1 Im ālikin men kein ilo jinoin iiō eo kein kaļalem in iien tōl ko aer eaar jino juon aitwerōk ilubwiljin armej ro; bwe juon em̧m̧an, kar etan Amlijai, ekar juon em̧m̧aan etao, aaet, juon em̧m̧aan ejeļāļo̧kjeņ kōn jeļā an laļ, ekar jān laajrak eo an ļeo eaar m̧an ^aGideon kōn jāje, eo kar mej ekkar n̄an kien eo—

2 Kiiō Amlijai in, jān an etao, eaar karreel elōn̄ armej n̄an ļoore; em̧ool jon̄an raar jino kanooj kajoor; im raar jino kijejeto n̄an kōm̧m̧an bwe Amlijai en kiin̄ ioon armej ro.

3 Kiiō men in eaar inepata n̄an armej ro ilo kabun̄ eo, im barāinwōt n̄an aolep ro kar jab bōkļo̧k er jān karreelel ko an Amlijai; bwe raar jeļā bwe ekkar n̄an kien eo aer men rot kein reaikuj jutak jarjar jān ^aainikien armej ro.

4 Kōn menin, n̄e en kar maron̄ bwe Amlijai en aikuj kar bōke ainikien armej ro, e, āinwōt juon em̧m̧aan enana, enaaj kar ^abōbrae jān er jim̧we ko im anemkwōj ko an kabun̄ eo; bwe eaar an kōttōpar n̄an ko̧kkure Kabun̄ eo an Anij.

5 Im ālikin men kein armej ro raar kuk tok ippān doon ilo aolepān āneo, kajjojo armej ekkar n̄an an ļōmņak, men̄e eaar ņae ak jab ņae Amlijai, ilo kumi ko reoktak, ilo eļap inepata im ^aaitwerōk ko rekabwilōn̄lōn̄ ippān doon.

6 Im āindein raar aintok doon n̄an kwaļo̧k ainikier kōn n̄an men in; im ainikier raar pād im̧aan riekajet ro.

7 Im ālikin men kein ainikien armej ro eaar itok ņae Amlijai, bwe en jab kiin̄ ioon armej ro.

8 Kiiō men in eaar kōm̧m̧an eļap m̧ōņōņō ibūruōn ro raar jum̧ae e; a Amlijai eaar kalim̧otak ro raar jepiaan n̄an illu ņae ro raar jab jepiaan.

9 Im ālikin men kein raar kuk tok ippān doon, im raar kapene Amlijai bwe en aer kiin̄.

10 Kiiō ke Amlijai kar kōm̧m̧an bwe en kiin̄ ioer eaar jiron̄ er bwe ren kotak aer kein tariņae ņae ro jeir im jatier; im men in eaar kōm̧m̧an bwe en maron̄ bōk er an.

11 Kiiō armej in Amlijai kar alikkar jān āt eo Amlijai, kar etaer ^ariAmlijai; im ro bweier kar etaer ^briNipai, ak armej in Anij.

12 Kōn menin armej in Nipai ro raar jeļā kōn kōttōpar eo an riAmlijai ro, im kōn menin raar m̧aanjāppopo n̄an iioon er; aaet, raar kōpooj er kōn jāje ko, im kōn jāje ko reddik, im kōn lippo̧ņ ko, im kōn m̧ade in lippo̧ņ ko, im kōn dekā ko, im kōn buwat ko, im kōn ^akein tariņae ko otemjeļo̧k.

13 Im āindein raar pojak n̄an iioon ro riAmlijai ilo iien aer itok. Im eaar wōr kapen ro jitōn̄ er, im kapen ro reutiejļo̧k, im kapen ro reutiejtata, ekkar n̄an oran ko aer.

14 Im ālikin men kein Amlijai eaar kōpooj em̧m̧aan ro an kōn aolep kein tariņae otemjeļo̧k; im eaar barāinwōt jitōn̄ irooj im ritōl ro ioon armej ro an, n̄an tōl er n̄an pata ņae ro jeir im jatier.

15 Im ālikin men kein ro riAmlijai raar itok ioon bat Aminaiu, eo eaar pād iturear in ^areba Sidon, eo eaar ettōr iturinļo̧k ^bāneen Zaraemla, im ijo raar jino kōm̧m̧an tariņae ippān ro riNipai.

16 Kiiō Alma, āinwōt juon ^ariekajet eutiejtata im kabna in armej in Nipai, kōn menin eaar wanlōn̄ļo̧k ippān armej ro an, aaet, ippān kapen ro an, im kapen ro reutiejtata, aaet, ijo ilōn̄tata ilo jarin tariņae ko an, ņae ro riAmlijai n̄an pata.

17 Im raar jino n̄an m̧an ro riAmlijai ioon bat eo iturear in Sidon. Im ro riAmlijai raar ire ippān riNipai ro kōn eļap kajoor, jon̄an elōn̄ iaan ro riNipai raar wōtlo̧k im̧aan riAmlijai ro.

18 Mekarta, Irooj eaar kōkajoorļo̧k pein riNipai ro, bwe ren m̧an riAmlijai ro kōn eļap m̧anm̧an, bwe ren kar jino ko im̧aer.

19 Im ālikin men kein riNipai ro raar lukwarkware riAmlijai ro aolepān raan eo, im kar m̧ane er kōn eļap m̧anm̧an, jon̄an eaar wōr ^amej jān riAmlijai ro jon̄oulruo to̧ujin limabukwi jiln̄uul im ruo armej; im oran ro remej jān riNipai ro jiljino to̧ujin limabukwi jiljinon̄oul im ruo armej.

