Mataupu 16

Faaipoipoga ma le Tulaga Faamatua: Saunia o o Tatou Aiga mo le Ola e Faavavau

E mafai ona lotogatasi aiga e atiina ae le malo o le Atua ma tofo ai i faamanuiaga uma lava o le lagi, e ala i le taialaina e ni matua amiotonu ma alolofa.

Mai le Soifuaga o Wilford Woodruff

Sa faaipoipoina Wilford Woodruff ma Phoebe Whittemore Carter i le aso 13 o Aperila, 1837, i Katelani, Ohio. I lo la soifuaga faatasi, sa la taufai onosaia le tele o lu’i faigata, ma tutupu ai faatasi i laua i le faamaoni o le tasi i le isi, i le la fanau, ma le malo o le Atua. O se tasi o ia aafiaga na oo mai i le taumalulu o le 1838, na tusia i le lima masina a o lei valaauina Wilford Woodruff i le tofi aposetolo. A o taitaiina e Uso Woodruff se vaega o le Au Paia i se faigamalaga e potopoto atu faatasi ma isi tagata o le Ekalesia, sa oo ina ma’i tigaina lona faletua. Sa ia faamatala mulimuli ane:

“I le aso 23 o Novema sa lavea lo’u toalua, o Phoebe, i se tiga matuitui o lona ulu, lea na i’u ai i le fiva faiai. Sa oo ina tuputupu pea lona lotovaivai ma le popole i aso uma a o alu pea la matou faigamalaga. O se tulaga lea e matuai ogaoga le leaga mo se tamaitai e faimalaga ai i se taavale solofanua i luga o auala lauleaga, a o tigaina e pei ona sa i ai. O le taimi foi lea sa ma’i tigaina ai la ma’ua tama.”

I aso taufaiuiu, sa matua faateteleina le leaga o le tulaga o le ma’i o Sister Woodruff, e ui lava sa mafai ona latou malolo i luga o le ala a o latou faimalaga ma maua ni nofoaga e mapu i ai. Sa manatuaina e Uso Woodruff: “E oo mai i le aso 3 o Tesema ua matua leaga lava le tulaga o lo’u toalua. Sa ou faaaluina le aso atoa i le tausiaina o ia, ma o le aso na sosoo ai sa ou toe foi atu ai i Eaton [o se aai lata ane] e aumai ni mea mo ia. Sa foliga sa faasolosolo atu lava ina vaivai o ia, ma i le afiafi sa manino lava le tuua e lona agaga o lona tino, ma maliu ai o ia.

“Sa faapotopoto mai tuafafine uma e li’o lona tino, ma fetagisi ai, a o ou tu ma tilotilo atu ia te ia ma lo’u faanoanoa tele. Sa amata ona oo mai le Agaga ma le mana o le Atua i o’u luga, ma mo le taimi muamua lava talu lona ma’i, sa faatumulia lo’u agaga i le faatuatua, e ui lava sa taoto mai o ia o se ua oti.”

I le faamalosia ai o ia i lona faatuatua, sa tuuina atu e Wilford Woodruff se faamanuiaga faaleperisitua i lona toalua. “Sa ou faaeeina o’u lima i ona luga,” o lana tala lea, “ma i le suafa o Iesu Keriso sa ou tulieseina le mana o le oti faapea le na te faaumatiaina, ma poloaiina lea agaga e alu ese ma ia, ma poloaiina le agaga o le ola e ulufale atu i lona tino.

“Sa toe foi atu lona agaga i lona tino, ma e mai i lena itula sa atoatoa ai o ia; ma na matou lagona uma lava e tatau ona vivii atu i le suafa o le Atua, ma ia faatuatua ia te ia ma tausi i ana poloaiga.

“A o tupu pea lenei faagasologa ia te a’u (e pei ona faamatala mulimuli mai ai e lo’u toalua) sa tuua e lona agaga lona tino, ma sa ia vaai mai i lona tino o taatia i luga o le moega, ma tuafafine o loo fetagisi. Sa ia vaai atu ia te i latou ma vaai mai ia te a’u, ma lana pepe, a o sioa o ia i lenei vaaiga, na oo mai i totonu o le potu ni peresona e toalua. … O le tasi o nei avefeau na ta’u atu ia te ia e mafai ona fai lana filifiliga: e mafai ona alu atu ma malolo i le lalolagi o agaga, ae e iai foi aiaiga e mafai ona ia maua le avanoa e toe foi mai ai i lona tino ma faaauau ana galuega i luga o le fogaeleele. O le aiaiga, afai na te lagonaina e mafai ona ia tu i tafatafa o lana tane, ma ui atu faatasi ma ia i faigata, i lu’itau, ma tiga ma mafatiaga uma o le olaga lea o le a valaauina ai o ia e ui atu ai ona o le Talalelei seia oo lava i le iuga. Ina ua vaai mai o ia i le tulaga o lana tane ma lana tama o lea sa fai atu ai o ia: ‘Ioe, o le a ou faia!”

