Mataupu 22

Galuega Faaletino ma le Faaleagaga, “E Galulue Faatasi”

I a tatou taumafaiga e faamalosia o tatou aiga ma fausia le malo o le Atua i luga o le fogaeleele, e tatau ia i tatou ona galulue i le faaletino ma le faaleagaga.

Mai le Soifuaga o Wilford Woodruff

I popofou o le Ekalesia, sa apoapoai atu pea ia perofeta ma aposetolo i tagata ina ia faia la latou vaega i le atiina ae o le malo o le Atua. O lenei taumafaiga e manaomia uma ai galuega faaleagaga ma le faaletino. E faaopoopo atu i ai i ia ituaiga o sailiga e pei o le tatalo, suesueina o tusitusiga paia, ma le fetufaai atu o le talalelei, sa fausia ai e le Au Paia fale ma aai, faavaeina aoga faalauaitele, galueaiina ma faasusu le palapala malo, ma toso mai le maa paepae mai mauga e fausia le Malumalu o Sate Leki. I le 1857, i le sefulu tausaga talu ona uluai ulufale mai paionia o le Au Paia o Aso e Gata Ai i le Vanu o Sate Leki, sa faapea atu ai Elder Wilford Woodruff: “Afai tatou te o e galulue ma fausia le malo o le Atua nai lo tatou lava, e le afaina lava po o le a le auala tatou te fausiaina ai, e tusa pe o le fausiaina o se alavai, po o le fausiaina o se malumalu, talaiina o le talalelei, galueaiina o le eleele, po o soo se mea lava. … O le a tatou iloaina o le a fesoasoani le Alii ia i tatou ma lagolago i tatou, ma faamalosia i tatou i lona mana, ma o le a fesoasoani ia i tatou i mea uma e tatau ona tatou faia.”¹

O i latou o e sa masani ma Peresitene Woodruff latou te iloaina e lei faapea sa na o le tautala lava o ia e uiga i le taua o le galue malosi—sa faaaogaina e ia lea aoaoga faavae i lona olaga. E faaopoopo atu i le faalauteleina o ona valaauga i le perisitua, sa ia filiga i galuega faaletino, e oo lava ina ua matua lona soifua. Na tusia e Andrew Jenson le tausi talafaasolopito o le Au Paia o Aso e Gata Ai e faapea: “O lona toaga sa manino mai lava o se vaega lea o lona tagata, i le ivasefulu o tausaga, sa sili laitiiti lava se tasi o atalii o lana fanau ia te ia i le suaina o ni fualaau aina i le togalaau, ma sa ia faapea mai ma ni foliga ua faalumaina: ‘Ia, o le taimi muamua lava lenei i lo’u olaga atoa ua sili ai se isi o la’u fanau ia te au i le suaina [o laau].’ ”²

O se tasi na soifua faatasi ma Peresitene Woodruff sa ia matauina: “E matua fiafia tele o ia i le galue, e le faapea na o le fiafia i ai mo le galue lava ia, ae talu ai ona sa fesootai le galue ma se poloaiga faalelagi. E lei faapea foi sa tagai i ai o ia ua na o se auala e maua ai mea manaomia mo le ola ai i le lalolagi, mo le faaopoopoina mai o mea e mananao ai ma faafaigofieina ai lona lava olaga ma i latou o e sa faamoemoe ia te ia; ae ia te ia lava, o le galue o se faamanuiaga, o se mea e aoga, o se avanoa sa tauia ai pea o ia i soo se taimi lava e talafeagai ai ma lona valaauga. … O le afu, o se poloaiga faalelagi e pei lava o le tatalo; ma i lona soifuaga sa avea o ia ma faataitaiga o le tulaga silisili ona maualuga o le soifuaga faaKerisiano faigofie lea e tuufaatasia ai le soifua maloloina faaletino, faalemafaufau, ma le uiga tonu o le tagata. Sa talitonu faamaoni o ia i le amiotonu maoae o le galue malosi. Sa matua fiafia tele o ia i ai ma olioli ai.”³

Aoaoga a Wilford Woodruff

A o tatou fausiaina le malo o le Atua, o loo i ai o tatou tiute faaletino e faatinoina.

Ua ta’u soo mai lava e lo tatou Peresitene [o Polika Iaga] ia i tatou e faapea e le mafai ona tuuesea le faaletino mai le faaleagaga, ae e tatau ona o faatasi, ma o le tulaga lena o loo i ai ma e tatau ona tatou galulue ai e tusa ai ma le atiina ae o le ekalesia ma le malo o le Atua.⁴

O nisi o tagata ua i ai le manatu o le Au Peresitene o lenei Ekalesia ma le Au Aposetolo e Toasefululua e le tatau ona i ai se mea latou te faia i mataupu faaletino. Ia, semanu o le a i ai i tatou i se tulaga faaletonu pe a na matou le aafia i mataupu faaletino.⁵

O loo tatou fausiaina le malo moni lava o le Atua i luga o le fogaeleele, ma o loo i ai o tatou tiute faaletino e faatinoina. O loo i ai o tatou tino faaletino, tatou te aai i meaai faaletino, tatou te fausia fale faaletino, tatou te tausia povi faaletino ma fatu saito faaletino, tatou te tauivi ma vao faaletino, faatasi ai ma fili faaletino o loo i le palapala, ma o nei mea e moomia ai lava ona gauai atu i le faatinoina o le tele o tiute o se natura faaletino ma faigata, ma o nei mea, e moni, e talisapaia i lo tatou talitonuga.⁶

E le mafai ona tatou fausia Siona i le nofonofo i luga o se ogalaau ma tatou pesepese ai seia tau atu i le fiafia e faavavau; e tatau ona tatou galueaiina le eleele, ina ia aveeseina maa ma isi vaega mai mauga e fausia ai malumalu i le Atua Silisiliese; ma o lenei galuega faaletino o loo poloaiina mai i o tatou lima e le Atua o le lagi, e pei lava ona ia manaomiaina le maliu o Keriso e togiola le lalolagi, e pei foi ona manaomia e le Faaola ia Peteru, Iakopo ma Ioane e o atu ma talai le talalelei i malo o le lalolagi. O le tisipenisione sili lenei lea e tatau ona fausiaina le Siona a le Atua, ma i le avea ai o i tatou ma Au Paia o Aso e Gata Ai, o lea e tatau ai ona tatou fausiaina.⁷

I mataupu faaletino, e tatau ona tatou taliaina fautuaga a le Alii ma Ana auauna.

