Mataupu 9

Folafolaina atu o le Talalelei

E tatau ona tatou filiga ma faatuatua i le fesoasoani atu i isi e maua faamanuiaga o le talalelei toefuataiina.

Mai le Soifuaga o Wilford Woodruff

E lei umi lava se taimi talu ona uma ona papatiso Wilford Woodruff ma faamauina o se tasi o le Ekalesia, ae ona maua “se naunautaiga tele ina ia talai atu le Talalelei.” Sa ia manatua: “I le afiafi o se tasi Aso Sa sa ou alu atu ai na o a’u i le togavao, ma valaau atu i le Alii i le tatalo faatauanau, ina ia tatala lo’u auala ou te alu ai ma talai le Talalelei i tagata o le lalolagi. Sa molimau mai le Agaga o le Alii ua faafofogaina la’u tatalo, ma o le a talia. Sa ou tulai mai o’u tulivae [ua ou] fiafia, ma ou savali loa mo le tusa ma le lua selau mita, ma feiloai ai ma Elias Higbee, o se Faitaulaga Sili, o le sa ou nofo ai mo ni nai masina. Ina ua ou oo atu ia te ia, sa ia faapea mai, ‘Uso Wilford, ua ta’u mai e le Agaga o le Alii ua tatau ona faauuina oe, ma e alu atu ai i se misiona.’ Sa ou tali atu, ‘Ua ou saunia.’ ”¹

I lalo o le taitaiga a lona epikopo, sa faauuina Wilford Woodruff o se ositaulaga i le aso 5 o Novema, 1834, ma valaau ai e auauna i se misiona i le Iunaite Setete i saute. Sa ia auauna ma le faatuatua ma le maelega, ma amata ai se olaga o auaunaga faamisionare lea sa ia fesoasoani ai i le afe ma afe o [tagata] e talisapaia le talalelei toefuataiina. Sa saunoa mai Peresitene Heber J. Grant e uiga ia te ia, “Ou te talitonu e leai lava se isi tagata ua savalia le laueleele ua sili atu sona faaliliuina o agaga i le talalelei a Iesu Keriso.”²

Ia Ianuari 1840, e lei umi talu ona faauuina o se Aposetolo, ae taunuu Elder Wilford Woodruff i Egelani e auauna o se faifeautalai. Sa amataina lana auaunaga i le nuu o Staffordshire, ma faafiafiaina ai i le manuia tele [o le galuega]. “E toa 40 sa faaopoopo mai i le ekalesia e ala i le papatisoga,” sa ia lipoti mai ai, “ma e tele faitotoa fou ua tatalaina; ma i le lotolotoi o le oa o le galuega, a o ou tu ou te lauga atu i se faapotopotoga tele lava i Hanly, i le aso 1 o Mati, sa faailoa mai e le Alii ia te a’u o le taimi mulimuli lea o le a ou lapataia ai na tagata mo ni aso se tele, ma ina ua ou tu atu ma ta’u atu i tagata o le taimi mulimuli lea o le a faalogo ai i lo’u leo mo ni aso se tele, sa maofa i latou, aua sa latou manatu, e pei foi ona ou manatu ai, ina ua ou ulufale atu i lea fale, o le a tele ni masina ou te i ai faatasi ma i latou; ae o ala ma manatu o le Atua e le tusa lea ma o tatou manatu i tulaga uma.”

