1. Oiai ua hoike mai ka Haku iaʻu, ua alualu hou mai iaʻu koʻu poe enemi iloko o Misouri a me keia Mokuaina pu; a oiai hoi ke alualu nei lakou iaʻu me ke kumu ole, a aole hoi he wahi aka a kulana hoi o ka pono, a i ole o ka pololei ma ko lakou aoao, ma ka haku ana mai i ka lakou mau kumu hoopii e kue iaʻu; a oiai hoi ua hookahua ia ka lakou mau hana hookohukohu a pau maluna o ka wahahee eleele loa, ua manao au he kupono a he naauao iloko oʻu e haalele i keia wahi no kekahi manawa pokole, no koʻu palekana iho, a no ka palekana o keia poe kanaka. Ke makemake nei au e olelo aku i ka poe a pau me lakou au e lawelawe oihana nei, ua waiho aku au i kaʻu mau hana me kekahi mau agena a me kekahi mau kupakako, na lakou e lawelawe i na hana a pau me ka eleu a me ka hoopono, a e nana i ka hookaa ia o koʻu mau aie a pau i ka wa kupono, ma ke kuai ana aku i ka waiwai, a ma kekahi ano e ae paha e like me ka mea i koi ia mai, a i ole e like me ke kupono i na mea e hoea mai ana. Aia a ike au ua hala ae ka ino, alaila e hoi hou mai au io oukou nei.

2. A no na popilikia oʻu i kahea ia ai e komo aku me he mea la he liilii lakou iaʻu, oiai o ka nonohua a me ka inaina o kanaka oia na mea maa mau iaʻu i na la a pau o koʻu ola ana; a no ke kumu aha la, he mea pohihihi ia, ke ole au i koho ia mai ka wa mamua aku o ka hookumu ia ana o ke ao nei no ka kekahi hopena maikai, a ino paha, e like me ka oukou e manao ai. E noonoo oukou no oukou iho. Ke ike nei ke Akua i keia mau mea a pau, ina he maikai paha ia a he ino paha. Aka nae, o ka wai hohonu ka mea aʻu i walea ai i ka au ana. Ua lilo ia mau mea a pau me he mea la o koʻu ano maoli no ia, a he like no hoi au me Paulo, e hauoli ana iloko o ka popilikia, no ka mea, ua hoopakele mai ke Akua o koʻu mau kupuna iaʻu a hiki i keia la, mailoko mai o ia mau mea a pau, a e hoopakele no iaʻu mai keia manawa aku; no ka mea, aia hoi, e nana, e lanakila auanei au maluna o koʻu poe enemi a pau, no ka mea, ua olelo mai ka Haku ke Akua ia mea.

3. Nolaila, e hauoli ka Poe Hoano a pau, a e olioli nui hoi, no ka mea, o ke Akua o ka Iseraela ko lakou Akua ia, a e haawi aku no Ia i uku kupono maluna o na poo o ko lakou poe hooluhi.

4. A eia hou, he oiaio, wahi a ka Haku, O ka hana o Koʻu halelaa a me na hana a pau Aʻu i koho ai na oukou, e hoomau ia aku no, a aole e hooki; a e papalua ia ko oukou hooikaika, a me ko oukou hoomanawanui, a me ke ahonui, a me ka oukou mau hana, a aole oukou e nele iki i ko oukou uku, wahi a ka Haku o na lehulehu; a ina e hoomaau mai lakou ia oukou, pela no lakou i hoomaau ai i na Kaula a me na kanaka pono mamua o oukou. No ka mea, aia no he uku ma ka lani no keia mau mea a pau.

5. A eia hou, ke haawi aku nei au ia oukou i kekahi olelo e pili ana i ka bapetizo ana no ko oukou poe make.

6. He oiaio, penei ka Haku e olelo mai nei ia oukou e pili ana i ko oukou poe make: i ka wa o kekahi o oukou e bapetizo ia ai no ko oukou poe make, e noho pu mai kekahi kakauolelo, a e lilo oia i mea ike maka i ko oukou mau bapetizo ana; e lohe oia me kona mau pepeiao, i hoike ai oia i ka oiaio, wahi a ka Haku;

7. Ma ka oukou kakau ana a pau e kakau ia ia ma ka lani, kela a me keia mea a oukou e hoopaa ai ma ka honua e hoopaa ia no ma ka lani; o kela a me keia mea a oukou e hookuu ai ma ka honua e hookuu ia no ma ka lani;

8. No ka mea, ua aneane Au e hoihoi hou mai i na mea he nui wale i ka honua, e pili ana i ka Oihanakahuna, wahi a ka Haku o na Lehulehu.

9. A eia hou, e malama pono ia na mookuauhau a pau i hiki ai ia mau mea ke waiho ia iloko o na waihona buke-mooolelo o Kuu Halelaa Hemolele, e malama ia me ka hoomanao ana ia hanauna aku ia hanauna aku, wahi a ka Haku o na Lehulehu.

10. E olelo aku ana au i ka Poe Hoano a pau, makemake iho la au, me ka iini nui, e haiolelo aku imua o lakou mai ka awai aku, maluna o ke kumumanao o ka bapetizo ana no ka poe make, ma ka La Sabati mahope mai. Aka, oiai aia ia mawaho o koʻu mana e hana pela, e kakau ana au i ka olelo a ka Haku ia manawa aku ia manawa aku, maluna o ia kumumanao, a e hoouna aku ia mea io oukou la ma ka leka me kekahi mau mea e ae he nui.

11. Ano ke hooki nei au i kaʻu leka no keia wa, no ka nele i ka manawa; no ka mea, ke makaala nei ka enemi; a e like me ka ka Hoola i olelo ai, ke hele mai nei ke keikialii o keia ao, aka, aohe ana mea iloko Oʻu.

12. Aia hoi, o kaʻu pule i ke Akua, oia no e hoola ia oukou a pau: a ke kakau inoa iho nei au ka oukou kauwa iloko o ka Haku, ke Kaula a Mea Ike o Ka Ekalesia o Iesu Kristo o ka Poe Hoano o na La Hope nei.