1 Idahaemi ami, Moroni, ŋwet ekpri nte ɔfɔnde ye ami; ndien ŋwet nnɔ nditɔ eka mi, mme Lamanite; ndien ami moyom nte yak mmɔ efiɔk ete ke isua emi awakde akan ikie inaŋ ye edip ama ebe efep tɔŋɔ emi ekenɔde idiɔŋɔ edidi Christ.

2 Ndien ami madian mme ŋwed emi, ke ini ami mma nketiŋ mme ikɔ ifaŋ ke usuŋ item nnɔ mbufo.

3 Esese, ami nyebeŋe mbufo nte ke ini emi mbufo edikotde mme ŋkpɔ emi, edieke edide ifiɔk ke Abasi ete ke ana nte mbufo ekot mmɔ, ete ke mbufo eyeti nte Jehovah enyenede mbɔm ɔnɔ nditɔ owo, tɔŋɔ ke edibot Adam tutu ɔsuhɔde esim ini emi mbufo edibɔde mme ŋkpɔ emi, ndien ekere enye ke esit mbufo.

4 Ndien ke ini emi mbufo edibɔde mme ŋkpɔ emi, ami nyebeŋe mbufo nte ke mbufo eyebup Abasi, Nsinsi Ete, ke enyiŋ Christ, mme mme ŋkpɔ emi idighe akpanikɔ; ndien edieke mbufo edibupde ke esit akpanikɔ, ye ke eti uduak, enyenede mbuɔtidem ke Christ, enye ayayarade akpanikɔ enye ɔnɔ mbufo, oto ke odudu Edisana Spirit.

5 Ndien ke odudu Edisana Spirit mbufo eyefiɔk akpanikɔ eke kpukpru ŋkpɔ.

6 Ndien ŋkpɔ ndomo kiet emi ɔfɔnde edi nnen nnen ye akpanikɔ, ke ntre, ŋkpɔ ndomo kiet emi ɔfɔnde ikaŋke Christ, edi enyime ete ke enye odu.

7 Ndien mbufo emekeme ndifiɔk ete ke enye odu, oto ke odudu Edisana Spirit; ke ntre ami nyebeŋe mbufo nte mbufo ekukaŋ odudu Abasi; koro enye anam ŋkpɔ ke odudu, nte asaŋade ye mbuɔtidem nditɔ owo, ukem oro mfin ye mkpɔŋ ye ke nsinsi.

8 Ndien efen, ami mbeŋe mbufo, nditɔ eka mi, nte yak mbufo ekukaŋ mme enɔ Abasi, koro mmɔ ewak; ndien mmɔ eto kpa Abasi oro. Ndien nsio nsio usuŋ edu emi enɔde mme enɔ emi; edi edi kpa Abasi oro anam kpukpru ŋkpɔ; ndien enɔ mmɔ ke ediyarade Spirit Abasi nnɔ mme owo, man mmɔ enyene udori.

9 Koro esese, enɔ kiet ke Spirit Abasi, ete enye ekpep ikɔ ɔniɔŋ;

10 Ndien enyeken, ete enye ekpep ikɔ ifiɔk ke ukem Spirit oro;

11 Ndien enyeken, ata ɔkpɔsɔŋ akwa mbuɔtidem; ndien enyeken, mme enɔ ukɔk udɔŋɔ ke ukem Spirit oro;

12 Ndien efen, enyeken, ete enye anam mme ikpɔ utibe ŋkpɔ;

13 Ndien efen, enyeken, ete enye etiŋ nte prophet kabaŋa kpukpru ŋkpɔ;

14 Ndien efen, enyeken, ndikut mme angel ye mme spirit utom;

15 Ndien efen, enyeken, kpukpru oruk usem;

16 Ndien efen, enyeken, ndikabade mme usem ye nsio nsio oruk edeme.

17 Ndien kpukpru mme enɔ emi edi eto Spirit Christ; ndien mmɔ edi enɔ kpukpru owo kiet kiet, nte enye aduakde.

18 Ndien ami nyebeŋe mbufo, ndima nditɔ eka mi, nte yak mbufo eti ete ke kpukpru eti enɔ oto Christ.

19 Ndien ami nyebeŋe mbufo, ndima nditɔ eka mi, nte yak mbufo eti ete ke enye edi ukem ukem mkpɔŋ, mfin, ye ke nsinsi, ndien ete ke kpukpru mme enɔ emi emi ami ntiŋde, emi edide eke spirit, tutu amama idibehe ifep, kpa nte adaŋa ini nte ererimbot edidade, ibɔhɔke nte asaŋade ye unana mbuɔtidem nditɔ owo.

20 Ke ntre, ana nte mbuɔtidem odu; ndien edieke anade nte mbuɔtidem odu ana nte ŋko idorenyin odu; ndien edieke anade nte idorenyin odu ana nte ŋko ata ima odu.

