1 Kamatuoran, kamatuoran, nga nasiring ako ha iyo nga kamo in maglimos ha kablas; kundi maghirot kamo nga an iyo paglimos in dire ha atubangan han tawo agud makita nira; kun dire waray kamo kakarawaton nga pahalipay ha iyo Amay nga aada ha langit.

2 Sanglit, kun maglimos kamo ayaw niyo paghuypi an budyong ha atubangan niyo, sugad han ginbubuhat han mga epokrita ha mga sinagoga ngan ha mga kakarsadahan, agud hira in magkamay-ada hin kahimayaan ha tawo. Kamatuoran nasiring ako ha iyo, may-ada na hira pahalipay.

3 Kundi san-o kamo maglimos pasagdi nga dire mahibaroan han wala nga kamot nimo an ginbubuhat han too nga kamot;

4 Agud an iyo paglimos in masekreto; ngan an iyo Amay nga nakakita hin sekreto, hiya ngahaw in magpapahalipay hin dayag ha iyo.

5 Ngan kun kamo in mag-aampo ayaw kamo pagsubad han mga epokrita, tungod kay nahihigugma hira nga mag-ampo, nga nakatukdaw ha mga sinagoga ngan ha mga eskina han mga dalan, nga agud hira in makita han tawo. Kamatuoran nasiring ako ha iyo, nga hira in mayada na pahalipay.

6 Kundi, kun kamo in nag-aampo, sakob kamo ha iyo sulod, ngan kun iyo masadhan an iyo purtahan, pag-ampo kamo ha iyo Amay nga aada ha sekreto; ngan an iyo Amay, nga nakita han sekreto, in pahahalipayan kamo hin dayag.

7 Kundi kun kamo mag-aampo, ayaw kamo paggamit hadton waray pulos nga pabalik-balik, sugad han ginbubuhat hadton mga waray bunyagi, kay kasiring nira nga pamamatian hira han duro nga pagyinakan.

8 Ayaw kamo pagsubad ha ira, kay maaram an iyo Amay han mga butang nga kinahanglanon niyo san-o kamo umaro ha iya.

9 Ha sugad hine nga paagi in mag-ampo kamo: Amay namon nga aada ha langit, dayawon an imo ngaran.

10 Matuman an imo pagburut-an dinhe ha tuna sugad man ha langit.

11 Ngan pasayloon mo kami han amon mga utang, sugad man han amon pagpasaylo han mga nakautang ha amon.

12 Ngan ayaw kami pagdad-a ha pagsulay, kundi talwason mo kami ha magraot.

13 Kay imo an ginhadian, ngan an gahum, ngan an kahimayaan, ha kadayonan. Amen.

14 Kay, kun iyo pasasayloon an tawo ha ira pakasala an iyo Amay ha langit in magpapasaylo liwat ha iyo;

15 Kundi kun dire niyo papasayloon an mga tawo ha ira mga sala an iyo Amay ha langit in dire liwat magpapasaylo han iyo mga sala.

16 Labot la hine, kun san-o kamo in magpupuasa ayaw kamo pagsugad han mga epokrita, nga may masulob-on nga mga nawong, kay ginpaparaot nira an ira mga nawong agud lumutaw ha tawo nga hira in nagpupuasa. Kamatuoran nasiring ako ha iyo, mayada na hira pahalipay.

17 Kundi kamo, kun kamo in nagpupuasa, hisoi an iyo mga ulo, ngan hiram-osi an iyo mga nawong;

18 Nga dire mahisabotan han tawo nga ikaw in nagpupuasa, kundi ngadto la han imo Amay, nga aadto ha sekreto; ngan an imo Amay, nga nakita ha sekreto, in pahahalipayan ka hin dayag.

19 Dire kamo magtirok hin karikohan ha tuna, kun hain an bokbok ngan an taoy in nakakaperdi, ngan an mga kawatan in nagpipirit nga makasulod ngan mangawat;

20 Kundi magtirok kamo para ha iyo kalugaringon karikohan ha langit, nga diin waray bokbok o taoy nga nakakaperdi, nga ha diin an mga kawatan in dire magpipirit pagsulod ngan mangawat.

21 Kay kun hain an iyo mga karikohan, aadto liwat an iyo mga kaburut-on.

22 An kalamrag han iyo lawas amo an mata; kun, masugad, an iyo mata in tangkod, an iyo bug-os nga lawas in mapupuno hin kalamrag.

23 Kundi kun an iyo mata in maraot, an bug-os nga lawas in mapupuno hin kasisidman. Kun, kundi, an kalamrag nga aada ha iyo in kasisidman, ano kadako adton kasirum!

24 Waray tawo nga makakagserbi ha duduha nga agaron; kay hain man ha duha iya kauuritan an usa ngan hihigugmaon liwat an usa, o kun dire mag-uupod hiya ha usa ngan pagpapakaraoton an usa. Dire ka poydi makagserbi ha Diyos ngan han Manggad.

25 Ngan yana ine nahitabo nga han igyakan ni Jesus ine nga mga tugon hiya in sumiplat han 12 nga iya ginpili, ngan nagsiring ha ira: Hinumdumi an mga tugon nga akon iginyakan. Kay kamatuoran, kamo adton akon ginpili nga magserbi ngada hine nga mga tawo. Sanglit nasiring ako ha iyo, ayaw kamo kabaraka para ha iyo kinabuhi, kun ano it iyo kakaonon, o kun ano it iyo iimnon; o han iyo mga lawas, kun ano it iyo igsusul-ot. Dire ba an kinabuhi in duro hin ka labaw pa han pagkaon, ngan an lawas kontra han panapton?

26 Kitaa an mga tamsi ha kalangitan, dire hira nagtatanom, bisan an pag-aani o naninirok ngadto han kamalig; kundi hira in ginpapakaon han langitnon nga Amay. Dire ba kamo in duro hin ka labaw pa ha ira?

27 Hin-o ha iyo ha paghunahuna hine in makakagdugang hin usa nga siko ha iya panlawas?

28 Ngan kay ano nga nababaraka kamo ha pamanapton? Huna-hunaa an mga liryo ha kapatagan kun ano an ira pagtubo; dire hira nagbubuhat, bisan an pagsamay;

29 Kundi nasiring ako ha iyo, nga bisan hi Solomon, ha bug-os niya nga himaya, in waray pagpanaptoni, sugad ha usa hine ha ira.

30 Sanglit, kun an Diyos in nagpapanapton han mga banwa ha kapatagan, nga yana in aada, ngan ha pagkabuwas in iglalabog didto han hudno, sugad man pagpapanaptonan niya kamo, kun dire gutiay an iyo pagtuo.

31 Sanglit ayaw kamo kabaraka, nga nagsisiring, Ano an amon kakaonon? o, Ano an amon iinomon? o, Hain matikang an amon igsusul-ot?

32 Kay maaram an iyo Amay ha langit nga kinahanglan niyo an ngatanan hine nga waray kinabuhi nga butang.

33 Kundi pamilnga anay niyo an ginhadian han Diyos ngan an iya katadungan, ngan ngatanan hine nga waray kinabuhi nga butang in mahidudugang ha iyo.

34 Sanglit ayaw kamo kabaraka para hit buwas, kay an buwas in mababaraka ha mga nahuna-huna para ha iya kalugaringon. Igo na an adlaw han iya kamaraot.