1 Ha Ñandejára heʼi Jared joykeʼýpe oguejy hag̃ua yvytýgui Ñandejára renondégui, ha tohai umi mbaʼe ohechavaʼekue; ha oñembotove oñeʼẽ hag̃ua yvypóra raʼykuérape umívagui oñemopuʼã rire peve kurusu ári; ha upévare rréi Mosíah oñongatu, ani hag̃ua og̃uahẽ yvórape ndahaʼéiramo Cristo ojehechauka rire itavayguakuérape.

2 Ha Cristo ojehechauka rire añetehápe itavayguakuérape, haʼe heʼi ojehechaukavaʼerãha umíva.

3 Ha koʼág̃a, kóva rire, opavave hoʼa jegueroviaʼỹme; ha ndopytái avave ndahaʼéiramo lamanita-kuérante, ha umíva orrechasa Cristo evanhélio; upévare ojeʼe chéve añomi hag̃ua koʼãva yvýpe.

4 Péina ápe, che ahaíkuri koʼã pláncha ári umi mbaʼe ohechavaʼekue Jared joykeʼy; ha arakaʼeve ndojehechaukaivaʼekue mbaʼe tuichavéva umi ojehechaukavaʼekuégui Jared joykeʼýpe.

5 Upévare Ñandejára heʼíkuri chéve ahai hag̃ua umíva; ha che ahaíkuri. Ha heʼi chéve asella hag̃ua; ha heʼi avei chéve asella hag̃ua iñehesaʼỹijo; upévare che asella umi intérprete, Ñandejára heʼi haguéicha.

6 Ñandejára heʼígui chéve: Ndohomoʼãi hikuái gentil-kuérape ndahaʼéiramo ára oñearrepenti vove hikuái hembiapovaígui, ha taipotĩ Ñandejára renondépe.

7 Ha ára omombaʼapo vove jerovia cherehe, heʼi Ñandejára, jepeve ojapo haguéicha Jared joykeʼy, oñemomarangatu hag̃ua hikuái chepype, upéramo ahechaukáta chupekuéra umi mbaʼe ohechavaʼekue Jared joykeʼy, jepe aipyso peve henondepekuéra opa che rrevelasiõ, heʼi Jesucristo, Tupã Raʼy, yvagakuéra ha yvy Ru, ha opa mbaʼe oĩvagui ipype.

8 Ha oñorairõva Ñandejára ñeʼẽ rehe, toñemoñeʼẽngái; ha pe onegáva koʼã mbaʼe, toñemoñeʼẽngái; koʼãvape ndahechaukamoʼãigui mbaʼe tuichavéva, heʼi Jesucristo; che haʼégui pe oñeʼẽva.

9 Ha che haʼégui ojepeʼa ha oñemboty yvagakuéra; ha che ñeʼẽ rupi oryrýita yvy; ha che rembiapoukapýre oikóva ipype ohasáta, jepeve tata rupiguáicha.

10 Ha pe ndogueroviáiva che ñeʼẽ ndogueroviái che remimboʼekuérape; ha che nañeʼẽiramo, pehusga peẽ; ára pahápe peikuaátagui che haʼeha pe oñeʼẽva.

11 Ha pe ogueroviáva koʼã ñeʼẽ haʼéva, ajúta chupe che espíritu jehechaukápe, ha oikuaáta ha omeʼẽta testimónio. Ha che espíritu rupi oikuaáta koʼã mbaʼe añeteguaha; omokyreʼỹgui yvyporakuérape ojapo hag̃ua iporãva.

12 Ha oimeraẽ mbaʼe omokyreʼỹva yvyporakuérape ojapo hag̃ua iporãva ou chehegui; iporãva ndoʼúi haguére avavégui ndahaʼéiramo chehegui añónte. Che haʼe pe ogueraháva yvyporakuérape opa mbaʼe iporãvape; ha ndogueroviáiva che ñeʼẽ ndojeroviamoʼãi avei cherehe—che haʼeha; ha pe cherehe ndojeroviáiva ndojeroviamoʼãi Túva chembouvaʼekuére. Ha péina ápe, che haʼe pe Túva, che haʼe tesape ha tekove, ha yvorapegua añetegua.

13 Peju cherendápe, O gentil-kuéra, ha ahechaukáta peẽme umi mbaʼe tuichavéva, pe kuaapy oñeñomivaʼekue jegueroviaʼỹ rupi.

14 Peju cherendápe, O Israel róga, ha ojehechaukáta peẽme tuichaite mbaʼe Túva oñongatuvaʼekue peẽme g̃uarã, yvóra ñepyrũmby guive; ha nog̃uahẽiva peẽme jegueroviaʼỹ rupi.

15 Ha péina ápe, pemondoro vove pe jegueroviaʼỹ vélo penderejáva pene ñeime vaiete tembiapoñañáme, ha korasõ atãme, ha apytuʼũ ypytũme, upéramo mbaʼe tuicha ha hechapyrãva oñeñomivaʼekue pendehegui yvóra ñepyrũmby guive—heẽ, pejerure vove Túvape che rérape, korasõ mirĩ ha espíritu ñembyasy reheve, upéramo peikuaáta Túva imanduʼaha konvénio ojapovaʼekuére ñande rukuéra ndive, O Israel róga.

16 Ha upéramo ojehechaukáta opavave tavayguakuéra resa renondépe che rrevelasiõnguéra ajapoukavaʼekue tojehai che rembiguái Juan rehe. Penemanduʼáke, pehechávo koʼã mbaʼe, peikuaáta hiʼag̃uimaha añetehápe ára ojehechaukatahápe umíva.

17 Upévare, oñemeʼẽ vove peẽme ko kuatiajehaipyre, peikuaáta Túva rembiapo oñepyrũmaha opa yvy ape ári.

18 Upévare, peñearrepenti opavave peẽ yvy paha, ha peju cherendápe, ha pejerovia che evanhéliore, ha peñemongarai che rérape; pe oguerovia ha oñemongaraíva ojesalváta haguére; ha katu pe ndogueroviáiva oñekondenáta; ha che réra ogueroviáva rapykuéri ohóta techaukahakuéra.

19 Ha ojehovasapyre upe ára pahápe ojejuhúva ijerovirekoha che rérare, oñemopuʼãtagui oiko hag̃ua rréino oñembosakoʼíva chupe g̃uarãme yvóra ñepyrũmby guive. Ha péina ápe, che haʼe pe añeʼẽvaʼekue umíva. Amén.