Sa saili atu e Elder Woodruff le Alii i le tatalo i le aso na sosoo ai, ma fesili ai po o fea e tatau ona alu i ai. Sa ia faamatala: “I lo’u talitonu ai o lo’u avanoa ma lo’u tiute lo’u iloa o le finagalo o le Alii i lea mataupu, o lea la, sa ou fesili ai i le Tama Faalelagi i le suafa o Iesu Keriso e aoao mai ia te a’u lona finagalo i lenei mea, ma a o ou fesili atu, sa tuuina mai e le Alii, ma faaali mai ia te a’u o lona finagalo ia ou alu i le taimi lava lea i le itu i saute o Egelani. Sa ou talanoa ma le uso o William Benbow i lenei mataupu, o le sa nofo i Herefordshire ma sa i ai ni ana uo o loo nonofo ai iina, ma sa ia matua moomoo ia ou asiasi atu i lena itu o le atunuu, ma sa ia ofo alofa mai ma te o faatasi i le fale o lona uso matua ma totogiina lo’u pasese, lea sa ou taliaina ma le faafetai.”³

I le aso 4 o Mati, 1840, sa taunuu ai Elder Woodruff ma William Benbow i le fale o le uso o William o Ioane. “I le tasi le itula talu ona ou taunuu i lona fale,” na manatua ai e Peresitene Woodruff, “sa ou iloa ai le mafuaaga ua valaau ai a’u e le Alii iina. … sa ou tau atu i le faapotopotoga o alii ma tamaitai, pe ono selau, o e auau faatasi i lo latou igoa o le United Brethren, ma sa latou galulue mo le faataunuuina o le faatulagaga sa i ai anamua. Sa latou mananao i le Talalelei e pei ona sa aoaoina e perofeta ma aposetolo, e pei o o’u lagona a o ou talavou.”⁴

Sa vave ona taliaina e le aiga o Benbow le feau o le Toefuataiga, ma sa toe foi atu William i Staffordshire “ina ua maea le avanoa fiafia sa ia vaai ai i lona uso o John Benbow, ma lona aiga atoa, … ua papatisoina i le feagaiga fou faavavau.”⁵ Sa nofo Elder Woodruff i le nofoaga lea mo le tusa e valu masina. Sa ia manatua mulimuli: “I le tolusefulu aso muamua talu ona ou taunuu atu i Herefordshire sa ou papatisoina ni faifeau se toa fasefululima ma nai selau o. … Sa matou galulue ai tusa po o le valu masina ma aumaia i le [talalelei] le lua afe o [tagata].”⁶

Sa tusia e Peresitene Woodruff e uiga i lenei aafiaga: “O le talafaasolopito atoa o lenei misiona i Herefordshire ua faaalia mai ai le taua o le faalogo i le leo itiiti ma le filemu o le Atua ma faaaliga a le Agaga Paia. Sa i ai se nuu o le Alii iina ua saunia mo le Talalelei. Sa latou tatalo mo le malamalama ma le upumoni, ma sa auina atu a’u e le Alii ia i latou.”⁷

E tusa pe lua tausaga a o lei auauna Elder Woodruff i Egelani, sa taitaiina o ia e le Agaga e talai le talalelei i se vaega laitiiti ifo— o lona lava aiga. I lona faamanuiaga faapeteriaka, sa tuuina mai e ala ia Iosefa Samita Sr., sa folafola atu ia te ia o le a ia “aumaia le aiga o [lona] tama i le malo o le Atua.”⁸ I le 1838, a o auauna o ia i se misiona i le aai latalata i lona nuu, sa lagona e ia ua oo mai le taimi ua tatau ona faataunuuina ai lea folafolaga. Sa ia tusia:

“Sa ou faaaluina … le sefuluvalu aso i Farmington ma Avon, e asiasi atu i le aiga o lo’u tama, o uso o lo’u tama, tuafafine o lo’u tama ma tuagane o lo’u tina, o a latou fanau, o tuaoi ma uo, ma talai atu i ai le Talalelei a Iesu Keriso ia i latou, ma taumafai ai e aumaia i latou i le malo o le Atua. … E ala i le fesoasoani a le Atua, sa ou faatuatua i le talaiina o le Talalelei i le aiga o lo’u tama ma i latou uma o e sa i ai faatasi ma ia, faapena foi ma isi o o’u aiga.”

