1 Ha ojehu Oríah ohusga tekojojápe yvy ári opa hiʼára aja, hetaitereíva.

2 Ha omoheñói taʼýra ha tajyrakuéra; heẽ, omoheñói treinta y uno, ha ijapytepekuéra veintitres haʼe kuimbaʼe.

3 Ha ojehu haʼe omoheñói avei itujakue Kib-pe. Ha ojehu Kib orreina hendaguépe; ha Kib omoheñói Corihor-pe.

4 Ha Corihor oguerekóvo treinta y dos ary oñemoĩ itúvare, ha oho ha oiko Nehor retãme; ha omoheñói taʼýra ha tajyrakuéra, ha umíva iporãiterei; upévare Corihor ogueraha hapykuéri heta tavayguakuéra.

5 Ha ombyaty rire peteĩ ehérsito ojupi Morón retãme rréi oikohápe, ha ojagarra chupe tekoʼapytĩme, upéicha oñekumpli Jared joykeʼy ñeʼẽ ojeguerahataha chupekuéra tekoʼapytĩme.

6 Koʼág̃a Morón retã, upe rréi oikohápe, oĩ tetã nefita-kuéra ohenóiva Desolación ypýpe.

7 Ha ojehu Kib oiko tekoʼapytĩme, ha avei itavayguakuéra, Corihor, itaʼýra poguýpe, itujaiterei peve; upevére Kib omoheñói itujakue Shule-pe, haʼe oĩ aja gueteri tekoʼapytĩme.

8 Ha ojehu Shule ipochy ijoykeʼy ndive; ha Shule oñemombareteterei, ha imbarete kuimbaʼe mbaretépe; ha imbarete avei huísiope.

9 Upévare, haʼe oho yvyty Efraín-pe, ha upépe omboyku mineral upe yvytýgui, ha ojapo kysepuku asérogui umi oguerahavaʼekue hapykuéripe g̃uarã; ha oarma rire chupekuéra kysepukúpe ohojey tavaguasu Nehor-pe, ha oñorairõ ijoykeʼy Corihor ndive, ha upéicha rupi ohupyty upe rréino ha omoĩjey itúva Kib-pe.

10 Ha koʼág̃a upe Shule ojapovaʼekue rupi, itúva omeʼẽ chupe upe rréino; upévare oñepyrũ orreina itúva rendaguépe.

11 Ha ojehu ohusga tekojojápe; ha oipyso irréino opa yvy ape ári, tavayguakuéra hetaitereígui.

12 Ha ojehu Shule omoheñói avei taʼýra ha tajyrakuéra.

13 Ha Corihor oñearrepenti heta mbaʼevai ojapovaʼekuégui; upévare Shule omeʼẽ chupe puʼaka irréinope.

14 Ha ojehu Corihor omoheñói heta taʼýra ha tajýra. Ha Corihor raʼy apytépe oĩ peteĩ hérava Noé.

15 Ha ojehu Noé oñemoĩ rréi Shule rehe, ha avei itúva Corihor rehe, ha ogueraha ijoykeʼy Cohor-pe hapykuéri, ha avei ogueraha opavave ijoykeʼy ha heta tavayguakuérape.

16 Ha oñorairõ rréi Shule ndive, ha upéichape ipuʼaka ijyvy jehejapyre peteĩháre; ha oñemoĩ rréiramo upe tetã pehẽnguépe.

17 Ha ojehu oñorairõ jey rréi Shule ndive, ha ojagarra Shule-pe, upe rréipe; ha ogueraha chupe Morón-pe tekoʼapytĩme.

18 Ha ojehu oipeʼapotávo chugui hekove, Shule raʼykuéra oike pyhare kañyháme Noé rógape ha ojuka chupe, ha oity hikuái kaʼirãi rokẽ ha oguenohẽ itúvape; ha omoĩ hikuái chupe ijapykajegua ári irréinope.

19 Upévare, Noé raʼy omopuʼã irréino hendaguépe; upevére ndohupytyvéi puʼaka rréi Shule ári, ha tavayguakuéra oĩva rréi Shule poguýpe tuicha oñakãrapuʼã ha oñemombarete.

20 Ha upe tetã oñembojaʼo; ha oĩ mokõi rréino, Shule rréino, ha Cohor rréino, Noé raʼy.

21 Ha Cohor, Noé raʼy, ojapo itavayguakuéra toho ñorairõme Shule rehe, ha upévape kóva ipuʼaka hesekuéra ha ojuka Cohor-pe.

22 Ha koʼág̃a Cohor oguereko peteĩ itaʼýra hérava Nimrod; ha Nimrod omeʼẽ Shule-pe Cohor rréino, ha haʼe ojuhu poʼa Shule resa renondépe; upévare Shule ojapo hese heta mbaʼe porã, ha haʼe ojapo Shule rréinope ojaposéva.

23 Ha avei Shule rreinádope og̃uahẽ tavayguakuéra apytépe profetakuéra, oñemboúva Ñandejáragui, oprofetisávo tavayguakuéra tekoñaña ha taʼangarayhu ogueruha hína peteĩ ñeʼẽngái yvy ape ári, ha oñehunditaha chupekuéra noñearrepentíriramo.

24 Ha ojehu tavayguakuéra oñemoĩ profetakuérare, ha oñembohory hesekuéra. Ha ojehu rréi Shule ohusga opa umi oñemoĩvape profetakuérare.

25 Ha oguenohẽ peteĩ léi opa upe tetãme, ha upéva omeʼẽ profetakuérape puʼaka oho hag̃ua ohosehápe; ha upéva rupi tavayguakuéra ojegueru arrepentimiéntope.

26 Ha tavayguakuéra oñearrepentígui hekoñaña ha itaʼangarayhúgui Ñandejára operdona chupekuéra hekove, ha oñepyrũjey oñakãrapuʼã upe tetãme. Ha ojehu Shule omoheñói itujakue taʼýra ha tajyrakuéra.

27 Ha ndaiporivéi ñorairõguasu Shule ára aja; ha haʼe imanduʼa tuichaite mbaʼe Ñandejára ojapovaʼekue ituvakuérare oguerúvo chupekuéra yguasu pypukúre yvy ñeʼẽmeʼẽnguéme; upévare ohusga hustísia reheve opa hiʼára pukukue.