1 Ha koʼág̃a, che Moroni, añemoĩ ambopaha che ñemombeʼu upe tavayguakuéra añeʼẽhague ñehundi rehegua.

2 Ha péina ápe, orrechasa hikuái opa Éter ñeʼẽ; haʼe oñeʼẽgui chupekuéra añetehápe opa mbaʼére, yvypóra ñepyrũmby guive; ha ykuéra ojeipeʼa rire ko yvy ape árigui oikókuri chugui peteĩ yvy ojeiporavopyréva opa ambue tetã ári, peteĩ yvy Ñandejára oiporavovaʼekue; upévare Ñandejára oipota oipytyvõ chupe opavave yvypóra oikóva ijape ári;

3 Ha haʼeha Jerusalén Pyahu renda, oguejýtava yvágagui, ha Ñandejára tupaitũ renda marangatu.

4 Péina ápe, Éter ohechákuri Cristo ára, ha oñeʼẽ peteĩ Jerusalén Pyahúre ko yvy ári.

5 Ha haʼe oñeʼẽ avei Israel rógare, ha Jerusalén-re Lehi outahágui—oñehundi rire oñemopuʼã jeytaha, peteĩ tavaguasu marangatu Ñandejárape g̃uarã; upévare, ndaikatúi haʼe peteĩ Jerusalén Pyahu oĩmaguikuri yma; ha katu oñemopuʼã jeýta, ha haʼéta peteĩ tavaguasu marangatu Ñandejára mbaʼéva; ha oñemopuʼãta Israel rógape g̃uarã—

6 Ha upe Jerusalén Pyahu oñemopuʼãtaha ko yvy ári, José ñemoñare rembyrépe g̃uarã, ha upevarã oĩkuri peteĩ ñemohaʼanga.

7 Ha José ogueraha haguéicha itúvape Egipto retãme, omano peve upépe; upévare, Ñandejára oguenohẽ peteĩ José ñemoñare rembyre tetã Jerusalén-gui, iporiahuvereko hag̃ua José ñemoñare ndive ani hag̃ua omano, iporiahuvereko haguéicha José ru ndive jepe ani hag̃ua omano.

8 Upévare, José róga rembyre oñemoĩta ko tetã ári; ha haʼéta ijyvy jehejapyre; ha omopuʼãta hikuái peteĩ tavaguasu marangatu Ñandejárape g̃uarã, ojoguáva Jerusalén ymaguarépe; ha noñemoapañuãmoʼãvéima chupekuéra, og̃uahẽ meve ipaha yvy opatahápe.

9 Ha oĩta peteĩ yvága pyahu ha peteĩ yvy pyahu; ha haʼéta umi ymaguaréicha, ha katu umi ymaguare ohasátama, ha opa mbaʼe oñembopyahúta.

10 Ha upéramo ou Jerusalén Pyahu; ha ojehovasapyre umi ipype oikóva, haʼégui hikuái umi ijaokuéra oñemomorotĩva upe Cordero ruguy rupive; ha haʼekuéra haʼe umi ojeipapáva José ñemoñare rembyre apytépe, haʼéva Israel rogagua.

11 Ha upéramo ou avei Jerusalén ymaguare; ha ipype oikóva, ojehovasapyre, ojejohéigui chupekuéra upe Cordero ruguýpe; ha haʼe umi oñemosarambi ha oñembyatyvaʼekue irundy yvy rendágui, ha nortepegua tetãnguéragui, ha oike hikuái upe konvénio ñekumplípe Tupã ojapovaʼekue Abraham, itúva ndive.

12 Ha ou vove koʼã mbaʼe, oñekumplíta escritura heʼíva, oĩ haʼevaʼekue ñepyrũha, haʼétava ipaha; ha oĩ umi haʼevaʼekue ipaha, haʼétava ñepyrũha.

13 Ha che aimete ahaive, ha katu oñembotove chehegui; ha katu tuicha ha hechapyrãva Éter profesiakuéra; ha katu tavayguakuéra nomombaʼéi, ha omosẽ chupe hikuái okápe; ha haʼe okañy arakue peteĩ itakuápe, ha osẽ pyharekue ohecha hag̃ua umi mbaʼe oútava tavayguakuéra ári.

