Scriptures
3 Nefi 29


Kapítulo 29

E salimentu na lus di e Buki di Mormon ta un señal ku Señor a kuminsa rekohé Israel i kumpli su konvenionan — Esnan ku rechasá su revelashonnan i donnan den e delaster dia lo wòrdu maldishoná.

1 I awor ata’ki, mi ta bisa boso ku ora Señor haña ta bon, den su sabiduría, pa e palabranan aki yega na e gentilnan segun su palabra, e ora ei boso por sa ku e konvenio ku e Tata a hasi ku e yunan di Israel, tokante nan restourashon na e teranan di nan herensia, a kuminsa wòrdu kumplí kaba.

2 I boso por sa ku e palabranan di Señor, ku a wòrdu bisá pa e profetanan Santu, tur lo wòrdu kumplí; i boso no tin mester di bisa ku Señor ta tarda su binida na e yunan di Israel.

3 I boso no tin mester di imaginá den boso kurason ku e palabranan ku a wòrdu bisá ta envano, pasobra ata awor, Señor lo kòrda su konvenio ku el a hasi ku su pueblo di e kas di Israel.

4 I ora boso weta e palabranan aki parse entre boso, e ora ei boso no tin ku hasi bofon mas di e echonan di Señor, pasobra e spada di su hustisia ta den su man drechi; i ata, na e dia ei, si boso hasi bofon di su echonan e lo laga esei alkansá boso lihé.

5 Ai di esun ku ta hasi bofon di e echonan di Señor; si, ai di esun ku lo ninga e Cristo i su obranan!

6 Si, ai di esun ku lo ninga e revelashonnan di Señor, i ku lo bisa ku Señor no ta traha mas pa revelashon, òf pa profesía, òf pa donnan, òf pa lenga, òf pa sanidat, òf pa e poder di Spiritu Santu!

7 Si, ai di esun ku e dia ei lo bisa, pa haña rikesa, ku no por tin milager efektuá pa Jesucristo; pasobra esun ku hasi esaki lo bira manera e yu di pèrdishon, pa kende no tabatin miserikordia, segun e palabra di Cristo!

8 Si, i boso no tin mester di flùit mas, ni hasi bofon; ni tenta e hudiunan, ni ningun di e restu di e kas di Israel; pasobra ata, Señor ta kòrda su konvenio na nan, i e lo hasi na nan segun loke el a hura.

9 Di manera ku boso no mester suponé ku boso por bira e man drechi di Señor na man robes, pa e no ehekutá huisio te na e kumplimentu di e konvenio ku el a hasi na e kas di Israel.