I le aso 1 o Iulai, 1838, sa papatisoina e Elder Woodruff tagata e toaono, e aofia ai ma tagata uma lava sa nonofo i le fale o lona tama, e pei lava ona sa folafolaina atu i lona faamanuiaga faapeteriaka. “O se aso moni lava o le olioli o lo’u agaga,” sa ia fai mai ai. “O lo’u tama, o lona toalua ma lo’u tuafafine sa i ai i le vaega na papatisoina. Sa mulimuli ane faaopoopo i ai ma se isi vaega o lo’u aiga. Sa ou lagonaina o le galuega o le aso e tasi sa lava lea e totogi ai a’u mo a’u galuega uma i totonu o le galuega [a le Atua].

“O ai se na te malamalama i le olioli, le mamalu, le fiafia ma le faamanuiaga e lagonaina e se Toeaina o Isaraelu i le avea ai ma meafaigaluega i le aao o le Atua i le aumaia o lona tama, tina, tuafafine, uso, po o soo se isi lava i le aiga o Atamu e ui atu i le faitotoa e ulufale atu i le ola ma le faaolataga? E le mafai e se tasi, vagana ai ua aafia o ia i ia mea, ma maua e ia le molimau ia Iesu Keriso ma le musumusuga a le Atua Silisiliese.”⁹

Aoaoga a Wilford Woodruff

E faamasinoina i tatou e le Atua mo le faasoaina atu o le talalelei i isi.

O tagata i augatupulaga uma e saili mo le fiafia; latou te naunau mo le filemu lautele ma i totonu o le aiga; ma a latou mafaufau atu i le lumanai, latou te naunau ia aofia ai i faamanuiaga o loo ta’ua e aofia ai i lena ituaiga olaga; ae latou te le iloa pe faapefea ona maua, vagana ua sau se auauna a le Atua ma faasino i ai le ala o le ola.¹⁰

Ua na o tatou lava tagata o e ua tuuina mai i ai lenei talalelei, perisitua ma feagaiga paia i o tatou aso, ma o le a faamasinoina i tatou i ala tatou te faaaogaina ai. Ona tatau ai lea ona tatou filiga ma faatuatua i le ofoina atu o lenei faaolataga matautia i le fanauga a tagata, ma i le atiina ae o Siona ma le malo o le Atua.¹¹

Po o le a lava le le taua o lenei nuu i le vaaiga a le lalolagi, ua tuuina mai e le Atua o lo tatou tiute le talaiina atu o lenei Talalelei i nuu uma i lalo o le lagi, ma e tatau ona tatou faia a leai, o le a fano i tatou. E le mafai ona tatou ‘alo mai ai. Aisea, aua, e pei ona fai mai Paulo: “Oi talofa foi ia te a’u, pe a ou le folafolaina le Talalelei.” [1 Korinito 9:16.] E tasi lava le Talalelei; e lei i ai lava ma se isi ua na o le tasi lava, ma o le a leai lava; ma ua fai mai Paulo: “A e peitai e ui lava ina talaiina e i matou, po o se agelu mai le lagi, ia te outou se tala lelei e ese i lea na talaiina atu ai e i matou ia te outou, ia anatema ia.” [Kalatia 1:8.] O lena Talalelei, outou le Au Paia a le Atua soifua. … ua i o tatou lima, ua tuuina mai ia i tatou e ala i taitaiga a Agelu—le Talalelei lava e tasi lea sa aoaoina mai ia Atamu e oo ia Keriso, ma mai ia Keriso e oo mai i lo tatou vaitaimi ma lo tatou tupulaga, i taimi uma ua i ai se nuu o le Atua i luga o le fogaeleele.¹²

E lei i ai lava se vaega o alii talu mai le foafoaina o le lalolagi ua ia i latou se tiute matua matautia ina ia lapataia lenei tupulaga, ina ia sii o latou leo ia umi ma leotele, ao ma le po a o i ai le avanoa ma folafola atu le afioga a le Atua i lenei tupulaga. Ua manaomia i tatou e faia lenei mea. O lo tatou valaauga lenei. O lo tatou tiute lenei. O la tatou feau lenei.¹³

