Mataupu 4

O Le Mana ma le Pule o le Perisitua Paia

Ua faaee atu e le Atua le perisitua i luga o Lona nuu mo o latou faamanuiaga ma faaeaga.

Mai le Soifuaga o Wilford Woodruff

I lona talavou, sa naunau lava Wilford Woodruff na te mauaina le ekalesia o loo i ai le pule o le perisitua moni—faatasi ma le “mana mai le Atua i luga o le fogaeleele.”¹ I sana lauga sa faia i le 1889, sa ia faamatala mai ai:

“Sa ou alu i le aoga Aso Sa, a o ou laitiiti. … I lena aoga Aso Sa ou faitau ai i le Feagaiga Fou. Sa ou aoaoina fuaiupu ma lea fuaiupu ma mataupu ma lea mataupu. O le a la se mea na ou aoao mai i le Feagaiga [Fou]? Sa aoao mai ia te a’u le Talalelei o le ola ma le faaolataga; sa aoao mai ia te a’u le Talalelei o le mana mai le Atua i luga o le fogaeleele. Sa aoao mai ia te a’u o le faatulagaga o le Ekalesia e i ai Perofeta, Aposetolo, Faifeau ma Aoao, ma fesoasoaniga uma ma malo. E mo le a? ‘E mo le faaatoatoaina o le Au Paia, latou te fai ai le galuega a auauna: mo le atiina ae o le tino o Keriso; seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso.’ [Tagai 1 Korinito 12:28; Efeso 4:11–13.]

“O mea nei na ou aoaoina mai, ma sa iloga ona aafia ai ou manatu ma lagona. Sa ou talitonu i ai; ae peitai ou te lei faalogo lava ua aoaoina e se faifeau po o se failotu i luga o le fogaeleele. I le amataga mai o lo’u tagata matua sa toeitiiti lava ou auai i fonotaga [po o sauniga] uma a ituaiga lotu eseese sa i ai. I se tasi taimi sa ou auai i se tasi o na fonotaga tetele ia sa masani ona fai i Connecticut, sa i ai le toafasefulu po o le limasefulu faifeau o ituaiga lotu eseese sa faapotopoto faatasi. Sa latou tatalo mo se vaitau faapenetekoso ma le tele lava o isi mea. I lea fonotaga sa maua ai se faatagaga mo soo se isi lava e faia ai se faamatalaga. Sa ou laitiiti tele i lena taimi. Sa ou tu ma laa atu i le va o laina nofoa, ma ou fai atu i na faifeau uma: ‘Au uo e, sei outou ta’u mai ia te a’u pe aisea ua outou le finau ai mo le faatuatuaga lea sa tuuina mai muamua i le Au Paia? Se’i outou ta’u mai lava ia te a’u pe aisea ua outou le finau ai mo le Talalelei lea sa aoaoina e Iesu Keriso, ma lea sa aoaoina mai e Ana Aposetolo? Aisea ua outou le finau ai mo lena lotu e tuuina atu ia te outou le mana i luma o le Atua, le mana e faamalolo ai ma’i, e faapupula ai e tauaso, e savavali ai e pipili, ma lea na te tuuina atu ia te outou le Agaga Paia ma na meaalofa uma ma mea silisili ia sa faailoaina mai talu mai le foafoaga o le lalolagi? Aisea tou te le aoao ai tagata i na aoaoga faavae ia sa aoaoina e Peteriaka ma Perofeta anamua ao oofu i latou i faaaliga a le Atua? Sa latou mauaina le auaunaga a agelu; sa latou mauaina miti ma faalialia, ma mauaina soo faaaliga e faafoe ai ma taitaiina i latou i le ala e tatau ona savavali ai.’

“Sa faapea mai le toeaina pulefaamalumalu: ‘Le taulealea pele e, e avea oe ma se alii poto tele, ma se alii aoga tele i le lalolagi, pe a e le talitonu lava i na mea valea. O mea na sa tuuina atu i le fanauga a tagata i le augatupulaga o le pouliuli o le lalolagi, ma sa tuuina atu i latou mo le faamoemoega ina ia faamalamalamaina le fanauga a tagata i lena augatupulaga, ina ia latou talitonu ai ia Iesu Keriso. O le taimi nei ua tatou ola i le malama mai o le malamalama o le talalelei mamalu, ma e tatou te le manaomia na mea.’ Sa ou fai atu: ‘Ia tuu mai la ia te a’u ia augatupulaga pouliuli o le lalolagi; ia tuu mai ia te a’u augatupulaga na sa mauaina nei mataupu faavae.’ ”²

