1 Mo nao i bin stat blong gat wan bigfala ^astrong nogud tok long ful graon from rabis fasin blong ol pipol, long samting ia, sapos wan man bae i putum tul blong hem o naef blong faet blong hem long selef blong hem, o long ples we hem i wantem putum, luk, long nekis dei, bae hem i no save faenem samting ia, from se strong nogud tok ia we oli sakem long graon i bigwan tumas.

2 Taswe, evri man i hang strong long samting we i blong hem, wetem ol han blong hem, mo i no wantem letem o bae hem i givim long man; mo evri man i holemtaet handel blong naef blong faet blong hem long raet han blong hem, blong i difendem gud ol samting blong hem, mo laef blong hemwan, mo ol waef mo ol pikinini blong hem.

3 Mo nao, afta long spes blong tu yia, mo afta ded blong Sared, luk, brata blong Sared i girap, mo hem i faet agensem Koriantuma; long faet ia Koriantuma i bin winim hem mo hem i ronem hem i go long waelples blong Akis.

4 Mo i bin hapen se brata blong Sared i faet agensem hem long waelples blong Akis; mo faet ia i bin kam strong tumas, mo plante taosen oli bin foldaon tru long naef blong faet.

5 Mo i bin hapen se Koriantuma i raonem waelples; mo brata blong Sared i maj i go, i aot long waelples long naet, mo i kilimded wan pat blong ami blong Koriantuma, taem we oli drong.

6 Mo hem i kam kasem graon blong Moron, mo hem i putum hemwan long bigfala jea blong Koriantuma.

7 Mo i bin hapen se Koriantuma i stap wetem ami blong hem long waelples blong spes blong tu yia, long taem ia hem i bin kasem bigfala paoa long ami blong hem.

8 Nao brata blong Sared, we nem blong hem i Gilead, tu i bin kasem bigfala paoa long ami blong hem, from ol sikret grup.

9 Mo i bin hapen se hae pris blong hem i kilimded hem long taem we hem i stap sidaon long bigfala jea blong hem.

10 Mo i bin hapen se wan long ol sikret grup i kilimded hem long wan sikret rod, mo i tekem long hemwan kingdom ia, mo nem blong hem i Lib; mo Lib i wan man we i bigfala, moa bitim eni narafala man long medel blong evri pipol.

11 Mo i bin hapen se long fas yia blong Lib, Koriantuma i kam antap long graon blong Moron, mo i faet agensem Lib.

12 Mo i bin hapen se hem i faet wetem Lib, we long faet ia, Lib i kilim han blong hem mekem se hem i kasem kil, be, ami blong Koriantuma i gohed strong long Lib, mekem se hem i bin ronwe i go long ol boda long so blong solwota.

13 Mo i bin hapen se Koriantuma i ronem hem; mo Lib i faet agensem hem long so blong solwota.

14 Mo i bin hapen se Lib i kilim ami blong Koriantuma, mekem se oli ronwe bakegen i go long waelples blong Akis.

15 Mo i bin hapen se Lib i ronem hem kasem taem we hem i kam long ol flat ples blong Agos. Mo Koriantuma i tekem evri pipol wetem hem taem we hem i stap ronwe long fored blong Lib long pat blong graon we hem i bin ronwe i go long hem.

16 Mo taem we hem i kam kasem ol flat ples blong Agos, hem i faet agensem Lib, mo hem i kilim hem kasem taem we hem i ded; be, brata blong Lib i kam agensem Koriantuma long ples blong hem, mo faet i bin kam strong tumas, mekem se Koriantuma i bin ronwe bakegen long fored blong ami blong brata blong Lib.

17 Nao nem blong brata blong Lib oli singaotem Sis. Mo i bin hapen se Sis i ronem Koriantuma, mo hem i tekova plante bigtaon, mo hem i kilimded ol woman tugeta wetem ol pikinini, mo hem i bonemdaon ol bigtaon.