Ua ou ui atu i taufusi ma aau i vaitafe, ma ou sue meaai mai lea aiga ma lea aiga; ma tuuina atu toeitiiti atoa le limasefulu tausaga i lenei galuega. Ma aisea? Sa lava ea iina i Kalefonia se auro e totogi ai a’u ina ia ou faia? E matua leai lava; ma o mea ua ou faia ma mea ua faia e la’u usoga, ua matou faia aua ua poloaiina ai i matou e le Atua. Ma o le tulaga lea matou te tutu ai nei. Ua matou talai atu ma galulue i aiga [ma nuu] ma nuu ese, ma matou te faamoemoe e faaauauina pea a matou galuega, e ala i le fesoasoani a le Atua, pau lava le mea ia i ai matou le saolotoga e faia ai.¹⁴

Ou te manatu, i le tele o taimi, i le avea ai ma toeaina o Isaraelu ma le Au Paia o Aso e Gata Ai, ua tatou le malamalama i lo tatou tulaga i luma o le Alii. O le galuega o loo ua manaomia i o tatou lima e matautia ma maoae; o le galuega a le Atua Silisiliese. O le a faamasinoina i tatou i le folafolaina atu o le talalelei a Keriso i nuu uma o le lalolagi. … O le a faamasinoina i tatou i nei mea uma ma i le fausiaina o malumalu i le Silisiliese, ia e mafai ona tatou ulufale ai e faia sauniga paia mo le faaolaina o o tatou tagata oti.¹⁵

Ona, ua siomia i tatou i o tatou aiga i le toatele o e ua avea ma o tatou tiute le talai atu i ai, aua e taua lava le talai i le aiga e pei o nuu ese.¹⁶

Tatou te maua le olioli sili i le fesoasoani i isi e o mai ia Keriso ma agai atu ai i luma i le faaeaga.

E te aveatu i soo se agaga ia mataupu faavae o le ola ma le faaolataga ma faatinoina nei sauniga paia mo ia, ma o le a avea oe ma meafaigaluega i aao o le Atua i le faaolataga o lena agaga. E leai se mea ua tuuina atu i le fanauga a tagata e tutusa ma lena mea. …

… Ua fetalai mai le Alii, “Afai fo’i e fa’apea ona oulua galulue i o oulua aso uma i le alagaina o le salamo i lenei nu’u, ma aumai, tau lava o se agaga e toatasi ia te a’u, faauta i le tele o lo outou olioli faatasi ma ia i le malo o lo’u Tama!” [MFF 18:15.] … Ua tatou talaiina le Talalelei i nuu uma, ituaiga, gagana, ma tagata, e tusa ai ma le tatalaina o auala e le Alii mo i tatou ma ua tatou maua le avanoa e o ai. Ae o loo tumu pea le lalolagi e oo mai i lenei aso o e e lei faalogo i le Talalelei a Iesu Keriso; ma a o i ai le Perisitua i luga o o tatou tauau o loo i ai pea ia i tatou le tiute ma o le a faamasinoina i tatou i le faaolataga o le fanauga a tagata, e tusa ai ma le avanoa ua ia i tatou e faaeeina atu ai nei meaalofa i luga o atalii ma afafine o Atamu. Tau lava o le mafaufau e ala i le talisapaia o le Talalelei a Keriso e mafai ai ona tatou avea ma suli o le Atua ma suli faatasi ma Iesu Keriso, lea e mafai ai ona avea i tatou ma vaega o le uluai toetutu, ma tulai mai i o tatou tuugamau ma faaofuina i le mamalu, tino ola pea ma le ola faavavau, ma ui atu i luma o le Atua ma le Tamai Mamoe ma ola faatasi ma i latou e faavavau i le lagi! O ai na te malamalama i lenei [mea]? E [malamalama ea] tagata o le lalolagi? Latou te le [malamalama]. … Ua ou iloa e a’u lava ua tatou faalagolago i le Alii i mea uma. O le alii na faasaoina i tatou. O ia o le mataisau o lo tatou faaolataga. Sa tuuina i lalo e Iesu Keriso Lona soifua e togiola i tatou i Lona toto, ma o lena ua faaeeina mai ai ia i tatou nei faamanuiaga. …