I le aso 29 o Tesema, 1833, sa faatoa faalogo ai lava Wilford Woodruff i le talalelei mai se auauna tofia a le Atua. Sa ia faamatala: “Mo le taimi muamua lava i lo’u olaga, sa ou vaai ai i se Toeaina o le Ekalesia a Iesu Keriso o le Au Paia o Aso e Gata Ai. O Zera Pulsipher lea. Sa ia ta’- uina mai ia te a’u sa musuia o ia e le Alii. Sa faamama ana saito i lona fale manu ae ona faalogoina le leo o le Alii ua oo mai ia te ia ma ta’u mai ia te ia e tulai ma agai atu i matu, o loo i ai se feau a le Alii mo ia iina. Sa ia valaauina Uso [Elijah] Cheney, o lona tuaoi ma o se tasi o le Ekalesia. Sa la savavali mo le onosefulu maila … i le kiona loloto, ma o le nofoaga muamua lava sa musuia i la’ua e afe ai, o le ma fale ma lo’u uso. Sa la ulufale mai i le fale ma talanoa ma le toalua o lo’u uso, ma sa la faamatalaina atu ia te ia i la’ua atoa foi ma le la savali. Sa la ta’u atu ia te ia sa uunaia i la’ua [e le Alii] e agai atu i matu, ma e lei lagonaina lava e i la’ua se musumusuga e tutu i se isi lava mea sei vagana ina ua la oo mai i le fale lena. Ina ua la ta’uina atu ia te ia a la’ua mataupu faavae, sa ia fai atu o lona toalua ma lona uso o ni alii e talitonu i na mataupu faavae, ma sa tatalo i la’ua mo le tele o tausaga ina ia maua ia mea. Sa faatulagaina se taimi e feiloai ai i le faleaoga i luga atu o le matou faatoaga.

“Sa ou foi mai i le fale i le afiafi, ma ta’u mai ai e le toalua o lo’u uso ia te a’u e uiga i lenei feiloaiga. Sa ou galue i le tosoina mai o ogalaau mai le Vaituloto o Ontario (o a’u sa i le pisinisi fai lau- papa), ma sa ou aveina atu a’u solofanua i le vao lafulemu, ou te lei nofo ou te ‘ai, ae sa ou alu loa i le fono. Sa ou mauaina le fale ma sa faatumulia le malae i luma i tagata. Sa ou faalogo ai mo le taimi muamua lava i lo’u olaga i se lauga o le Talalelei ao aoaoina mai e Toeaina o lenei Ekalesia. O le mea tonu lava lea sa ou sailia mai lava i lo’u laitiiti. Sa ou valaauliaina nei alii matou te o i lo’u aiga. Sa ou faanoi maia le Tusi a Mamona, ma sa ou nofo ai i le po atoa ma faitau. I le taeao sa ou ta’uina atu ia Uso Pulsipher ua ou manao ou te papatiso. Sa i ai sa’u lava molimau, e moni na mataupu faavae. Sa ma o atu ma lo’u uso [matua]… ma papatisoina loa i ma’ua—o tagata muamua ia o lena nuu [na papatisoina].”³

Sa papatisoina e Elder Pulsipher ia Wilford Woodruff i se tamai vaitafe i le aso 31 o Tesema, 1833, ma faamauina ai o ia i le aso lava lena. I le tolu o aso mulimuli ane, sa mauaina ai e Wilford Woodruff le Perisitua Arona ma faauuina ai i le tofi o le aoao. O le amataga lea o le soifua auauna atu i le galuega a le Alii. I le toe tepa atu i ai i lena taimi, sa faapea mai o ia, “Na amata mai ai lava i lena taimi la’u misiona.”⁴

Aoaoga a Wilford Woodruff

E faatinoina e le Atua Ana galuega uma i le mana o le perisitua.

