1 Mo Lod i bin givim oda long brata blong Jared blong go daon aot long bigfala hil, aot long fes blong Lod, mo raetemdaon ol samting we hem i bin luk, mo Lod i bin blokem se oli no kamaot long medel blong ol pikinini blong ol man kasem afta we bae oli leftemap hem antap long kros; mo from stamba tingting ia king Mosaea i bin holemtaet olgeta, blong oli no mas kam long wol kasem afta we Kraes bae i soemaot hemwan long ol pipol blong hem.

2 Mo afta Kraes i bin soemaot hemwan long ol pipol blong hem, hem i givim oda se oli mas soemaot ol samting ia.

3 Mo nao, afta long samting ia, olgeta evriwan i bin kam slak from oli lusum bilif; mo i no gat wan be Ol Man blong Leman nomo, mo oli bin sakemaot gospel blong Kraes; from hemia, mi mi kasem oda se mi mas haedem olgeta bakegen andanit long graon.

4 Luk, mi bin raetem long ol buk ia ol stret samting we brata blong Jared i bin luk; mo i neva i bin gat eni samting we i moa bigfala we Lod i soemaot bitim ol samting ia we Lod i bin soemaot long brata blong Jared.

5 Taswe, Lod i bin givim oda long mi blong raetemdaon olgeta; mo mi raetem olgeta. Mo hem i bin givim oda long mi se mi mas silim olgeta; mo tu, hem i givim oda blong mi mas silim ol mining blong olgeta; mekem se mi bin silim ol samting ia blong tanem lanwis folem komanmen blong Lod.

6 From Lod i bin talem long mi: “Bae oli no mas go long Ol Jentael kasem dei we bae oli sakem rabis fasin blong olgeta, mo kam klin long fored blong Lod.

7 Mo long dei ia we bae oli yusum fet long mi, Lod i talem, olsem we brata blong Jared i bin mekem, blong oli save kam tabu long mi, afta bae mi soemaot long olgeta ol samting we brata blong Jared i bin luk, go kasem we mi eksplenem long olgeta evri revelesen blong mi, Jisas Kraes i talem, Pikinini blong God, Papa blong ol heven mo blong wol, mo evri samting we oli stap insaed long olgeta.

8 Mo hem we bae i faet agensem toktok blong Lod, mekem hem i stap anda long wan strong nogud tok we oli sakem long hem; mo hem we i tanem baksaed long ol samting ia, mekem hem i stap anda long wan strong nogud tok we oli sakem long hem; from long olgeta ia, bae mi no soemaot ol samting we oli moa bigfala, Jisas Kraes i talem; from mi mi hem we i stap toktok.

9 Mo long oda blong mi, ol heven oli open mo oli sat; mo long toktok blong mi, wol bae i seksek; mo long oda blong mi, olgeta we oli stap laef long hem bae oli ded, semmak olsem tru long long faea.

10 Mo hem we i no bilivim ol toktok blong mi, hem i no bilivim ol disaepol blong mi; mo sapos i olsem se mi no toktok, yufala i jajem, from bae yufala i save se hem i mi, we i toktok, long las dei.

11 Be hem we i bilivim ol samting ia we mi bin talemaot, hem bae mi visitim tru long ol samting we Spirit blong mi bae i soemaot, mo bae hem i save mo witnesem. From se, from Spirit blong mi, bae hem i save se ol samting ia oli tru; from oli lidim ol man blong mekem gud fasin.

12 Mo eni samting we i lidim ol man blong mekem gud fasin, i kamaot long mi; from gud samting i no kamaot long eni man sapos i no tru long mi. Mi, mi semfala man ia we i lidim ol man blong mekem evri gud fasin; hem we bae i no bilivim ol toktok blong mi, bae i no bilivim mi—se mi mi stap; mo hem we bae i no bilivim mi bae hem i no bilivim Papa we i bin sendem mi. From luk, mi mi Papa, mi mi laet, mo laef, mo trutok blong wol.

13 Kam long mi, O yufala Ol Jentael, mo bae mi soem long yufala ol samting we oli moa bigfala, save ia we mi bin haedem from fasin blong no gat bilif.

14 Kam long mi, O yufala laen blong Isrel, mo bae mi soemaot long yufala hamas nao ol bigfala samting we Papa i bin mekem rere blong yufala, stat long stat blong wol; mo i no bin kam long yufala, from fasin blong no gat bilif.

15 Luk, taem we bae yufala i teremaot vel ia blong no gat bilif, we i stap mekem yufala i stap long nogud ples blong yufala blong fasin nogud, mo hat we i strong, mo maen we i blaen, afta bae ol bigfala mo gudfala samting we i bin haed long stat blong stat blong wol long yufala—yes, taem we bae yufala i prea long Papa long nem blong mi, wetem wan hat we i sore mo wan spirit we i wantem blong sakem sin, afta bae yufala i save se Papa i bin tingbaot kavenan we hem i bin mekem wetem ol papa blong yufala, O laen blong Isrel.

16 Mo afta bae ol revelesen blong mi we mi bin mekem se wokman blong mi Jon i raetemdaon, mi save eksplenem long ae blong evri pipol. Tingbaot, taem we yufala i luk ol samting ia, bae yufala i save se taem ia i kam kolosap we bae mi soemaot tru long ol samting we mi mekem.

17 From hemia, taem we bae yufala i kasem histri ia, bae yufala i save se wok blong Papa i stat finis long ful fes blong graon.

18 From hemia, sakem sin yufala evriwan long ol en blong wol, mo kam long mi, mo biliv long gospel blong mi, mo kasem baptaes long nem blong mi; from hem we i bilivim mo i kasem baptaes, bae Lod i sevem hem; be hem we i no biliv, bae i no save kam antap samtaem; mo ol saen bae oli folem olgeta we oli biliv long nem blong mi.

19 Mo hem we oli faenem se hem i fetful long nem blong mi long las dei bae i kasem blesing, from bae oli leftemap hem blong stap long kingdom we oli bin rere blong hem, stat long stat blong wol. Mo luk, hem i mi we mi bin talem samting ia. Amen.”