“I le taimi lava na ia faia ai lena filifiliga sa oo mai le mana o le faatuatua i luga ia te a’u, ma ina ua ou faauuina o ia, sa ulufale mai lona agaga i lona tino. …

“I le taeao o le aso 6 o Tesema, sa fetalai mai le Agaga ia te a’u: ‘Tulai, ma faaauau lau faigamalaga!’ ma o le alofa tunoa o le Atua sa mafai ai ona tulai lo’u toalua ma faia ona lavalava ma savali atu i le taavale solofanua, ma sa matou o ai i le ala ma le olioli tele.”¹

I lona faamaoni ai i lana folafolaga, sa tumau Sister Woodruff i tafatafa o lana tane, e oo lava ina manaomia e ona tiute o se Aposetolo le malaga ese atu ma le aiga mo taimi uumi lava. I le aso 4 o Me, 1840, a o auauna ai Elder Woodruff i se misiona i Egelani, sa lafo atu ai e [Sister Woodruff ] se tusi mo ia, faapea: “Ou te iloa o le finagalo o le Atua e tatau ona e auauna i lana tovine; o le mea lea, ua ou lagona ai lo’u lagolagoina o lona finagalo i ia mea. E le’i tuua lava a’u ou te muimui pe ou te faatuiese talu ona e tuua a’u, ae ou te tulimataia le aso o le a e toe foi tasi mai ai i le fatu o lou aiga, ua faataunuuina lau misiona i le alofa ma le mata’u i le Atua. O loo e i ai pea iinei faatasi ma a’u i taimi ou te oo atu ai i luma o le nofoalii o le alofa tunoa, ma le taimi ou te talosaga ai mo le puipuiga ma faamanuiaga mo a’u ma le fanau, ou te talosagaina foi lea lava mea e tasi mo la’u soa pele, o le ua alu ese mamao atu ma a’u, i se atunuu ese, e talai le atoaga o le talalelei a Iesu Keriso.”²

I ia taimi a o valavala ai, sa faailoa ai foi e Peresitene Woodruff sona naunautaiga mo lona aiga, tuufaatasia ma se tautinoga e faia le finagalo o le Alii. I le aso 3 o Aperila, 1847, sa auina ai o ia e faimalaga faatasi ma le vaega muamua o paionia e agai atu i le Vanu o Sate Leki. Sa ia tusia i lana tusi talaaga: “Ou te lei lagonaina lava se mamafa sili atu i lo’u mafaufau i se isi lava taimi na ou tuua ai lo’u aiga mo se misiona nai lo le taimi lenei. O la’u tatalo i le Atua o le a Ia lagolagoina a’u ma lo’u aiga ina ia matou toe feiloai i lenei lalolagi e pei ona ia faia i le tele o isi misiona ua ou faataunuuina i le lalolagi i le tovine a le Alii.”³ I le fa o aso mulimuli ane sa vaavaai atu ai lona aiga ia te ia a o malaga ese atu mo le nofoaga o le Au Paia i Uinita Kuota, Nebraska. Sa tu o ia i luga o se mea maupuepue e le mamao ma le nofoaga, ma sa ia faaalu ai sina taimi e toe tepa ai i tua i lona aiga i le faaaogaina lea o ana meavaaimamao.⁴

