1 Ngan yana ine nahitabo nga han igsiring ni Jesus ine nga mga tugon lumingi hiya ngahaw ngadto han kadam-am, ngan gin-abrehan niya ngahaw an iya baba ha ira liwat, ngan nagsiring: Kamatuoran, kamatuoran, nasiring ako ha iyo, ayaw Paghukom, agud dire kamo paghukman.

2 Kay kun ano an paghukom nga ihuhukom niyo, kamo in paghuhukman; ngan ha ano nga igsusukol niyo, adto in igsusukol liwat ha iyo.

3 Ngan kay ano nga ginkikita mo an mota nga aada han mata han imo bugto, kundi waray mo huna-hunaa an mota nga aada ha imo kalugaringon nga mata?

4 O paonan-o mo isisiring ha imo bugto: Pabay-i nga kuhaon ko an mota ha imo mata — ngan kitaa, usa nga puling in aada ha imo mata?

5 Ikaw nga epokrita, kuhaa anay an puling nga aada ha imo mata; ngan kun masugad malinaw mo nga makikita an pagkuha han mota nga aada ha mata han imo bugto.

6 Ayaw niyo ihatag an ano man nga baraan ngadto ha mga ayam, o iglabog an mga perlas ha mga baboy, bangin tamakan nira han ira mga tiil, ngan ha paglingi pagpapang-iton kamo nira.

7 Pangaro, ngan ine in ighahatag ha imo; pamiling, ngan ikaw in makakaagi; tuktok, ngan ito in aabrehan para ha imo.

8 Kay an ngatanan nga nangangaro, in nakakakarawat; ngan hiya nga nanmimiling, in nakakaagi; ngan hiya nga nagtutuktok, in ina-abrehan.

9 O ano nga tawo kamo, nga, kun mangangaro an anak hin tinapay, tatagan hiya hin bato?

10 O kun umaro hiya hin isda, tatagan ba hiya hin halas?

11 Kun hi kamo liwat, bisan magraot, in maaram maghatag hin maupay nga regalo ngadto hit iyo mga anak, asay pa ba daw an iyo Amay nga aada ha langit in maghatag hin mag-upay nga mga butang hadton nangangaro ha iya?

12 Sanglit, an ngatanan nga buruhaton nga buot niyo nga buhaton han tawo ha iyo, buhata man liwat niyo ha ira, kay amo ine an mga kasugoanan ngan an mga propeta.

13 Sakob kamo han suok nga purtahan; kay haluag an purtahan, ngan haluag an dalan, nga nagtitipakadto ha karat-an, ngan damo adton masulod ngadto;

14 Tungod kay suok an purtahan, ngan haligot an dalan, tipakadto ha kinabuhi, ngan gutiay la an makakaagi hito.

15 Mag-ikmat kamo han mga dire tinuod nga mga propeta, nga nadaup ha iyo nga nakasul-ot hin panapton sugad hin karnero, kundi ha sakob amo in mabangis nga hayop.

16 Makikilala niyo hira pinaagi ha ira mga bunga. An tawo ba in namumurot hin ubas ha mga sapinit, o igos ha mga dawa?

17 Sugad an kada maupay nga puno hin kahoy in nabunga hin maupay nga bunga; kundi an maraot nga puno in nagbubunga hin maraot nga bunga.

18 An maupay nga puno hin kahoy in dire magbubunga hin maraot nga bunga, bisan liwat an maraot nga puno hin kahoy dire magbubunga hin maupay nga bunga.

19 Kada kahoy nga dire magbubunga hin maupay in pupudlon, ngan ilalabog ngadto ha kalayo.

20 Sanglit, ha ira mga bunga makikilala niyo hira.

21 Dire an kada usa nga nagsisiring ha akon, Ginoo, Ginoo, in makakasulod han ginhadian han langit; kundi hiya la nga nagbubuhat han kaburut-on han akon Amay nga aadto ha langit.

22 Damo an magsisiring ha akon hadto nga urhi nga adlaw: Ginoo, Ginoo, dire ba kami in nanagna pinaagi ha imo ngaran, ngan pinaagi ha imo ngaran in nagpalayas han yawa, ngan ha imo ngaran in nagbuhat kami hin damo nga mga urusahon?

23 Ngan hadto in igsasaysay ko ha ira: Dire ko kamo mga kilala; iwas kamo ha akon, kamo nga magburuhat hin karat-an.

24 Sanglit, adton namamati hine nga mga ginyakan ko ngan dire magbuhat hine, in masusugad hadton makinaadmanon nga tawo, nga nagtukod han iya balay ha bawbaw han bato —

25 Ngan pumusdak an uran, ngan umabot an baha, ngan humuyop an hangin, ngan humampas hadto nga balay; ngan waray katumba, kay ine in gintukod ha bawbaw ha bato.

26 Ngan kada usa nga nakakabati hine nga mga pulong ngan kun dire nagbubuhat in isusugad ko han usa nga tawo nga lurong, nga nagtukod ha iya balay ha baras —

27 Ngan pumusdak an uran, ngan umabot an baha, ngan humuyop an hangin, ngan humampas hadto nga balay; ngan adto in natumba, ngan makusog an pagkatumba hadto.