Ou te leiloa lava se isi mataupu i le Ekalesia e sili atu lona taua i tagata o le lalolagi ma i tatou lava, nai lo le Perisitua Paia.⁵

O le mana o [le] Perisitua, na faatulagaina ai e le Atua, lo tatou Tama Faavavau ia lalolagi uma, ma faaolaina lalolagi uma ia sa faaolaina talu mai lava le amataga. O le Perisitua foi lea e tasi o loo galulue ai alii i luga o le fogaeleele i sauniga o le Talalelei a Keriso.⁶

O le Perisitua Paia o le auala lea e talanoa ma fesootai ai le Atua ma tagata i luga o le fogaeleele; ma o avefeau o le lagi o e ua asiasi mai i le lalolagi e fesootai ma tagata, ma o alii sa latou umiaina ma faamamaluina le perisitua a o i ai i latou i la le tino; ma o mea uma na faia e le Atua e mo le faaolataga o le tagata, e amata mai le oo mai o le tagata i le lalolagi seia oo i le togiolaina o le lalolagi, na auala mai ma ala mai i le pule a le perisitua e faavavau.⁷

E lei i ai lava se ekalesia a le Alii i luga o le fogaeleele, mai lava i lona uluai faatulagaina seia oo mai i le taimi nei, vagana ai o lena ekalesia sa faatulagaina e ala i faaaliga, faatasi ma perofeta ma aposetolo, faifeau, aoao, fesoasoaniga uma ma malo ua faaeeina i ai le Perisitua Paia—o le mana lena na tuuina mai e le Atua i le tagata, lea e faatagaina ai o ia e galue mo le Atua; ma a leai lea Perisitua e leai lava se tagata, mai le aso na amata mai ai le lalolagi, o i ai se aia e faatinoina ai soo se sauniga lava o lona maota paia, pe i ai foi i soo se tagata se aia e maua ai lena Perisitua vagana ua valaauina o ia e le Atua e pei o Arona, lea ua ta’u mai ia i tatou, sa valaauina e ala i faaaliga [tagai Eperu 5:4]. O le a le aoga o le Perisitua? E mo le faatinoina o sauniga paia o le Talalelei, le Talalelei lava a lo tatou Tama oi le Lagi, le Atua faavavau, le Elohima o tagata Iutaia ma le Atua o Tagata o Nuuese.⁸

E leai lava se tagata e i ai se pule mai le Atua e faatino ai mo le fanauga a tagata ia sauniga paia o le ola ma le faaolataga [vagana] e ala mai i le mana o le Perisitua Paia. O le mana o lena Perisitua o loo i ai i le Au Paia o Aso e Gata Ai.⁹

E tatau i e umia le Perisitua ona faaaogaina le perisitua e aveatu ai le auaunaga ma fausia ai le malo o le Atua, ae le o le faamaualugaina o i latou lava.

E maeu lava le tiutetauave o le umiaina o lenei Perisitua faalelagi, e faavavau, e tumau pea! Ma o le a tatou tuuina atu foi se lipoti e uiga i ai. O Aposetolo, Fitugafulu, Faitaulaga Sili, Toeaina, ma alii uma o e umia soo se vaega o lenei Perisitua ua tuuina mai ia i tatou, o le a faamasinoina e uiga i [lenei Perisitua].¹⁰

Ua i ai se galuega ua faatietie mai i luga o o tatou tauau. Sa ia Iosefa Samita, sa ia Polika Iaga, sa i le Au Aposetolo e Toasefululua, o loo ia i tatou uma, ma o le a fano i tatou pe a tatou le faataunuuina. O le a tatou iloaina pe a tatou oo atu i le isi itu o le veli. … E tele taimi i o’u mafaufauga, sa ou moomoo ai ia mafai ona ou matua malamalama atoatoa i le tiute o loo ia te a’u i le Atua, ma le tiute o loo i tagata uma o e umiaina le perisitua i lenei augatupulaga. Ae ou te fai atu ia te outou, uso e, ou te manatu ua gauai tele atu o tatou loto i mea o lenei lalolagi. Tatou te le o talisapaia, e pei ona tatau ai o ni alii o loo umiaina le Perisitua Paia i lenei augatupulaga, o le tiute mamana o loo tatou i ai i le Atua ma le lagi maualuga, e faapena foi i le lalolagi. Ou te manatu ua tatou mamao ese tele mai le Alii.¹¹

