1. E Oliva Kaudare, he oiaio, he oiaio, ke olelo aku nei Au ia oe, e like me ka oiaio ke ola nei ka Haku, oia hoi kou Akua a me kou Hoolapanai, he oiaio, pela io no e loaa ai ia oe ka ike no kela a me keia mea au e noi ai me ka manaoio, me ka naau hoopono, e manaoio ana e loaa ana ia oe ka ike e pili ana i na mea i kahakaha ia maluna o na mooolelo kahiko, i kahiko loa, e paa ana i kela mau mahele o Kuu Palapala Hemolele, ka mea nona i olelo ia ma o ka hoike ana la o Kuu Uhane.

2. He oiaio, aia hoi, e hai aku no Au ia oe iloko o kou noonoo a me kou naau, ma o ka Uhane Hemolele la, ka mea e kau mai ana maluna ou a e noho ana iloko o kou naau.

3. Ano, aia hoi, o keia ka Uhane o ka hoikeana; aia hoi, o keia ka Uhane ma ona la i lawe mai ai o Mose i na keiki o ka Iseraela maloko o ke Kai Ula iluna o ka aina maloo;

4. Nolaila, o keia kou haawina; e hoopili aku ia mea, a pomaikai oe, no ka mea, e hoopakele no ia ia oe mailoko mai o na lima o kou poe enemi, oiai, ina aole pela, e pepehi lakou ia oe a e lawe i kou uhane me ke kino i ka make.

5. Auwe! E hoomanao i keia mau olelo, a e malama i Kaʻu mau kauoha. E hoomanao o keia kou haawina.

6. Ano, aole o keia wale no kou haawina; no ka mea, ua loaa ia oe kekahi haawina e ae oia ka haawina o Aarona: aia hoi, ua hai mai ia ia oe i na mea he nui;

7. Aia hoi, aole kekahi mana e ae, koe wale no ka mana o ke Akua, ka mea hiki ke hoopili mai i keia haawina o Aarona me oe;

8. Nolaila, mai kanalua, no ka mea, oia no ka haawina o ke Akua, a e paa ana oe ia mea iloko o kou mau lima, a e hana i na hana kamahao; a aole he mana e hiki ke lawe aku ia mea mailoko aku o kou mau lima, no ka mea, oia ka hana a ke Akua.

9. A, nolaila, o kela a me keia mea au e noi mai ai Iaʻu e hai aku ia oe, ma o ia mea la, oia Kaʻu e haawi aku ia oe, a e loaa ana ia oe ka ike e pili ana ia mea:

10. E hoomanao, ke ole ka manaoio aole e hiki ia oe ke hana i kekahi mea, nolaila, e noi me ka manaoio. Mai paani wale me keia mau mea; mai nonoi mai i ka mea i kupono ole ia oe:

11. E nonoi i ike ai oe i na mea pohihihi o ke Akua, a i hiki ai ia oe ke unuhi a loaa ka ike mai kela mau mooolelo kahiko mai a pau, i huna ia ai, he mau mea laa hoi, a e like me kou manaoio pela no e hana ia ai nou.

12. Aia hoi, Owau ka Mea i olelo aku ia mea; a Owau ia Mea hookahi no i olelo aku ia oe mai kinohi mai. Amene.