20 Im ālikin men kein ke Alma eaar jab maron̄ lukwarkware riAmlijai ro ļo̧k wōt eaar kōm̧m̧an bwe armej ro an ren kajutak em̧ kōppād ko aer ilo ^akom̧laļ in Gideon, kom̧laļ eo kar etņake Gideon eo ekar mej jān pein ^bNior kōn jāje; im ilo kom̧laļ in ro riNipai raar kalōki em̧ kōppād ko aer n̄an bon̄ōn eo.

21 Im Alma eaar jilkinļo̧k riiaron̄ron̄ ro n̄an ļoor ro bwe in riAmlijai ro, bwe en maron̄ jeļā kōn karōk ko im kōttōbalbal ko aer; bwe en maron̄ oņaake e ņae er, bwe en maron̄ kōjparok armej ro an jān jako.

22 Kiiō ro eaar jilkinļo̧k er n̄an lale kāām an ro riAmlijai kar etaer Zeram, im Amnor, im Mantai, im Limer; errein ro raar ilo̧k ippān em̧m̧aan ro aer n̄an lale kāām ko an riAmlijai ro.

23 Im ālikin men kein ilo raan eo ilju raar bar ro̧o̧l n̄an kāām eo an riNipai ro ilo eļap kaiur, im raar kanooj bwilōn̄, im kar obrak kōn eļap mijak, im ba:

24 Lo, kōm ar ļoor kāām eo an ^ariAmlijai ro, im n̄an kanooj bwilōn̄ eo am, ilo āneen Minan, itulōn̄in āneen Zaraemla, ilo iaļ eo ļo̧k n̄an āneen ^bNipai, kōm ar lo elōn̄ bwijin in riLeman ro; im lo, riAmlijai ro raar kobaļo̧k ippāer;

25 Im rej ioon ro jeid im jatid ilo āne en; im rej ko im̧aer ilo elōn̄ oran ko, im kōrā ro pāleer, im ro nejier, ļo̧k n̄an jikin kwelo̧k eo ad; im n̄e jej jab kaiur renaaj bōk jikin kwelo̧k eo ad, im ro jemād, im kōrā ro pāleer, im ro nejid renaaj mej.

26 Im ālikin men kein armej in Nipai raar bōk em̧ kōppād ko aer, im ilo̧k jān kom̧laļ in Gideon ļo̧k n̄an jikin kwelo̧k eo aer, eo eaar jikin kwelo̧k in ^aZaraemla.

27 Im lo, ke raar kijoone reba Sidon, riLeman im riAmlijai ro, ke raar ^akanooj lōn̄, ilo kar wāween eo, āinwōt bok ko in parijet, raar iabon̄e er n̄an ko̧kkure er.

28 Mekarta, kōnke riNipai ro kar ^akōkajoor er jān pein Irooj, raar jar ilo kajoor n̄an e bwe en oņaake er jān pein rikōjdat ro aer, kōn menin Irooj eaar ron̄ kūr ko aer, im kar kōkajoor er, im riLeman ro im riAmlijai ro raar wōtlo̧k im̧aer.

29 Im ālikin men kein Alma eaar ire ippān Amlijai kōn jāje, erro n̄an doon, im raar ire ilo eļap kajoor, juon ippān eo juon.

30 Im ālikin men kein Alma, kōnke eaar armej in Anij, kōnke eaar m̧akūtkūt kōn eļap ^atōmak, eaar lam̧ōj, im ba: O Irooj, kwōn tūriam̧okake im dāpij aō mour, bwe in maron̄ juon kein jerbal ilo Peim n̄an kōjparok im lo̧mo̧o̧ren armej rein.

31 Kiiō ke Alma em̧ōj an ba naan kein eaar bar ire ippān Amlijai; im kar kōkajoorļo̧k e, jon̄an eaar m̧an Amlijai kōn jāje eo.

32 Im eaar barāinwōt ire ippān kiin̄ eo an riLeman ro; a kiin̄ eo an riLeman ro eaar ko likļo̧k jān im̧aan Alma im eaar jilkinļo̧k ribaar ro an n̄an ire ippān Alma.

33 A Alma, ippān ro an ribaar, raar ire ippān ribaar ro an kiin̄ eo an riLeman ro m̧ae iien eaar m̧ane im kokak likļo̧k er.

34 Im āindein eaar kōmajaj bwidej eo, a m̧ool eo kappe eo, eo eaar pād iturilikin reba Sidon, im juļo̧k ānbwinnin riLeman ro raar mej ilo dān ko in Sidon, bwe āindein armej ro an en wōr jikin aer kijoone im ire ippān riLeman ro im riAmlijai ro iturilikin reba Sidon.

35 Im ālikin men kein raar aolep kijoone reba Sidon riLeman ro im riAmlijai ro raar jino ko im̧aer, men̄e jon̄an lōn̄ eo aer reban kar maron̄ bwine oraer.

36 Im raar ko im̧aan riNipai ro ļo̧k n̄an āne jem̧aden eo irilik im iōn̄, ļo̧k jān tōrerein ko an āneo; im riNipai ro raar lukwarkware er kōn aer kajoor, im kar m̧ane er.

37 Aaet, kar iioone er jān jabdewōt jikin, im kar iabon̄e im kokak er, m̧ae iien raar jeplōklōk ijo irilik im ijo iōn̄, m̧ae iien raar tōpare āne jem̧aden eo, ekar etan Ermoun; eo eaar obrak kōn kidu ko rawiia im rekwōle.

38 Im ālikin men kein elōn̄ raar mej ilo āne jem̧aden jān kinej ko aer, im kar maat jān kidu awiia ko im barāinwōt bao in mejatoto ko; im di ko dier kar loi, im raar ejoujik ioon laļ.