Mataupu 7

O Le Togiola a Iesu Keriso

O le Togiola a Iesu Keriso o le mataupu faavae autu lea o le faaolataga ma le punavai sili ona taua o le faamoemoe mo tagata uma.

Mai le Soifuaga o Wilford Woodruff

Ina ua amataina le galuega a Elder Wilford Woodruff o se Aposetolo, sa galulue o ia ma lona usoga i le Iunaite Setete ma Egelani i le lotolotoi o tagata o e ava ia Iesu Keriso o le Alo o le Atua ma le Faaola o tagata. Ina ua iloa la o loo i le au faalogologo se talitonuga autu i le Togiola a Iesu Keriso, sa taulai atu a latou aoaoga i mataupu e pei o le valaauga o le Perofeta o Iosefa Samita, le oo mai o le Tusi a Mamona, ma le toefuataiina o le perisitua.¹ Ae peitai, ina ua lu’iina e tagata le mataupu faavae o le Togiola, sa faaleaogaina e Elder Woodruff o latou talitonuga i le mana ma le manino. Sa ia molimau atu o le faamoemoega o le misiona a Keriso i le lalolagi o le tuuina mai lea o ia lava e ositaulagaina ina ia faaola ai tagata mai le oti faavavau.”²

I le 1845 sa lolomiina e se tasi o le Ekalesia i le Atu Peretania se tamai tusi e taumafai ai e faamaonia le le manaomiaina ona tigaina ma maliu Iesu Keriso mo le faaolaina o tagata. Sa faalauaiteleina ona faaleaogaina lea talitonuga e Elder Woodruff, o le sa avea ma pulefaamalumalu a le Ekalesia i le Atu Peretania, i sana tusitusiga sa faaulutalaina o le “Rationality of the Atonement” [Faamalamalamaina o le Togiola]. I le lolomiina o lenei tusitusiga, sa ia faamoemoe i le faamautuina “o le talitonuga o [le Ekalesia] i le mataupu o le a sa’o ona malamalama i ai tagata uma, ma ia saunia le Au Paia a le Atua e tetee atu i sauaga a le fili maoae o le faaolataga o tagata, ma faapea foi ona faamaninoina lenei mataupu i mafaufau o tagata o e talitonu i faaaliga a le Atua.”³ O ana upu, i le faaleaogaina o aoaoga sese ma viia ai i le Faaola, sa faaalia mai ai lona alofa naunautai i le Alii ma le loloto o lona agaga faafetai mo le fuafuaga o le togiola.

Sa ia faailoa mai lona faanoanoa tele ona o le tagata sa ia tusia lea tamai tusi “sa matua pulea lona mafaufau e mana o le pouliuli, ua matua tele ai lona sese ese mai le faatulagaga ma le fautuaga a le malo o le Atua.” Sa ia faapea mai, “E matua sili mamao ai i se tagata ona matua leai sana taleni, nai lo le faaaogaina o i latou e taumafai ai e faamaonia le le manaomia o le togiola a Keriso, ma ia faasagatau mai ai i aoaoga faavae autu o le faaolataga e pei ona ia faia.”⁴

Sa mamafa le tele o le tusitusiga a Elder Woodruff i upusii mai tusitusiga paia, e faailoa mai ai le “oa o molimau” mai perofeta anamua ma mai le Alii lava Ia.⁵ Sa ia faapea mai o mataupu faavae o le Togiola “e le na o se autu sa fiafia perofeta anamua ma auauna a le Atua e talanoa ai, ae sa avea ma punavai sili ona taua o o latou faamoemoega uma, ma o le pogai lea e aumai ai lo latou malosi ma [lo latou] fesoasoani.”⁶

Aoaoga a Wilford Woodruff

E tusa ai ma le finagalo o Lona Tama, sa afio mai Iesu Keriso i le lalolagi e faaolaina i tatou mai aafiaga o le Pau.

