Mataupu 20

Saolotoga: Filifilia o le Ola po o le Oti

O le taimi lenei mo i tatou e filifili ai i le va o le lelei ma le leaga, aua o a tatou faatinoga e oo mai ai taunuuga i lenei olaga ma le faavavau.

Mai le Soifuaga o Wilford Woodruff

Sa molimau mai Peresitene Wilford Woodruff faapea, e oo mai le faaolataga ona “o le toto o Iesu Keriso,” ma sa ia faamamafaina mai foi faapea, o le atoatoaga o le faaolataga e “ala mai lea i le usiusitai i le Talalelei.”¹ Faatasi ai ma lea malamalamaaga, sa ia aoao mai ai faapea “e ia i tatou uma lava le saolotoga e filifili le lelei ae tetee i le leaga, po o le filifili o le leaga ae tetee i le lelei”²ma o le Atua “o le a faamasinoina i [tatou] i le faaaogaina o lenei saolotoga.”³ Sa ia uunaia le Au Paia ia faia filifiliga amiotonu, ma faamanatu ai ia i latou le eseesega i le va o “nai tausaga pupuu o fiafiaga faaletino” ma “se faavavau umi o le malamalama, upumoni, faamanuiaga, ma le poto ia o le a faaeeina e le Alii i luga o tagata uma taitoatasi o e tausia ana tulafono.”⁴

E pei lava o i tatou uma, sa maua e Peresitene Woodruff le anoanoai o avanoa e faaaogaina ai le meaalofa o le saolotoga. O se tasi o ia avanoa na oo mai i Herefordshire, i Egelani, i le aiga o Ioane Benbow (tagai i le itulau e 92 o lenei tusi). “O Ioane Benbow o se alii tamalii,” o le manatua lea e Peresitene Woodruff. “Sa pei o ia o se alii sili o Egelani; ou te manatu o ia o se alii sili ona mauoa ua ulufale mai i le Ekalesia. Ou te masalo e lei atoa se masina talu ona papatiso o ia, ae oo mai o ia i totonu o si tamai potu malolo ma lona faletua, ma e masalo sa faaaluina e ia le tolu kuata o se itula e faamatala mai ai ia te a’u faapea sa ia faitau i le Feagaiga Fou i le vaitaimi o le Au Aposetolo ma le auala na faatauina uma ai e tagata a latou meatotino ae tuuina atu i le Au Aposetolo [tagai i le Galuega 4:31–37], ma sa ia faapea mai sa ia lagonaina o lona tiute le faataunuuina o lena tulafono ma sa ia manao na te faia. Sa ou faalogologo ia te ia ma le onosai ma ina ua maea ona faamatala mai sa atoa foi le isi afa itula o o’u faamatalaina ia te ia le eseesega o lo matou tulaga i le taimi nei ma le tulaga o le Au Aposetolo i aso na. Sa ou faamalamalamaina o ia faapea e lei auina atu au iina e le Atua e tausia ana auro, o ana solofanua, o ana povi ma ona fanua; sa Ia auina atu a’u iina e talai le Talalelei. Ae peitai, sa ou fai atu ia te ia, e taliaina e le Alii lana taulaga, ma e soo se taimi lava e mafai ai ona ia faia mea lelei, e tatau ona ia faia; e tatau ona ia fesoasoani i e matitiva, ma fesoasoani e lomiaina le Tusi a Mamona, ma isi.”

I le toe faamatalaina o lenei aafiaga, sa faapea mai Peresitene Woodruff e uiga i le loloto o lana filifiliga e tetee atu ma lona ava tele i le ofo a Uso Benbow:

“O lenei, faamata o le a se taunuuga pe ana ou ui i le isi auala, ma faapea atu, ‘Ioe aumai ia te a’u au meatotino ou te tausiaina’? Ia, semanu e liliuese o ia. E le gata i lena, ae semanu e i ai se Aposetolo valea e toatasi, o le semanu e oo atu foi i le liliuese. Ae pe le o se faaosoosoga ea lena ia te a’u? E leai, leai lava. Semanu e le mafai e se Toeaina o loo tele ai le Agaga o le Atua e iloa ai le eseesega i le va o le selau afe pauni o tupe ma se vaega i le uluai toetutu, ma le mana e ui atu ai i talaane o agelu ma atua e oo atu i le faaeaga ma le mamalu, ma tu i luma o le Atua ma le Tamai Mamoe e faavavau faavavau lava.”⁵

Aoaoga a Wilford Woodruff

Talu ai ona ua tuuina mai e le Atua ia i tatou le saolotoga, o lea ua gafa ai lava i tatou ma a tatou mea e fai.

