Incwadzi ya-Omni
Sehluko 1
Omni, Amaroni, Khemishi, Abinadomu, kanye na-Amaleki, ngamunye ngekushintjana, bagcina imibhalo—Mosiya utfola bantfu baZarahemla, lababuya eJerusalema emalangeni aSedekiya—Mosiya wentiwa iNkhosi ngetulu kwabo—Besitukulwane saMuleki eZarahemla batfola Khoriyantumra, wekugcina wemaJaredi—INkhosi Bhenjamini itsatsa bukhosi emvakwaMosiya—Bantfu kumele banikele imiphefumulo yabo njengemnikelo kuKhristu. Cishe ngemnyaka wema-323–130 ngaphambi kwekutalwa kwaKhristu.
1 Buka, kwenteka kutsi mine, Omni, ngiyaletiwe ngubabe, Jaromu, kutsi kumele ngibhale lokutsite kulabongcwengcwe, kugcina umlandvo wesitukulwane setfu—
2 Ngaloko-ke, emalangeni ami, ngifisa kutsi nati kutsi ngalwa kakhulu ngenkemba kuvikela bantfu bami, emaNefi, ekuweleni etandleni tetitsa tabo, emaLamani. Kodvwa buka, mine ngekwami ngiyindvodza lekhohlakele, futsi angiyigcinanga imitsetfo kanye nemiyaleto yeNkhosi njengobe bekufanele ngabe ngentile.
3 Futsi kwenteka kutsi emakhulu lamabili nemashumi lasikhombisa nesitfupha eminyaka beseyendlulile, saba netikhatsi letinyenti tekuthula; saba netikhatsi letinyenti tetimphi letimatima kanye nekucitseka kwengati. Yebo, kwephetsa, emakhulu lamabili nemashumi lasiphohlongo nakubili eminyaka beseyendlulile, futsi ngangibagcinile laba bongcwengcwe njengekwemiyaleto yabokhokho bami; ngabendlulisela kundvodzana yami Amaroni. Futsi ngenta siphetfo.
4 Manje mine, Amaroni, ngibhala tonkhe tintfo lengitibhalako, letimbalwa, encwadzini yababe.
5 Buka kwenteka kutsi emakhulu lamatsatfu kanye nemashumi lamabili eminyaka besekendlulile, futsi incenye lenkhulu lekhohlakele yemaNefi yabhujiswa.
6 Ngoba iNkhosi yayingeke ivume, emvakwekutsi seyibaholile baphuma eveni laseJerusalema futsi yabagcina bavikelekile ekuweleni etandleni tetitsa tabo, yebo, yayingeke ivume kutsi emavi angafezeki, leyawakhuluma kubokhokho betfu, itsi: Nangabe ningeke niyigcina imiyaleto yami angeke niphumelele eveni.
7 Ngaloko-ke, iNkhosi yabajezisa ngekwehlulela lokukhulu; noko, yabasindzisa labalungile kute bangashabalali, kodvwa yabakhulula etandleni tetitsa tabo.
8 Futsi kwenteka kutsi bongcwengcwe ngabaniketa umnaketfu Khemishi.
9 Manje mine, Khemishi, ngibhala tintfo letimbalwa lengingatibhala, encwadzini lefanako neyemnaketfu; ngoba buka, ngakubona kwekugcina lakubhala, nekutsi wakubhala ngesakhe sandla lucobo; wakubhala ngelilanga labetfula ngalo kimi. Futsi ngalendlela sigcina imibhalo, ngoba kungenca yemiyaleto yabokhokho betfu. Futsi ngenta siphetfo.
10 Buka, mine, Abinadomu, ngiyindvodzana yaKhemishi. Buka, kwenteka kutsi ngabona timphi letinyenti kanye netincabano emkhatsini webantfu bakitsi, emaNefi, kanye nemaLamani; futsi mine, ngenkemba yami lucobo, ngititsatsile timphilo letinyenti temaLamani ekuvikeleni bomnaketfu.
11 Futsi buka, umbhalo walabantfu ucoshwe kubongcwengcwe labaphetfwe ngemakhosi, ngekwetitukulwane; futsi mine angati ngesembulo ngaphandle kwaleso lesibhaliwe, noma siphrofetho; ngaloko-ke, loko lokwanele kubhaliwe. Futsi ngenta siphetfo.
12 Buka, mine ngingu-Amaleki, indvodzana ya-Abinadomu. Buka, ngitokhuluma kini ngalokutsite mayelana naMosiya, lowentiwa inkhosi eveni laseZarahemla; ngoba buka, yena acwayiswe yiNkhosi kutsi kumele abaleke aphume eveni laNefi, futsi nangebunyenti balabo labayolilalela livi leNkhosi nabo kumele besuke baphume eveni kanye naye, baye ehlane—
13 Futsi kwenteka kutsi wenta njengobe iNkhosi yayimyaletile. Besuka baphuma eveni baya ehlane, bonkhe labo labalilalela livi leNkhosi; futsi baholwa ngetinshumayelo letinyenti kanye netiphrofetho. Futsi bebacwayiswa njalonjalo ngelivi laNkulunkulu; baholwa ngemandla esandla sakhe, badzabula ehlane bate befika entansi eveni lelalibitwa ngelive laseZarahemla.
14 Futsi batfola bantfu, labebabitwa ngekutsi bantfu baZarahemla. Manje, kwaba khona kutfokota lokukhulu emkhatsini webantfu baZarahemla; futsi kanjalo naZarahemla watfokota kakhulu, ngenca yekutsi iNkhosi beyitfumele bantfu baMosiya nabongcwengcwe belitfusi lebebacuketse umbhalo wemaJuda.
