1 Ut jo’kan wi’chik: Chex’ab’inq, ex xjunkab’al laj Israel, chejunilex li toqb’ilex chaq ut alinasinb’ilex sa’ xk’ab’a’ lix maa’usilaleb’ laj k’aak’alenel re lin tenamit; relik chi yaal, chejunilex li toqb’ilex chaq, li jek’inb’ilex chaq chi najt, li wankex sa’ lin tenamit, ex xjunkab’al laj Israel. Ab’ihomaqin, ex ch’och’ sa’ xyi li palaw, ut chex’ab’inq chaq chi najt, ex tenamit; li Qaawa’ kinixb’oq chalen chaq sa’ lin siyajik; chalen chaq sa’ xsa’ lin na’ kixye chaq resil lin k’ab’a’.

2 Ut kixyiib’ lix tz’uumal we chanchan jun ch’iich’ q’es ru’uj; sa’ xmuhel li ruq’ kinixmuq chaq, ut kinixyiib’ jo’ tzimaj ji’b’il ru; ut sa’ rochoch lix tzimaj kinixmuq chaq;

3 Ut kixye we: Laa’at lin moos, at Israel, li taanimob’resiiq wi’ inloq’al.

4 Toja’ naq laa’in kinye, maak’a’ xyaalal naq kink’anjelak, kinchoy inmetz’ew chi maak’a’ rajb’al ut chi maak’a’ xyaalal; relik chi yaal naq rik’in li Qaawa’ wan inraqb’a-aatin, ut lin k’anjel rik’in lin Dios.

5 Ut anajwan, chan li Qaawa’—li kik’uub’ank we chalen chaq sa’ lin siyajik re tinwanq choq’ xmoos, re xk’amb’al wi’ chaq chik laj Jakob rik’in—us ta moko ch’utub’anb’il ta laj Israel, toj nimaq inloq’al sa’ rilob’aal li Qaawa’, ut lin Dios taawanq choq’ inmetz’ew.

6 Ut a’an kixye: Yal ch’ina na’leb’ naq laa’at tatwanq choq’ inmoos re xwaklesinkileb’ lix teepal laj Jakob, ut re xk’ojob’ankil wi’chik li ke’kole’ xyu’am re laj Israel. Laa’in tatink’e ajwi’ choq’ saqen chiruheb’ laj Gentil, re tatwanq choq’ inkolb’a-ib’ toj sa’eb’ lix maril li ruchich’och’.

7 Jo’ka’in naxye li Qaawa’, laj Tojol rix laj Israel, lix Santil Dios, re li ani xik’ ilb’il xb’aan li winq, re li xik’ uuchinb’il xb’aaneb’ li tenamit, re lix mooseb’ laj taqlanel: Eb’ li rey te’iloq ut te’wakliiq, eb’ li awa’b’ej te’loq’oninq ajwi’, sa’ xk’ab’a’ li Qaawa’ li tiik xch’ool.

8 Jo’ka’in naxye li Qaawa’: Sa’ jun chaab’il hoonal katwab’i, ex ch’och’ sa’ xyi li palaw, ut sa’ xkutankil li kolb’a-ib’ katintenq’a, ut laa’in tinkol aawix, ut tink’e aawe lin moos choq’ sumwank chiru li tenamit, re xk’ojob’ankil li ruchich’och’, re xk’eeb’al chi eechaniik li sachenaqil eechanihom;

9 Re naq laa’at tatruuq chixyeeb’al reheb’ li preex: Ayuqex chaq; reheb’ li chunchuukeb’ chaq sa’ q’ojyin: K’utumaq chaq eerib’. Eb’ a’an te’tzekanq sa’eb’ li b’e, ut te’wanq lix wa’leb’aaleb’ pim sa’ chixjunileb’ li taqenaqil na’ajej.

10 Ink’a’ te’tz’okaaq, chi moko te’chaqiq re, chi moko li tiq chi moko li saq’e taasak’oq reheb’; xb’aan naq li ani naruxtaanaheb’ ru tixk’ameb’ xb’e; chire ajwi’ lix yo’leb’aal li ha’ tixb’eresiheb’.

11 Ut tinyiib’ chixjunileb’ lin tzuul choq’ b’e, ut eb’ lin nimb’e te’taqsiiq xloq’al.

12 Ut chirix a’an, ex xjunkab’al laj Israel, k’ehomaq reetal, eb’ a’in te’chalq chaq chi najt, ut ilomaq, eb’ a’in sa’ xnim chaq li saq’e ut sa’ rokeb’aal chaq li saq’e, ut eb’ a’in sa’ li ch’och’ Sinim chaq.

