1 Ŋwed ete mi Mormon, ewetde ɔnɔ mi, Moroni, ndien ekewet enɔ mi ke ini mibighike emiekekotde mi enɔ ke utom. Ndien ke utɔ usuŋ emi ke enye ekewet ɔnɔ mi, ete:

2 Edima eyen mi, Moroni, ami menem esit ata eti eti nte ke Jehovah Jesus Christ emeti fi, ndien okot fi esin ke utom esie, ye edisana utom esie.

3 Ami meti fi kpukpru ini ke mme akam mi, mbɔŋ akam kpukpru ini nnɔ Ete ke enyiŋ Edisana Eyen esie, Jesus, man enye, oto ke unana utit eti ido ye mfɔn esie, ekpenim fi oto ke ndiyɔ mbuɔtidem ke enyiŋ esie tutu utit.

4 Ndien idahaemi, ami ntiŋ ikɔ nnɔ fi kabaŋa enye emi mfuhɔde mbaŋa ata eti eti; koro enye anam mi mfuhɔ ete ke ana nte mme efaŋa edaha eda ke otu mbufo.

5 Koro, edieke nkɔfiɔde akpanikɔ, mme efaŋa edu ke otu mbufo kabaŋa uduɔk mmɔŋ mkpri nditɔ mbufo.

6 Ndien idahaemi, eyen mi, ami nyom nte yak afo esin ifik anam utom, man esio akamba ndudue emi efep ke otu mbufo; koro, ke ntak emi ke ami ŋwet ŋwed emi.

7 Koro ke ndondo ini emi ami nkopde mme ŋkpɔ emi mbaŋa fi ami mma mbup Jehovah kabaŋa ŋkpɔ emi. Ndien ikɔ Jehovah edisim mi ke odudu Edisana Spirit, ete:

8 Kpaŋ utɔŋ nɔ mme ikɔ Christ, Andifak fi, Jehovah fo ye Abasi fo. Sese, ami nkedi ererimbot idighe ndikot ndinen owo edi mme anam idiɔk ŋkpɔ ete ekabade esit; mbon nsɔŋidem iyomke abia ibɔk, edi mmɔ emi edɔŋɔde; ke ntre, mkpri nditɔ enyene nsɔŋidem, koro mmɔ ikemeke ndinam idiɔk-ŋkpɔ; ke ntre emen isuŋi Adam ekpɔŋ mmɔ ke ami, ete ke enye inyeneke odudu ke idem mmɔ; ndien emen mbet mbobi efep ke ami.

9 Ndien ke utɔ usuŋ emi ke Edisana Spirit akayarade ikɔ Abasi ɔnɔ mi; ke ntre, edima eyen mi, ami mɔfiɔk nte ke edi ata nsahi ke iso Abasi, ete ke ana nte mbufo eduɔk mkpri nditɔ mmɔŋ.

10 Sese ami ndɔhɔ fi nte ke ŋkpɔ emi ke ana nte afo ekpep—edikabade esit ye uduɔk mmɔŋ nnɔ mbon emi efiɔkde idem enyuŋ ekemede ndinam idiɔk-ŋkpɔ; iŋ, kpep mme ete ye mme eka ete ke ana nte mmɔ ekabade esit enyuŋ eduɔk mmɔŋ, ndien esuhɔde idem mmɔ nte mkpri nditɔ mmɔ, ndien eyenyaŋa kpukpru mmɔ ye mkpri nditɔ mmɔ.

11 Ndien mkpri nditɔ mmɔ iyomke edikabade esit, mme uduɔk mmɔŋ. Sese, uduɔk mmɔŋ edi ɔnɔ edikabade esit mbaŋa edisu ibet nnɔ usio ke mme idiɔk-ŋkpɔ.

12 Edi mkpri nditɔ edu uwem ke Christ, kpa tɔŋɔ ke editɔŋɔ ererimbot; midighe ntre, Abasi edi Abasi ubak, ŋko ye Abasi emi ekemede ndikpuhɔde, oŋyuŋ eteŋe mme owo enyin; koro ediwak nditɔ ifaŋ ekpa iduɔkke mmɔŋ!

13 Ke ntre, edieke mkpri nditɔ mibɔhɔ edinyaŋa ke miduɔkke mmɔŋ, mmɔ ekpeka anana utit hell.

14 Sese ami ndɔhɔ fi, nte ke enye emi ekerede ete ke mkpri nditɔ eyom uduɔk mmɔŋ odu ke ata ndot-ndot ye ke mme uruk ukwaŋ-ŋkpɔ; koro enye inyeneke mbuɔtidem, idorenyin, mme ata ima; ke ntre, edieke esibede enye esio ke ini odude ke ekikere oro, ana nte enye ɔsuhɔde aka hell.

15 Koro edi ata ibak ndikere ete ke Abasi anyaŋa eyen kiet ke ntak uduɔk mmɔŋ, ndien ana nte enye oko atak ke ntak emi enye minyeneke uduɔk mmɔŋ.

