1 Afei bea bi wɔ Shemlon a Lamanfo mbabaa boa hɔn ano wɔ hɔ tow ndwom na wɔsaw gye hɔn enyi.

2 Na ɔbaa dɛ da kor bi hɔn mu kumaabi boaa hɔn ano dɛ wɔrobɔtow ndwom na wɔasaw.

3 Na afei nna ɔhen Noah n’asɔfoe no hɔn enyiwa ato ntsi nna wonntum nnsan hɔn ekyir nnkɔ Nephi kurow no mu, nyew, nna wosuro so dɛ dɔm no boku hɔn, dɛm ntsi wɔyɛɛ dɛ wɔrennsan nnkɔ hɔn yernom na hɔn mba hɔn nkyɛn ara da.

4 Na wɔtsenaa sar no do kyɛree no, wohun Lamanfo hɔn mbaabaa no, wɔtsetsɛɛw hɔn.

5 Na wohun dɛ hɔn a wɔaboa hɔn ano rebɛsaw no suar no, wofii hɔn sumabew hɔ kɛkyekyeer hɔn kɔr sar no do; nyew, Lamanfo mbabaa a wɔdze hɔn kɔr sar no do no hɔn dodow yɛ eduonu-anan.

6 Na ɔbaa dɛ ber a Lamanfo hun dɛ hɔn mbabaa no ayew no, hɔn bo fuuw Limhi no nkorɔfo no osiandɛ wosusuu dɛ Limhi no nkorɔfo no na wɔyɛɛ dɛm.

7 Dɛm ntsi wotuu hɔn nsordaafo ma wɔkɔr hɔn do; nyew, ɔhen nankasa mpo na odzii hɔn enyim ma wɔkɔr Nephi asaase no do dɛ wɔrekɛsɛɛ Limhi no nkorɔfo no.

8 Na afei Limhi hun biribiara wɔ abantsentsen no do, hɔn mboaboaho nyinara so mpo ohunii; dɛm ntsi ɔboaboaa no nkorɔfo ano, na wɔtweɔɔn hɔn wɔ haban nye kwaa nyinara mu.

9 Na ɔbaa dɛ ber a Lamanfo baa hɔ no, Limhi no nkorɔfo no puei fii hɔn sumabew hɔ na wotui hyɛɛ hɔn do, na wɔhyɛɛ ase dɛ worukuku hɔn.

10 Na ɔbaa dɛ ɔkõ no mu yɛɛ dzen papanara, osiandɛ wɔkõo dɛ nwendadze a wɔrohwehwɛ hɔn afonam.

11 Na ɔbaa dɛ Limhi no nkorɔfo no hyɛɛ ase dɛ wɔrekã Lamanfo no gu; naaso nna hɔn dodow nndu Lamanfo hɔn dodow mu fã mpo. Naaso ^awɔkõe osian hɔnankasa hɔn nkwa nye hɔn yernom na hɔn mba nkwa ntsi; iyi ho ntsi wɔmiaa hɔnho kõe dɛ mbowa abɔyafo.

12 Na ɔbaa dɛ wohun Lamanfo hɔn hen no dɛ ɔfora hɔn ewufo no mu; naaso nna onnwui, na mbom nna oepira na woegya no wɔ famu hɔ, osiandɛ no dɔm no guaan ntsɛntsɛm.

13 Na wɔfaa no na wɔkyekyeer n’epirakur, na wɔdze no baa Limhi n’enyim, na wɔsee dɛ: Hwɛ, Lamanfo hɔn hen nye yi; opirae na ɔhwee famu wɔ ewufo no mu na woegya no hɔ; na hwɛ, yɛdze no aba w’enyim; na afei ma yenku no.

14 Mbom Limhi see hɔn dɛ: Mma hom nnku no, mbom hom mfa no mbra ha ma monhwɛ no. Na wɔdze no bae. Na Limhi see no dɛ: Siantsir bɛn ntsi na hom aba nye mo nkorɔfo robɔkõ yi? Hwɛ, mo nkorɔfo nntõo ^ansew a midzii kyerɛɛ wo no; na ɔyɛ dɛn ntsi na ɔwo atõ nsew a idzii kyerɛɛ mo nkorɔfo yi?