Ua tuuina mai e le Atua i ana fanau uma i lenei augatupulaga, e pei ona ia tuuina mai i ana fanau uma i augatupulaga ua mavae, le saolotoga o le tagata lava ia. O lenei saolotoga ua avea pea ma tofi o le tagata i lalo o le tulafono ma le pulega a le Atua. Sa [tatou] umiaina i le lagi o lagi a o lei i ai le lalolagi, ma sa faatumauina pea ma puipuia e le Alii iina e tetee atu ai i faamata’u a Lusifelo ma i latou o loo ‘au ma ia, ina ia faatoilaloina ai Lusifelo ma le tasi vae tolu o ‘au o le lagi [tagai i le Faaaliga 12:1–9; MFF 29:36–37; Mose 4:1–4]. O le taua tele o lenei saolotoga ua avea ai oe ma a’u faapea tagata uma lava ma tagata e gafa ma mea tatou te faia, e gafa mo le auala tatou te sailia, o olaga tatou te ola ai, ma galuega tatou te faia i la le tino.⁶

O se vaega o le pulega faalelagi o le le faamalosia lea o soo se tagata e alu i le lagi, ia le faamalosia le mafaufau ae ia tuu i le saolotoga e faia ai mo ia lava. Ua tuu e le [Atua] i luma o Lana tagata na foafoaina le talalelei e faavavau, o mataupu faavae o le ola ma le faaolataga, ona tuu loa lea o ia e filifili mo ia lava pe teena foi, ma le malamalamaaga maumaututu ua i ai lona tiute ia te Ia mo le taunuuga o ana galuega.⁷

O a tatou filifiliga e faia le lelei po o le leaga e oo mai ai taunuuga i lenei olaga ma le faavavau.

O le a maua e tagata uma lava mea na latou galulue i ai. O le mea lava tatou te luluina, pe lelei pe leaga, o le mea lava lena tatou te seleseleina le fua [tagai i le Kalatia 6:7; MFF 6:33].⁸

Ua poloaiina e le Alii i tatou, ma e tatau ona tatou usiusitai i ana poloaiga pe afai tatou [te] mauaina faamanuiaga o le usiusitai.⁹

O le tele o lo tatou tausisia o poloaiga a le Atua, o le tele foi lea o lo tatou faatuatuaga o le Atua o la tatou uo ma o loo Ia silasila mai ma puipuia i tatou ma o Lona Alo o Iesu o lo tatou fautua i le Tama, o loo i ai o Ia i le lotolotoi o lenei nuu, ma o le a Ia finau mo aia tatau a Lana Au Paia, ma o le a tafiesea auupega uma taitasi ua fausia e tetee ia Siona.¹⁰

E tatau ona uunaia mafaufau o a tatou fanau ia [malamalama] i taunuuga leaga o le faia o agasala po o le solia o soo se tulafono a le Atua; e tatau ona faamalamalamaina i latou faapea o le faia o mea sese latou te maua ai faanoanoaga ma mafatiaga ia e mafai ona latou aloese mai ai e ala i lo latou faia o le mea sao, ma e tatau ona latou aoaoina lenei aoaoga faavae e ala i mataupu [taitasi] ae le o le aoao mai i faanoanoaga ma mafatiaga e ala i aafiaga o le faia o le sese.¹¹

Ou te lei faia lava se agasala i totonu o lenei Ekalesia ma le malo e aunoa ma le sili atu i le faaafe ona ou tigaina ai nai lo le aoga [o le mea na ou agasala ai]. E le mafai ona tatou agasala ma tatou sao ai mai le faasalaga; e le mafai ona tatou le amanaiaina soo se fautuaga ma saoloto ai mai le faasalaga, ae o le a aumaia lava le faanoanoa.¹²

