1 Ndien idahaemi ami Moroni, ŋwet mme ikɔ ifaŋ eke ete mi Mormon, emi enye eketiŋde kabaŋa mbuɔtidem, idorenyin, ye ata ima; koro ke utɔ usuŋ emi ke enye eketiŋ ikɔ ɔnɔ mme owo, nte enye ekekpepde mmɔ ke synagogue emi mmɔ ekebɔpde nte ebiet ukpono.

2 Ndien idahaemi ami, Mormon, ntiŋ nnɔ mbufo, ndima nditɔeka mi; ndien edi ke mfɔn Abasi Ete, ye Ɔbɔŋ nnyin Jesus Christ, ye edisana uduak esie, ke ntak enɔ edisana ikot esie emi enye okotde mi, ke enɔ mi odudu nditiŋ ikɔ nnɔ mbufo ke ini emi.

3 Ke ntre, ami nyetiŋ ikɔ nnɔ mbufo emi edide eke ufɔk Abasi, emi edide mbon emem emi etienede Christ, ye emi ebɔde idorenyin emi ekemde ndinam mbufo eduk emem Jehovah, tɔŋɔ ke ini emi ka iso tutu mbufo ekeduɔk odudu ye enye ke heaven.

4 Ndien idahaemi nditɔ eka mi, ami mbiere mme ŋkpɔ emi mbaŋa mbufo ke ntak isaŋ emem mbufo ye nditɔ-owo.

5 Koro ami meti ikɔ Abasi emi ɔdɔhɔde ete ke mme utom mmɔ mbufo eyefiɔk mmɔ; koro edieke mme utom mmɔ efɔnde, ntre mmɔ efɔn ŋko.

6 Koro sese, Abasi ɔdɔhɔ ke owo emi edide idiɔk ikemeke ndinam se ifɔnde; koro edieke enye ɔnɔde enɔ, mme ɔbɔŋde akam ɔnɔ Abasi, ibɔhɔke enye eyenam enye ye esit akpanikɔ idoroke enye ŋkpɔ ndomo kiet.

7 Ndien sese, idibatke inɔ enye ke edinen ido.

8 Koro sese, edieke owo emi edide idiɔk ɔnɔde enɔ, enye anam enye mmeŋe-mmeŋe, ke ntre ebat enɔ enye ukem ukem nte ke enye amamum enɔ oro akama; ke ntre ebat enye nte idiɔk ke iso Abasi.

9 Ndien kpa ntre ŋko ke ebat nte idiɔk enɔ owo, edieke enye edibɔŋde akam ndien idighe ke esit akpanikɔ; iŋ, ndien idoroke enye ŋkpɔ ndomo kiet, koro Abasi ibɔhɔ utɔ oro.

10 Ke ntre, owo emi edide idiɔk ikemeke ndinam se edide eti; ŋko enye idinɔhɔ enɔ emi edide eti.

11 Koro sese, ndondot enyin idim ikemeke ndisio mmɔŋ emi edide eti; ŋko eti enyin idim isioho ndondot mmɔŋ; ke ntre, owo emi edide eyen utom ɔnɔ andidiɔk ikemeke nditiene Christ; ndien edieke enye etienede Christ enye ikemeke ndidi eyen utom nnɔ andidiɔk.

12 Ke ntre, kpukpru ŋkpɔ emi edide eti eto Abasi; ndien enye emi edide idiɔk oto andidiɔk; koro andidiɔk edi asua ye Abasi, ndien anwana ye enye kpukpru ini, ndien okot onyuŋ atap ete enam idiɔk-ŋkpɔ, ndien ete enam se edide idiɔk kpukpru ini.

13 Edi sese, enye emi edide eke Abasi okot onyuŋ atap ete enam eti kpukpru ini; ke ntre, kpukpru ŋkpɔ emi okotde onyuŋ atapde ete enam eti, enyuŋ ema Abasi ndien enam ŋkpɔ enɔ enye, oto Abasi.

14 Ke ntre, ekpeme, ndima nditɔeka mi, ete ke mbufo ibiereke ite ke emi edide idiɔk oto Abasi, mme ite ke emi edide eti ye eke Abasi oto andidiɔk.

