1 U fi żmien Kom ġew ukoll bosta profeti, u huma bdew iħabbru dwar il‑qerda ta’ dak il‑poplu kbir jekk huma jibqgħu ma jindmux, u ma jdurux lejn il‑Mulej, u ma jieqfux milli jkomplu joqtlu u jagħmlu l‑ħażen.

2 U ġara li n‑nies ma laqgħux għandhom lill‑profeti, u huma telqu b’ħarba għal għand Kom biex huwa jagħtihom kenn, għax in‑nies ippruvaw joqtluhom.

3 U l‑ħwejjeġ li huma ħabbru lil Kom kienu bosta; u hu kien imbierek għall‑bqija ta’ ħajtu.

4 U huwa għex ħajja twila mhux ħażin, u hu wiled lil Xiblom; u Xiblom beda jsaltan minfloku. U ħu Xiblom ħadha kontrih, u fil‑pajjiż ingħata bidu għal gwerra mill‑aktar kbira.

5 U ġara li ħu Xiblom ordna li l‑profeti kollha li jħabbru dwar il‑qerda tal‑poplu għandhom jingħataw il‑mewt;

6 U diżgrazzja kbira laqtet lill‑pajjiż kollu, għax huma kienu xehdu li saħta kbira kellha tolqot lill‑pajjiż, kif ukoll lin‑nies, kif ukoll li kien se jkun hemm qerda sħiħa fosthom, li bħalha qatt ma kien deher qabel fuq wiċċ l‑art, u li għadamhom kien se jispiċċa bħal munzell ramel fuq wiċċ l‑art jekk huma jibqgħu ma jindmux minn ħżunithom.

7 U huma baqgħu ma jridux jisimgħu minn kliem il‑Mulej, minħabba l‑alleanzi ħżiena tagħhom; għalhekk, mal‑pajjiż kollu qamu bosta gwerer u qam bosta ġlied, u kien hemm ukoll ġuħ kbir u anke l‑pesta, hekk li huma spiċċaw intlaqtu minn qerda sħiħa, li bħalha qatt ma deher qabel fuq wiċċ l‑art; u dan kollu seħħ fi żmien Xiblom.

8 U n‑nies bdew jindmu minn ħżunithom; u diment li huma bdew jindmu l‑Mulej kellu ħniena minnhom.

9 U ġara li Xiblom safa maqtul, u Set ittieħed fl‑eżilju, u huwa għammar fl‑eżilju ħajtu kollha.

10 U ġara li ibnu Aħa ħa f’idejh is‑saltna; u huwa saltan fuq il‑poplu ħajtu kollha. U f’ħajtu huwa wettaq kull tip ta’ ħażen, u minħabba f’hekk wassal biex jinxtered ħafna demm; u jiemu kienu ftit.

11 U Għetem, li kien ġej min‑nisel ta’ Aħa, ħa f’idejh is‑saltna; u f’ħajtu huwa wkoll wettaq il‑ħażen.

12 U ġara li fi żmien Għetem ġew bosta profeti, u huma reġgħu bdew iħabbru lin‑nies; iva, huma bdew iħabbru li l‑Mulej kien se jeqridhom għal kollox minn fuq wiċċ l‑art jekk huma jibqgħu ma jindmux minn ħżunithom.

13 U ġara li n‑nies webbsu qalbhom, u ma ridux jisimgħu kliemhom; u l‑profeti sewdu qalbhom u telqu minn fost il‑poplu.

14 U ġara li tul ħajtu kollha Għetem għamel ħaqq min‑nies b’mod inġust; u huwa wiled lil Moron. U ġara li Moron beda jsaltan minfloku; u Moron għamel dak li kien ħażin quddiem il‑Mulej.

15 U ġara li qamet rewwixta fost il‑poplu, minħabba l‑alleanza sigrieta li twaqqfet sabiex huma jkunu jistgħu jiksbu s‑setgħa u jakkwistaw; u fosthom qam raġel ħażin mill‑aktar setgħan, u hu mar jiġġieled f’battalja kontra Moron, u rnexxielu jeħodlu nofs is‑saltna; u huwa żamm nofs is‑saltna f’idu għal bosta snin.

16 U ġara li Moron ħadlu lura s‑saltna minn idejh, u b’hekk reġa’ ħadha f’idejh għal darb’oħra.

17 U ġara li qam raġel ieħor setgħan; u hu kien ġejt min‑nisel ta’ ħu Ġared.

18 U ġara li huwa ħareġ rebbieħ fuq Moron u ħa f’idejh s‑saltna; għalhekk, Moron għadda l‑bqija kollha ta’ ħajtu fl‑eżilju; u huwa wiled lil Kurjantor.

19 U ġara li Kurjantor għadda ħajtu kollha fl‑eżilju.

20 U fi żmien Kurjantor ġew ukoll ħafna profeti, u huma bdew iħabbru dwar ħwejjeġ kbar u tal‑għaġeb, u bdew ixandru l‑indiema lin‑nies, li jekk huma jibqgħu ma jindmux il‑Mulej Alla kien sejjer jagħmel ħaqq minnhom li jwassal għall‑qerda sħiħa tagħhom;

21 U li l‑Mulej Alla kien se jwassal biex jiġi poplu ieħor u bil‑qawwa tiegħu jieħu l‑art f’idejh, l‑istess kif huwa kien wassal lil missirijiethom f’din l‑art.

22 U huma ċaħdu dak kollu li qalu l‑profeti, minħabba s‑soċjetà sigrieta u l‑għemejjel mistkerrha tagħhom.

23 U ġara li Kurjantor wiled lil Għeter, u huwa miet, wara li għadda ħajtu kollha fl‑eżilju.