Uso e ma tuafafine, saili i le Atua; valaau atu ia te ia i o outou nofoaga lilo, ma aua nei liliuese mai le amiotonu ma le upumoni; e leai se mea e maua i le faia o lena mea, ae o le a faatoilaloina mea uma.¹³

O tagata uma o e le savavali e tusa ai ma le malamalama o loo ia i latou, pe vave mai pe tuai mai, ae o le a latou maua lava mafatiaga e ogaoga le tiga; latou te le maua le olioli ma le fiafia ma le faaolataga e pei o le tagata lea e usiusitai i poloaiga a le Atua ma tumau ai i le faia pea o le mea sa’o. O e agasala e fefefe i taimi uma. E leai lava se faamalosiauga mo se alii po o se tamaitai e faia le agasala, e le maua ai ni taui manaomia. E sili ai ia i tatou le auauna i le Alii, aua o i latou o e auauna i le Alii i le taeao, aoauli ma le po e fiafia lava i latou, tusa lava pe mauoa pe matitiva.¹⁴

Ia tuuina atu i soo se tagata, o atunuu, o malo, po o augatupulaga o tagata le fesili, ma o le a latou ta’u atu ia te outou o loo latou sailia le fiafia, ae o faapefea ona latou saili i ai? Tatou ave le vaega sili ona tele o tagata mo se faataitaiga, o faapefea ona latou saili mo le fiafia? E ala i le auauna atu i le tiapolo i le vave latou te mafai ai, ma e toetoe lava o le tagata po o le mea mulimuli e tapuai i ai le fanauga a tagata, o le tagata mulimuli e ana tulafono latou te mananao e tausia o tulafono ia a le Atua o le lagi. Latou te le tapuai i le Atua pe faamamalu i lona suafa, latou te le tausia ana tulafono, ae upuvale i lona suafa, mai lea aso i lea aso, ma e toeitiiti lava o le lalolagi atoa o loo saili mo le fiafia e ala i le faia o agasala, solia o tulafono a le Atua, ma le upuvale i lona suafa ma teenaina le auala lava e tasi e maua mai ai le fiafia.

Afai tatou te malamalama moni e le mafai ona tatou maua le fiafia i le savalia lea o le ala o le agasala ma le solia o tulafono a le Atua, ona tatau lea ona tatou iloaina le sese tele, o le a iloa ai e alii ma tamaitai uma taitoatasi o le ala e maua ai le fiafia o le tatau lea ona tatou galulue ma faatinoina galuega o le amiotonu, ma faia le finagalo o lo tatou Tama oi le Lagi, aua e tatau ona tatou maua mai lona aao le fiafia, faamanuiaga, mamalu, faaolataga, faaeaga, ma ola e faavavau, ia tatou te mauaina i le olaga nei ma le faavavau.¹⁵

Ia tatou faamaoni ma faamatagofieina i tatou lava i le uiga matagofie o le talalelei. E leai lava se mea e maua i le faia o le sese. O le pepelo, gaoi, upuvale, ona, taufaaleaga, ma le teenaina o le Alii o Iesu Keriso e aumaia ai le faanoanoa ma le nutimomoia; latou te faatoilaloina le tagata ua faia i le faatusa o le Atua; ae o le faia o le mea sao, o le usitai i poloaiga a le Atua, o le alofa mama ma le agalelei, e aumaia ai le olioli ma le filemu ma le Agaga Paia, ma oo atu ai i le faaeaina i le malo o lo tatou Tama.¹⁶

O le a tauia i tatou e faavavau e tusa ai ma tulafono tatou te filifili e tausia i si o tatou vaitaimi puupuu i le lalolagi.