15 Koro esese, nditɔeka mi, enɔ mbufo ete ebiere ikpe, man mbufo efiɔk eti eto idiɔk; ndien usuŋ ndibiere ikpe edi iŋwaŋ-iŋwaŋ, man mbufo efiɔk ye ifiɔk emi ɔfɔnde ama, nte uŋwana uwemeyo ɔkpuhɔrede ye ekim okoneyo.

16 Koro esese, enɔ kpukpru owo Spirit Christ, man enye ɔfiɔk eti ye idiɔk; ke ntre, ami nwut mbufo usuŋ ndibiere ikpe; koro kpukpru ŋkpɔ emi okotde ete enam eti, ye ndinam ebuɔtidem ke Christ, enɔ oto ke odudu ye enɔ Christ; ke ntre mbufo emekeme ndifiɔk ye mfɔnmma ifiɔk ke edi eke Abasi.

17 Edi ŋkpɔ ekededi emi anamde mme owo ete enam idiɔk, ndien ibuɔtke idem ke Christ, ndien ekaŋ enye, ndien inamke ŋkpɔ inɔ Abasi, ke ntre mbufo emekeme ndifiɔk ye mfɔnmma ifiɔk ke edi eke andidiɔk; koro ke utɔ usuŋ emi ke andidiɔk anam utom, koro enye inamke owo ndomo kiet enyime ndinam eti, iŋ iŋ, baba kiet, ŋko mme angel esie inamke; ŋko mbon emi esinde idem mmɔ ke idak esie inamke.

18 Ndien idahaemi, nditɔ eka mi, ke ekutde ke mbufo emefiɔk uŋwana emi anade mbufo ebiere ikpe, uŋwana emi edide uŋwana Christ, ekut ete ke mbufo ibiereke ikpe ke ukwaŋ; koro ke ukem ubiere ikpe oro emi mbufo ebierede eyebiere enɔ mbufo ŋko.

19 Ke ntre, ami mekpe mbufo ubɔk, nditɔeka, nte yak mbufo etim eduŋɔde ke uŋwana Christ man mbufo efiɔk eti ye idiɔk; ndien edieke mbufo edimumde kpukpru nti ŋkpɔ ikama, ndien itipke enye ikpe, mbufo ke akpanikɔ eyedi eyen Christ.

20 Ndien idahaemi, nditɔ eka mi, didie ke edi ete ke mbufo emekeme ndimum kpukpru nti ŋkpɔ nkama?

21 Ndien idahaemi ami nyetiŋ mbaŋa mbuɔtidem oro, emi ami nkɔdɔhɔde ke nyetiŋ; ndien ami nyɔdɔhɔ mbufo usuŋ emi mbufo ekemede ndimum kpukpru nti ŋkpɔ nkama.

22 Koro esese, Abasi ke ɔfiɔkde kpukpru ŋkpɔ, ke otode ke nsinsi esim ke nsinsi, esese, enye ama ɔdɔŋ mme angel edinam utom enɔ nditɔ owo, ndinam ayarade kabaŋa edidi Christ; ndien ke Christ ana nte ofuri nti ŋkpɔ edi.

23 Ndien Abasi ŋko ama ɔdɔhɔ mme prophet, ke inua esiemmɔŋ, ete ana Christ edi.

24 Ndien esese, ediwak usuŋ ema edu emi enye akayararede mme ŋkpɔ ɔnɔ nditɔ owo, emi ekedide nti; ndien kpukpru mme ŋkpɔ emi edide eti eto Christ; midighe mme owo ema eduɔ, ndien eti ŋkpɔ ikpidighe itiene mmɔ.

25 Ke ntre, ke utom mme angel, ye ke ofuri ikɔ emi okotode ke inua Abasi ɔwɔrɔ, mme owo ema etɔŋɔ ndinyene mbuɔtidem ke Christ; ndien ke emi ke mbuɔtidem, mmɔ ema emum kpukpru nti ŋkpɔ ekama; ndien emi ke ekedi tutu edidi Christ.

26 Ndien ke oro ebede ke enye ama ekedi ema enyaŋa mme owo ke mbuɔtidem ke enyiŋ esie, mmɔ ekabade edi nditɔ Abasi. Ndien ke akpanikɔ nte Christ odude uwem enye ama etiŋ mme ikɔ emi ɔnɔ mme ete nnyin, ete: Ŋkpɔ ekededi emi mbufo edibeŋede Ete ke enyiŋ mi, emi edide eti, ke mbuɔtidem enimde ete ke mbufo eyebɔ, esese, eyenam enɔ mbufo.

