1. I ka wa e hoea mai ai ka Hoola, e ike no kakou ia Ia ma Kona ano maoli. E ike no kakou he kanaka no Oia e like me kakou nei;

2. A o ka launa oluolu ana maa mau mawaena o kakou maanei, e mau ana ia mawaena o kakou malaila, koe wale no e hoohui ia ana ia me ka nani mau loa, ka nani hoi a kakou e ike ole nei i keia wa.

3. (Ioane 14:23.) O ka hoea ana mai o ka Makua a me ke Keiki, ma kela pauku, he hoea kino maoli ana mai ia; a o ka manao ana ke noho nei ka Makua a me ke Keiki iloko o ka naau o ke kanaka, he manao kahiko o ka poe ao hoomana ia, a he hoopunipuni hoi ia.

4. I haina no ka ninau, “Aole anei o ka helu ana o ko ke Akua manawa, ko ka anela manawa, ko ke Kaula manawa, a me ko ke kanaka manawa he ku like ia me ko ke ao, kahi a lakou e noho ana?”

5. Ke pane nei au, ae. Aka, aole he poe anela e lawelawe ana ma keia honua, koe wale no ka poe nolaila i keia wa, a i ole nolaila mamua.

6. Aole noho na anela maluna o kekahi ao e like me keia honua,

7. Aka, ke noho nei lakou imua o ke alo o ke Akua, maluna o kekahi ao poepoe e like me he moana kai aniani a me ke ahi la, kahi e hoike ia mai ai na mea a pau no ko lakou nani—o ko ka wa i hala, ko keia wa, a me ko ka wa e hiki mai ana, a ke mau nei lakou imua o ka Haku.

8. O kahi o ke Akua e noho nei he Urima a me Tumima nui ia.

9. O keia honua, iloko o kona kulana maemae a palaho ole, e hana ia ana ia a like me he pohaku aiai la, a e lilo i Urima a me Tumima i na kanaka e noho ana maluna ona, a ma o ia mea la, o na mea a pau e pili ana i na aupuni haahaa iho, a i ole, o na aupuni a pau o ke ano uuku iho, e hoike ia ai ia i ka poe e noho ana maluna ona; a e lilo keia honua no Kristo.

10. Alaila e lilo ka pohaku keokeo i olelo ia ma Hoikeana, 2:17, i Urima a me Tumima i kela me keia mea pakahi e loaa ana he hookahi, a ma o ia mea la e hoike ia ai na mea e pili ana i na aupuni o ke ano kiekie ae, he oiaio, o na aupuni a pau;

11. A e haawi ia aku kekahi pohaku keokeo i kela me keia mea pakahi e komo aku ana iloko o ke aupuni celestiela, a maluna olaila i kakau ia ai kekahi inoa hou, a aole kekahi kanaka e ike ia mea, koe wale no o ka mea e loaa aku ana ia mea ia ia. O ka inoa hou oia ka huaolelo-ki.

12. Ke wanana nei au, iloko o ka inoa o ka Haku ke Akua, o ka hoomaka ana o na popilikia, he mea nana e hookahe nui ana i ke koko mamua o ka hiki ana mai o ke Keiki a ke Kanaka, aia ana ia ma Karolaina Hema.

13. E ala mai ana paha ia ma o ka ninau kauwa kuapaa la. O keia ka kekahi leo i hai mai ai iaʻu, oiai au e pule ikaika ana maluna o keia kumumanao, iloko o Dekemaba, la 25, M. H. 1832.

14. E pule ana au me ka ikaika i kekahi manawa e ike i ka manawa o ka hiki ana mai o ke Keiki a ke Kanaka, a lohe ae la au i kekahi leo e olelo ana i na mea malalo iho nei:

15. “E Iosepa, Kaʻu keiki, ina e ola oe a hiki i ka piha ana ia oe he kanawalu-kumamalima mau makahiki, e ike no oe i ka helehelena o ke Keiki a ke Kanaka; nolaila, ua lawa keia, a mai hoouluhua hou mai Iaʻu e pili ana i keia mea!

16. Ua waiho ia au pela, me ka hiki ole ke hooholo ina paha ua pili keia hiki ana mai i ka hoomaka ana o ka milenio, a i ole i kekahi hiki ana mai mamua aku, a i ole, e make ana paha au, a pela e ike aku ai i Kona helehelena.

17. Ke manaoio nei au aole e hiki e mai ana ke Keiki a ke Kanaka mamua o ia manawa.

18. O kela a me keia kumupaa o ka naauao e loaa ai ia kakou ma keia ola ana, e ala pu mai ana ia me kakou i ke alahouana;

19. A ina e loaa i kekahi kanaka ka ike a me ka naauao i oi aku mamua o kekahi ma keia ola ana, mamuli o kona huli ikaika a hoolohe ana, pela no kona oi aku mamua o kekahi iloko o ke ao e hiki mai ana.

20. Aia no he kanawai hiki ole ke hoopau ia, i hooholo ia iloko o ka lani mamua o ka hookumu ia ana o keia ao, a maluna olaila i hookahua ia ai na pomaikai a pau;

21. A i ka wa e loaa ai ia kakou kekahi pomaikai mai ke Akua mai ma o ka hoolohe ana la no ia i kela kanawai kahi i hookahua ia ai ia.

22. He kino io a me na iwi ko ka Makua i hiki ke hoopa ia e like me ko ke kanaka; pela no hoi ko ke Keiki; aka, o ka Uhane Hemolele aole ona kino io a me na iwi, aka, he kino Uhane Ia. Ina aole pela, aole hiki i ka Uhane Hemolele ke noho iloko o kakou.

23. He hiki no i ke kanaka ke loaa ka Uhane Hemolele, a e iho mai no paha Ia maluna ona, aole nae e noho pu me ia.