Ou te talitonu sa silafia e le Silisiliese le mea o le a Ia faia e uiga i le lalolagi lenei a o le i faia e Ia. Sa ia silafia ituaiga o agaga o le a nonofo ai, ma le ituaiga o galuega e tatau ona faatinoina ina ia faasaoina ai Ona atalii ma afafine o e o le a o mai i le lalolagi. Ma i le faitauina o le talafaasolopito o fesootaiga a le Atua ma tagata, mai le fausiaina o le lalolagi e oo mai i lenei augatupulaga, ua tatou iloa ai sa galue le Tama e faamanuia Ona atalii ma afafine. Sa Ia tuuina mai Lona Alo pele e maliu e faaola le lalolagi—o se osigataulaga e pei o lea na o le Atua lava e mafai ona faia. Ma i nei aso amuli, ua Ia amataina le faatulagaga o le augatupulaga faaiu ma le maoae—lea e matua silisili i augatupulaga uma.⁷

Ua faailoa mai ia i tatou e le Faaola lava ia, le faamoemoe sa silasila i ai lona Tama i lona [Keriso] afio mai i le lalolagi. “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau: aua e lei auina mai e le Atua lona Atalii i le lalolagi ina ia faasala i le lalolagi, a ia faaolaina le lalolagi ia te ia.” [Ioane 3:16–17.]

O faaaliga ua tuuina mai e le Atua i tagata, e matua faamaonia ai o le Atua ma lalolagi faavavau o loo pulea e se tulafono faaselesitila; ma ina ia mafai e tagata ona tumau ai i le mamalu faatasi ma Ia, sa manaomia ai lona tausiaina o ia tulafono lava e tasi, “o le mea e pulea e le tulafono e faasaoina fo’i e le tulafono ma faaatoatoaina ma faapa’iaina ai lava.” [MFF 88:34.] Ae o le tagata, talu ai ua solia le tulafono a le Atua, ua aumaia tonu i ona lava luga le fetuu o le le usiusitai, lea sa le mafaia lava e ia ona togiolaina mai ai ia lava, pe mafai foi e se isi lava e faatauvaa ifo nai lo se osigataulaga faaleatua ona togiola lona pau.

O le taunuuga o lona le usiusitai, e pei ona lauiloa, o le oti, ma o lenei fetuu o loo faasolo mai i fanau uma a Atamu. Ia manatua o le tagata, ao ua’i atu i lenei faasalaga, na te faia e aunoa ma se mana i totonu o ia, i se tulaga tutoatasi, ia te ia lava e faataunuu ai lona toetu ma lona toefuataiina i luma o le Atua ma lona mamalu. O loo i ai nei o ia i lalo o le mana ma le pule a le oti, ma ina ia faataunuuina le manumalo i le oti sa manaomia ina ia i ai se tasi e sili atu lona paia ma lona mama nai lo le tagata lea ua solitulafono e tatau ona ulufale atu i le pule a le oti, ina ia mafai ai iina ona faaleaogaina lena pule; ma seiloga lava e faia lea mea, o lona uiga o le pule o le a umia e le oti i luga o tagata, o le a faavavau. O le a laitiiti se finauga e manaomia e faamaonia ai o le Alo o le Atua sa agavaa, i itu uma, e faatinoina lenei galuega, ona e mama, paia, ma e le pona; ma i le avea ai o ia o se tasi sa tofia e faataunuuina lenei mea, o loo ua matua atoatoa ona faamaoniaina i le molimau a Ioane e uiga ia te ia—“Faauta, i le Tamai mamoe a le Atua, na te aveesea le agasala a le lalolagi” [tagai Ioane 1:29]—ma “Aua faapei ona oti uma ia Atamu, e faapea foi ona faaolaina uma ia Keriso.” [1 Korinito 15:22.] …

… Ua atoatoa ona faavaeina i tua atu o feeseeseaiga uma, mai le matua maoae o le oa o molimau. … mai faaaliga a le Atua, ua tuuina mai i augatupulaga ma augatupulaga eseese o le lalolagi, ma i vaega eseese o le lalolagi, faapea o le faamoemoega o le misiona a Keriso i le lalolagi o le ofoina atu lea o ia lava o se osigataulaga e faaola ai tagata mai le oti faavavau, ma sa matua atoatoa lava ona talafeagai ma le finagalo o le Tama ina ia faia lea lava osigataulaga. Sa matua tonu lava ona ia faia i lona usiusitai i le finagalo o lona Tama i mea uma mai lava i le amataga, ma inu ai i le ipu oona sa tuuina atu ia te ia. I lea lava [osigataulaga] sa aumaia ai i le malamalama, le mamalu, viiga, tino ola pea, ma le ola e faavavau, faatasi ma lena alofa mama lea e silisili atu nai lo le faatuatua ma le faamoemoe, aua o le Tamai Mamoe a le Atua e ala i lena ua faatinoina mo le tagata lena [togiola] e le mafai e le [tagata] ona faia mo ia lava.⁸

Ua na o le Togiola a Iesu Keriso ma lo tatou usiusitai i tulafono ma sauniga o le talalelei e mafai ai ona tatou mauaina le meaalofa o le faaeaga.

