Capitulo 29
An pag-abot han Libro ni Mormon amo an tigaman nga an Ginoo in nagtikang ni hin pagtirok han Israel ngan tumanon adton iya mga kauyonan — Adton dire nakarawat han iya mga padayag ha urhi nga mga adlaw ngan hadton iya mga hatag in susumpaon.
1 Ngan yana kitaa, nasiring ako ha iyo nga kun an Ginoo kumita nga angay na, dida ha iya kinaadman, nga ine nga mga panaad in maabot ngadto ha mga Gentil subay han iya pulong, ngan mahibabaroan niyo nga an kauyonan nga ginhimo han Amay ngadto han mga anak ni Israel, mahitungod han pagpahiuli ngadto han katunaan nga ira panorundon, in yana nagtitikang hin pagkatuman.
2 Ngan iyo hibabaroan nga an mga saad han Ginoo, nga iginluwas han iya mga baraan nga mga propeta, in ngatanan matutuman; ngan dire kamo makakasiring nga an Ginoo in naglalangan han iya pag-abot ngadto han mga anak han Israel.
3 Ngan dire niyo kinahanglan paghuna-hunaon ha iyo mga kaburut-on nga adto nga mga saad nga iginyakan in kawang la, kay kitaa, hinunumduman han Ginoo adton iya mga kauyonan nga iya ginhimo ngadto han sulod balay ni Israel.
4 Ngan kun makita niyo nga ine nga mga pulong in umabot ha iyo, sugad dire kaangayan nga kamo in dire kumarawat hadton haruhalaba nga mga buruhaton han Ginoo, kay an iya espada han hustisya in aada han iya too nga kamot; ngan kitaa, hadto nga tiarabot nga adlaw, kun kamo in dire kumarawat han iya mga buruhaton iya hihimoon nga ikaw in mahiabotan hito.
5 Kairo hadton nagdudumire han mga buruhaton han Ginoo; oo, ngan kairo niya nga igindidiwara hi Cristo ngan han iya mga buruhaton!
6 Oo, ngan kairo hadton iginbabali-waray adton mga pahayag han Ginoo, ngan nasiring nga an Ginoo in dire na naghihimo hin mga pahayag, o panagna, o adton mga regalo, o mga pinulungan, o mga pagtambal, o an gahum han Espiritu Santo!
7 Oo, ngan kairo hiya nga nasiring hadto nga tiarabot nga adlaw, agud makakuha hin pulos, nga waray na milagro nga ginhimo ni Jesucristo; kay hiya nga magbubuhat hine in magigin sugad han anak han karat-an, nga diin hiya in waray na kaluoy, subay han tugon ni Cristo!
8 Oo, ngan dire na kinahanglan mag-iha nga kamo in magsinggit pa, ngan magdumire, ngan pagmolayan adton mga Judiyo, ngan bisan ano man nga nahisalin hadton sulod balay ni Israel; kay kitaa, an Ginoo in nahinunumdum han iya mga kauyonan ngadto ha ira, nga iya bubuhaton ngadto ha ira an subay han iya iginsaad.
9 Sanglit dire niyo maisisiring nga iyo mahimo lisoon adton too nga kamot han Ginoo ngadto ha wala, nga dire niya buhaton adton paghukom ha pagtuman han mga kauyonan nga iya ginhimo ngadto ha sulod balay ni Israel.