Pe afai o tatou. …, o e o loo umia le perisitua paia, e faaaogaina lena perisitua mo se isi lava faamoemoega i lalo ifo o le lagi ae le o le fausiaina o le Malo o le Atua, afai tatou te faia [lena tulaga] o le a leai so tatou mana. … Ua matua toatele tele tagata o e ua faia lea lava tulaga—tagata i tulaga maualuluga o le perisitua, e oo lava i le tofi Aposetolo—e faamaualugaina i latou lava i le pule o le perisitua. Ma o fea la ua oo i ai i latou? E mafai ona outou faapea mai ua muta lo latou mana ma lo latou pule. … Sei o tatou mafaufau loloto i nei mea. Ou te faia foi le mea lea e tasi ia te a’u lava. Ou te fai atu foi le mea lea e tasi i le Au Aposetolo, Fitugafulu ma Faitaulaga Sili uma. E le mafai ona outou faaaogaina le perisitua mo se isi lava faamoemoega i lalo ifo o le lagi ua na o le fausiaina o le malo ma faia le finagalo o le Atua; ma afai e te taumafai e faia se isi mea e ese mai ai, o le a aveeseina lea mana mai ia te oe.¹²

Ou te faitauina pea lava pea ma ni lagona loloto lena faaaliga sa tuuina atu ia Iosefa Samita o le tali o lana tatalo a o i ai i le falepuipui i Liperate [tagai MFF 121:34–46]. Ou te mafaufau pea lava pea i le faaaliga a le Atua i lena alii, e ui ina laiti fuaiupu o loo i ai, ae o se [faaaliga] o loo tumu i aoaoga faavae e pei lava o faaaliga uma sa tuuina mai e le Atua talu mai le amataga i tagata. Sa Ia tuuina mai ia Iosefa ina ia malamalama o loo ia umiaina le perisitua, le perisitua lea e tusa ma le faatulagaga a le Atua, e tusa ma le faatulagaga a Mekisateko, le perisitua lava e tasi lea sa faaaogaina e le Atua lava ia na te faatinoina ai ana galuega uma i le lagi ma le lalolagi, ma soo se tagata lava e umiaina lena perisitua o loo i ai le mana lea e tasi. O lena perisitua sa maua fesootaiga ma le lagi, le mana e faagaoioi ai le lagi, le mana e faatinoina ai galuega a le lagi, ma po o fea lava se mea e faalautele ai e se tasi lena valaauga, sa tuuina atu e le Atua i ana agelu le tiute e tausia o ia ma o ana auaunaga [faaperisitua] e mamana ma i ai le malosiaga i le lalolagi lenei ma le lalolagi a sau; ae afai e faaaoga e lena tagata lena perisitua mo se isi lava faamoemoega nai lo le fausiaina o le malo o le Atua, le faamoemoega lea na aumai ai, o le a punitia le lagi, o le a aveesea mai ai mana o le perisitua, ae o le a tuua o ia e savali i le pouliuli ae le o le malamalama, ma o le ki lea o le liliuese o tagata uma pe o i lenei tupulaga po o se isi lava [augatupulaga].¹³

Ua uma ona tuuina mai le perisitua ia i tatou, ma afai tatou te le faaaogaina sa’o, o le a aumaia i tatou i le faafanoga. O le mea lea, sei o tatou faamalolosi ia o tatou tauau ma tauaveina le malo. Sei o tatou galulue ia ina ia maua le Agaga Paia—ma mana o le talalelei a Iesu Keriso—lea ua tuuina mai i o tatou lima, ma afai tatou te faia faapea, o le a i ai faamanuiaga a le Atua ia tatou taumafaiga uma.¹⁴

E lagolagoina e le Alii soo se alii na te umiaina se vaega o le Perisitua, pe o ia o se Ositaulaga, o se Toeaina, o se Fitugafulu, pe o se Aposetolo, pe afai na te faalauteleina lona valaauga ma faia lona tiute.¹⁵

Sa matua faafiafiaina lava a’u i se tasi taimi i lo’u vaaia o se vaega o Tiakono o faalauteleina lo latou valaauga. … Sa latou o atu i aiga uma o lo [latou] aai ma tata ogafafie uma sa i aiga o tina nofofua uma i lena nuu. Sa i ai i le fanua o Uso [George] Teasdale, le Peresitene o le Siteki, ni ogalaau se fa, ma sa malaga atu o ia i le fale i le tasi po ma tau atu ai ua leai ni [ogalaau]. Sa faapea o ia po o le a le mea ua tupu; ae ina ua oo atu o ia i le isi itu e vaai ma maua atu ua uma ona tata ma tuu i totonu o lona fale e teu ai fafie. Sa matua matautia lava le faalauteleina ai iina o lo latou valaauga.

