1 Ha Com arakuérape ou avei heta proféta, ha oprofetisa oñehunditaha upe tavayguakuéra tuicháva noñearrepentíriramo hikuái, ha ojerejeyʼỹramo Ñandejára gotyo, ha ohejaʼỹramo ijejuka ha hekoñañakuéra.

2 Ha ojehu tavayguakuéra orrechasa profetakuérape, ha haʼekuéra oñani Com rendápe oñemoʼã hag̃ua, tavayguakuéra ohundiségui chupekuéra.

3 Ha heta mbaʼe oprofetisa hikuái Com-pe; ha ojehovasa opa hiʼára rembyre.

4 Ha oikove itujaiterei peve, ha omoheñói Shiblom-pe; ha Shiblom orreina hendaguépe. Ha Shiblom joykeʼy oñemoĩ hese, ha upépe oñepyrũ peteĩ ñorairõguasu tuichaitereíva upe tetãme.

5 Ha ojehu Shiblom joykeʼy ojapouka opavave umi profetakuéra oprofetisáva tavaguasu oñehunditaha, tojejuka;

6 Ha oiko tuicha mbaʼevai opa upe tetãme, otestifikágui hikuái outaha tuicha ñeʼẽngái upe tetã ári, ha avei tavayguakuéra ári, ha oikotaha tuicha ñehundi ijapytepekuéra, arakaʼeve ndaipóri haguéicha yvy ape ári, ha ikanguekuéra haʼéta yvy atýicha tetã ári noñearrepentíriramo hikuái hekoñañágui.

7 Ha nohendúi hikuái Ñandejára ñeʼẽ, imbaʼevai ñañanguéra rupi; upévare, oñepyrũ oiko ñorairõguasu ha joavy opa upe tetãme, ha avei heta ñembyahýi ha mbaʼasyvai, upéicha rupi oĩ tuicha ñehundi, arakaʼeve ndojeikuaaivaʼekuéicha yvy ape ári; ha opa koʼã mbaʼe oiko Shiblom árape.

8 Ha oñepyrũ tavayguakuéra oñearrepenti hembiapovaígui; ha ojapokuévo upéicha, Ñandejára oiporiahuvereko chupekuéra.

9 Ha ojehu Shiblom ojejuka, ha Set oñemoĩ tekoʼapytĩme, ha oikove tekoʼapytĩme opa hiʼára aja.

10 Ha ojehu Ahah, itaʼýra, ojagarra upe rréino; ha orreina tavayguakuéra ári opa hiʼára aja. Ha haʼe ojapo opáichagua tembiapovai hiʼárape, upévare ojapo toñeñohẽ heta tuguy; ha hiʼára mbovymíkuri.

11 Ha Etem, haʼéva Ahah ñemoñare, ojagarra upe rréino; ha haʼe ojapo avei iñañáva hiʼára aja.

12 Ha ojehu Etem árape ou heta profetakuéra, ha oprofetisa jey tavayguakuérape; heẽ, oprofetisa hikuái Ñandejára ohundipataha chupekuéra yvy ape árigui noñearrepentíriramo hikuái hembiapovaígui.

13 Ha ojehu tavayguakuéra omohatã ikorasõ, ha nohenduséi iñeʼẽnguéra; ha profetakuéra ombyasy ha osẽ tavayguakuéra apytégui.

14 Ha ojehu Etem ohusga ñaña paʼũme opa hiʼára; ha haʼe omoheñói Morón-pe. Ha ojehu Morón orreina hendaguépe; ha Morón avei ojapo iñañáva Ñandejára renondépe.

15 Ha ojehu oiko peteĩ ñemopuʼã tavayguakuéra apytépe, pe mbaʼevai ñemi rupi oñemoĩvaʼekue ojehupyty hag̃ua puʼaka ha pirapire; ha opuʼã ijapytepekuéra peteĩ kuimbaʼe ikatupyryetereíva tembiapovaípe, ha oñorairõ Morón ndive, upéichape ohupyty upe rréino mbyte; ha ojoko upe rréino mbyte heta ary pukukue aja.

16 Ha ojehu Morón ipuʼaka hese, ha ojagarra jey upe rréino.

17 Ha ojehu opuʼã ambue kuimbaʼe imbaretéva; ha haʼe Jared joykeʼy ñemoñare.

18 Ha ojehu haʼe ipuʼaka Morón rehe, ha ojagarra upe rréino; upévare, Morón oikove tekoʼapytĩme opa hiʼára rembyre; ha haʼe omoheñói Coriantor-pe.

19 Ha ojehu Coriantor oikove tekoʼapytĩme opa hiʼára aja.

20 Ha Coriantor árape ou avei heta proféta, ha oprofetisa hikuái mbaʼe tuicha ha hechapyrãva, ha ojerureʼasy hikuái pe arrepentimiénto tavayguakuérape, ha noñearrepentíriramo hikuái Tupã Ñandejára omoĩta huísio hiʼarikuéra oñehundipa peve.

21 Ha oprofetisa Tupã Ñandejára omboutaha térã oguerutaha ambue tavayguakuérape ohupyty hag̃ua upe yvy, ipuʼaka rupi, ogueru haguéicha ituvakuérape.

22 Ha haʼekuéra orrechasa opa profetakuéra ñeʼẽ, ijaty ñemi ha hembiapokyʼa ñañakuéra rupi.

23 Ha ojehu Coriantor omoheñói Éter-pe, ha omano, oikove rire tekoʼapytĩme opa hiʼára aja.