1. Aia hoi, penei wahi a ka Haku ia olua, Kaʻu mau kauwa, he mea pono ia iloko Oʻu e kahea ia na Lunakahiko o Kuu Ekalesia e hoakoakoa mai ka hikina mai a mai ke komohana mai, a mai ka akau a mai ka hema mai, ma ke kakau leka ana, a i ole, ma kekahi ano e ae.

2. A e hiki mai keia, ina e kupaa lakou a hana ma ka manaoio iloko Oʻu, e ninini aku no Au i Koʻu Uhane maluna o lakou i ka la a lakou e hoakoakoa pu ai ia lakou iho.

3. A eia kekahi, e hele aku lakou ma na aina e kokoke mai ana, a e hai aku i ka mihi i ka poe kanaka;

4. A e nui auanei ka poe e hoohuli ia mai, a hiki i ka loaa ana ia oukou ka mana e kukulu ia oukou iho, e ku i na kanawai o kanaka;

5. I loaa ole ai i ko oukou poe enemi ka mana maluna o oukou, i hoopakele ia ai oukou ma na mea a pau; i hiki ai ia oukou ke malama i Koʻu mau kanawai, i mokumoku ai na apo paa a pau a na enemi i imi ai e luku i Koʻu poe kanaka.

6. Aia hoi, ke olelo aku nei Au ia olua, e hele olua a ike i ka poe ilihune a me ka poe nele, a e haawi aku no ko lakou hooluolu ia ana, i malama ia ai lakou a hiki i ka hana ia ana o na mea a pau i ku i Koʻu kanawai a olua i loaa ai. Amene.