E tatau ia i tatou, o se nuu, ona mataala i le mea moni, ua faia e lo tatou Tama i le Lagi mea uma na te mafai mo le faaolataga o le aiga o le tagata. Ua ia faailoa mai tulafono e manaomia mo le faaeaga ma le mamalu o tagata ma ua faia mea uma e mafai ona faia i le tulafono. … O Iesu sa maliu e togiolaina tagata uma; ae ina ia mafai ona aoga ia i latou Lona maliu, ma ia faamamaina e Lona toto i latou ma agasala patino uma ua faia i la le tino, e tatau ona latou ola i le tulafono o le talalelei. O agasala sa faia e ala ia Atamu ua uma ona faaolaina ai i tatou e ala i le toto o Keriso; ma ina ia maua le faaolataga e tatau ia i tatou ona usiusitai ma faatuatua i aoaoga faavae o le talalelei.⁹

Afai lava ou te mauaina se faaolataga atoatoa, o le a mafua ona o lo’u tausiaina o tulafono a le Atua.¹⁰

O le faamasinoga tonu i le tulaga muamua lava ua uma ona i ai lana aia, ma o afioga a le Atua ua faamaoniaina—“Aua o le aso e te ‘ai ai e te oti ai lava.” [Tagai Kenese 2:17.] O lea la, i le isi itu, ua faalauteleina atu le alofa tunoa, ma ua faailoaina mai le alofa o le Atua i le motusia o noanoataga o le oti, lea ua mafai ai ona toe faatasia agaga ma tino o tagata. O agaga o e e amiotonu e mauaina se faaeaga i luma o le Atua ma le Tamai Mamoe—i tino [faaletino] lava e tasi ia sa latou tauivi ai, galulue ai, ma tigaina ai a o i ai i le lalolagi, pe a na le seanoa lea tuu faatasiga e le mafai e agaga o tagata ona maua le atoatoaga o le mamalu. O loo i ai se mamalu e fesootai ma lenei, o le i ai lea o se pogai faavavau o le olioli i tagata uma o le malo selesitila. I le isi itu, o agaga o i latou o e tetee i le Talalelei a Keriso ma taufaifai i le alofa tunoa o le Atua ia i latou, e tatau ona toe foi i o latou tino i le toetutu mulimuli ina ia mauaina se atoatoaga o lo latou faasalaga i tino lava ia sa latou ola ai a o faasagatau atu i le Atua. O le mea lea matou te lapatai atu ai i tagata uma o e faalogo i le leo o nei upu, ina ia salamo ia latou agasala ma usitaia le Talalelei a le Alo o le Atua.¹¹

O le a le talalelei e pei ona aoaoina e Iesu lava ia? O le uluai mataupu faavae lava o le faatuatua i le Mesia; o le uluai mataupu faavae lava lea sa aoaoina i le tagata. Ina ua alu atu Atamu, ina ua maea ona tulieseina mai le faatoaga i Etena, i Atamu-onai-Amani e osi ai se taulaga, sa fesiligia o ia e le agelu a le Alii pe aisea ua ia faia ai. Sa tali Atamu na te le iloa, ae sa poloaiina o ia e le Alii ina ia faia. Sa ta’u atu ai ia te ia o le toto o povi po’a ma oti, o mamoe po’a ma tamai mamoe e tatau ona faamasaaina i luga o le fata faitaulaga o se faatusa o le taulaga faaiu ma le maoae lea o le a ofoina atu mo agasala a le lalolagi. [Tagai Mose 5:4–7.] O le uluai aoaoga faavae, lea, ua aoaoina i le Tama o Atamu o le faatuatua i le Mesia, o le e afio mai i le vaeluaga o taimi ina ia ofoina atu lona soifua mo le togiolaina o tagata. O le aoaoga faavae lona lua o le salamo. Ma o le a le salamo? O le fulitua lea i le agasala. O le tagata e salamo, afai o ia e palauvale, e le toe palauvale; po o se gaoi, e le toe gaoi; o le a liliu ese o ia mai agasala uma lava ua uma ona faia ma e le toe faia lava. E le o le salamo le faapea, ua ou salamo nei, ona toe gaoi lea taeao; o le salamo lena faalelalolagi, lea e inosia i luma o le Atua. O le salamo o le mataupu faavae lona lua.