18 Mo wan fraet long Sis i bin go raon truaot long ful graon; yes, wan krae i bin go aot truaot long graon—?Huia i save stanap long fored blong ami blong Sis? !Luk, hem i brum graon long fored blong hem!

19 Mo i bin hapen se ol pipol oli stat blong kam tugeta long ol grup blong ol ami, truaot long fes blong ful graon.

20 Mo oli bin seraot; mo wan pat blong olgeta i ronwe i go long ami blong Sis, mo wan pat blong olgeta i ronwe i go long ami blong Koriantuma.

21 Mo wo i bin bigwan mo longwan tumas, mo fasin blong luk blad i ron mo kilim man i ded i bin stap blong wan longfala taem, mekem se ol ^abodi blong ol dedman oli bin kavremap ful fes blong graon.

22 Mo wo ia i bin kwik mo i spid mekem se i no gat wan we i stap blong berem olgeta we oli ded, be oli maj i go long wan fasin blong mekem blad i ron i go long wan moa fasin blong mekem blad i ron, oli livim ol bodi blong ol man tugeta wetem ol woman, mo ol pikinini oli ledaon olbaot long fes blong graon, blong kam wan kaekae blong ol ^awom blong mit.

23 Mo smel blong olgeta i bin go aot long fes blong graon, kasem we i go long fes blong ful graon; taswe, ol pipol oli bin stat blong kasem trabol long dei mo long naet, from smel blong olgeta.

24 Be, Sis i no bin stop blong ronem Koriantuma; from hem i promes blong pembak hemwan long Koriantuma from blad blong brata blong hem, we oli bin kilimded, mo toktok blong Lod we i bin kam long Ita se Koriantuma bae i no foldaon tru long naef blong faet.

25 Mo olsem ia nao yumi luk se Lod i bin visitim olgeta long kros blong hem we i fulwan, mo fasin nogud mo rabis sin blong olgeta i mekem rere wan rod blong prapa spolem gud olgeta blong taem we i no gat en.

26 Mo i bin hapen se Sis i folem Koriantuma i go long Is, i go kasem long ol boda kolosap long so blong solwota, mo long ples ia hem i faet agensem Sis blong spes blong tri dei.

27 Mo fasin blong prapa spolem gud samting long medel blong ol ami blong Sis i nogud tumas, mekem se ol pipol oli stat blong fraet, mo oli stat blong ronwe long fored blong ol ami blong Koriantuma; mo oli ronwe i go long graon blong Korihor, mo oli brumaot olgeta we oli stap laef long hem long fored blong olgeta, olgeta evriwan we oli no bin wantem joenem olgeta.

28 Mo oli bin stanemap ol tenet blong olgeta long vale blong Korihor; mo Koriantuma i stanemap ol tenet blong hem long vale blong Sur. Nao vale blong Sur i stap kolosap long hil blong Komnor; taswe, Koriantuma i tekem ol ami blong hem i kam tugeta long hil blong Komnor, mo i blo long wan pupu long ol ami blong Sis blong askem olgeta blong kam faet.

29 Mo i bin hapen se oli kam, be oli pusum olgeta i gobak bakegen; mo oli kam nambatu taem, mo oli pusumbak olgeta bakegen nambatu taem. Mo i bin hapen se oli kam bakegen nambatri taem, mo faet i kam strong tumas.

30 Mo i bin hapen se Sis i kilim Koriantuma mekem se hem i givim long hem plante kil we i dip; mo Koriantuma, from hem i bin lusum blad blong hem, ae blong hem i dak, mo oli karem hem i go olsem se hem i ded.

31 Nao lus blong ol man, ol woman, mo ol pikinini long tufala saed tugeta i bin bigwan tumas tu mekem se Sis i givim oda long ol pipol blong hem se oli no mas ronem ol ami blong Koriantuma; taswe, oli gobak long kamp blong olgeta.