16 Ɔyɔdɔdiɔk ɔnɔ mmɔ emi edikwaŋade mme usuŋ Jehovah ke utɔ usuŋ emi, koro mmɔ eyetak ibɔhɔke mmɔ ekabade esit. Sese, ami ntiŋ ikɔ ye uko, ke nyenede unen nto Abasi; ndien ami mfeheke se mme owo ekemede ndinam; koro mfɔnmma ima ebin ofuri ndik osio.

17 Ndien ami mɔyɔhɔ ye ata ima, emi edide nsinsi ima; ke ntre, kpukpru nditɔ edi ukem ukem enɔ mi; ke ntre, ami mama mkpri nditɔ ye mfɔnmma ima; ndien mmɔ kpukpru edi ukem ukem ye mme andibuana ke edinyaŋa.

18 Koro mɔfiɔk ke Abasi idighe Abasi ubak, ŋko idighe enye emi ɔkpuhɔrede; edi enye emi mikpuhɔkede tɔŋɔ ke nsinsi sim ofuri nsinsi.

19 Mkpri nditɔ ikemeke ndikabade esit, ke ntre, edi ata ibak ndisin mmɔ mme edisana mbɔm Abasi, koro mmɔ kpukpru edu uwem ke enye ke ntak mbɔm esie.

20 Ndien enye emi ɔdɔhɔde ete ke mkpri nditɔ eyom uduɔk mmɔŋ esin mme mbɔm Abasi, ndien enim ke ikpikpu usio-isop esie ye odudu edifak esie.

21 Ɔyɔdɔdiɔk ɔnɔ utɔ oro, koro mmɔ edu ke afanikɔŋ mkpa, hell, ye anana utit ndutuhɔ. Ami ntiŋ enye uko uko; Abasi ɔnɔ mi uyo. Kpaŋutɔŋ nnɔ mmɔ nyuŋ nam, midighe mmɔ eda ebaŋa mbufo ke itie ikpe Christ.

22 Koro sese ke kpukpru mkpri nditɔ edu uwem ke Christ, ŋko ye kpukpru mmɔ emi minyeneke mbet. Koro odudu edifak edi ɔnɔ kpukpru mmɔ emi minyeneke mbet, ke ntre, enye emi ikpe mitipke, mme enye emi miduhe ke idak utip ikpe, ikemeke ndikabade esit; ndien utɔ oro uduɔk mmɔŋ inyeneke ufɔn ndomo kiet—

23 Edi edi nsahi ke iso Abasi, ndikaŋ mme mbɔm Christ, ye odudu Edisana Spirit esie, ye ndisin idorenyin ke mme obukpo utom.

24 Sese, eyen mi, ŋkpɔ emi ikpinaha edi; koro edikabade esit enyene mbon emi edude ke idak ubiom ikpe ye ke idak isuŋi ubiat mbet.

25 Ndien akpa mfri edikabade esit edi uduɔk mmɔŋ; ndien uduɔk mmɔŋ edi oto mbuɔtidem ɔnɔ edisu ibet; ndien edisu ibet ada usio ke mme idiɔk-ŋkpɔ edi;

26 Ndien usio ke mme idiɔk-ŋkpɔ ada suŋ-suŋ ido, ye nsuhɔde idem ke esit edi; ndien ke ntak suŋ-suŋ ido ye nsuhɔde idem ke esit edidise eke Edisana Spirit edi, Idɔŋesit emi ɔyɔhɔde ye idorenyin ye mfɔnmma ima, ima emi ɔyɔde oto ntiŋ-enyin ke akam, tutu utit edi, ke ini kpukpru mme ndisana owo ediduŋde ye Abasi.

27 Sese, eyen mi, ami nyafiak ŋwet nnɔ fi edieke ami mensɔpke nka enwan ye mme Lamanite. Sese, ntaŋidem obio emi, mme mbon Nephite, owut nsobo mmɔ ibɔhɔke mmɔ eyekabade esit.

28 Bɔŋ akam nnɔ mmɔ, eyen mi, man edikabade esit edisim mmɔ. Edi sese, ami nkop ndik nte ke Spirit etre ndinwana ye mmɔ; ndien ke ŋkaŋ isɔŋ emi mmɔ ŋko ke eyom ndinim ke isɔŋ kpukpru odudu ye unen emi etode Abasi; ndien mmɔ ke ekaŋ Edisana Spirit.

29 Ndien ke ini ema ekesin utɔ akamba ifiɔk oro, eyen mi, ana nte mmɔ esɔp ekpa, ke ntak edisu mme prophecy emi mme prophet eketiŋde, kpa ye mme ikɔ Andinyaŋa nnyin ke idem esie.

30 Tie suŋ, eyen mi, tutu ami nyewet nnɔ fi, midighe nyafiak nsobo ye afo. Amen.