Ua ou faalogo i le tele o tagata o faapea e le manaomia ni sauniga paia, ae ua tau lava o le talitonu i le Alii o Iesu Keriso e manaomia e faaolaina ai. Ou te lei aoaoina lava e a’u lena mea mai ni faaaliga a le Atua i tagata, pe mai anamua po o ona po nei. Ae i le itu faafeagai, o le faatuatua ia Keriso, salamo, ma le papatisoga mo le faamagaloina o agasala sa aoaoina e peteriaka ma perofeta ma Iesu Keriso ma Ana aposetolo. O le papatisoga mo le faamagaloina o agasala o se sauniga o le talalelei. Fai mai se tasi, o le papatisoga e le manaomia mo le faaolataga. E le gata sa aoaoina e Iesu, ae sa usiusitai lava o ia i lena tulaga manaomia, e lei faapea na papatisoina mo le faamagaloina o ni agasala—ae, e pei ona fetalai o ia, “ina ia faataunuuina o mea tonu uma,” o lea la i lenei mea, e pei lava ona i ai i isi tulaga uma lava i le faia o se faataitaiga mo tagata uma ina ia mulimuli ai [tagai Mataio 3:15]. Pe a mulimulitai i nei aoaoga faavae o le talalelei, ona avea lea o se tagata o se tasi e agavaa e mauaina le Agaga Paia; ma o lenei meaalofa paia e faaeeina i le taimi lenei e pei ona sa faia anamua, e ala i le faaeeina atu o lima o alii o loo umiaina le pule e faia ai sauniga o le talalelei. O uluai aoaoga faavae ia o le talalelei ia e talitonu i ai i tatou o le Au Paia o Aso e Gata Ai ma aoao atu i o tatou uso a tagata.¹²

Pe a valaauliaina tagata ina ia salamo i a latou agasala, e faasino i a latou lava agasala, e le o le agasala a Atamu. O le mea e ta’ua o le uluai agasala sa togiolaina e ala i le maliu o Keriso e lei manaomia ai se gaoioiga lava se tasi a se tagata; e faapena foi agasala a tagata taitoatasi sa togiolaina e ala i le taulaga lava lea e tasi, ae i luga o le tuutuuga o lona usiusitai i le ata o le faaolataga o le talalelei pe a faalogo i ai ua folafolaina atu.¹³

O le fanauga uma a tagata o e [ua taunuu] i o latou tausaga ua malamalama ma ua mafai ai ona tali atu ua sese pe a agasala, o [tagata] uma e i ai le natura e fai ai agasala e pei lava o le natura o aloiafi e lelea agai i luga. “Se a se mea matou te faia [ina ia faasaoina]” o le tagi atu lea a tagata o e na faalogo i le talaiga a Peteru i le aso Penetekoso [tagai Galuega 2:37], ma o lea lava le manatu e tasi o le a talafeagai mo tagata uma o tupulaga uma. O le tali, o le usitai i le tulafono o le Talalelei. O le auala saogalemu lea ua tuuina mai mo le faaolataga o le aiga o le tagata.¹⁴

Ou te lagona ua tatau ia i tatou o se nuu ona alalaga fiafia; ma e tatau ona tatou faatauaina nei meaalofa ma faamanuiaga a le Atua ua tuuina i o tatou lima, ma e tatau ia i tatou ona saili e faalauteleina o tatou valaauga, ma ia faataunuuina faatasi ai o se nuu le finagalo o lo tatou Tama i le Lagi, ma le manatu maualuga o e sa soifua ma maliliu i luma atu o i tatou. …

… O le Talalelei a Keriso o se tasi o faamanuiaga silisili e mafai ona faaeeina i luga o tagata. O le ola e Faavavau, ua fetalai mai ai le Alii, o le meaalofa sili lea a le Atua [tagai MFF 14:7]. Ua na o le usiusitai i lenei Talalelei, e mafai ai ona tatou mauaina lena. O lenei, uso e ma tuafafine, o lo tatou faamanuiaga lena.¹⁵

O la’u tatalo naunautai ina ia i luga o i tatou faamanuiaga a lo tatou Atua i le taimi nei, ma pe a mae’a i tatou ma ui atu i talaatu o le veli, ua mae’a ona tatou faia mea uma ua manaomia mai ia i tatou, ma saunia ai e ola faatasi ma e ua faapaiaina ma e amiotonu ua faaatoatoaina i le toto o le Tamai Mamoe.¹⁶

O le taua o le Togiola, e mafai ai ona tatou faaatoatoaina e ala ia Keriso.