Ia manuia o outou agaga, o o tatou olaga iinei ua na o ni nai aso, ae i le isi itu o le veli o le a tatou ola ai e faavavau, o le a tatou ola ma tumau ai i le umi lava e soifua ai lo tatou Foafoa, ma o lo tatou taunuuga faavavau e faalagolago i le ala tatou te faaaluina ai o tatou olaga pupuu i la le tino.¹⁷

Afai e mafai ona tatou matuai malamalama lelei i o tatou taunuuga i le lumanai—fiafia i le lumanai, faaeaga ma le mamalu, po o lo tatou puapuaga i le lumanai, faatoilaloina ma le faanoanoa, e faalagolago uma lava i le taimi itiiti lea o loo tatou faaaluina i lenei lalolagi, e mafai ona ou faapea atu e leai ma se aoga i se tagata i lalo o le lagi e faaalu ai lona taimi i le faia o mea sese. … Afai e maua e se tagata ni faamanuiaga mai soo se mea, e tatau ia te ia ona maua mai na faamanuiaga mai le Alii, aua e leai se uiga o le tiapolo e faamanuia, ma e na te le faamanuiaina foi le fanauga a tagata; ae e galue o ia e taitaieseina i latou mai ala o le amiotonu ma le upumoni.¹⁸

O le Atua o le lagi, o le na foafoaina lenei lalolagi ma tuuina i ai lana fanau, na tuuina atu ia i latou se tulafono lea e mafai ai ona faaeaina ma faasaoina ai i latou i se malo o le mamalu. Ona o loo i ai se tulafono ua tuuina atu i malo uma, ma o mea uma lava ua pulea e le tulafono i le vanimonimo atoa. Soo se tulafono lava e tausia e se tasi, e faasaoina o ia e lena tulafono, ma maua e ia soo se taui lava ua folafola atu e lena tulafono ia te ia [MFF 130:20–21]. O le finagalo o le Atua ia usitaia e lana fanau uma le tulafono silisili ona maualuga, ina ia latou maua ai le mamalu silisili ona maualuga ua faauuina mo tagata uma e tino ola pea. Ae ua tuuina mai e le Atua i lana fanau uma le saolotoga, e filifili ai le tulafono latou te tausia.¹⁹

E leai se tagata o le a mauaina se mamalu selesitila sei vagana ua ia tausia se tulafono selesitila; e leai se tagata o le a mauaina se mamalu terasitila sei vagana ua ia tausia se tulafono terasitila, ma e leai se tagata o le a mauaina se mamalu telesitila sei vagana ua ia tausia se tulafono telesitila [tagai MFF 88:19–33]. O loo i ai se eseesega tele i le va o le susulu o le la i le aoauli ma le tauemoemo o fetu i le po, ae o lena eseesega e le sili atu lona tele nai lo le eseesega o mamalu i ni nai vaega o le malo o le Atua.²⁰

Ua faaalia mai e le Alii ia i tatou le tulafono selesitila, o lena tulafono e faapea, ua Ia tuuina mai ia i tatou le atoatoaga o le talalelei a Iesu Keriso, ma ua tuuina mai ia i tatou se malamalama o mataupu faavae o le ola e faavavau. …

Afai tatou te o atu i le lalolagi selesitila ona uunaia lea o i tatou e le agaga o loo pulea iina, ma faaauau ai pea ma i tatou na mataupu faavae ia e tatau ona pulea i tatou. Ua tatau ona tatou maua le agaga lea e tasi ma mataupu faavae i lenei lalolagi, ma e tatau ona tatou tausia se tulafono selesitila iinei, ma fusia faatasi i mataupu faavae ia e fusia faatasi ai le nuu o le Atua o e o loo i ai i ona luma, ina ia mafai ai ona maua le mamalu lava lea o loo latou olioli ai.

O mataupu faavae nei o loo aoaoina ai i tatou mai lea aso i lea aso, ma e tatau ona tatou aoao e faatino, ma e tatau ona tuuese lo tatou manatu faapito ma isi uma mataupu faavae sese.²¹

E i ai le taui mo i latou o e faia le mea sao, ma o le a matuai faanoanoa ma le tiga ia tagata ona o le mulimuli i se isi auala i le tupulaga lenei po o se isi lava tupulaga e faatuiese atu ai i le Atua po o lana galuega. … Afai e faia e se tagata le mea sao, e lototoa i le molimau ia Iesu Keriso, e usitai i le talalelei, ma tausia ana feagaiga, a oo atu o ia i le isi itu o le veli ua i ai lona avanoa e ulufale atu ai i luma o le Atua ma le Tamai Mamoe; talu ai ona sa tausia le tulafono selesitila e ulufale atu ai o ia i le mamalu selesitila, ua faasaoina o ia e lena tulafono, ma auai ai o ia i lena mamalu i augatupulaga uma e le gata ai o le faavavau. E i ai le taui mo soo se tagata lava i lalo o le lagi e usitaia ma faatuatua i le tulafono a le Atua i nai aso itiiti o loo ia faaaluina i la le tino.²²