Sa olioli Wilford Woodruff i le malamalamaaga e mafai ona faavavau lona aiga. O le upumoni lea na tuuina atu ia te ia le malosi e onosaia ai faigata o le olaga. Sa ia faapea mai, “Ua ou mafaufau i le tele o taimi faapea afai ou te galue seia oo ina ou matua e pei o Metusela ma e ala i lena auaunaga e mafai ai ona ou maua lo’u aiga matou te ola faatasi i le mamalu o lalolagi faavavau, o le a avea lena ma totogi ia te a’u mo tiga ma mafatiaga uma e mafai ona ou tutumau mai ai i lenei lalolagi.”⁵ O le folafolaga o se aiga faavavau sa uunaia ana gaoioiga i tagata o lona aiga. I se tusi i lona afafine o Blanche, sa ia faitauina: “O loo tatou talitonu uma lava o le a tatou nonofo faatasi e faavavau pe a uma le oti. Ou te manatu o i tatou uma lava o matua ma fanau e tatau ona tauaveina uma lava tiga tatou te mafaia ina ia mafai ai ona tatou fiafia faatasi a o tatou ola ai ina ia aua lava nei i ai ni mea tatou te toe faanoanoa ai.”⁶

Aoaoga a Wilford Woodruff

O faamanuiaga o le faaipoipoga ma le avea ma matua e sili mamao atu nai lo oa faalelalolagi.

Ua faailoa mai e le Alii ia i tatou o le faaipoipoga ua faapaiaina e le Atua i le tagata [tagai MFF 49:15]. O le faatulagaga o le faaipoipoga, i nisi nofoaga o loo tatou faitau i ai, ua tauau lava ina le amanaiaina. O loo masalomia o loo tupu a’e pea se manatu ia i tatou i le itu lea. O le mafuaaga, e le taumateina, e ono taitaiina atu i le faateleina o le oa ma le leai o se naunautai o alii talavou e tauaveina i o latou luga le avega o se toalua ma se aiga. A o tatou see ese atu ma le tulaga faatauvaa o le olaga o uluai aso, atonu e faanatura lava lo tatou iloa o le a faateleina pea lenei laina o manatu a o taofiofia alii talavou mai le ofoina atu o ni faaipoipoga i tamaitai talavou seiloga e mafai e i latou ona tuuina atu ia i latou se mea e pei o se fale manaia e pei ona latou fiafia ai i aiga o o latou matua. O le aoaoina foi o tamaitai ina ia ola i amioga ma soifuaga taugata ma le soona fai, o le a avea foi ma aafiaga e faalotovaivaia ai alii talavou mai le faaipoipoina. … E tatau ona aoaoina talavou o itupa uma e lua faapea, e le talafeagai le maua o ni oa ina ia maua ai le fiafia i le faaipoipoga.⁷

A oo ina fesiligia afafine o Siona e alii talavou ina ia tuufaatasia ma i latou i le faaipoipoga, nai lo le fesili—“E i ai se fale piliki manaia o le alii lenei, se pea solofanua mananaia ma se taavale solofanua manaia?” e tatau ona latou fesili—“Pe o ia o se tagata o le Atua? Pe o ia te ia le Agaga o le Atua? Pe o ia o se tasi o le Au Paia o Aso e Gata Ai? Pe tatalo o ia? Pe o i ai i luga ia te ia le Agaga e agavaa ai o ia e atiina ae le malo?” Afai e ia te ia lena, faataatiaese le taavale solofanua ma le fale piliki, a ia taliaina loa ma faatasia oulua e tusa ai ma le tulafono a le Atua.⁸

O le tiute o nei alii talavou [i] Siona le faaipoipo atu i afafine o Siona, ma saunia tino [faaletino] mo agaga o tagata, o fanau a lo tatou Tama oi le Lagi. O loo faatalitali mai i latou mo ni tino, ua faauuina i latou e o mai iinei, ma e tatau ona fananau i latou i le nuu o Siona ae le o Papelonia.⁹

Ou te valaau atu i matua uma i Siona atoa ina ia faia mea uma tou te mafaia e uunaia ai o outou atalii ma afafine e savavali i le ala o le amiotonu ma le upumoni ma faaaogaina ia avanoa o loo i o latou luma e faaleleia ai i latou lava. Aua nei tuuina atoa o outou loto i mea le aoga ma aafiaga o le lalolagi, ae ia aoao e talisapaia le mea moni, o le i ai o ni fanau faatuatua o se vaega lea o faamanuiaga silisili ma le maoae.¹⁰

O faamanuiaga ua faaalia mai e le Atua ia i tatou i le faatulagaga faapeteriaka o le faaipoipoga—o le faamauina lea mo le olaga nei ma le faavavau—tatou te le o faatauaina e i tatou e pei ona tatau ai.¹¹

E tatau ona tatou faatauaina o tatou aiga, ma le fegalegaleaiga ua tatou maua faatasi, ma manatua afai tatou te faatuatua o le a tatou mauaina le mamalu, tino ola pea ma le ola e faavavau, ma o lenei le meaalofa sili o meaalofa uma a le Atua i tagata [tagai i le MFF 14:7].¹²

E ala i aoaoga ma faataitaiga a matua e mafai ai e fanau ona saunia e auauna i le Ekalesia ma tumau faamaoni i le faatuatua.