… E leai se isi valaauga sili atu e mafai ona valaau ai se tagata nai lo le maua o le aia tatau ma le avanoa paia e alu atu ai ma faasaoina agaga o tagata—faaolaina i latou e ala i le talai atu o le Talalelei ia te i latou, e ala i le faia o sauniga i le maota o le Atua mo i latou, ina ia saunia i latou e o atu i le malo o le lagi ma i le mamalu faaselesitila. …

Ou te manatu i le tele o taimi o i tatou lava tatou te le faatauaina faamanuiaga o loo tatou fiafia ai ma [faamanuiaga] e mafai ona tatou maua.Oo tatou loto e tatau ona mautu i le atiina ae o le malo o le Atua, le Siona o le Atua, ma le galuega a le Atua, a o tatou i ai iinei ma ia maua le mana e faatinoina ai nei mea. O lo tatou tiute i le avea ai ma Au Peresitene ma Aposetolo, e le gata i le galulue o i tatou lava, ae ia auina atu Toeaina o Isaraelu i nuu o le lalolagi e folafola atu le Talalelei. I le taimi lenei o loo tatalaina le avanoa e faasalalauina ai le Talalelei a Keriso i nuu e tele, ma ia aumaia tagata ia Keriso, ina ia latou maua ai nei faamanuiaga.¹⁷

Ua toeitiiti o’u faaaluina lo’u olaga atoa i lenei Ekalesia; ma e mai le taimi na ou sau ai i totonu o le Ekalesia sa ou alu ai i misiona ma e lei faagataina lava mai lena taimi e oo mai i le aso. Sa ou matua fiafia tele i lenei [tulaga], ma ou te fiafia tele ai i le aso. A ou oti ma tuu i lalo lo’u tino, ou te le manao lava i se tasi e tulai ma faapea mai sa ou tuulafoaiina lo’u tiute i lo’u taumafai e tuuina atu ia te ia le faaolataga e tusa ai ma lo’u mafai. Ou te fiafia tele i le talai atu o le Talalelei; ou te fiafia tele i le faia o sauniga paia o le ola ma le faaolataga i le aiga ma nuu ese, aua sa ou iloa o le galuega lenei a le Atua, ma ou te iloaina lava e oo mai i le aso.¹⁸

Nai lo le faitioina o lotu a isi, e tatau ona tatou ola i se auala e faaali atu ai le upumoni ma le tulaga lelei o la tatou lava [lotu].

A e alu atu i lou tuaoi e talai le Talalelei, aua nei e taumafai e talepe muamua i lalo le faatuatuaga o se tagata, ona e taumafai lea e tuuina atu ia te ia se faatuatuaga e sili atu; o le mea moni, aua aua lava nei e faasaga tau atu i se lotu a se isi, po o fea lava e te alu i ai. Ia e naunau e tuuina atu i tagata taitoatasi e faafiafiaina i lana lava lotu. O lana aia tatau lena. Afai na te le taliaina lau molimau e uiga i le Talalelei a Keriso, o lana lava matafaioi lena, ae le o oe. Aua nei faaaluina lou taimi e toso ai i lalo isi lotu ma isi vaega faalelotu. E leai so tatou taimi e faaaluina i lena mea. E matua le sa’o lava le faia o lena mea.¹⁹