21 Ndien ibɔhɔke mbufo enyene ata ima mbufo ikemeke ndibɔ edinyaŋa ke obio ubɔŋ Abasi; ŋko mbufo ikemeke ndibɔ edinyaŋa ke obio ubɔŋ Abasi edieke mbufo minyeneke mbuɔtidem; ŋko mbufo ikemeke edieke mbufo minyeneke idorenyin.

22 Ndien edieke mbufo minyeneke idorenyin ana nte mbufo edu ke mfuhɔ; ndien mfuhɔ edi ke ntak ukwaŋ-ŋkpɔ.

23 Ndien Christ ke akpanikɔ ama ɔdɔhɔ mme ete nnyin ete: Edieke mbufo enyenede mbuɔtidem mbufo emekeme ndinam kpukpru ŋkpɔ emi ɔfɔnde enɔ mi.

24 Ndien idahaemi ami ntiŋ nnɔ ofuri utit ererimbot—nte edieke usen oro edide emi edimende odudu ye mme enɔ Abasi ifep ke otu mbufo, edidi ke ntak unana mbuɔtidem.

25 Ndien ɔyɔdɔdiɔk ɔnɔ nditɔ owo edieke emi edide ntre; koro ndomo kiet ididuhe emi anamde eti ke otu mbufo, iŋ iŋ baba kiet iduhe. Koro edieke kiet odude ke otu mbufo emi anamde eti, enye edinam ke odudu ye mme enɔ Abasi.

26 Ndien ɔyɔdɔdiɔk ɔnɔ mmɔ emi edinamde mme ŋkpɔ emi ebe efep ndien ekpa, koro mmɔ edikpa ke mme idiɔk-ŋkpɔ mmɔ, ndien mmɔ ikemeke ndibɔ edinyaŋa ke obio ubɔŋ Abasi, ndien ami ntiŋ enye nte asaŋade ye mme ikɔ Christ; ndien nsuhu-nsu.

27 Ndien ami mbeŋe mbufo nte eti mme ŋkpɔ emi; koro ini ke awara edi emi mbufo edifiɔkde ete ke nsuhu nsu, koro mbufo eyekut mi ke ebiet uda ikpe ke esop Abasi; ndien Jehovah Abasi ɔyɔdɔhɔ mbufo ete: Ndi ami nkɔdɔhɔke mbufo mme ikɔ mi, emi erenowo emi ekewetde, ukem nte owo emi ofioride oto mkpa, iŋ, kpa nte owo etiŋde ikɔ oto ke ntan?

28 Ami ndɔhɔ mme ŋkpɔ emi ke ndisu mme prophecy. Ndien esese, mmɔ eyeto ewɔrɔ ke inua nsinsi Abasi; ndien ikɔ esie eyesi ɔwɔrɔ tɔŋɔ ke emana sim emana.

29 Ndien Abasi oyowut mbufo, ete ke enye emi ami ŋwetde edi akpanikɔ.

30 Ndien efen ami nyebeŋe mbufo nte yak mbufo edi etiene Christ, ndien emum kpukpru eti enɔ ekama, ndien itukke idiɔk enɔ, mme ndedehe ŋkpɔ.

31 Ndien demede, nyuŋ daha da ke ntan, O Jerusalem; iŋ, nyuŋ sine ediye ɔfɔŋ fo, O eyen anwan Zion; nyuŋ sɔŋɔ mme ɔkpɔhɔ fo ndien nam mme adaŋa fo etara ke nsinsi, man afo odutimede aba, man mme ediomi emi Nsinsi Ete anamde ɔnɔ fi, O ufɔk Israel, okposu.

32 Iŋ, edi etiene Christ, enyuŋ efɔn ema ke enye, enyuŋ esin idem mbufo kpukpru unana uteŋe Abasi; ndien edieke mbufo edisinde kpukpru unana uteŋe Abasi, enyuŋ ema Abasi ye ofuri ukeme, esit ye odudu mbufo, ini oro ke mfɔn esie edikem mbufo, man oto ke mfɔn esie mbufo ekeme ndifɔn-mma ke Christ; ndien edieke edide ke mfɔn Abasi ke emefɔn ema ke Christ, mbufo ke usuŋ ndomokiet ikemeke ndikaŋ odudu Abasi.

33 Ndien efen, edieke mbufo ke mfɔn Abasi efɔnde ema ke Christ, ndien ikaŋke odudu esie, ini oro ke enam mbufo esana ke Christ ke mfɔn Abasi, oto ke uduɔk iyip Christ, emi odude ke ediomi Ete ɔnɔ usio isop ke mme idiɔk-ŋkpɔ mbufo, man mbufo ekabade esana, enana ndo.

34 Ndien idahaemi ami ŋkɔm kpukpru owo, etie suŋ. Ami nyosɔp nka ndiduɔk odudu ke paradise Abasi, tutu spirit ye idem mi efiak ediana kiet, ndien eda mi edi ke nte nkande ke ofum, ndisobo ye mbufo ke iso edinem ebiet ikpe eke akwa Jehovah, Nsinsi Ebiere ikpe nnɔ odu uwem ye akpa mkpa. Amen.