1 Na afei ɔbaa dɛ Zeniff dze n’ahendzi maa Noah, ne mbabanyin no mu kor; dɛm ntsi Noah hyɛɛ ase dzii n’egya n’adze; na ɔannantsew n’egya n’akwan mu.

2 Na hwɛ, oenndzi Nyame ne mbrasɛm do, mbom ɔnantseew n’akoma n’apɛdze do. Na onyaa yernom nye nwewefo pii. Na ɔmaa no nkorɔfo yɛɛ bɔn, na wɔyɛɛ dza ɔyɛ ekyiwadze wɔ Ewuradze enyim. Nyew, na wɔbɔɔ ndwamambra na wɔyɛɛ emumuyɛdze ahorow pii.

3 Na ɔhyehyɛɛ tow too hɔ dɛ dza wɔwɔ nyinara wɔnkyɛ mu enum na wontu no mu kor mma no, wɔnkyɛ hɔn sika nye dwetɛ mu enum na wontu no mu kor mma no, wɔnkyɛ hɔn ziff, nye hɔn kɔɔber mu enum na wontu no mu kor mma no, nye hɔn boran na hɔn ndaadze; wɔnkyɛ hɔn nguan a wɔadɔ angoa mu enum na wontu no mu kor mma no; wɔnkyɛ hɔn eburow so mu enum na wontu no mu kor mma no.

4 Na iyinom nyinara ɔgyegyee na ɔdze hwɛɛ noho nye ne yernom nye no nwewefo; nye n’asɔfoe so na hɔn yernom nye hɔn nwewefo; dɛm na ɔyɛɛ dze sesaa ahenman no ne nhyehyɛɛ.

5 Na oyii nyimpa nyinara a n’egya hyɛɛ hɔn asɔfo no fii hɔ, na ɔhyɛɛ afofor hyɛɛ hɔn ananmu, hɔn a wɔamema hɔnho do wɔ akoma mu.

6 Nyew, iyi maa wonyaa mboa, wɔ hɔn enyihaw nye hɔn abosonsom mu, na hɔn ndwamambɔ so mu; na tow a nna ɔhen Noah dze ato no nkorɔfo do no ntsi; ɔmaa dɔm no yɛɛ edwumadzen dze gyee emumuyɛ abamba.

7 Nyew, na hɔn so bɛyɛɛ abosonsomfo, osiandɛ ɔhen no nye n’asɔfoe no dze ndaadaa na kasa fenemfenem daadaa hɔn; wɔkãa kasa fenemfenem kyerɛɛ hɔn.

8 Na ɔbaa dɛ ɔhen Noah sisii adan akɛse a ɔyɛ fɛw pii; na ɔdze ndua edwindze fɛɛfɛw siesiee ho, nye ndzɛmba a ɔsom bo ahorow pii, sika, nye dwetɛ, na daadze, nye boran, nye ziff nye kɔɔber.

9 Na osii ahemfie kɛse na ɔdze ahengua sii finimfin, ne nyinara wɔdze dua a ɔyɛ fɛw nye sika nye dwetɛ nye ndzɛmba a ɔsom bo siesie ho.

10 Na ɔmaa n’edwumayɛfo no dze dua a ɔyɛ fɛw, nye kɔɔber, nye boran yɛɛ edwindze a ɔyɛ fɛw ahorow pii wɔ temple n’afasu mu.

11 Na ngua a wɔdze esisi nkyɛn ama asɔfompanyin no, dza ɔbɔ ngua nkaa nyinara do no, ɔdze sika mapa siesiee ho; na ɔmaa wɔyɛɛ akokyɛm edwindze sisii hɔn enyim, ama woeetum atsentsen hɔn mu na wɔaagye hɔn ahom wɔ do wɔ ber a wɔreka atorsɛm na nsɛm gyangyan akyerɛ no dɔm no.

12 Na ɔbaa dɛ osii abantsentsen wɔ temple no nkyɛn; nyew, abantsentsen ara yie, ɔwar araa ma otum gyina n’etsifi na ɔhwɛ Shilom asaase nye Shemlon asaase a nkyɛ Lamanfo wɔ do no; nna otum mpo hu asaase a otwa ho hyia nyinara.

13 Na ɔbaa dɛ ɔmaa wosisii adan pii wɔ Shilom asaase no do; na ɔmaa wosii abantsentsen wɔ koko bi a ɔwɔ Shilom asaase etsifi afamu hɔ bea a nkyɛ ɔyɛ Nephi ne mba hɔn sumabew wɔ ber a woguanee fii asaase no do no; na dɛm ndzɛmba yi, sika a onyaa fii tow a ɔgyee fii no dɔm no hɔ no na ɔdze yɛe.

14 Na ɔbaa dɛ ɔdze n’akoma hyɛɛ n’ahodze mu, na ɔnye ne yernom nye ne nwewe dzii hɔn mber wɔ sakasakayɛ mu; na dɛmara na n’asɔfoe so nye ndwamambɔfo yɛe.

15 Na ɔbaa dɛ oduaa wenyin ture pii bɔɔ asaase no ho aprɔw; na ɔyɛɛ wenyin mfir na ɔyɛɛ wenyin kwã ara yie; na dɛm ntsi ɔbɛyɛɛ sabokwanyi na no nkorɔfo so dɛmara.