Saili e ala i le faatuatua, tatalo ma le lotomaualalo, e maua le poto, ma le Agaga o le Atua e taitaia a outou galuega uma. O le poto o se tasi o meaalofa silisili a le Atua, ma le leo o le poto o le a le ta’u maia ia i tatou e faaalu so tatou taimi e faasaga tau atu ai i lotu eseese o lo tatou vaitaimi, e faatuiese ai i manatu o tagata, e faitioina lotu o loo siomiaina i tatou, ma faatupuina ai le le fia faalogo o tagata ia i tatou; ma punitia ai loto o tagata i le malamalama ma le upumoni; o manatu ma lotu a isi tagata e pele ia i latou e pei lava ona pele la tatou lotu ia i tatou. … Ia avea le Faaolataga ma a outou mataupu autu, i le agamalu ma le lotomaualalo, ma le mana o le upumoni faavavau, poto, malamalama ma le atamai ia o loo natia i totonu o uluai mataupu faavae o le talalelei a le Alo o le Atua. E mafai ona avea outou ma meafaigaluega i le faasaoina o agaga o tagata, ma o le a latou olioli faatasi ma outou ua mafai ona latou vaai i le malamalama o le talalelei; e le tatau ona tatou o i luga atu o le talalelei, pe tuua foi le talalelei ae tala’i atu se mea e ese mai i o tatou valaauga, po o le faia o fefinaua’iga i upu ona le aoga ai lea; e iloa lava le laau i ona fua; afai tatou te faatuatua i le Alii, saili se auala poto ma le atamai, o fua lelei o le a mautinoa lava le mulimuli mai ia tatou galuega.²⁰

E tatau ona avea ma sini autu a tagata uma o le Ekalesia le faatinoina i o latou olaga o aoaoga faavae o le Talalelei. E leai se isi auala e sili atu tatou te faatalitonuina ai le lalolagi i le moni o ia mea nai lo le faaali atu e ala ia tatou galuega ma fesootaiga a le tasi i le isi faapea ma tagata uma le aafiaga o ia aoaoga faavae ia i tatou. Tatou te faia tautinoga maualuluga, ma e tatau ona i ai foi ma se tulaga maualuga o le ola mama ia i tatou ina ia talafeagai ma ia tautinoga.²¹

E aumaia e le Agaga Paia le taitaiga mo e faasoa atu le talalelei faapea e taliaina.

O le itu lilo atoa o le faamanuiaina o lo tatou taumafai e tusa ai ma le faaliliuina o tagata o le, tatou talaiina o le talalelei e tasi lea sa talaiina e Iesu i lona faigofie ma lona manino, ma ia i ai le Agaga Paia i luga o e taliaina, ma faatumuina o latou loto i le olioli ma le fiafia e le mafaamatalaina, ma avea ai i latou e tasi; ma latou iloa ai iina mo i latou lava le mataupu faavae pe mai le Atua pe mai le tagata.²²

Sa faapefea e lenei fia selau ma afe e mano o Toeaina o Isaraelu … ona i ai le mana e o atu ai i nuu ese … e talai le Talalelei i le faatalitonuina o atalii ma afafine o Atamu? Ua mafai ona faia e ala i le mana o le Atua. E leai se Toeaina i lenei Ekalesia sa i ai se mana e alu atu ai ma faia le finagalo o le Atua [vagana] ai e faia i le mana o le Atua. Afai ua ia i tatou se mana, e aumai i le Atua, e tatau ona tatou faatuatuaina o Ia e tusa ai ma nei mea uma.²³