E lei i ai lava so’u masalosalo e uiga i le upumoni ma le manumalo faaiu o lenei galuega. E leai lava [so’u masalosalo] i le taimi nei. E leai so’u masalosalo e uiga ia Siona i le avea ma lena na tagai i ai perofeta, i lona mamalu, ma lona mana, ma lana pule ma le malosi, faatasi ma le mana o le Atua i ona luga.

I le iloa atu o nei mea uma lava, o le fesili lea sa oso a’e i lo’u mafaufau, ma lea sa mafua ai ia te a’u le tele o manatunatuga, o le, o ai o le a alu e ave lenei malo ma tauaveina le tiutetauave? O ai o le a finagalo le Alii e aveina lenei malo i lona manumalo faaiu ma saunia ai mo lona faaatoatoaina ma le mamalu mo le afio mai o le Atalii o le Tagata? I o tatou atalii ma afafine. … I luga o o latou tauau o le a tatau ona nofo ai lenei malo, pe a te’a atu o latou tama ma toeaiina i le isi itu o le veli. Ua i o’u luma lenei mea i le manino e pei o le susulu o le la i le vateatea o le lagi. Ma a ou mafaufau i lenei mea, ona ou fesili lea ia te a’u lava, o le a le tulaga o loo i ai o tatou alii ma tamaitai talavou? O tatou ea, o matua, o faia o tatou tiute ia i latou? O latou taumafai ea e faaagavaaina i latou ma saunia mo le taunuuga ma le galuega matautia o loo taatia mai i o latou luma?¹³

E leai se isi o i tatou e iloa le auala o le a ui ai a tatou fanau. Tatou te faatuina faataitaiga lelei i o latou luma, ma tatou tauivi e aoao ia i latou aoaoga faavae o le amiotonu; ae a oo ina taunuu i o latou tausaga e tatau ai ona tali atu ua ia i latou le saolotoga ma e galulue lava i latou mo i latou lava.¹⁴

I lo tatou naunautai e talaiina atu le Talalelei i tagata o atunuu uma, e le tatau foi ona galo ia i tatou ia tiutetauave ua tuuina mai ia i tatou e tusa ai ma le tulaga tatau e tausia ma aoaoina ai a tatou lava fanau, ma totoina i totonu o i latou, a o laiti, le alofa mo le upumoni ma uiga lelei, ma le ava i mea paia, ma maua ai e i latou le malamalama i aoaoga faavae o le Talalelei.¹⁵

Ia tatou taumafai e tausi a tatou fanau i le aoaiga ma le apoapoaiga a le Alii [tagai i le Efeso 6:4]. Ia tatou faatuina ni faataitaiga lelei mo i latou ma aoaoina ia i latou aoaoga faavae lelei a o laiti i latou. Ua tuuina mai i latou ia i tatou e le Tama faalelagi; o i latou o lo tatou malo, o i latou o lo tatou faavae mo lo tatou faaeaga ma mamalu; o i latou o ni fugalaau lauiloa [tagai i le MFF 124:61], ma e tatau ona tatou tauivi e tausi i latou e talitonu i le Alii, ma aoao i latou e tatalo ma maua le faatuatua i le Alii i le mafai tatou te mafaia, ina ia oo i le taimi tatou te toesea ai ma tea atu ae tulai mai i latou i lea lava tulaga o le olaga o le a mafai foi ona latou tauaveina le galuega maoae ma le malo o le Atua i luga o le fogaeleele.¹⁶