15 Buka, kwenteka kutsi Mosiya watfola kutsi bantfu baZarahemla baphuma eJerusalema ngesikhatsi Sedekiya, inkhosi yakaJuda, yayitfwelwe yayotfunjelwa eBhabhulona.
16 Futsi bahamba ehlane, baletfwa ngesandla seNkhosi ngesheya kwemanti lamakhulu; baya eveni lapho Mosiya abatfola khona; futsi bebahleti lapho kusukela ngaleso sikhatsi kuya phambili.
17 Futsi ngesikhatsi Mosiya abatfola, bese babanyenti kakhulu. Noko, bese babe netimphi letinyenti kanye netincabano letimatima, bese bafe ngenkemba tikhatsi ngetikhatsi; nelulwimi lwabo lwaselonakele; bebangaketi nemibhalo; futsi bebabuphika bukhona beMdali wabo; futsi Mosiya, noma bantfu baMosiya, abakwatanga kubacondza.
18 Kodvwa kwenteka kutsi Mosiya wenta kutsi bafundziswe ngelulwimi lwakhe. Futsi kwenteka kutsi emvakwekutsi sebafundzisiwe ngelulwimi lwaMosiya, Zarahemla wanika umlandvo wesitukulwane sabokhokho bakhe, njengekukhumbula kwakhe; futsi ubhaliwe, kodvwa hhayi kulaba bongcwengcwe.
19 Futsi kwenteka kutsi bantfu baZarahemla, kanye nebaMosiya, bahlangana ndzawonye; Mosiya wabekwa kutsi abe yiNkhosi yabo.
20 Futsi kwenteka kutsi emalangeni aMosiya, kwaba khona litje lelikhulu lelaletfwa kuye lelalinemibhalo lecoshiwe kulo; wayihumusha lemibhalo lebeyicoshiwe ngesipho kanye nangemandla aNkulunkulu.
21 Yayilandzisa ngaKhoriyantumra lotsite, kanye nekubulawa kwebantfu bakhe. Futsi Khoriyantumra watfolwa bantfu baZarahemla; wahlala nabo sikhatsi lesitinyanga letiyimfica.
22 Futsi ngetulu kwaloko yayikhuluma emavi lambalwa mayelana nabokhokho bakhe. Futsi batali bakhe bekucala baphuma embhoshongweni, ngesikhatsi iNkhosi iphambanisa lulwimi lwebantfu; lulaka lweNkhosi lwawela etikwabo njengekwetehlulelo tayo letilungile; nematsambo abo alele asakateke eveni lelingasenyakatfo.
23 Buka, mine, Amaleki, ngatalwa emalangeni aMosiya; futsi ngihlalile ngate ngabona kufa kwakhe; Bhenjamini, indvodzana yakhe, yabusa esikhundleni sakhe.
24 Futsi buka, ngibonile, emalangeni eNkhosi Bhenjamini, imphi lematima kanye nekucitseka kwengati lokunyenti emkhatsini wemaNefi kanye nemaLamani. Kodvwa buka, emaNefi atfola kusitakala lokukhulu ngetulu kwawo; yebo, kangangekutsi inkhosi Bhenjamini yabacosha baphuma eveni laseZarahemla.
25 Futsi kwenteka kutsi ngacala kuba mdzala; futsi, ngingenantalelwane, ngati kutsi iNkhosi Bhenjamini bekayindvodza lelungile phambi kweNkhosi, ngaloko-ke, ngitohambisa laba bongcwengcwe kuye, ngikhutsate bonkhe bantfu kutsi bete kuNkulunkulu, loNgcwele waka-Israyeli, futsi bakholelwe etiphrofethweni, nasetembulweni, nasekusitweni tingilosi, nakuso sipho sekukhuluma ngetilimi, nakuso sipho sekuhumusha tilimi, kanye nakuto tonkhe tintfo letinhle; ngoba kute lutfo lokuhle ngaphandle kwekutsi kuvela eNkhosini; futsi loko lokubi kuvela kudeveli.
26 Manje, bomnaketfu labatsandzekako, ngifuna kutsi nite kuKhristu, loNgcwele waka-Israyeli, nihlanganyele ensindzisweni yakhe, kanye nasemandleni ekuhlenga akhe. Yebo, wotani kuye, ninikele imiphefumulo yenu yonkhe njengemnikelo kuye, nichubeke ekuzileni nasekuthandazeni, nibeketele kute kube sekugcineni; futsi njengobe iNkhosi iphila niyawusindziswa.
27 Manje ngitawukhuluma ngaloko lokuphatselene nesibalo lesitsite lesahamba sakhuphukela ehlane kute sibuyele eveni laNefi; ngoba bekukhona sibalo lesikhulu salabo labebanesifiso sekutfola live lelilifa labo.
28 Ngaloko-ke, bahamba bakhuphukela ehlane. Futsi umholi wabo ayindvodza lecinile nalenemandla, futsi ayindvodza lenenkhani, ngaloko-ke yadala incabano emkhatsini wabo; futsi bonkhe babulawa, ngaphandle kwalabangemashumi lasihlanu, ehlane, baphindze babuyela emuva eveni laseZarahemla.
29 Futsi kwenteka kutsi baphindze batsatsa labanye baba sibalo lesikhudlwana, batsatsa luhambo lwabo futsi baya ehlane.
30 Mine, Amaleki, nganginemnaketfu, naye lowahamba nabo; kusukela ngaleso sikhatsi angikate ngati mayelana nabo. Futsi sengitolala ethuneni lami; nalaba bongcwengcwe sebagcwele. Ngenta siphetfo senkhulumo yami.