1 Mo i bin hapen se Ses, we i wan laen blong Het—from Het i ded tru long hadtaem blong kasem kaekae, wetem evriwan insaed long haos blong hem, be Ses nomo—taswe, Ses i stat blong bildimap bakegen wan pipol we i brokbrok.

2 Mo i bin hapen se Ses i tingbaot fasin ia blong prapa spolem gud ol papa blong hem, mo hem i bildimap wan kingdom we i stret mo gud; from hem i tingbaot wanem we Lod i mekem blong tekem Jared mo brata blong hem blong ^akrosem dip solwota; mo hem i wokbaot folem ol rod blong Lod; mo hem i gat ol boe mo ol gel.

3 Mo fasbon boe blong hem, we nem blong hem i Ses, i go agensem hem, be, han blong wan stilman i bin kilim Ses, from ol rij samting blong hem we i tumas, mo samting ia i tekem pis i kambak bakegen long papa blong hem.

4 Mo i bin hapen se papa blong hem i bildimap plante bigtaon long fes blong graon, mo ol pipol oli stat bakegen blong go olbaot long ful fes blong graon. Mo Ses i stap laef kasem taem we hem i olfala tumas, mo hem i gat Riplakis. Mo hem i ded, mo Riplakis i rul long ples blong hem.

5 Mo i bin hapen se Riplakis i no mekem samting we i bin stret long lukluk blong Lod, from hem i gat plante waef mo ol ^anarafala woman, mo hem i putum ol samting long ol solda blong ol man we oli had blong karem; yes, hem i mekem olgeta oli pem takis wetem ol takis we oli bigwan; mo wetem ol takis, hem i bildimap plante bigfala haos we i gat plante spes.

6 Mo hem i stanemap blong hem, wan bigfala jea blong hem we i naes tumas; mo hem i bildimap plante kalabus, mo huia we bae i no wantem pem ol takis, hem i sakem long kalabus; mo huia we i no save pem ol takis hem i sakem long kalabus; mo hem i mekem se olgeta oli mas wok oltaem from sapot blong olgeta; mo huia we i no wantem blong wok, hem i bin mekem blong oli kilim hem i ded.

7 Taswe, hem i bin kasem evri naes wok blong hem, yes, mo tu, naes gol blong hem, hem i bin mekem olgeta i wokem insaed long kalabus; mo evri kaen naes fasin blong wok hem i mekem se oli wokem insaed long kalabus. Mo i bin hapen se hem i givim hadtaem long ol pipol wetem ol fasin blong hem blong slip olbaot mo ol rabis sin.

8 Mo afta we hem i rul blong spes blong foti mo tu yia, ol pipol oli bin girap blong go agensem hem; mo i stat blong gat wo bakegen long graon, inaf blong mekem se oli kilimded Riplakis, mo oli ronem ol laen blong hem aot long graon.

9 Mo i bin hapen se afta spes blong plante yia, Morianton, (hem i wan laen blong Riplakis) i karem i kam tugeta wan ami blong ol pipol we oli sakemaot finis, mo oli go aot mo oli faet agensem ol pipol; mo hem i winim paoa ova plante bigtaon; mo wo i bin kam nogud tumas, mo i gohed blong spes blong plante yia; mo hem i winim paoa ova long ful graon, mo i stanemap hemwan i kam king ova long ful graon.

10 Mo afta we hem i bin stanemap hemwan i kam king, hem i mekem wok blong ol pipol i nomo hevi, mo tru long samting ia, hem i bin winim sapot long ae blong ol pipol, mo oli anoentem hem blong kam king blong olgeta.

11 Mo hem i bin mekem jastis long ol pipol, be i no long hemwan from plante fasin blong hem blong slip olbaot; mekem se oli katem hem aot long fes blong Lod.

12 Mo i bin hapen se Morianton i bildimap plante bigtaon, mo andanit long rul blong hem ol pipol oli kam rij tumas, long ol haos, mo long gol mo silva, mo blong resemap ol sid, mo long ol grup blong animol, mo ol buluk, mo ol samting olsem we oli kambak bakegen long olgeta.

13 Mo Morianton i bin laef kasem taem we yia blong hem i bigwan tumas, mo afta hem i gat Kim; mo Kim i bin rul long ples blong papa blong hem; mo hem i rul eit yia, mo papa blong hem i bin ded. Mo i bin hapen se Kim i no rul long stret mo gud fasin, from samting ia Lod i no laekem hem.

14 Mo brata blong hem i girap long fasin blong go agensem hem, mo tru long samting ia hem i mekem hem i kam olsem prisena; mo hem i stap long slef evri dei blong hem; mo hem i bin gat ol boe mo ol gel long slef, mo long taem we hem i olfala hem i gat Livae; mo hem i ded.

