1 Mo i bin hapen se Jared mo brata blong hem, mo ol famli blong olgeta, mo tu, ol fren blong Jared, mo brata blong hem mo ol famli blong olgeta, oli go daon long vale we i stap long Not, (mo nem blong vale i ^aNimrod, we oli singaotem afta strong man ia blong lukaotem animol long bus) wetem ol animol blong olgeta we oli karem i kam tugeta, man mo woman blong evri kaen.

2 Mo tu, oli bin putum ol rop blong holem animol mo kasem ol pijin blong skae; mo tu, oli mekem rere wan kontena we insaed long hem i gat ol fis blong wota we oli karem wetem olgeta.

3 Mo tu, oli bin karem wetem olgeta deseret, we, long lanwis ia, i wan sugabag; mo olsem ia nao oli bin karem wetem olgeta ol grup blong ol sugabag, mo evri kaen samting we i stap long fes blong graon, ol sid blong evri kaen.

4 Mo i bin hapen se taem we oli kam daon insaed long vale blong Nimrod, Lod i kam daon mo toktok wetem brata blong Jared; mo hem i stap insaed long wan ^aklaod, mo brata blong Jared i no bin luk hem.

5 Mo i bin hapen se Lod i givim oda long olgeta se oli mas go long waelples, yes, insaed long ples ia we i neva bin gat man i go bifo. Mo i bin hapen se Lod i go long fored blong olgeta, mo i toktok wetem olgeta long taem we hem i stanap insaed long wan ^aklaod, mo i talemaot long olgeta weaples oli mas wokbaot.

6 Mo i bin hapen se oli wokbaot long waelples, mo oli bildim ol sip, we wetem ol sip ia, oli krosem plante wota, mo han blong Lod i bin lidim olgeta oltaem.

7 Mo Lod i no bin wantem letem se oli mas stop bitim solwota long waelples, be hem i wantem se oli mas go kasem ^agraon blong promes, we i moa gud tumas bitim evri narafala graon, we Lod God i bin holem i stap blong wan pipol we oli gat stret mo gud fasin.

8 Mo long kros blong hem, hem i bin mekem strong promes long brata blong Jared, se eni man we bae i stap long graon blong promes, stat long tetaem ia i go mo blong oltaem, i mas ^awok blong hem, we hem nomo i God mo i tru, sapos no, bae oli mas ^bbrumaot olgeta long taem we kros blong hem we i fulwan bae i kam long olgeta.

9 Mo nao, mifala i save luk ol loa blong God long saed blong graon ia, se hem i wan graon blong promes; mo eni kantri we bae i stap long hem, i mas wok blong God, o bae God i brumaot olgeta long taem we kros blong hem we i fulwan bae i kam long olgeta. Mo kros blong hem we i fulwan i kam long olgeta long taem we oli raep long rabis fasin.

10 From luk, hemia i wan graon we i gud tumas bitim evri narafala graon; taswe, hem we i stap long hem, bae i wok blong God, o bae God i brumaot olgeta; from hemia i loa blong God we i no gat en. Mo hemia bae i no hapen kasem taem we rabis fasin long medel blong ol pikinini blong graon ia i ^afulwan, we bae God i ^bbrumaot olgeta.

11 Mo hemia i kam long yufala, O yufala Ol ^aJentael, blong yufala i save gat save long saed blong ol loa blong God—blong yufala i save sakem sin, mo no gohed long rabis fasin blong yufala kasem taem we i fulwan i kam, blong yufala i no mekem kros blong God we i fulwan i kam daon long yufala, olsem we olgeta we oli stap laef long graon ia oli bin mekem bifo long taem ia.

12 Luk, hemia i wan gudfala graon tumas, mo eni kantri we bae i stap long hem, bae i ^afri long fasin blong stap slef, mo i no stap andanit long narafala paoa, mo i fri long evri narafala kantri andanit long heven, sapos bae oli ^bwok nomo blong God blong graon ia, we i Jisas Kraes, we i bin soemaot hem tru long ol samting we mifala i bin raetem.

13 Mo nao mi gohed wetem histri blong mi; from luk, i bin hapen se Lod i tekem Jared mo ol brata blong hem i kam kasem bigfala solwota ia we i seraotem ol kantri. Mo taem we oli kam long solwota oli stanemap ol tenet blong olgeta; mo oli singaotem nem blong ples ia, Moriankama; mo oli stap long ol tenet, mo oli stap long ol tenet long so blong solwota blong spes blong fo yia.