15 Na afei ɔhen no see dɛ: matõ nsew no osiandɛ wo nkorɔfo soaa mo nkorɔfo hɔn mbabaa kɔree; dɛm ntsi m’ebufuhyew mu no na memaa mo nkorɔfo kwan dɛ wɔmbra na wɔnye wo nkorɔfo mobɔkõ.

16 Na afei yi mu no nna Limhi nntsee biribiara fa dɛm asɛm yi ho; dɛm ntsi ɔsee dɛ: mobɔhwehwɛ mo nkorɔfo yi mu na obiara a ɔayɛ dɛm adze yi no ɔbɔhwer no nkwa. Dɛm ntsi ɔmaa kwan dɛ wɔnhwehwɛ no nkorɔfo no mu.

17 Afei aber a ^aGideon a ɔyɛ ɔhen no nsordaafo mu panyin no tsee dɛm nsɛm yi no, ɔkɔr ɔhen no hɔ kɛsee no dɛ: Meserɛ wo, sie abotar, na mma nnhwehwɛ dɔm yi mu, na mma mmfa asɛm yi nnto hɔn do.

18 Ana ennkaa w’egya n’asɔfoe no a dɛm nkorɔfo yi peer dɛ woboku hɔn no? Ana wonnyi sar no do? Ana nnyɛ hɔn na woewia Lamanfo hɔn mbabaa no?

19 Na afei, hwɛ, na kã dɛm nsɛm yi kyerɛ ɔhen no, ama ɔakã akyerɛ no nkorɔfo no ama ɔaapata hɔn ama hɛn; na hwɛ wɔaboa hɔnho dada reba hɛn do; na hu so dɛ hɛn dodow suar.

20 Na hwɛ, wɔdze hɔn dɔmtutuw nyinara reba; na gyedɛ ɔhen no pata hɔn ma hɛn ɔno yɛbɛhera.

21 Ana Abinadi ne nsɛm no ^annhyɛɛ mã, nkɔnhyɛ a ɔhyɛɛ tsiaa hɛn no—na osiandɛ yenntsie Ewuradze ne nsɛm, na yɛanndan emmfi hɛn emumuyɛ ho, ntsi na iyi nyinara aba?

22 Na afei ma yɛmpata ɔhen no, na yendzi nsew a yedzii maa no no do; na oye dɛ yɛbɛhyɛ nkowaasom ase sen dɛ yɛbɔhwer hɛn nkwa; dɛm ntsi ma yensiw dɛm bɔgyagu pii yi ano.

23 Na afei Limhi faa nsɛm a n’egya nye ^aasɔfo no a woguanee kɔr sar no do no kãe no nyinara kyerɛɛ ɔhen no, na ɔdze mfom no too hɔn do dɛ hɔn na wɔbɔsoaa hɔn mbabaa no kɔree.

24 Na ɔbaa dɛ ɔhen no no bo dwee wɔ no nkorɔfo no ho; na ɔsee hɔn dɛ: Hom mma yɛnkɔ nkehyia mo nkorɔfo no, mma hom mmfa akodze; na medzi nsew akyerɛ hom na mehyɛ bɔ dɛ mo nkorɔfo runnku hom.

25 Na ɔbaa dɛ wɔkãa ɔhen no do kɔree a wɔammfa akodze kehyiaa Lamanfo no. Na ɔbaa dɛ wohyiaa Lamanfo no; na ɔhen no bɔɔ no mu adze maa hɔn, na ɔpaa kyɛw maa Limhi no nkorɔfo.

26 Na ber a Lamanfo no hun Limhi no nkorɔfo no dɛ wonnkura akodze no, wonyaa ^aayamuhyehye maa hɔn na wonyaa abodwee wɔ hɔn ho, na wɔnye hɔn hen no sanee kɔr hɔn asaase do asomdwee mu.