1 Ia oqo, oi kemudou na wekaqu lomani, au sa wilika na veika oqo mo dou kila kina na veiyalayalati ni Turaga ka a veiyalayalati kina vei ira kece na mataqali i Isireli—

2 Ni a vosa vei ira na Jiu, ena gusudra na nona parofita tabu, mai na ivakatekivu, mai na itabatamata ki na itabatamata, me yacova na gauna era na vakalesui kina ki na lotu dina kei na lomanibai ni Kalou; ni ra na vakasoqoni vata ki na veivanua sa nodra ivotavota vakawa, ka ra na vakataudeitaki ena veivanua yalataki kecega.

3 Raica, oi kemudou na wekaqu lomani, au sa vosataka vei kemudou na veika oqo mo dou reki kina, ka laveta cake na ulumudou me sega ni mudu, ena vuku ni veivakalougatataki ka na solia na Turaga na Kalou vei ira na luvemudou.

4 Ka’u sa kila ni vuqa vei kemudou sa vakasaqara vakalevu me kila na veika ena yaco mai; ia au sa kila ni dou sa kila ni na vuca vakaidina na yagoda ka mate yani; ia, ena yagoda ga eda na raica kina na Kalou.

5 Io, au kila ni dou sa kila ni na vakaraitaki Koya vakayago vei ira era tiko voli mai Jerusalemi, na vanua eda a lako mai kina; ni sa kilikili me vakayacori ena kedra maliwa; ia sa kilikili vua na Dauniveibuli cecere me soli Koya me ra lewai koya na tamata ena bula vakayago, ka mate ena vukudra na tamata kecega, me na qai lewai ira rawa kina na tamata kecega.

6 Ia me vaka ni sa na yaco na mate ki na tamata kecega, me vakayacori kina na nona ituvatuva loloma na Dauniveibuli cecere, sa dodonu kina me dua na kaukauwa ni tucake tale mai na mate, ia sa dodonu kina me na tucake tale mai na mate na tamata ena vuku ni lutu tani; ka sa yaco na lutu tani ena vuku ni talaidredre; ia ena vuku ni sa lutu tani na tamata era sa muduki tani kina mai na nona iserau na Turaga.

7 O koya, sa dodonu kina me dua na veisorovaki tawayalani—ia kevaka sa sega na veisorovaki tawayalani ena sega ni tawavuca rawa na ka sa vuca rawarawa oqo. Ia, na imatai ni lewa sa tau vua na tamata ena mani tu ga ka tawacava rawa. Ia kevaka me vaka kina, ena vakadavori sobu na yago oqo me vuca ka kavuru yani vua na tinana sai koya na qele, me sega vakadua tale ni tucake.

8 O na nona yalomatua na Kalou, na nona loloma cecere kei na nona loloma soli wale! Raica, kevaka sa sega ni tucake tale na yago sa na qai lewa kina na yaloda na agilosi ka a lutu tani mai na iserau ni Kalou Tawamudu, ka yaco me tevoro, me sega vakadua tale ni tucake.

9 Ka na yaco me vakataki koya na yaloda, ka eda na yaco me tevoro, me agilosi ni tevoro, ka sogoti tani mai na iserau ni noda Kalou, ka tiko vata ga kei koya na tama ni ka lasu, ena rarawa, me vakataki koya; io, ki vei koya ka a vakacalai rau na noda itubutubu taumada, ka vakamataliataki koya me vaka e dua na agilosi ni rarama, ia sa vakayavalati ira na luve ni tamata ki na veisoqosoqo vuni ni laba kei na veimataqali cakacaka vuni ni butobuto kecega.

10 A ka levu vakaidina na nona vinaka na noda Kalou, ka sa vakarautaka e dua na sala me da dro kina mai na ivesu ni manumanu rerevaki oqo; io, na manumanu ko ya, ko mate kei eli, ka’u vakatoka me mate vakayago, kei na mate vakayalo talega.

11 Ia ena vuku ni sala ni nona veisereki na noda Kalou, na Yalo Savasava ni Isireli, na mate oqo ka’u a vosa kina, sai koya na mate vakayago, ena sereki ira mai na nona mate; ka sai koya na ibulubulu.

12 Kei na mate oqo ka’u a vosa kina, sai koya na mate vakayalo, ena sereki ira mai na nona mate; ia na mate vakayalo sai eli; o koya erau na sereki ira mai kina na nodrau mate ko mate kei eli, ka na sereki ira mai na yalo sa vesuka tu ko eli, ka na sereki ira mai na yago sa vesuka tu na ibulubulu, ka rau na cokoti vata tale na yago kei na yalo ni tamata; a sa yaco na ka oqo ena kaukauwa ni nona tucake tale mai na mate na Yalo Savasava ni Isireli.