13 B’ichanqex, ex choxa, ut chisaho’q aach’ool, at ruchich’och’, xb’aan naq li roqeb’ li wankeb’ chaq sa’ releb’aal li saq’e te’k’ojob’aaq; ut chejap eere chi b’ichank, ex tzuul; xb’aan naq maajun wa chik te’sak’e’q; xb’aan naq li Qaawa’ xk’ojob’ xch’ool lix tenamit, ut taaruxtaanaheb’ ru li ani re li tawasinb’ileb’.

14 A’ut k’ehomaq reetal, Sion kixye: Li Qaawa’ kinixkanab’ injunes, ut xinsach sa’ xch’ool lin Qaawa’—a’b’an a’an tixk’ut naq moko yaal ta.

15 Xb’aan naq jun li ixq ma naru tab’i’ nasach sa’ xch’ool lix ka’ch’in natu’uk, toj reetal naq ink’a’ tixtoq’ob’a ru li ralom lix k’uub’ xsa’? Relik chi yaal, maare eb’ a’an te’sachq ajwi’ sa’ xch’ool, a’b’anan laa’in ink’a’ tatsachq sa’ inch’ool, at xjunkab’al laj Israel.

16 K’e reetal, katintz’iib’a chiru lix sa’ li wuq’; eb’ laa xaqxookil tz’ak junelik wankeb’ chiwu.

17 Eb’ laa walal aak’ajol te’xseeb’a rib’ sa’ xb’eeneb’ li xe’sachok aawe, ut eb’ li kate’xkanab’ chi sachenaq te’elq chaq aawik’in.

18 Taqsi laa wilob’aal chasutam ut k’e reetal; chixjunileb’ a’in neke’xch’utub’eb’ rib’, ut eb’ a’an te’chalq aawik’in. Ut jo’ naq yo’yookin, chan li Qaawa’, laa’at taatiqib’ aawib’ chi yaal rik’ineb’ chixjunil, jo’ rik’in junaq q’ol, ut taab’ak’eb’ chawix chanchan jun li tuq’ixq taasumlaaq.

19 Xb’aan naq laa sachenaqil ut laa yamyookil na’ajej, ut lix ch’och’il laa sachlijik, sa’ li kutan ajwi’ a’in moko tz’aqalaq ta xb’aan xk’ihaleb’ li wankeb’ chi sa’, ut eb’ li ke’nuq’uk chaq aawe te’wanq chik chi najt.

20 Eb’ li kok’al li te’yo’laaq aawik’in, chirix naq xe’sach chawu li xb’een, te’xye wi’chik sa’ laa xik: Ink’a’ ninkuy xlaatz’al li na’ajej; k’e chaq inna’aj re taawanq wochoch.

21 Toja’ naq taaye sa’ laa ch’ool: Ani x’alank reheb’ a’in choq’ we, rik’in naq xe’sach chiwu lin kok’al, ut laa’in sachenaqin, preexin, ut yalaq b’ar ninb’eek? Ani ut xk’iresink reheb’ a’in? K’ehomaq reetal, kinkanab’aak injunes; eb’ a’in, b’ar xe’wan chaq?

22 Jo’ka’in naxye li Qaawa’ Dios: K’e reetal, laa’in tintaqsi li wuq’ reheb’ laj Gentil, ut tinxaqab’ li weetalil chiruheb’ li tenamit; ut te’xk’ameb’ chaq laa walal sa’eb’ li ruq’, ut eb’ laa rab’in k’amb’ilaqeb’ sa’ xb’eeneb’ xtel.

23 Ut te’wanq rey choq’ yuwa’b’ej aj ch’olanihom aawe, ut li ixqi rey reheb’ choq’ na’b’ej aj ch’olanihom aawe; eb’ a’an te’xhupub’ rib’ chi ch’och’ chawu, ut te’xreq’ lix poqsil laa woq; ut taanaw naq laa’in li Qaawa’, xb’aan naq ink’a’ te’xutaanaq li ani neke’oyb’enink we.

24 Xb’aan naq ma taamaq’e’q tab’i’ chiru li kaw xmetz’ew li yoob’il xb’aan, malaj taakole’q tab’i’ li ani k’eeb’ileb’ chi preexil jo’ chanru li chaq’rab’?

25 A’b’anan jo’ka’in naxye li Qaawa’, lix preexeb’ li kaw xmetz’ew te’isiiq ajwi’, ut lix chapom li xuwajel te’kole’q chaq; xb’aan naq laa’in tinpleeti li ani napleetink aawe, ut tinkoleb’ laa kok’al.

26 Ut eb’ li neke’rahob’tesink aawe tink’e chixtzekaheb’ tz’aqal lix tib’eleb’; te’kalaaq rik’in tz’aqal lix kik’eleb’ chanchan rik’in ki’il viin; ut chixjunil li tz’ejwalej te’xnaw naq laa’in, li Qaawa’, wankin choq’ aj Kolol aawe ut aj Tojol aawix, li Kaw Xmetz’ew re laj Jakob.