O loo tatou i ai i le taimi nei, i nisi itu, i ni tulaga uigaese. E tatau ona tatou faatuatua i le Atua ma faia le mea sao. Ou te iloa le Perisitua ua aumaia mo le faaolataga o tagata mo le faia o sauniga paia mo e o soifua mai ma e ua maliliu. E fia sefuluafe i latou ua faaolaina i le lalolagi o agaga e o latou aiga o e o loo tutu i la le tino ma umia ki o le faaolataga o o latou tagata ua maliliu. Ua tula’i ae ni faaola i le Mauga o Siona, ao i ai i le Alii le malo, e pei lava ona fai mai ai le Perofeta o Opetaia [tagai Opetaia 1:21]. O loo faia nei e nei tagata lenei galuega. O loo i ai le Alii faatasi ma outou, ma olioli ai o outou tuaa i le lalolagi o agaga. O le mea lea, sei o tatou faamaoni ia, ao tatou i ai iinei. Ua tofia i tatou e le Atua e tauaveina lenei Perisitua. Mai le. … miliona ma miliona o tagata i luga o le fogaeleele ua filifilia e le Alii, na o ni nai alii toalaiti ua latou umia lenei [perisitua]; e faauuina, e faatulagaina, e lapataia le lalolagi, e talaiina atu le Talalelei ia i latou. Ou te faamoemoe i o’u uso o tauaveina lenei Perisitua o le a manatuaina le taua o le [perisitua]. …

… Ia tatou faamaoni ma faatuatua. Aua nei mamulu la tatou uumau i le Perisitua, po o le malo o le Atua. Ia tatou o atu i le tatalo faalilolilo i luma o le Atua ma valaau atu i Lona suafa paia. O iina e maua ai lo tatou malosi.¹⁶

Afai tatou te faamaoni i a tatou feagaiga, o le a tatou mauaina faamanuiaga o le perisitua i lenei olaga ma le olaga a sau.

A oo ina faaeeina atu e le Alii meaalofa i luga o le fanauga a tagata e ala i le Perisitua, o i latou o e mauaina nei meaalofa e faamasinoina mo le faaaogaina o ia [meaalofa].¹⁷

A oo ina taitai [sauniga] se aposetolo po o se peresitene, epikopo po o soo se alii lava e umiaina le perisitua, na te faatinoina lava i le pule a le Alii o Iesu Keriso; ona i ai lea o le aafiaga o lena perisitua, ma o faamanuiaga uma lava e faaeeina atu e lena auauna a le Atua i luga o fanauga a tagata, o le a aoga i le olaga lenei ma le olaga a sau. Afai e i ai sou faamanuiaga e maua e ala i le perisitua paia, pe afai foi ou te mauaina se faamanuiaga mai se peteriaka, o na meaalofa ma faamanuiaga o le a oo atu lava i le isi lalolagi; ma afai ou te faamaoni i a’u feagaiga i lenei olaga, e mafai ona ou mauaina faamanuiaga uma ua uma ona faaee i o’u luga, aua o lena pule sa auala mai ai faaeega ua faauuina e le Atua, ma e ala mai ai foi iina le faatinoina e atalii o le Silisiliese i le fanauga a tagata o sauniga paia o le ola ma le faaolataga, ma o na galuega faatagaina uma o le a i ai lo latou aoga i luga o na tagata i tua atu o le tuugamau ma faapena foi i lenei olaga. O oa moni ia; o oa ia o le a tumau e oo lava i le faavavau, ma ua ia i tatou le mana e ala i ia faamanuiaga, sa faaeeina mai e auala mai le talalelei, ia toe maua o tatou tino ma faasaoina o tatou lava tulaga uiga ese taitoatasi i le faavavau. Ioe, e mafai ona tatou mauaina lea e ala i le taua o le perisitua paia.¹⁸

E masani ona ou tomanatu i folafolaga sa faia e uiga i le perisitua. O le Alii, i se faaaliga e uiga i lenei mataupu, ua fetalai mai, . … “Aua ai se faamaoni i le maua o nei Perisitua e lua ia ua ou tautala atu ai, ma le faalauteleina o lo latou valaaulia, ua faapaiaina e le Agaga i le faafouina o o latou tino. … O lea o le a tuuina atu ai ia te ia mea uma o i ai i lo’u Tama. O lea, o i latou uma o e maua le Perisitua, ua maua lenei tautoga ma feagaiga a lo’u Tama, na te le mafai ona solia, e le malueina foi.” [Tagai MFF 84:33–40.] O lenei, e i ai taimi ou te fesili ai lava ia te a’u le fesili, Pe tatou te malamalama ea i nei mea? Pe tatou te malamalama ea afai tatou te ola i tulafono o le Perisitua o le a avea i tatou ma suli o le Atua ma suli-faatasi ma Iesu Keriso? Ou te iloa e lei vaai o tatou mata, e lei lagona foi e o tatou taliga, e lei oo foi i o tatou loto le mamalu o loo ua saunia mo e faamaoni [tagai 1 Korinito 2:9].¹⁹