14 Mo i bin hapen se long en blong fo yia, Lod i kam bakegen long brata blong Jared, mo i stanap insaed long wan klaod mo i toktok wetem hem. Mo blong spes blong tri aoa Lod i toktok wetem brata blong Jared, mo i ^astretem hem from hem i no bin tingbaot blong ^bsingaotem nem blong Lod.

15 Mo brata blong Jared i bin sakem sin, from nogud fasin we hem i bin mekem, mo hem i singaotem nem blong Lod from ol brata blong hem we oli stap wetem hem. Mo Lod i talem long hem: “Bae mi fogivim yu mo ol brata blong yu long ol sin blong olgeta, be yufala i no mas mekem sin bakegen, from yufala i mas tingbaot se ^aSpirit blong mi bae i no ^bwok oltaem wetem man; taswe, sapos bae yufala i mekem sin kasem taem we yufala i raep fulwan, bae Lod i katem yufala aot long fored blong hem. Mo hemia i ol tingting blong mi long saed blong graon we bae mi givim long yufala blong graon we i kam long ol papa; from bae i wan graon we i ^dgudfala tumas bitim evri narafala graon.”

16 Mo Lod i bin talem: “Go blong wok mo bildim ol sip, folem semfala fasin we yufala i bin bildim bifo.” Mo i bin hapen se brata blong Jared i go wok, mo tu, ol brata blong hem, mo oli bildim ol sip long semfala fasin we oli bin bildim bifo, folem ol ^ainstraksen blong Lod. Mo ol sip ia oli smol, mo oli no hevi long solwota, semmak olsem wan pijin blong skae we i no hevi antap long wota.

17 Mo oli bin bildim olgeta long wan fasin we oli strong mo ^asat gud, mekem se oli save holem wota olsem wan dis; mo botom blong olgeta i strong mo sat gud olsem wan dis; mo ol saed blong olgeta i strong mo sat gud olsem wan dis; mo ol en blong olgeta i bin sap; mo ol ples antap blong olgeta i strong mo sat gud olsem wan dis; mo longfala blong olgeta i olsem longfala blong wan tri; mo doa blong olgeta, taem we oli sarem, i strong mo sat gud olsem wan dis.

18 Mo i bin hapen se brata blong Jared i prea long Lod, i talem: “O Lod mi bin mekem wok ia we yu talem long mi blong mekem, mo mi bin mekem ol sip ia folem wanem we yu bin talem long mi.

19 Mo luk, O Lod, insaed long olgeta i no gat eni laet; ?weaples nao bae mifala i stia? Mo tu, mifala bae i ded, from insaed long olgeta, bae mifala i no save pulum win, be win we i stap insaed long olgeta nomo; from hemia, bae mifala i ded.”

20 Mo Lod i bin talem long brata blong Jared: “Luk, bae yufala i mekem wan hol long ples antap, mo tu, long andanit; mo taem we bae yufala i sot long win, bae yufala i openem hol mo kasem win. Mo sapos i olsem se wota i kam insaed long yufala, luk, bae yufala i sarem hol, blong mekem se yufala i no save ded long wota we i kam insaed.”

21 Mo i bin hapen se brata blong Jared i mekem olsem, folem wanem we Lod i talem.

22 Mo hem i bin prea bakegen long Lod, i talem: “O Lod, luk mi bin mekem olsem we yu givim oda long mi blong mekem; mo mi mekem rere ol sip blong ol pipol blong mi, mo luk, i no gat eni laet insaed long olgeta. Luk, O Lod, ?bae yu letem se bae mifala i krosem bigfala wota ia long tudak?”

23 Mo Lod i bin talem long brata blong Jared: “?Wanem nao yu wantem se mi mas mekem blong yufala i save gat laet insaed long ol sip blong yufala? From luk, yufala i no save gat ol windo, from bae oli brokbrok long pisis; mo tu, bae yufala i no tekem faea wetem yufala, from bae yufala i no mas go wetem laet blong faea.

24 From luk, bae yufala i stap olsem wan welfis long medel blong solwota; from bigfala hil blong ol wef bae oli foldaon long yufala. Be bae mi karem yufala i kam antap bakegen aot long ol dip ples blong solwota; from ol ^awin oli kamaot long maot blong mi, mo tu, ol ^bren mo ol wota, mi nao mi sendem i go.

25 Mo luk, mi mekem rere yufala agensem olgeta samting ia; from yu no save krosem bigfala dip solwota ia, sapos mi no mekem yufala i rere agensem ol wef blong solwota, mo ol win we oli blo i go, mo ol wota we bae oli kam antap bigwan. From hemia, ?wanem nao yu wantem se bae mi mas mekem blong yu blong mekem se yufala i save gat laet long taem we ol dip ples blong solwota oli kavremap yufala?”