O i latou o e ola i lalo o le mea e ta’u o le tulafono malamalama ma le moomia, ua aoaoina i ai le tulafono o le ola mama—o tulafono e sefulu—e aoaoina i latou e aua le pepelo, aua le faia upu masoa, aua le gaoi, a faapuupuu, aua le faia na mea ua faitauina e le mama, e le paia, e le amiotonu i le lotolotoi o fesootaiga faaletagata. A aoaoina e matua i a latou fanau nei aoaoga faavae i le amataga o lo latou talavou o le a mafai ona faamauina i o latou mafaufau, ma e pei lava ona vave ona taunuu fanau i tausaga e tatau ai ona tali atu, o le a uunaia a latou gaoioiga e mea ia na muamua faamauina i o latou mafaufau, ma o le a uunaia ai foi i latou i le atoaga o o latou olaga. O tamaiti uma o e faapena ona uunaia ma aoaoina, o le a oo ia i latou le te’i pe a latou faalogoina o fai upu masoa nisi latou te faifaimea faatasi, pe latou te ta’u fua le suafa o le Atua, ma afai lava latou te aoaoina e faaaoga upu masoa o le a muamua lava matua manaomia le matuai galue e aveesea uunaiga sa muai faamauina i o latou mafaufau.¹⁷

O se … faamanuiaga maoae mo fanau le i ai o matua o e tatalo ma aoao a latou fanau i aoaoga faavae lelei, ma faia faataitaiga lelei i o latou luma. E le mafai ona lelei le aoaiina e matua o a latou fanau i le faia o mea o loo faia foi e i latou lava.¹⁸

Afai tatou te faatuina se faataitaiga lelei i luma o a tatou fanau, ma taumafai e aoao i latou mai lava i lo latou laiti seia oo ina matutua, ia aoao i latou e tatalo ma faamamalu le Silisiliese; ia aoao ia i latou na mataupu faavae ia o le a lagolagoina i latou i le lotolotoi o tofotofoga uma, ina ia i ai i o latou luga le Agaga o le Alii, … ona faafaigata ai lea ona taitaieseina i latou. O uunaiga lelei o le a mulimuli ia i latou i o latou olaga atoa, ma e soo se mataupu faavae lava e ono tuuina mai, o le a le mafai lava ona o ese mai i o latou mafaufau na uunaiga lelei.¹⁹

O matua faautauta o le a le faatagaina popolega i mea i fafo atu ina ia sili a’e i luga o le aiga.

Ua leva ona ou mautinoa o loo matua taumafai lava le tiapolo ina ia faatupuina feeseeseaiga i le va o matua ma fanau, i le taumafai lea e musuia ma faatumauina i mafaufau o atalii ma afafine o le au paia na manatu le sa’o ia e taofia ai i latou mai le mulimuli atu i tulagavae o o latou tama ma tina. …

… E matua taua lava le tatau ona avea i tatou ma tama ma tina faautauta, ma e tatau foi ona tatou gaoioi ma le faautauta i le faatumauina i o latou mafaufau talavou na mataupu faavae uma lava o le a taitaia i latou e agai atu i le mea tonu, ma faatinoina ai i o latou olaga mataupu faavae o le amiotonu ma le upumoni. …

… O se mea maoae le iloa pe faapefea ona faia amio ina ia maua ai lagona lelei ma le alofa o o tatou aiga, ia o le a taitaia i latou i le ala e mafai ai ona faasaoina i latou. O se suesuega ma se galuega e le tatau lava ona faataatiaeseina e matua. … I le tele o taimi tatou te ono manatu ai o pisinisi e sili atu le taua ma tulei ese ai i fafo o o tatou mafaufau nei mea [taua], ae e le o se tulaga tatau lea. O le mafaufau o soo se tagata lava e matala, ma ia tulimataiina le galuega o loo taatia mai i o tatou luma, o le a ia vaai ma lagonaina o le tiutetauave lea e taoto i ona luga e tusa ai ma lona ia lava aiga, aemaise ai foi le tausiaina o lana fanau, e matua maoae.

Tatou te mananao e faasaoina a tatou fanau, ma mautinoa latou te mauaina faamanuiaga uma o loo siosiomia ai e ua faapaiaina, ma ia maua e i latou faamanuiaga a o latou matua o e sa faatuatua i le atoaga o le talalelei.²⁰

Ia tatou vaavaai i o tatou aiga, ma ia taumafai tagata taitoatasi e pulea lona lava aiga ma faatulaga lona lava fale ia maopoopo.²¹

E tatau i tama taitoatasi ona pulefaamalumalu i le agalelei ma le amiotonu i lona aiga.

