1 Ndien idahaemi ami ntiŋ kabaŋa uduɔk mmɔŋ. Sese, mme ebioowo, mme oku, ye mme andikpep ema eduɔk mmɔŋ; ndien mmɔ ikiduɔkke mmɔŋ ibɔhɔke mmɔ esio mfri emi ekemde ewut ke mmɔ ema edot enye.

2 Ŋko mmɔ ikibɔhɔ baba kiet isin ke uduɔk mmɔŋ ibɔhɔke mmɔ ekedi ye mbuŋɔ esit ye spirit emi anuahakde, enyuŋ etie ntiense enɔ ufɔk Abasi ete ke mmɔ ke akpanikɔ ema ekabade esit ke mme idiɔk-ŋkpɔ mmɔ.

3 Ndien ufɔk Abasi ikibɔhɔ ndomo kiet isin ke uduɔk mmɔŋ ibɔhɔke mmɔ eda enɔ idem mmɔ enyiŋ Christ, enyene mkpembiere ndinam utom nnɔ enye tutu esim utit.

4 Ndien ke ini ema ekebɔ mmɔ esin ke uduɔk mmɔŋ, ndien ema etuk enyuŋ enam esana ke odudu Edisana Spirit, ema ebat mmɔ esin ke otu mbon ufɔk Abasi Christ, ndien ema ewet enyiŋ mmɔ, man eti enyuŋ ebɔk mmɔ ye eti ikɔ Abasi, man enim mmɔ ke nnen nnen usuŋ, man enim mmɔ kpukpru ini ke ukpeme akam, edorienyin ikpɔŋ ke mme eti ido Christ, emi ekedide anditɔŋɔ ye andinam mbuɔtidem mmɔ ɔfɔn ama.

5 Ndien ufɔk Abasi ema esobo kiet ke ini ke ini, nditre udia ye ndibɔŋ akam, ye nditiŋ ikɔ kiet ye eken kabaŋade ufɔn ukpɔŋ mmɔ.

6 Ndien mmɔ ema esobo kiet ke ini ke ini ndita uyo ye wine, ke nditi Ɔbɔŋ Jesus.

7 Ndien mmɔ ema ekpeme ndikut ete ke ukwaŋŋkpɔ iduhe ke otu mmɔ; ndien owo ekededi emi ekekutde nte anamde ukwaŋŋkpɔ, ndien mme ntiense ita ke ufɔk Abasi etip mmɔ ikpe ke iso mme ebio-owo, ndien edieke mmɔ mikabakede esit, inyuŋ iyarakede, ema esɔhi enyiŋ mmɔ esio, ndien ufɔk Abasi ibatke mmɔ isin ke otu mbon Christ.

8 Edi ke adaŋa ini emi nte mmɔ ekabarede esit enyuŋ eyomde edifen nnɔ, ye esit akpanikɔ, ema efen enɔ mmɔ.

9 Ndien ufɔk Abasi akada mme mbono mmɔ usuŋ nte asaŋade ye mme ubono ŋkpɔ Spirit, ye ke odudu Edisana Spirit; koro nte odudu Edisana Spirit akadade mmɔ usuŋ mme ke ndikwɔrɔ ikɔ, mme ke nditeme, mme ke ndibɔŋ akam, mme ke ndibeŋe, mme ke ndikwɔ ikwɔ, kpa ntre ke ekenam.