Ua tatau loa ona tatou suesueina o tatou lava loto, ma ia faia loa lava i le taimi nei se faaiuga o le a tatou faia galuega o le amiotonu, faamamaluina lo tatou Tama oi le Lagi, faia o tatou tiute i le Atua ma tagata, uumau ma atinae le malo o le Atua, ona tatou malamalama ai lea, ina ia mafai ona maua le fiafia ma faamalieina le agaga ola pea i se atoatoaga o le mamalu e tatau i lena tagata ona tausia se tulafono selesitila ma faaolaina e se vaega o le Agaga selesitila o le Atua; ma o le a tatou malamalama ai foi o le faia o le agasala, solia o le tulafono a le Atua ma le upuvale i lona suafa, o le a aumaia ai le faanoanoa ma le nutimomoia ma o le a oo mai ai foi le oti faaletino ma le faaleagaga. Afai tatou te savavali i ala o le amioletonu, ua tatou faatupuina le faanoanoa i le Agaga Paia ma faatupuina le faanoanoa i o tatou uso ma faamanu’aina i tatou lava.²³

O le ala o le ola ua faasinoina mai ma afai tatou te le amanaia ona savavali ai, e leai se isi mea ua na o le oti e fetaiai ma i tatou. Sei o tatou taofi lava ma tomanatu mo sina taimi—sei o tatou vaai pe sili ia i tatou le maua o le ola po o le oti. … Ua uma ona outou faalogo i upumoni manino, ma ua uma ona ta’uina mai e le mana o le Agaga Paia ma e ala i le molimau ia Iesu Keriso, ma o le taimi lenei mo outou e filifili ai po o ai tou te auauna i ai.²⁴

O o outou faamanuiaga i le lumanai, o o outou faaeaga ma mamalu i le lumanai, i lalolagi e leai ni gataaga, o le a faalagolago lava i le auala e te ui ai iinei. Ua manino le ala i o outou luma lea e tau atu i le ola e faavavau. … Ua tuu atu nei ia te outou ina ia outou savavali ai.²⁵

Ua tuu mai e le Atua le faaolataga ia tatou au i ai, ma tuuina mai mataupu faavae faigofie o le amio ma tuuina mai le malosi e faataunuuina ai.

O loo mafai ona tatou ausia le faaolataga, ola faavavau ma se vaega i le uluai toetutu; e moni, o faamanuiaga uma lava ua folafolaina mai e le Atua i soo se nuu lava ua ola i la le tino, o loo ua tuuina mai mo outou ma e mafai ona outou ausiaina tau lava lea ia faia o outou tiute.²⁶

O loo i ai faamalosiauga uma lava mo le Au Paia o Aso e Gata Ai; o lo latou auala o loo manino ma faatosina mai i o latou luma.²⁷

E na o le tasi lava le auala, ma o se auala tuusao lava; ma o aoaoga faavae ma tulafono uma e pulea outou i lena auala e faatauvaa ma faigofie ona malamalama i ai. O le auala lenei mo i tatou e savavali ai, ma e ou te manatu ua matua maoae lo tatou faamanuiaina i lo tatou iloa ai lea o le ala moni.²⁸

O lenei soo se mea lava e manaomia e le Alii i o tatou lima, na te le manaomiaina lava se mea mai ia i tatou e le mafai ona tatou faatinoina. E mafai ona tatou usiusitai i ana poloaiga e tusa ai ma le tulaga o loo mafai ona tatou i ai ma mea o loo tatou maua. E leai lava se alii po o se tamaitai e matua mativa lava e le mafai ai ona ia usitaia le talalelei; e mafai lava e i latou ona o atu ma papatisoina mo le faamagaloina o a latou agasala, ma afai latou te tausia poloaiga a le Alii o le a ia tuuina mai i o latou lima le mana ma mea manaomia e faataunuuina ai mea o loo manaomia mai ia i latou.²⁹