13 A ka levu vakaidina na nona ituvatuva na noda Kalou! Ia ena yasana ka dua, ena sereka mai na parataisi ni Kalou na yalodra na ivalavala dodonu, ka na sereka mai na ibulubulu na yagodra na ivalavala dodonu; ka rau na cokoti vata tale na yalo kei na yago; ka ra na tawavuca rawa tale na tamata kecega, ka tawa mate rawa tale, ka ra sa bula vakayalo, ka ra na kila ka me vakataki keda ena bula vakayago oqo, ia ena taucoko sara na noda kila ka.

14 O koya, eda na kila vinaka kina na noda cala kecega, na noda dukadukali, kei na noda luvaiwale; ia ko ira na ivalavala dodonu era na kila vinaka na nodra marau, kei na nodra ivalavala dodonu, ni ra sa vakaisulu tu ena savasava, io, ena isulu ni ivalavala dodonu.

15 Ka na qai yaco ni ra sa na lako sivita na imatai ni mate oqo, ki na bula, na tamata kecega, ka ra sa yaco me tawamate rawa tale, era na qai rairai ki na idabedabe ni veilewai i koya na Yalo Savasava ni Isireli; ena qai yaco na veilewai, ka ra na qai lewai kina me vaka na nona lewa tabu na Kalou.

16 Ia me vaka sa bula vakaidina na Turaga, ni sa kaya na Turaga na Kalou, ka sa nona vosa tawamudu, ka sega ni rawa ni takali yani, ni ko ira era sa ivalavala dodonu era na ivalavala dodonu tiko ga, kei ira era sa dukadukali era na dukadukali tiko ga; ia, ko ira na dukadukali sai koya na tevoro kei ira na nona agilosi; era na lako tani yani ki na bukawaqa tawavakaiyalayala, sa vakarautaki vei ira; kei na nodra yaluma sa vaka na drano bukawaqa kei na sulifure, ka sa tubu cake me sega ni mudu ka sega ni mudu na kena yameyame ka sega na kena icavacava.

17 Io na qaqa kei na lewa dodonu ni noda Kalou! Ni sa dau vakayacora na nona vosa kecega, ka ra sa lako yani mai gusuna, ka na vakayacori ga na nona lawa.

18 Ia, raica, ko ira na ivalavala dodonu, ko ira na nona yalododonu na Yalo Savasava ni Isireli, ko ira era sa vakabauta na Yalo Savasava ni Isireli, ko ira era sa vosota na vei kauveilatai ni vuravura, ka beca na kena maduataki; era na taukena na matanitu ni Kalou, ka sa vakarautaki tu ena vukudra mai na tauyavutaki ni vuravura, ka na vuabale na nodra marau me sega ni mudu.

19 Io na levu ni nona loloma cecere na noda Kalou, na Yalo Savasava ni Isireli! Ni sa sereki ira na nona yalododonu mai na manumanu rerevaki ko ya na tevoro, na mate, kei eli, kei na drano bukawaqa kei na sulifure ko ya, sai koya na yaluma tawacava.

20 Io na levu ni nona savasava na noda Kalou! Ni sa kila na ka kecega, ka sa sega ni dua na ka me sega ni kila.

21 Ka sa lako mai ki vuravura me vakabulai ira na tamata kecega kevaka era na vakarorogo ki na domona; ia raica, sa colata ko koya na nodra mosi na tamata kecega, io, na nodra mosi na veika bula kecega, na tagane, kei na yalewa, kei na gone, ka ra lewe ni vuvale i Atama.

22 Ka sa vosota ko koya na ka kece oqo me ra rawata kina na tucake tale mai na mate na tamata kecega, me ra na tu kecega e matana ena siga ni veilewai levu.

23 Ka sa vakaroti ira na tamata kecega me ra veivutuni, ka papitaiso ena yacana, ka vakabauta taucoko vakaidina na Yalo Savasava ni Isireli, de ra na sega ni vakabulai rawa ena matanitu ni Kalou.

24 Ka kevaka era na sega ni veivutuni ka vakabauta na yacana, ka papitaiso ena yacana, ka vosota me yacova na ivakataotioti, era na cudruvi; ni sa kaya na Turaga na Kalou na Yalo Savasava ni Isireli.

25 O koya sa solia kina ko Koya e dua na lawa; ia ni sa sega ni soli e dua na lawa, sa sega ni dua na itotogi; ia ni sa sega na itotogi sa sega na cudruvi; ia ni sa sega na cudruvi sa qai yacovi ira na loloma cecere nei koya na Yalo Savasava ni Isireli, ena vuku ni veisorovaki; ni ra sa sereki ena nona kaukauwa.