27 Ke ntre, ndima nditɔ eka mi, ndi mme utibe ŋkpɔ etre ke ntak emi Christ ɔkɔdɔkde oduk enyɔŋ, ndien etie ke ubɔk nnasia Abasi, ndibɔ Ete mme unen mbɔm esie emi enye ekenyenede ɔnɔ nditɔ owo?

28 Koro enye ama ɔbɔrɔ mme ntak mbet, ndien enye ama ɔbɔ kpukpru mbon oro emi ekebuɔtde idem ke enye; ndien mmɔ emi ekebuɔtde idem ke enye eyeyire kpukpru nti ŋkpɔ; ke ntre enye ama ekpe emem ke ntak nditɔ owo; ndien enye oduŋ ke nsinsi ke mme heaven.

29 Ndien ke ntak emi enye anamde emi, ndima nditɔeka mi, ndi mme utibe ŋkpɔ etre? Sese ami ndɔhɔ mbufo, Iŋ iŋ; ŋko mme angel itreke ndinam utom nnɔ nditɔ owo.

30 Koro esese, mmɔ edu ke idak ukara esie, ndinam utom nte asaŋade ye ikɔ uyo esie, ewut idem mmɔ enɔ mbon ɔkpɔsɔŋ mbuɔtidem ye nsɔŋɔnda esit ke kpukpru ido uteŋe Abasi.

31 Ndien ubiɔŋ utom mmɔ edi ndikot mme owo ete ekabade esit, ye ndikem nyuŋ nnam utom mme ediomi Ete, emi enye anamde ɔnɔ nditɔ owo, ndibeŋe usuŋ ke otu nditɔ owo, ke ndikwɔrɔ ikɔ Christ nnɔ mme isuŋ utom Jehovah emi emekde, man mmɔ etie ntiense ebaŋa enye.

32 Ndien ke ndinam ntre, Jehovah Abasi ɔnɔ usuŋ ete nyɔhɔ nsuhɔ mme owo ekeme ndinyene mbuɔtidem ke Christ, man Edisana Spirit ekeme ndiyene ebiet ke mme esit mmɔ, nte asaŋade ye odudu esie; ndien ke utɔ usuŋ emi Ete anam ete etibe, mme ediomi emi enye anamde ɔnɔ nditɔ owo.

33 Ndien Christ ɔdɔhɔ ete: Edieke mbufo edinyenede mbuɔtidem ke ami mbufo eyenyene odudu ndinam ŋkpɔ ndomo kiet ekededi emi ɔfɔnde ke ami.

34 Ndien enye ɔdɔhɔ ete: Ekabade esit kpukpru mbufo mme utit ererimbot, enyuŋ edi etiene mi, enyuŋ ena uduɔkmmɔŋ ke enyiŋ mi, enyuŋ enyene mbuɔtidem ke ami, man enyaŋa mbufo.

35 Ndien idahaemi, ndima nditɔeka mi, edieke emi edide ntre ete ke mme ŋkpɔ emi edi akpanikɔ emi ami ntiŋde nnɔ mbufo, ndien Abasi eyewut mbufo, ye odudu ye akwa ubɔŋ ke akpatre usen, ete ke mmɔ edi akpanikɔ, ndien edieke mmɔ edide akpanikɔ ndi mme usen utibe ŋkpɔ etre?

36 Mme ndi mme angel etre ndiwut nditɔ owo idem? Mme ndi enye omum odudu Edisana Spirit abaha mmɔ? Mme ndi enye, ke adaŋa nte ini odude, mme ererimbot edidade, mme owo kiet odude ke iso isɔŋ emi anade nte enyaŋa?

37 Esese ami ndɔhɔ mbufo, Iŋ iŋ; koro edi ke mbuɔtidem ke enam mme utibe ŋkpɔ; ndien edi ke mbuɔtidem ke mme angel ewut idem enyuŋ enam utom enɔ mme owo; ke ntre, edieke mme ŋkpɔ emi etrede ɔyɔdiɔk ɔnɔ nditɔ owo, koro edi ke ntak unana mbuɔtidem, ndien kpukpru edi ikpikpu.