Ou te tatalo o le a tatou sailia lena auala ina ia mafai ona tatou oo atu i le isi itu o le veli ae o loo mafai ona faamalieina i tatou i o tatou faamaumauga. O le a tatou maua lo tatou talafaasolopito ma o tatou faamaumauga iina i se faletusi maoae o le malo selesitila o lo tatou Atua, ma o le a tatou iloa ai mea sa tatou faia i lenei olaga. Afai tatou te faia soo se mea lava e sese o le a tatou faanoanoa ai. E tatau ona tatou salamo mo sese ma taumafai e faasili atu le lelei. Ou te tatalo o le a i ai faatasi ma i tatou le Agaga o le Atua e taitai ma faasino i tatou i a tatou galuega seiloga tatou te maea ma iinei, afai loa o le a tatou mavae atu o le a mafai ona taliaina i tatou i le malo o le Atua. E tatau ona tatou olioli pe afai tatou te faia le mea sao; aua e lei vaai o tatou mata, e lei faalogo o tatou taliga ma e lei ulufale lava i totonu o loto o le fanauga a tagata le mamalu o loo i luma atu o atalii ma afafine o Atamu. O loo natia mai i o tatou mata i le taimi nei, ma o le a le faailoaina mai lava ia i tatou seiloga tatou te ulufale atu i le afioaga o le Atua ma le Tamai Mamoe.³⁰

E leai lava se alii po o se tamaitai ua ola i le lalolagi ma tausia poloaiga a le Atua o le a maasiasi, pe faanoanoa ai, pe a latou ulufale atu i le afioaga o le Atua.³¹

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Toe faitau le tala o loo i itulau 214–216. O a mataupu faavae na taitaia le filifiliga a Elder Woodruff i lona tali atu ia Uso Benbow?
Faitau atoa le parakalafa i le itulau 216. Aisea e tetee ai i le natura o le Atua le “faamalosi o soo se tagata e alu i le lagi” po o le “faamalosia o le mafaufau”? O le a le mea e faia e lo tatou Tama Faalelagi e faamalosiau mai ai ia i tatou e filifili le ala e tau atu i le ola e faavavau?
Sa faapea mai Peresitene Woodruff, “O le a maua e tagata uma lava mea na latou galulue i ai (itulau 216). O le a le uiga o lenei mea ia te oe? E faapefea ona aafia faaiuga tatou te faia i lenei faamatalaga?
E tusa ai ma aoaoga a Peresitene Woodruff, o a nisi o faamanuiaga e oo mai i lenei olaga pe a tatou tausia poloaiga? O a nisi o taunuuga e oo mai i le olaga lenei pe a tatou filifili e ‘aua le tausia poloaiga? (Tagai i itulau 217–219.)
Toe Iloilo le parakalafa e fa ma le lima i le itulau 217. O a totogi o le agasala?
E faapefea e a tatou filifiliga i aso taitasi ona aafia ai lo tatou taunuuga e faavavau? (Tagai i itulau 219–220, 222.) Aisea e taua ona manatua e puupuu le olaga lenei pe a faatusatusa atu i le faavavau?
O le a sau tala e fai i tagata o lou aiga ma uo o e o loo saili le fiafia e aunoa ma le tausia o poloaiga? O a ni aafiaga e mafai ona tatou fetufaai atu e fesoasoani ai i lena tagata?
Aisea e te manatu ai o nisi taimi e lagona ai e tagata e le mafai ona latou ausia le faaolataga? A o e suesueina aoaoga a Peresitene Woodruff i itulau 222–223, o a faamatalaga e te manatu e faapitoa lava le faamautinoaina i tagata o e e faapea o latou lagona?
O a ni mea e mafai ona faia e matua ina ia faaaloalogia ai le saolotoga o a latou fanau a o loo fesoasoani pea i a latou fanau ia faia filifiliga sa’o?

Mau E Faatatau I Ai: Iosua 24:15; Isaia 64:4; Kolose 3:24–25; 1 Nifae 3:7; 2 Nifae 2:25–30; Alema 7:14–25; 41:10; Helamana 14:30–31; MFF 130:20–21