E leai se tasi e i ai se mana e faaolaina agaga o tagata ma tuuina atu ia i latou le ola e faavavau, vagana ai le Alii o Iesu Keriso, i lalo o le taitaiga a Lona Tama.¹⁷

E tatau ona avea ma a tatou suesuega sili le faatauaina o upu o le ola ina ia tatou ola ai i le alofa tunoa ma alualu ai i luma i le poto o le Atua ma faaatoatoaina ai ia Keriso Iesu, ina ia tatou maua ai le atoatoaga ma avea ma suli o le Atua ma suli faatasi ma Iesu Keriso. [Tagai Roma 8:16–17.]¹⁸

Uso e ma tuafafine, e le o i tatou ea o atalii ma afafine o le Atua, ma a oo ina faaali mai o ia, afai tatou te faatuatua, e le avea ea i tatou e pei o ia? [Tagai 1 Ioane 3:2.] Ioe; ma a oo ina taunuu mai lea aso mamalu o le a tatou toe maua le avanoa e tutulai ai i lenei lalolagi ma feiloai i le olioli ma le faafetai … o le afe ma afe o isi o e ua faasinasinaina o latou ofu i le toto o le Tamai Mamoe, ma o e, e ala i le taua o Lana togiola, ua tofia e avea ma tupu ma ositaulaga i le Atua, ma nofotupu faatasi ai ma Ia i le faaeaga i Lona Malo. Ia tatou agavaa mo lenei taui; ma o lenei, a o tatou faimalaga pea i lenei lalolagi o suiga ma faanoanoaga, ia tatou mulimuli atu i mamanu o soifuaga o e agavaa … ma, e sili atu i lo na mea uma, ia tatou mulimuli i tulaga vae o le Faataitai sili o mea tonu uma, o lo tatou Alii ia o Iesu Keriso, o le o le a i ai lona alofa tunoa ia i tatou uma.¹⁹

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau v–ix.

O le a le mea o loo faaalia mai i le tala i itulau 67–69 e uiga i lagona o Peresitene Woodruff e uiga ia Iesu Keriso?
Toe faitau aoaoga i itulau 69–71. O le a le mea na aoao mai e Peresitene Woodruff e uiga i lo tatou manaomiaina o le Togiola a le Faaola?
Faasolo lau vaai i le mataupu ma suesue nisi o mau o loo lisiina i lalo o lenei itulau. A o e faia lea, vaavaai ni faaupuga o loo faamatala mai ai mea sa tigaina ai Iesu Keriso ina ia faasaoina i tatou uma mai le oti faaletino ma ofoina mai ai mo i tatou le faaolataga mai ia tatou agasala. E faapefea ou lagona a o e mafaufau loloto i le mea sa faia e le Faaola mo oe?
O le a se mea e te ono fai atu ai i se isi e tautino mai faapea “e le manaomia ni sauniga paia, ae ua tau lava o le talitonu i le Alii o Iesu Keriso e manaomia e faaolaina ai? (Tagai itulau 71–74.)
Faitau le vaega faaiu o lenei mataupu (itulau 75), ma tulimatai faapitoa atu i le faaupuga “o le taua o Lana togiola.” Ona suesue lea o le 2 Nifae 2:6–8 ma le Alema 22:14. E faapefea e nei aoaoga ona faateleina lou malamalamaaga i le Togiola?
E faapefea ona uunaia lou olaga e lau molimau o le Togiola a le Faaola?

Mau E Faatatau I Ai: I le tala o loo ta’ua i itulau 74–75, o loo siiina mai ai po o faasino foi i ai Elder Woodruff i mau ia e uiga i le Togiola a Iesu Keriso: Iopu 19:25;Mataio 26:28; 27:52; Ioane 1:29; 3:16–17; Galuega 2:23; 4:12; 20:28; Roma 3:24–25; 1 Korinito 15:22; Kalatia 3:17–24; Efeso 1:7; Kolose 1:19–20; Eperu 9:28; 10:7–10, 29; 11:26, 35; 1 Peteru 1:18–21; 1 Ioane 2:2; Faaaliga 1:5; 5:9–10; 13:8; 1 Nifae 10:5–6; 11:32–33; 2 Nifae 2:26; 9:3–14; 26:23–24; Iakopo 6:8–9; Mosaea 3:11, 16–18; 15:19–20; 18:2; Alema 7:12; 11:42; 21:9; 34:8–15; 42:13–17; 3 Nifae 11:9–11; 27:14; Mamona 9:13; Eteru 3:14; Moronae 10:33; MFF 18:10–11; 19:16–19; 35:2; 38:4; 45:3–4; 88:34