38 Koro owo ndomo kiet ikemeke ndibɔ edinyaŋa, nte asaŋade ye mme ikɔ Christ, ibɔhɔ mmɔ eyenyene mbuɔtidem ke enyiŋ esie; ke ntre, edieke mme ŋkpɔ emi etrede, ndien ndi mbuɔtidem etre ŋko; ndien ata idiɔk edi idaha owo, koro mmɔ etie nte edifak ikiduhe.

39 Koro esese, ndima nditɔ eka mi, ami mbiere mme ŋkpɔ emi efɔnde ekan mbaŋa mbufo, koro ami mbiere nte ke mbufo emenyene mbuɔtidem ke Christ ke ntak nsuhɔdeidem mbufo; koro edieke mbufo mibuɔtke idem ke enye ke ini oro ke mbufo midotke se ebatde esin ke otu mbon ufɔk Abasi esie.

40 Ndien efen, ndima nditɔeka mi, ami nyetiŋ ikɔ nnɔ mbufo kabaŋa mbuɔtidem. Didie ke edi ete ke mbufo emekeme ndinyene mbuɔtidem, ibɔhɔke mbufo eyenyene idorenyin?

41 Ndien nso ke mbufo ekeme ndidori enyin mbaŋa? Esese ami ndɔhɔ mbufo nte ke mbufo eyenyene idorenyin eto ke usio-isop Christ ye odudu ediset ke mkpa esie, man edemede enɔ uwem nsinsi, ndien emi ke ntak mbuɔtidem mbufo ke enye nte asaŋade ye eŋwɔŋɔ.

42 Ke ntre, edieke owo enyenede mbuɔtidem ana nte enye enyene idorenyin; koro mbuɔtidem miduhe idorenyin ndomo kiet ikemeke ndidu.

43 Ndien efen, esese ami ndɔhɔ mbufo nte ke enye ikemeke ndinyene mbuɔtidem ye idorenyin, ibɔhɔke enye eyedi suŋ-suŋ, onyuŋ ɔsuhɔde idem ke esit.

44 Edieke edide ntre, mbuɔtidem ye idorenyin esie edi ikpikpu, koro baba kiet idighe se ebɔde ke iso Abasi, ibɔhɔke suŋ-suŋ ye enye emi enyene nsuhɔde idem ke esit; ndien edieke owo edide suŋ-suŋ onyuŋ ɔsuhɔde idem, ndien ayarade ke odudu Edisana Spirit ete ke Jesus edi Christ, ana nte enye enyene ata ima; koro edieke enye minyeneke ata ima enye idighe ŋkpɔ ndomo kiet; ke ntre ana nte enye enyene ata ima.

45 Ndien ata ima edi anyan ime, onyuŋ edi eti ido, inyuŋ inamke isinenyin, inyuŋ itaŋke idem, iyomke esiemmɔ, isɔpke iyaresit, ikereke idiɔk, idarake ukwaŋ-ŋkpɔ edi adara esit ke akpanikɔ, ɔyɔ kpukpru ŋkpɔ, ɔbuɔtidem ke kpukpru ŋkpɔ, odori enyin ke kpukpru ŋkpɔ, enyene ime ke kpukpru ŋkpɔ.

46 Ke ntre, ndima nditɔeka mi, edieke mbufo minyeneke ata ima, mbufo idighe ŋkpɔ ndomo kiet, koro ata ima idibehe ifep. Ke ntre, emum ata ima ekama, emi edide emi akande kpukpru, koro ana nte kpukpru ŋkpɔ ebe efep—

47 Edi ata ima edi edisana ima eke Christ, ndien enye odu ke nsinsi; ndien owo ekededi emi ekutde ke enyene enye ka akpatre usen, ɔyɔfɔn ye enye.

48 Ke ntre, ndima nditɔ eka mi, ebɔŋ akam enɔ Ete ye ofuri odudu esit, man mbufo ekeme ndiyɔhɔ ye ima esie, emi enye ɔnɔde kpukpru mbon emi etienede Eyen esie, Jesus Christ, ke akpanikɔ; man mbufo ekabade edi nditɔ Abasi; man ke ini enye edidide nnyin iyitie nte enye, koro nnyin iyikut enye nte enye edide, man nnyin inyene idorenyin emi; man nnyin isana kpa nte enye asanade. Amen.