Pe faapefea la outou amio e tatau ai, o e ua valaauina e faia ni vaega i le galuega matautia o aso e gata ai? E tatau ona avea i tatou ma alii ma tamaitai o le faatuatua, totoa mo le upumoni e pei ona faaalia ma tuuina mai i o tatou lima. E tatau ona avea i tatou ma alii ma tamaitai o le faamaoni i le Atua ma Lana Perisitua paia, faamaoni ia te Ia ma faamaoni le tasi i le isi. E le tatau ona tatou faatagaina fale ma fanua, auro ma ario, po o soo se isi lava mea o lenei lalolagi e tosoeseina i tatou mai le tulimatai atu i le faamoemoe sili ua tuuina mai ia i tatou e le Atua ina ia faatinoina. O la tatou sini e maualuga, o lo tatou taunuuga e maualuga ma e le tatau le tatau lava ona tatou faatoilaloina lo tatou Tama, po o au uma o le lagi o e o loo vaavaai mai ia i tatou. E le tatau ona tatou faatoilaloina le miliona ma miliona o e o loo i le lalolagi o agaga, o e o loo vaavaai mai foi ia i tatou ma lagona loloto ma popolega ia e faafaigata lava ia i tatou ona faaulufaleina i o tatou loto ma malamalama ai. O mea matautia ma le silisili nei o loo manaomia e le Atua mai ia i tatou. O le a tatou le agavaa mo le faaolataga, o le a tatou le agavaa mo le ola e faavavau i le malo o lo tatou Atua, pe afai e i ai lava se mea e mafai ona liliueseina i tatou mai le upumoni, pe mai lo tatou fiafia foi i ai.²⁰

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau v–ix.

O a ni mea na iloga ona aafia ai lagona o le talavou o Wilford Woodruff na taitaiina ai o ia e sailiili mo le Ekalesia moni? (Tagai itulau 36–39.) Na faapefea ona fesootai nei lagona ma le perisitua?
Toe iloilo itulau 39–40 ma vaavaai mea na faataunuuina e le Alii e ala i le mana o le perisitua. E faapefea ona auai i latou o loo umia le perisitua i le galuega a le Alii?
Aisea e taua uma ai i alii ma tamaitai le aoao e uiga i le perisitua?
Ua faapefea ona faamanuiaina lou olaga e le perisitua?
A o e faitauina aoaoga a Peresitene Woodruff e uiga i tiutetauave o i latou o e umiaina le perisitua, o a ni aoaoga faavae patino na e mauaina? (Tagai itulau 40–43)
E tusa ai ma aoaoga a Peresitene Woodruff, o a ni uiga faaalia ma ni gaoioiga e tupu ai le punitia o le lagi mai se tasi e umiaina le perisitua? Aisea e faigata ai i se tagata ona faaaoga le perisitua mo le mauaina o ana lava mea? (Tagai itulau 40–43; tagai foi MFF 121:34–40.) E tatau faapefea ona ola se tasi e umiaina le perisitua ina ia mafai ai ona maua le “mana e faatinoina ai galuega a le lagi”? (Tagai itulau 43–45); tagai foi MFF 121:41–46.)
O le a le uiga o le faalauteleina o se valaauga faaleperisitua? (Tagai itulau 44–45.) O a ni faataitaiga ua e vaai i ai i le usoga o faalauteleina lo latou valaauga faaleperisitua?
Toe iloilo le vaega faaiu i le mataupu (itulau 44–45). O a ni auala e mafai ai e le perisitua ona aumaia faamanuiaga i lenei olaga ma le olaga a sau?

Mau E Faatatau I Ai: Ioane 15:16; Eperu 5:4–6; Alema 13:1–20; MFF 84:17–48; 107:18–20; Mataupu Faavae o le Faatuatua 1:5