14 Ha oiko aja peteĩ ita kuápe ojapo ko kuatiajehaipyre rembyre, pyhare jave ohechávo ñehundi oúva tavayguakuéra ári.

15 Ha ojehu upe arýpe omosẽramoguare hikuái chupe tavayguakuéra apytégui oñepyrũ peteĩ ñorairõguasu tuicháva tavayguakuéra apytépe, oĩgui heta opuʼãva, haʼéva kuimbaʼe imbaretéva, ha oñehaʼã ohundi hikuái Coriántumr-pe iplan ñemi ñañakuéra rupive, upe oñeñeʼẽmavaʼekuére.

16 Ha koʼág̃a Coriántumr, oñembokatupyry rire, opa ñorairõguasu ha opa yvóra katupyry reheguápe, upévare haʼe oñorairõ umi ohundiséva ndive chupe.

17 Ha katu haʼe noñearrepentíri, ni itaʼýra ha itajyrakuéra porãite; ni Cohor raʼy ha rajykuéra porãite; ni Corihor raʼy ha rajykuéra porãite, ha ndaipóri ni peteĩ taʼýra ha tajýra porã opa yvy ape ári oñearrepentíva iñangaipágui.

18 Upévare, ojehu peteĩha ary Éter oikoramoguare upe ita kuápe, oĩ heta tavayguakuéra omanóva umi mbaʼevai ñemi kysepuku rupive, oñorairõva Coriántumr ndive ohupyty hag̃ua upe rréino.

19 Ha ojehu Coriántumr raʼykuéra heta oñorairõ ha huguy heta hikuái.

20 Ha mokõiha arýpe Ñandejára ñeʼẽ ou Éter-pe, ohovaʼerãha ha oprofetisa Coriántumr-pe, oñearrepentíramo haʼe, ha opa hogagua, Ñandejára omeʼẽtaha chupe upe rréino ha ohejataha tavayguakuérape hekove—

21 Ndaupéichairamo oñehundíta hikuái, opa hogaguáicha ha haʼénte nahanirimoʼãi. Ha haʼe oikovetaha ohecha hag̃uánte oñekumpliha umi profesiakuéra ojeʼevaʼekue ambue tavayguakuéra rehegua oñemeʼẽtavape yvy ijehejapyrerã; ha Coriántumr oñeñotỹta hesekuéra; ha opa ánga oñehunditaha ndahaʼéiva Coriántumr.

22 Ha ojehu Coriántumr noñearrepentíri, ni umi hogagua, ni tavayguakuéra; ha ñorairõguasukuéra ndopái; ha oñehaʼã ojuka hikuái Éter-pe, ha katu haʼe okañy chuguikuéra ha oike jey pe itakuápe.

23 Ha ojehu opuʼã Shared, ha péva ojapo avei ñorairõguasu Coriántumr-pe; ha ipuʼaka hese, upéicha rupi mbohapy arýpe oity chupe tekoʼapytĩme.

24 Ha Coriántumr raʼykuéra, irundyha arýpe, ipuʼaka Shared rehe, ha omeʼẽ jey hikuái upe rréino itúvape.

25 Koʼág̃a oñepyrũ oiko ñorairõguasu opa yvy ape ári, opavave kuimbaʼe ijatykuéra ndive oñorairõvo upe oipotáva rehe.

26 Ha oĩkuri mondaha, ha ipahápe, opáichagua tekoñaña opa yvy ape ári.

27 Ha ojehu Coriántumr ipochyeterei Shared ndive, ha haʼe oho ñorairõme hese ijehersitokuéra reheve; ha tuicha pochýpe, ojotopa hikuái yvytypaʼũ Gilgal-pe, ha upe ñorairõ ivaieterei.

28 Ha ojehu Shared oñorairõ hendive mbohapy ára pukukue. Ha ojehu Coriántumr ipuʼaka hese, ha omuña chupe og̃uahẽ meve yvy Heslón-pe.

29 Ha ojehu Shared osẽ jey chupe ñorairõme pe yvy oĩháme; ha péina ápe, ipuʼaka Coriántumr rehe, ha ombojevy jey chupe yvytypaʼũ Gilgal peve.

30 Ha Coriántumr oho jey Shared rehe ñorairõme yvytypaʼũ Gilgal-pe, ha upépe ipuʼaka Shared rehe ha ojuka chupe.

31 Ha Shared oikutúkuri Coriátumr-pe hetymáme, ha upévare haʼe nosẽi ñorairõme mokõi ary aja, ha upe árape opa tavayguakuéra yvy ape ári oñohẽ hína tuguy, ha avave ndaikatúi ojoko chupekuéra.