A o ou laitiiti ma ou alu i le aoga, sa masani ona sau le puleaoga ma se fusi laau e tusa o le 8 futu le umi, ma o le tasi o mea muamua lava sa matou iloa o le a tupu o le sasaina lea o i [matou]. Aua soo se mea lava e le fiafia i ai o ia o le oo foi lena ia i matou o se sasa e matautia le ogaoga. O sasa uma lava na oo mai ia te a’u i lena taimi e lei i ai ma se aoga ia te a’u. … O le agalelei, agamalu ma le alofa tunoa o le ala sili lava lena. Ou te naunau ina ia faatumauina lenei mataupu faavae i mafaufau o o tatou alii talavou, ina ia mafai e i latou ona faatinoina i a latou amioga uma i le olaga. O le pule saua e le lelei, e tusa pe faaaogaina e tupu, po o peresitene, po o auauna a le Atua. O upu alofa e sili mamao atu le lelei nai lo upu mamafa. Tusa pe i ai ni tulaga faigata i o tatou va o le tasi i le isi, ae afai tatou te agalelei ma loto fiafia le tasi i le isi, o le a tatou faasaoina i tatou lava mai le tele o faalavelave.

… Afai e te ulufale atu i se aiga o loo tausia e se alii lona toalua ma lana fanau i le agalelei, o le a e iloa ai e faapena foi ona latou tausia o ia i le ala lava e tasi. O loo oo mai ia te a’u ni tala e uiga i le faiga e isi alii o o latou taitoalua. Latou te le o mauaina ni mea e tausi ai i latou. Latou te le tausia i latou ma se agalelei. O nei mea uma e ootia ai a’u. E le tatau ona tupu nei mea. … E tatau ia i tatou ona agalelei le tasi i le isi, faia mea lelei i le isi, ma galulue e faaalualu i luma le lelei, o le faagaeetia ma le fiafia o le isi, aemaise lava o i latou o o tatou lava aiga.

O le alii e taiulu i le aiga. O ia o le peteriaka o lona aiga. … E leai lava se isi vaaiga e sili atu lona matagofie i luga o le fogaeleele nai lo le vaai atu o tulai mai se alii i le ulu o lona aiga ma aoao i latou i mataupu faavae o le amiotonu ma tuuina atu ia i latou fautuaga lelei. O nei tamaiti e ava i o latou tama, ma e faamalieina ma olioli i latou i le i ai o se tama, o se alii amiotonu.²²

O aoaoga ma faataitaiga a le tina e mafai ona uunaia ai lona aiga i taimi uma ma le faavavau.

Ua pei o se tulafono, tatou te manatu ai o le tina o le tagata lea na te fausia le amio ma uiga o le tamaitiiti. Ou te manatu o le tina e malosi atu lana uunaiga i lana fanau nai lo se isi lava tagata. Ma o le fesili ua tulai mai i nisi taimi, “O afea e amata ai aoaoga?” Ua saunoa mai o tatou perofeta, “Pe a ulufale le agaga ola i totonu o le tino.” O le tulaga lava o le tina i le taimi lena [e fanau ai le tamaitiiti] o le a i ai ona aafiaga i le tagata e fanau mai i lona manava; ma e amata mai i le fanau mai o le tamaitiiti, ma lona olaga atoa lava, o aoaoga ma faataitaiga a le tina e pulea ma taitaiina ai, i se tulaga maoae lava lena tamaitiiti, ma o lana uunaiga e lagonaina i taimi uma ma le faavavau.²³

I luga o tauau o outou tina o loo taatia ai, i se tulaga maoae, le tiutetauave o le atiina ae sa’o o mana faalemafaufau ma le ola mama o tupulaga fai a’e, pe o le taimi o pepe meamea, tamaitiiti, po o le faasolo pea i luga o tausaga. … E leai se tina i Isaraelu e tatau ona te’a atu se aso ae na te lei aoaoina lana fanau e tatalo. E tatau ona e tatalo lava oe, ma aoao lau fanau ia faia, ma e tatau ia te oe ona aoaoina pea i latou i le ala lea, ina ia e te’aese atu oe, ae latou tulai mai i lou tulaga i le tauaveina o le galuega maoae a le Atua, o le a ia i latou aoaoga faavae ua uma ona faamauina i o latou mafaufau e lagolagoina ai i latou i taimi uma ma le faavavau. Ua loa ona ou fai atu o le tina lea e fausiaina le mafaufau o le tamaitiiti. …