26 Ni sa sauma na veisorovaki na ka sa gadrevi ena nona lewa dodonu kivei ira kece ka sega ni soli vei ira na lawa, me ra sereki kina mai na manumanu rerevaki ko ya, ko mate kei eli, kei na tevoro, kei na drano bukawaqa kei na sulifure, sai koya na yaluma tawacava; ka ra sa vakalesui tale vua na Kalou o koya ka a solia vei ira na icegu ni bula, o koya na Yalo Savasava ni Isireli.

27 Ia ena ca vei koya sa soli vua na lawa, io, ka sa kila na ivakaro kecega ni Kalou, me vakataki keda, ka qai talaidredre kina, ka vakamaumautaka na nona veisiga ni vakatovolei, ni na ca sara ko koya!

28 Io na nona inaki qaseqase na vu ni ca! Io na nodra viavialevu, kei na nodra malumalumu, kei na nodra lialia na tamata! Ni ra sa kilaka era nanuma ni ra sa vuku, ka ra sega ni vakarorogo ki na ivakasala ni Kalou, ni ra sa biuta vakatikitiki ka nanuma era sa kilaka vaka ira ga, o koya, sa ka lialia kina na nodra yalomatua ka sega ni yaga vei ira. Ia era na rusa ga.

29 Ia sa vinaka na kilaka kevaka era vakarorogo ki na ivakasala ni Kalou.

30 Ia ena ca vei ira sa vutuniyau, ko ira era sa vutuniyau ena veika vakavuravura. Ni ra sa vutuniyau era sa beci ira kina na dravudravua, ka vakacacani ira sa yalomalua, ka ra sa lomana ga na nodra iyau; o koya sa nodra kalou kina na nodra iyau. Ka raica, na nodra iyau ena rusa vata kei ira.

31 Ka na ca vei ira sa didivara ka ra sega ni rogoca; ni ra na rusa.

32 Ena ca vei ira sa mataboko ka sega ni raica; ni ra na rusa talega.

33 Ena ca vei ira sa sega ni cilivi na yalodra, ni na yaviti ira na nodra kila na nodra caka cala ena siga mai muri.

34 Ena ca vua sa dau lasu, ni na biu sobu ki eli ko koya.

35 Ena ca vua na daulaba ka sa nakita me veivakamatei, ni na mate ko koya.

36 Ena ca vei ira sa ia na veibutakoci, ni ra na biu sobu ki eli.

37 Io, ena ca vei ira sa dau qarava na veimatakau, ni sa rekitaki ira ko koya na nodra tevoro na tevoro kecega.

38 Ka, me vakalekalekataki ga, ena ca vei ira kecega era sa mate ena nodra ivalavala ca; ni ra na lesu tale vua na Kalou, ka raica na matana, ka ra na tiko ga ena nodra ivalavala ca.

39 Oi kemudou na wekaqu lomani, mo dou nanuma na ca levu ni talaidredre vua na Kalou Yalosavasava, kei na ca levu ni noda soli keda ki na veitemaki i koya na dau lawaki ko ya. Dou nanuma matua, ni sa vu ni mate na gadreva na itovo vakayago, ia sa vu ni bula tawamudu na gadreva na itovo vakayalo.

40 O oi kemudou na wekaqu lomani, dou vakatudaliga ki na noqu vosa. Dou nanuma na nona cecere o Koya na Yalo Savasava ni Isireli. Dou kakua ni kaya ni’u sa vosataka na veika dredre me baleti kemudou; ni kevaka dou sa kaya vakakina, dou na vosa vakacacataka na dina; ni’u sa vosataka na vosa i Koya sa Buli kemudou. Au kila ni sa saqata na vosa dina na veika tawasavasava; ia ko ira na ivalavala dodonu era sega ni rerevaka, ni ra sa lomana na dina ka sega ni taqaya kina.

41 O koya gona, oi kemudou na wekaqu lomani, dou lako mai vua na Turaga, o koya na Yalo Savasava. Mo dou nanuma ni sa dodonu na nona sala. Raica, sa qiqo na sala me muria na tamata, ia sa davo koto ena dua na sala dodonu e matana, ka sa ivakatawa ni matamata na Yalo Savasava ni Isireli; ka sa sega ni lesia kina e dua tale na tamata; ka sa sega ni dua tale na sala, ena matamata ga; ni na sega ni rawa me vakaisini ko Koya, ni sa yacana na Turaga na Kalou.

42 Ia ko koya yadua sa tukituki, ena dolava vua ko koya; ia ko ira na vuku, kei ira sa kilaka, kei ira sa vutuniyau, ko ira era sa vakalevulevui ira ena vuku ni nodra kilaka, kei na nodra yalomatua, kei na nodra iyau—io, sai ira sa beca ko koya; ka kevaka era na sega ni biuta tani na veika kece oqo, ka okati ira me ra lialia ena mata ni Kalou, ka lako sobu mai ena yalomalumalumu titobu sara, ena sega ni dolava vei ira ko koya.