Pe a talai atu e se o i ai le pule le talalelei, na te faia folafolaga, i le suafa o Iesu Keriso, ia i latou uma o e talitonu ma usitai, faapea o le a tuuina atu ia i latou le Agaga Paia. E ala i le taua o lenei folafolaga, e mafai e ia tagata uma ona iloa mo i latou lava, pe [o le folafolaga] e a le Atua, pe a le tagata. Afai e alu atu se tagata e aunoa ma se pule, ma faafoliga o loo folafola atu le talalelei lava lea e tasi, ma e le afaina po o le a le agavaa ma le talenia o ia, o lana mataupu e mafai ona iloa lelei, aua o folafolaga ia e tatau ona mulimuli atu i e talitonu ia Keriso o le a le faataunuuina, o le Agaga Paia o le tuuina atu ana meaalofa i tagata o le a le mauaina, ma o iina e aliali mai ai le sese o mataupu a tagata, ina ia aua nei faaseseina ai se tasi.²⁴

A le i ai ia te oe le Agaga Paia pe a e alu atu e talai le Talalelei, e le mafai ona faia lou tiute; ae a i ai ia te oe o le a e saogalemu, po o fea lava e te alu i ai, ao a’u upu o le a i ai le aafiaga i loto o e faamaoni ma agamalu o le lalolagi.²⁵

O le a leai se eseesega po o le a le matua o se tagata e talaiina le talalelei, pe lua sefululima, iva sefulu, pe lima selau ona tausaga, ae pau lava lea e musuia o ia e le Agaga ma le mana o le Atua.²⁶

Ia muamua le Alii i o tatou luma e saunia le ala ma aumaia ia i tatou le faaulufaleina i loto o tagata, ina ia faataunuuina le lelei ma agai ai i luma le malo o le Atua.²⁷

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Toe iloilo le tala ia Elder Wilford Woodruff i lona oo atu i le fale o John Benbow (itulau 91–92.) O a auala na taitaia ai Elder Woodruff i le faatoaga a Benbow? A o e faitauina lenei tala, o a ni mea e te aoaoina mai i le faataitaiga a William Benbow?
I itulau 91–92, vaavaai ni upu po o faaupuga e faaali mai ai po o a ni lagona o William Benbow ma Wilford Woodruff ina ua talisapaia e o la aiga le talalelei. Sa faapefea ou lagona ina ua auai i le Ekalesia pe toe faatoagaina mai i le Ekalesia se tasi e te alofa i ai?
Toe iloilo saunoaga a Peresitene Woodruff e uiga i o tatou tiutetauave e fetufaai atu le talalelei (itulau 92–95). O le a se mea patino e mafai ona tatou faia e fetufaai atu ai le talalelei i aiga ma uo? O a auala e mafai ona tatou galulue ai faatasi ma faifeautalai i lenei taumafaiga?
O a ni auala e mafai ona tatou faataunuu ai lo tatou tiutetauave o le aoao atu o le talalelei “i nuu uma o le lalolagi”? (itulau 95–97).
Aisea tatou te le mautonu ai i nisi taimi e fetufaai atu ai le talalelei? E faapefea ona tatou foia lo tatou fefe?
Aisea ua avea ai le galuega faafaifeautalai o se aafiaga e faatupuina ai le olioli? (Tagai itulau 95–96.) O a ni ou aafiaga sa e lagona ai le olioli e fetufaai atu le talalelei?
Aisea e taua ai le aloese mai le faitioina o lotu a isi? (Tagai itulau 97.) E mafai faapefea ona tatou molimauina le moni o le Ekalesia e aunoa ma le faitioina o isi lotu?
Toe faitau le parakalafa mulimuli i le itulau 98. O a auala e avea ai a tatou galuega ma uunaiga i manatu o tagata e uiga i le Ekalesia?
A o e faitauina saunoaga a Peresitene Woodruff e uiga i le Agaga Paia ma le auaunaga faafaifeautalai, o le a se mea na e aoaoina? (Tagai itulau 98–99.) O a ni mea e tatau ona tatou faia e agavaa ai i tatou e avea le Agaga ma a tatou soa?

Mau E Faatatau I Ai: Mataio 28:19–20; MFF 4; 18:10–16; 42:11–14; 50:13–22; 60:2–3; 84:88; 88:81