1 Ha ojehu Jared ha ijoykeʼy, ha hogaguakuéra, ha avei Jared ha ijoykeʼy angirũ ha hogaguakuéra, oguejy yvytypaʼũ oĩva nórtepe, (ha pe yvytypaʼũ réra Nimrod, oñembohérava upéicha pe mymbajukahára guasu rehehápe) imymbaʼaty ombyatyvaʼekue reheve, mácho ha kuña, opaichaguáva.

2 Ha omoĩ avei hikuái ñuhã ojagarra hag̃ua guyra yvategua; ha ombosakoʼi peteĩ kambuchi, ha upévape ogueraha hikuái ypegua pira.

3 Ha ogueraha avei hikuái deseret, oñehesaʼỹijóramo heʼiséva, eiru ombaʼapóva; ha péicha ogueraha hendivekuéra heta eiru raity, ha opáichagua oĩva yvy ape ári, yvaraʼỹi opáichagua.

4 Ha ojehu og̃uahẽvo hikuái yvytypaʼũ Nimrod-pe, Ñandejára oguejy ha oñeʼẽ Jared joykeʼy ndive; ha oĩ peteĩ araípe, ha Jared joykeʼy ndohechái chupe.

5 Ha ojehu heʼi chupekuéra Ñandejára oho hag̃ua taveʼỹme, heẽ, upe tenda arakaʼeve ndoikói haguépe avave yvypóra. Ha ojehu Ñandejára oho henonderãkuéra, ha oñeʼẽ chupekuéra oĩ aja peteĩ araípe, ha ohechauka chupekuéra moõ gotyopa ohovaʼerã.

6 Ha ojehu oguata hikuái pe taveʼỹre, ha ojapo ygakuéra, ha umívape ohasa hikuái y heta rupive, ha Ñandejára po oisãmbyhy meme chupekuéra.

7 Ha ndoipotái Ñandejára opyta hikuái yguasu mboypýri, taveʼỹme, ha katu heʼi oho hag̃ua hikuái og̃uahẽ meve yvy ñeʼẽmeʼẽnguépe, haʼéva yvy ojeiporavopyréva opa ambue tetã ári, Tupã Ñandejára oñongatuvaʼekue peteĩ tavayguakuéra hekojojávape g̃uarã.

8 Ha oñeʼẽmeʼẽkuri iñekoʼõime Jared joykeʼýpe, umi ohupytýva kóva ko yvy ñeʼẽmeʼẽngue, upe guive tapiaite peve, oipytyvõvaʼerãha chupe, Tupã añetegua ha peteĩnteva, térã oñehundíta hikuái hoʼa vove hiʼarikuéra iñekoʼõi paha.

9 Ha koʼág̃a, ikatu jahecha Tupã ñeʼẽ ko yvy rehegua, haʼeha peteĩ yvy ñeʼẽmeʼẽngue; ha oimeraẽ tetã ohupytýva oipytyvõvaʼerã Tupãme, térã oñehundíta iñekoʼõi paha hoʼa vove hiʼári. Ha iñekoʼõi paha oguejýta hiʼári hiʼaju vove hikuái tembiapovaípe.

10 Ha péina ápe, kóva haʼe peteĩ yvy jeiporavopyre opa yvy ári; upévare pe ohupytýva oipytyvõvaʼerã Tupãme térã oñehundíta; haʼégui Tupã ñeʼẽ opaveʼỹva. Ha noñehundíri hikuái ndahaʼéiramo og̃uahẽ vove huʼãme tembiapovai yvypóra raʼykuéra apytépe.

11 Ha upéva ou peẽme, O gentil-kuéra, peikuaa hag̃ua Tupã ñeʼẽ—peñearrepentivaʼerãha, ha anive peime pene rembiapovaípe penerenyhẽmba peve, ani hag̃ua pegueru pende ári Tupã ñekoʼõi paha ojapo haguéicha koʼág̃a peve oikovéva ko yvy ári.

12 Péina ápe, kóva haʼe yvy jeiporavopyre, ha oimeraẽ tetã ohupytýva isãsóta ñeñapytĩmbýgui, ha tekoʼapytĩgui, ha opa ambue tetã yvága guýpe oĩvagui, oipytyvõramo upe yvypegua Tupãme, haʼéva Jesucristo, ojehechaukavaʼekue umi mbaʼe rohaivaʼekuére.

13 Ha koʼág̃a che amombeʼuve; ha péina ápe, ojehu Ñandejára ogueraha Jared ha ijoykeʼykuérape jepe yguasu ombojaʼóva yvykuéra peve. Ha og̃uahẽvo pe yguasúpe omoĩ hikuái hogaaokuéra; ha ohenói hikuái upe tendápe Moriáncumer; ha oiko hikuái ogaaópe, ha oikókuri hikuái ogaaópe pe yguasu rembeʼýpe irundy ary pukukue.