… Faasino mai ia te a’u se tina o le e tatalo, o le ua foia le tele o faafitauli o le olaga e mafua mai i le tatalo, o le ua faatuatua i le Alii le Atua o Isaraelu i ona tofotofoga ma faigata, ma o lana fanau o le a mulimuli i le auala lava e tasi. O nei mea uma o le a le tuua i latou pe a latou o mai e galulue i le malo o le Atua.²⁴

O o tatou tuafafine … ua i ai o latou tiute e faatinoina i o latou taitoalua. E tatau ona latou mafaufau i lona tulaga ma ona laasaga. … O ava uma lava e tatau ona agalelei ia latou tane. E tatau ia te ia ona faamafanafana ia te ia ma faia mea lelei uma na te mafaia mo ia, i soo se laasaga o le olaga. Pe a lotogatasi uma le aiga, latou te fiafia i se agaga faalelagi iinei i le lalolagi. O le tulaga lea e tatau ona i ai; aua a oo ina faaipoipo se alii i se tamaitai e iloa e ia o le a la faatasi i taimi uma ma le faavavau. I le taeao o le uluai toetutu e tulimatai o ia e faatasia ma lana ava ma lana fanau i le faatulagaga o le aiga, e tumau ai i lena tulaga e faavavau faavavau lava. O se manatu matua mamalu lava lena!²⁵

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

O le a se mea o iloga ona aafia ai ou lagona e uiga i le fesootaiga i le va o Wilford ma Phoebe Woodruff? (Tagai i itulau 167–170.)
Toe iloilo le fautuaga a Peresitene Woodruff i lona afafine o Blanche (itulau 170). Mafaufau pe talanoaina foi mea patino e mafai ona e fesoasoani ai i tagata o lou aiga e maua ai le fiafia.
O le a se mea o iloga ona aafia ai ou lagona a o e faitauina fautuaga a Peresitene Woodruff i le autalavou e uiga i le faaipoipoga ma le avea ma matua? (Tagai i le itulau 170–171.) Faamata e faapefea ona faaaogaina lana fautuaga i olaga o tagata uma lava o le Ekalesia?
Faitau parakalafa e tolu mulimuli i le vaega muamua o aoaoga (itulau 171). O a auala e mafai ai e “mea le aoga ma aafiaga o le lalolagi” ona faatosina ese atu i tatou mai mea e fiafia i ai le aiga? E faapefea ona tatou tali atu i nei ituaiga o uunaiga? E faapefea ona tatou faaali atu i tagata o lo tatou aiga tatou te faatauaina a tatou fegalegaleaiga ma i latou?
Faitau atoa le parakalafa muamua i le itulau 173. O le a sou manatu o le a le uiga o le “tausia o a tatou fanau i le aoaiga ma le apoapoaiga a le Alii”? O a nisi o mea ua e faia e faataunuuina ai lenei mea?
Toe iloilo atoa parakalafa e tolu ma le fa i le itulau 172. E mafai faapefea e matua ona fesoasoani i a latou fanau ia maua se naunautaiga e auauna atu i le Ekalesia?
A o e faitauina fautuaga a Peresitene Woodruff e uiga i le aoaoina o fanau, o a ni mataupu faavae patino o e maua ai? (Tagai i itulau 172–173.)
Toe iloilo le vaega o loo amata i le itulau 173. O a ni mea e mafai ona fai e matua ina ia faasilisili ai ona faamuamua fesootaiga faaleaiga?
O a ni mataupu faavae e mafai e matua ona aoaoina mai i aafiaga o le alii talavou o Wilfod Woodruff ma lona pulea’oga? (Tagai i itulau 175.)
O le a se saunoaga a Peresitene Woodruff e uiga i le uunaiga a tane ma tama? (Tagai i itulau 175.) O le a sana saunoaga e uiga i uunaiga a ava ma tina? (Tagai i itulau 175–176.) E mafai faapefea e tane ma ava ona fesoasoani le tasi i le isi i o laua tiutetauave?
E faapefea ona fetaui aoaoga i lenei mataupu ma matua o matua? O a ni aafiaga ua faaalia mai ai le mafai e matua o matua ona i ai sa la’ua uunaiga amiotonu i fanau a a la’ua fanau?
O a ni faataitaiga ua e vaaia i matua ma matua o matua i le faataunuuina o o latou tiutetauave i o latou aiga?

Mau E Faatatau I Ai: Enosa 1:1; Mosaea 4:14–15; Alema 56:45–48; MFF 68:25–31; 93:38–40