1 Mo i bin hapen se Oraeha, i mekem wok blong jaj long graon, long stret mo gud fasin, long evri dei blong hem, we ol dei ia blong hem oli plante tumas.

2 Mo hem i bin gat ol boe mo ol gel; yes, hem i gat teti mo wan, we long medel blong olgeta i bin gat twante mo tri boe.

3 Mo i bin hapen se hem i gat Kib tu long taem we hem i olfala. Mo i bin hapen se Kib i rul long ples blong hem; mo Kib i gat Korihor.

4 Mo taem we Korihor i kasem teti mo tu yia, hem i go agensem papa blong hem, mo hem i go mo i stap long graon blong Nihor; mo hem i gat ol boe mo ol gel, mo oli kam naes tumas; from samting ia Korihor, i pulum plante pipol blong folem hem.

5 Mo taem we hem i pulum wan ami i kam tugeta, hem i kam antap long graon blong Moron, ples we king i stap long hem, mo i tekem hem olsem prisena, we hemia i mekem se ^atoktok blong brata blong Jared i kamtru, we i talem se bae oli tekem olgeta olsem prisena.

6 Nao graon blong Moron, ples we king i stap long hem, i kolosap long graon we Ol Man blong Nifae oli singaotem Emti.

7 Mo i bin hapen se Kib i stap long kalabus wetem ol pipol blong hem andanit long Korihor, boe blong hem, kasem taem we hem i kam olfala tumas; be Kib i gat Sul long taem we hem i olfala, taem we hem i stap yet long kalabus.

8 Mo i bin hapen se Sul i kros long brata blong hem; mo Sul i kam strong, mo hem i kam strong olsem paoa blong wan man; mo tu, hem i bin strong long saed blong jajmen.

9 Taswe, hem i kam long hil Efrem, mo hem i meltem aean aot long hil ia, mo mekem ol naef blong faet aot long aean, blong olgeta we hem i pulum olgeta i go wetem hem, mo afta we hem i bin mekem olgeta i rere blong faet wetem ol naef blong faet, hem i gobak long bigtaon Nihor, mo hem i faet agensem brata blong hem Korihor, tru long ol wei ia, hem i kasem kingdom mo givimbak long papa blong hem, Kib.

10 Mo nao from samting we Sul i bin mekem, papa blong hem i bin givim long hem kingdom long hem; from hemia, hem i stat blong rul long ples blong papa blong hem.

11 Mo i bin hapen se hem i mekem jajmen long stret mo gud fasin; mo hem i mekem kingdom blong hem i gro long ful fes blong graon, from namba blong ol pipol oli kam plante tumas.

12 Mo i bin hapen se Sul tu i gat plante boe mo gel.

13 Mo Korihor i bin sakem sin blong ol plante nogud fasin we hem i bin mekem; from samting ia Sul i givim long hem paoa long kingdom blong hem.

14 Mo i bin hapen se Korihor i gat plante boe mo gel. Mo long medel blong ol boe blong Korihor, i gat wan we nem blong hem i Noa.

15 Mo i bin hapen se Noa i go agensem Sul, we i king, mo tu, papa blong hem Korihor, mo hem i pulum i gowe brata blong hem, Kohor, mo tu, evri brata blong hem mo plante long ol pipol.

16 Mo hem i faet agensem Sul, we i king, tru long faet ia hem i kasem graon we i kam long ol fasfala papa blong olgeta; mo hem i kam wan king ova long pat ia blong graon.

17 Mo i bin hapen se hem i bin faet bakegen agensem Sul, we i king; mo hem i tekem Sul, we i king, mo i karem hem i gowe olsem prisena long Moron.

18 Mo i bin hapen se taem we hem i rere blong kilim hem i ded, ol boe blong Sul oli bin wokbaot sloslo i go insaed long haos blong Noa long naet, mo oli kilim hem i ded, mo oli brekemdaon doa blong kalabus mo oli tekemaot papa blong olgeta, mo oli putum hem long bigfala jea blong hem long kingdom blong hem.

19 Taswe, boe blong Noa i bildimap kingdom blong hem long ples blong hem. Be oli no kasem paoa bakegen ova Sul we i king, mo ol pipol we oli bin stap andanit long rul blong Sul we i king, oli kam antap gud tumas mo oli kam strong.

20 Mo kantri i bin split; mo i gat tu kingdom, kingdom blong Sul, mo kingdom blong Kohor, boe blong Noa.

21 Mo Kohor, boe blong Noa, i bin mekem se ol pipol blong hem i mas faet agensem Sul, we long faet ia Sul i bin winim olgeta mo i kilim Kohor i ded.

22 Mo nao Kohor i gat wan boe we oli singaotem Nimrod; mo Nimrod i bin lego kingdom blong Kohor long Sul, mo hem i winim gladhat blong Sul; taswe Sul i bin givim ol gudfala samting we oli bigwan long hem, mo hem i mekem samting long kingdom blong Sul olsem we hem i wantem.

23 Mo tu, long taem blong rul blong Sul, ol profet oli bin kam long medel blong ol pipol, we Lod i bin sendem olgeta, oli profesae se fasin nogud mo fasin blong ol pipol blong ^awosipim aedol bae i karem wan strong nogud tok i kam long graon, mo bae Lod i kilim olgeta i ded sapos oli no sakem sin.

24 Mo i bin hapen se ol pipol oli tok agensem ol profet, mo jikim olgeta. Mo i bin hapen se king Sul i mekem jajmen agensem olgeta evriwan we oli bin tok agensem ol profet.

25 Mo hem i bin mekem wan loa truaot long ful graon, we i givim paoa long ol profet blong oli save go long eni ples we oli wantem; mo tru long stamba tingting ia, oli bin mekem ol pipol oli kam blong sakem sin.

26 Mo from ol pipol oli sakem ol rabis fasin blong olgeta mo ol fasin blong wosipim ol aedol, Lod i letem olgeta oli stap laef, mo oli stat blong kam antap gud bakegen long graon. Mo i bin hapen se Sul i gat ol boe mo ol gel long taem we hem i olfala.

27 Mo i nomo bin gat ol wo long ol dei blong Sul; mo hem i tingbaot ol bigfala samting we Lod i bin mekem from ol papa blong hem, blong tekem olgeta oli ^akrosem bigfala solwota i go long promes graon; taswe, hem i mekem jajmen long stret mo gud fasin blong evri dei blong hem.