43 Ia ena vunitaki mai vei ira na veika sa nodra na vuku kei na yalomatua me sega ni mudu—io, na marau ko ya ka sa vakarautaki vei ira na yalododonu.

44 O, oi kemudou na wekaqu lomani, mo dou nanuma na noqu vosa. Raica, au sa luvata tani na noqu isulu, ka kuretaka e matamudou; au sa masuta na Kalou ni noqu vakabulai me ilovi au e matana sa dau raica na ka kecega; o koya, dou na kila kina ena siga mai muri, ni ra na lewai kina na tamata kecega ena nodra ivalavala, ni a vakadinadinataka na Kalou ni Isireli ni’u a kureitaka tani na nomudou caka cala mai yaloqu, ka’u sa tucake ena kequ iserau e matana, ka’u sa galala mai na nomudou dra.

45 O, oi kemudou na wekaqu lomani, dou vuki tani mai na nomudou ivalavala ca; dou kuretaka tani na sinucodo i koya ena vesuki kemudou matua; dou lako mai vua na Kalou o koya na uluvatu ni nomudou vakabulai.

46 Dou vakarautaka na yalomudou ki na siga lagilagi ko ya ni na tau kina na lewa dodonu vei ira na ivalavala dodonu, io na siga ni veilewai, mo dou kakua kina ni kino ena rere vakadomobula; mo dou kakua kina ni nanuma na nomudou cala rerevaki ena kena taucoko, ka uqeti ga mo dou qolouvaka: E dodonu, e dodonu na nomuni lewa, oi kemuni na Turaga na Kalou Qaqa—ia au sa kila na noqu caka cala; au sa talaidredre ki na nomuni lawa, ka sa baleti au ga na noqu cala; ka sa rawai au na tevoro, ka’u sa coko kina ki na nona rarawa rerevaki.

47 Ia raica, oi kemudou na wekaqu, sa kilikili li me’u vakayadrati kemudou mo dou kila na dina ni veika oqo? Au na cukiraka li na yalomudou kevaka e savasava tu na nomudou vakasama? Au na vosa vakamatata li vei kemudou me vaka na matata ni ka dina, kevaka dou a galala tu mai na ivalavala ca?

48 Raica, kevaka dou sa savasava ke’u na vosataka vei kemudou me baleta na veika savasava; ia ni dou sa sega ni savasava ka dou sa okati au me’u nomudou ivakavuvuli, sa dodonu kina ka kilikili me’u vakavulica vei kemudou na isau ni ivalavala ca.

49 Raica, na yaloqu sa vakasisilataka na ivalavala ca; ka sa rekitaka na lomaqu na ivalavala dodonu; ka’u na vakacaucautaka na yacana tabu na noqu Kalou.

50 Dou lako mai, oi kemudou na wekaqu, oi kemudou vakaadua ga sa viagunu, dou lako mai ki na wai; kei koya sa sega vua na ilavo, dou lako mai ka volivoli ka kana; io, dou lako mai ka voli waini kei na sucu segai ena ilavo ka sega talega ena isau.

51 O koya, mo dou kakua kina ni vakayagataka na ilavo ena ka sa sega na betena, se na nomudou cakacaka ena ka sa sega ni veivakacegui. Dou vakarorogo matua sara vei au, ka nanuma na vosa au sa vosataka; ka lako mai vua na Yalo Savasava ni Isireli, ka kania na ka sa sega ni ca se vuca rawa, ka laiva na yalomudou me qai marautaka na ka sa uro.

52 Raica, oi kemudou na wekaqu lomani, mo dou nanuma na vosa ni nomudou Kalou; dou masu tiko ga vua ena veisiga, ka vakavinavinaka ki na yacana tabu ena veibogi. Dou laiva me reki na lomamudou.

53 Ka raica na cecere ni veiyalayalati ni Turaga, kei na levu ni nona vakalolovirataki koya vei ira na luve ni tamata; ia ena vuku ni nona cecere, kei na nona loloma soli wale kei na nona loloma uasivi, sa yalataka kina vei keda ni ra na sega ni vakarusai sara vakadua ko ira na noda kawa, ena bula vakayago, ia ena maroroi ira ko Koya; ia era na yaco me dua na tabana yalododonu vei ira na mataqali i Isireli ena veitabatamata mai muri.

54 Ia oqo, oi kemudou na wekaqu, au via vosataka vei kemudou e vuqa tale na ka; ia au na qai tukuna vei kemudou ena mataka na vo ni noqu vosa. Emeni.