16 Na ɔbaa dɛ Lamanfo no hyɛɛ ase baa no nkorɔfo no do, hɔn mu kumaabi a wɔrohwɛ hɔn nguankuw do, na wokum hɔn wɔ hɔn kwã no mu.

17 Na ɔhen Noah somaa hɔn a wɔbɔ asaase no ho ban no dɛ wɔnkɛpam hɔn mfi hɔ; na mbom wɔannsoma dɔm a wɔdɔɔ sõ, na Lamanfo no baa hɔn do bokum hɔn, na wɔdze hɔn nguankuw no mu pii fii asaase no do kɔree; dɛm na Lamanfo no hyɛɛ ase sɛɛ hɔn, na wɔkyerɛ hɔn tan wɔ hɔn do.

18 Na ɔbaa dɛ ɔhen Noah somaa no nsordaafo wɔ hɔn do, na wɔpaam hɔn mber kakra; dɛm ntsi, wɔsaan hɔn ekyir a nna woridzi dɛw wɔ dza wɔasɛɛ no no ho.

19 Na afei, osian dɛm konyimdzi kɛse yi ntsi ahantanyɛ hyɛɛ hɔn akoma mã; wotuuw hɔnho wɔ hɔnankasa hɔn ahoɔdzen mu see dɛ, hɔn eduonum tum gyina Lamanfo mpem mpem ano; na dɛm na wɔdze tuuw hɔn ho, na hɔn enyi gyee wɔ bɔgya ho, nye dɛ wɔbɛka hɔn nuanom bɔgya egu, na iyi osian hɔn hen nye asɔfo hɔn emumuyɛ ntsi.

20 Na ɔbaa dɛ ɔbarimba bi wɔ hɔn mu a ne dzin dze Abinadi; na okyimaa hɔn mu na ɔhyɛɛ ase dɛ ɔrehyɛ nkɔm, se dɛ: Hwɛ dɛm na Ewuradze se, na dɛm na ɔahyɛ me dɛ, kɔ, na kɛse dɔm yi dɛ, dɛm na Ewuradze se—Dɛm nkorɔfo yi ndue, na mehu hɔn ekyiwadze nye hɔn emumuyɛdze, nye hɔn ndwamambɔ, na gyedɛ wonu hɔnho, annyɛ dɛm a mebɛba hɔn nkyɛn wɔ m’ebufuhyew mu.

21 Na gyedɛ wonu hɔnho na wɔsan ba Ewuradze hɔn Nyankopɔn nkyɛn, hwɛ, medze hɔn bɛhyɛ hɔn atamfo nsa; nyew, na wɔdze hɔn bɛba nkowaasom mu; na wobohu amandze wɔ hɔn atamfo nsa.

22 Na ɔbɛba dɛ wobohu dɛ Emi nye hɔn Ewuradze Nyankopɔn, na meyɛ Nyame nyinkufo a mebɛsera mo nkorɔfo hɔn bɔn:

23 Na ɔbɛba dɛ gyedɛ nkorɔfo yi nu hɔnho na wɔsan ba Ewuradze hɔn Nyankopɔn nkyɛn, annyɛ dɛm a wɔdze hɔn bɛba nkowaasom mu; na obiara nnyi hɔ a ɔbɛgye hɔn, gyedɛ Ewuradze, Otumfo Nyankopɔn.

24 Nyew, na ɔbɛba dɛ ber a wobosũ afrɛ me no, mebɛyɛ nyaa etsie hɔn sufrɛ, nyew, na mebɛma kwan ma hɔn atamfo ahaw hɔn.

25 Na gyedɛ wonu hɔn ho na wofura wertam na wɔtsena nsõ mu, na wosũ dzendzenndzen frɛ Ewuradze hɔn Nyankopɔn. Mirinntsie hɔn mpaabɔ, nna merenngye hɔn mmfi hɔn amandzehu mu; na dɛm na Ewuradze ahyɛ me dɛ menkã.

26 Afei ɔbaa dɛ aber a wɔtsee dza Abinadi kãe no, hɔn bo fuuw no na wɔpeer dɛ wobeyi no nkwa efi hɔ; na mbom Ewuradze gyee no fii hɔn nsamu.

27 Afei aber a ɔhen Noah tsee nsɛm a Abinadi kãa kyerɛɛ nkorɔfo no, no so no bo fuwii na ɔsee dɛ: Woana nye dɛm Abinadi no a orubobu emi nye mo nkorɔfo atsɛn yi, anaa woana nye dɛm Ewuradze no a ɔdze dɛm amandzehu kɛse reba mo nkorɔfo do yi?

28 Mese hom dɛ hom mfa Abinadi mbra ha ma munku no, osiandɛ ɔakã dɛm nsɛm yi dze asɛɛ mo nkorɔfo no ma woenya ebufuw ama hɔnho na ɔdze wentwiwentwi aba mo nkorɔfo mu; dɛm ntsi muboku no.

29 Afei nkorɔfo no hɔn enyiwa efura; dɛm ntsi wopiriim hɔn akoma wɔ Abinadi ne nsɛm no ntsi na ofitsi dɛm aber no dze kɔ no wɔpeer dɛ wobosuo no mu. Na ɔhen Noah piriim n’akoma wɔ Ewuradze n’asɛm ho na oennu noho emmfi ne bra bɔn ho.