14 Ha ojehu opávo irundy ary, Ñandejára ou jey Jared joykeʼýpe, ha oĩ peteĩ araípe ha oñeʼẽ hendive. Ha mbohapy aravo aja oñeʼẽ Ñandejára Jared joykeʼy ndive, ha ojaʼo chupe naimanduʼái haguére ohenói hag̃ua Ñandejára réra.

15 Ha Jared joykeʼy oñearrepenti mbaʼevai ojapovaʼekuégui, ha ohenói Ñandejára réra ijoykeʼykuéra oĩva hendive ñeimeporãrã. Ha Ñandejára heʼi chupe: Poperdonáta pene angaipa ndéve ha nde joykeʼykuérape; ha katu ndapejapomoʼãvéima angaipa, ha penemanduʼavaʼerã che espíritu noñorairõmoʼãiha tapiaite yvypóra ndive; upévare, pejapóramo angaipa penerenyhẽ meve, peñemosẽta Ñandejára renondégui. Ha koʼãva haʼe che jepyʼamongeta pe yvy ameʼẽtavare peẽme jehejapyrerã; haʼétagui peteĩ yvy ojeiporavopyréva opa ambue yvy ári.

16 Ha heʼi Ñandejára: Pembaʼapo ha pejapo yga, koʼág̃a peve pejapo haguéicha. Ha ojehu Jared joykeʼy oñemoĩ ombaʼapo, ha ijoykeʼykuéra avei, ha ojapo hikuái yga umi ojapo haguéicha voi, Ñandejára heʼi haguéicha chupekuéra. Ha michĩ, ha ipyaʼe y ári, guyra oveve hatãháicha y ári.

17 Ha ojejapo oñemboty porãiterei hag̃uáicha, ikatuha peve peteĩ vásoicha ojoko y; ha hugua oñemboty peteĩ vásoicha; ha ijyképe oñemboty avei upéicha; ha ijapýra hakua; ha pe ijape oñemboty avei peteĩ vásoicha; ha ipukukue peteĩ yvyramátaicha; ha okẽ oñembotývo, opyta peteĩ vásoicha.

18 Ha ojehu Jared joykeʼy ojerureʼasy Ñandejárape, heʼívo: O Ñandejára, ajapókuri tembiapo erevaʼekue chéve, ha ajapókuri umi yga nde rehechauka haguéicha chéve.

19 Ha péina ápe, O Ñandejára, ndaipóri ipypekuéra tesape; moõ gotyo piko rohovaʼerã? Ha romanóta avei, ipypekuéra ndaikatúigui orepytuhẽ, ndahaʼéiramo pe arapytu oguerekóva ipype añónte; upéicharõ romanóta.

20 Ha Ñandejára heʼi Jared joykeʼýpe: Péina ápe, rembokuáta pe huʼãme, ha avei huguápe; ha reikotevẽ vove arapytu, reipeʼáta pe tápa ha reguerekóta arapytu. Ha oikéramo peẽme y, péina ápe, embotýta pe ikuára, ani hag̃ua pemano yguasúpe.

21 Ha ojehu Jared joykeʼy ojapo upéicha, Ñandejára heʼi haguéicha chupe.

22 Ha ojerureʼasy jey Ñandejárape heʼívo: O Ñandejára, péina ápe jepe ajapókuri ere haguéicha chéve; ha ambosakoʼi umi yga che tavayguakuérape g̃uarã, ha péina ápe ndaipóri tesape ipypekuéra. Péina ápe, O Ñandejára, rehejáta piko rohasa koʼã y tuichávare pytũmbýpe?

23 Ha Ñandejára heʼi Jared joykeʼýpe: Mbaʼe reipota che ajapo peguereko hag̃ua tesape pende ygápe? Péina ápe, ndaikatúigui peguereko ovetã, oñemonguʼipátagui; ni ndapeguerahamoʼãi tata penendive, ndapehomoʼãigui tata resape rupive.

24 Ha péina ápe, haʼéta peteĩ vallénaicha yguasu mbytépe; umi ypuʼã guasu oinupãtagui pende rehe. Upevére, che poguenohẽ jeýta yguasu ruguágui; che jurúgui osẽgui yvytukuéra, ha che amboúkuri avei ama ha amaguasu.

25 Ha péina ápe, che pombosakoʼi opa koʼã mbaʼe pehasa porã hag̃ua; ndaikatúigui pejapyhara ko yguasu tuichaitéva che pombosakoʼiʼỹre yguasu puʼãgui, ha yvytu osẽtavagui, ha amaguasukuéra oútavagui. Upévare mbaʼe reipota ambosakoʼi peẽme g̃uarã penderesape hag̃ua peñapymi vove yguasu ruguápe?