15 Mo i bin hapen se Livae i wok long slef afta long ded blong papa blong hem, blong spes blong foti mo tu yia. Mo hem i bin mekem faet agensem king blong graon, mo tru long samting ia, hem i kasem kingdom blong hemwan.

16 Mo afta we hem i bin kasem long hemwan kingdom, hem i mekem samting we i stret long lukluk blong Lod; mo ol pipol oli kam antap gud long graon; mo hem i stap laef kasem taem we hem i olfala gud, mo i bin gat ol boe mo ol gel; mo tu, hem i gat Korom, we hem i bin anoentem blong kam king long ples blong hem.

17 Mo i bin hapen se Korom i mekem samting we i stret long lukluk blong Lod long evri dei blong hem; mo hem i gat plante boe mo ol gel; mo afta hem i luk plante dei, hem i ded, semmak olsem ol narafala blong wol; mo Kis i bin rul long ples blong hem.

18 Mo i bin hapen se Kis i bin ded tu, mo Lib i bin rul long ples blong hem.

19 Mo i bin hapen se Lib tu i bin mekem samting we i gud long lukluk blong Lod. Mo long ol dei blong Lib, oli kilim ol ^aposen snek i ded. Taswe, oli bin go long graon long Saot, blong lukaotem kaekae blong ol pipol blong graon, from kantri i bin fulap long ol animol blong bus. Mo Lib tu, hemwan i bin kam wan gudfala man blong go lukaotem animol blong kaekae.

20 Mo oli bin bildimap wan strong bigtaon kolosap long eria blong smolfala graon, kolosap long ples we solwota i seraotem graon.

21 Mo oli bin blokem graon long Saot blong i wan waelples, blong oli kasem ol wael animol blong kaekae. Mo ful fes blong graon long Not i bin fulap long ol pipol we oli stap laef long hem.

22 Mo oli bin wokhad tumas, mo oli pem mo salem mo mekem bisnis wan wetem narawan, blong mekem se oli save kasem mane.

23 Mo oli bin wok wetem evri kaen ston blong aean, mo oli mekem gol, mo silva, mo ^aaean, mo bras, mo evri kaen aean; mo oli digim samting ia aot long graon; taswe, oli bin hivimap ol bigfala hip blong graon blong kasem ston blong aean, blong gol, mo blong silva, mo blong aean, mo blong kopa. Mo oli bin wokem evri kaen gudfala wok.

24 Mo oli bin gat ol silk, mo naes kaliko; mo oli wokem evri kaen kaliko, blong mekem se oli save kavremap neked bodi blong olgeta.

25 Mo oli bin mekem evri kaen tul blong wok long graon, blong brekem graon tugeta wetem blong planem, blong tekem kaekae long garen mo blong klinim graon, mo tu, blong karemaot ol sid.

26 Mo oli bin mekem evri kaen tul we tru long olgeta, oli yusum long ol animol blong olgeta.

27 Mo oli bin mekem evri kaen tul blong faet. Mo oli wokem evri kaen wok long wan fasin blong wok we i defren mo gud tumas.

28 Mo i neva bin gat wan pipol we oli kasem moa blesing bitim hemia we olgeta i kasem, mo kam antap gud moa tru long han blong Lod. Mo oli stap long wan graon we i gud tumas bitim evri graon, from Lod i bin talemaot samting ia.

29 Mo i bin hapen se Lib i bin laef plante yia, mo i gat ol boe mo ol gel; mo tu, hem i gat Hiatom.

30 Mo i bin hapen se Hiatom i rul long ples blong papa blong hem. Mo taem we Hiatom i bin rul blong twante mo fo yia, luk, oli tekemaot kingdom long hem. Mo hem i bin wok plante yia olsem slef, yes, blong evri dei blong hem we i bin stap.

31 Mo hem i bin gat Het, mo Het i stap laef olsem slef long evri dei blong hem. Mo Het i gat Eron, mo Eron i stap olsem slef long evri dei blong hem; mo hem i gat Amnigada, mo Amnigada tu i bin stap olsem slef long evri dei blong laef blong hem; mo hem i bin gat Koriantum, mo Koriantum i stap olsem slef long evri dei blong hem; mo hem i gat Kom.

32 Mo i bin hapen se Kom i bin sakemaot haf blong kingdom. Mo hem i rul ova long haf blong kingdom blong foti mo tu yia; mo hem i go blong faet agensem king, Amgid, mo oli bin faet blong spes blong plante yia, long taem ia Kom i kasem paoa ova long Amgid, mo bin kasem paoa ova long narafala pat blong kingdom we i stap.

33 Mo long ol dei blong Kom, i bin stat blong gat ol stilman long graon; mo oli bin tekem ol olfala plan, mo i givim ol ^astrong promes folem fasin blong olgeta blong bifo, mo oli lukaotem bakegen blong prapa spolem gud kingdom.

34 Nao Kom i bin faet agensem olgeta plante; be, hem i no bin win agensem olgeta.