Mai lava i le amataga mai o lenei galuega e oo mai i le taimi nei o loo sili atu le faigata o le galuega i auauna a le Atua ina ia saunia tagata i o latou loto e faatagaina le Alii e pulea ma faatonutonu i latou i a latou galuega ma meatotino faaletino nai lo le faatatau i mataupu faatatau i lo latou faaolataga e faavavau. …

E i ai se mea e tulaga ese ai lenei mea, ae ou te manatu, atonu, o se taui lea o le tofiga o loo matou i ai. O loo i ai se veli i le va o le tagata ma mea o le faavavau; ana fai e aveesea lena veli ma mafai ona tatou vaai atu i mea o le faavavau e pei ona i ai i luma o le Alii e leai se tagata e tofotofoina e tusa ai ma auro, ario ma mea uma o lenei lalolagi, ma e leai se tagata, e tusa ai ma ia mea, o le a le manao e faatonutonuina o ia e le Alii. Ae peitai o iinei o loo i ai lo tatou saolotoga, ma o loo tatou i ai i se tulaga e faataitai ai, ma o loo i ai se veli i le va o i tatou ma mea o le faavavau, i le va o i tatou ma lo tatou Tama Faalelagi ma le lalolagi o agaga; ma o lenei mea e mo se faamoemoega poto ma le tonu i le Alii lo tatou Atua, ina ia mautinoa ai pe o le a tumau le fanauga a tagata i lana tulafono pe leai i le tulaga o loo ua tuu i ai i latou iinei. Le Au Paia e o Aso e Gata Ai, toe manatunatu i nei mea. Ua tatou naunau uma, faatasi ai ma lagona uma lava o o tatou loto, e tatau ia Iosefa Samita, o Peresitene Iaga ma taitai o le nuu ona taitaia ma faatonutonuina i tatou e tusa ai ma o tatou faamoemoega e faavavau; ma o faamanuiaga i o tatou luga e ala i la latou pule e au atu i le isi itu o le veli ma e faamalosia pe a mavae le oti, ma e aafia ai lo tatou taunuuga i augatupulaga e le gata o le faavavau.

O tagata i aso o Aperaamo, Isaako ma Iakopo, faapea foi aso o Iesu ma le Au Aposetolo, sa i ai faamanuiaga sa faamauina i o latou luga, o malo, o nofoalii, o itumalo ma mana, faatasi ai ma faamanuiaga uma lava o le Feagaiga Fou e Faavavau. E ono tuuina mai le fesili, pe taua nei faamanuiaga e faavavau ia i tatou? E taua, pe tatau ona taua. Pe sili atu le taua o nei faamanuiaga i o tatou ola faalelalolagi, e tusa pe laitiiti pe tele? Pe taua atu ea le faaolataga ma le ola e faavavau nai lo ni povi, o se fale, o se fanua e selau eka, po o soo se mea lava ua ia i tatou iinei i la le tino? Afai lava o lea, ua tatau lava ona tatou saunia e faatagaina le Alii e pulea ma faatonutonuina i tatou i a tatou galuega faaletino uma e pei foi o a tatou galuega faaleagaga.

O le mea foi lea, afai e oti se tagata e le mafai ona aveina faatasi ma ia ana povi, solofanua, fale ma fanua; e alu o ia i le tuugamau— o le nofoaga malolo o tino faaletino uma. E leai lava se tagata e mafai ona solaese mai ai, o le tulafono o le oti o loo i luga o i tatou uma lava. Aua faapei ona oti uma ia Atamu, e faapea foi ona faaolaina uma ia Keriso [tagai i le 1 Korinito 15:22]. Ua tatou malamalama uma lava ua oo mai le oti i tagata uma lava, ae … e leai se isi o i tatou e iloa po o afea e oo mai ai le faasologa ia i tatou, e ui lava tatou te iloa e le o toe umi tele se taimi ae valaauina foi i tatou e mulimuli atu i tupulaga o e ua muamua atu ia i tatou. A tatou tomanatu i nei mea ou te manatu e tatau ona tatou naunautai uma lava ina ia taitaia i tatou e le Alii i mataupu faaletino.⁸

O le ola i le talalelei e aofia ai le aoaoina faaleagaga ma le faaletino faatasi ma le galue faamaoni.

O loo i ai se faataoto po o se faaupuga ua ou faalogo soo i ai i lo’u olaga, lea ou te manatu e mamafa tele lona taua, e faapea, “o le upumoni e mamana ma o le a manumalo.” Ou te manatu ua faaalia mai i mea uma lava ua faaaogaina ai le upumoni pe faaaogaina i le faaletino po o le faaleagaga; pe faaaogaina i le vaega oatunuu po o aiga po o tagata taitoatasi; pe faaaogaina i le lalolagi po o le Malo o le Atua.⁹

O le atiina ae o le Siona a le Atua i nei aso e gata ai, e mafai ona ou fai atu se upumoni, e aofia ai lala uma lava o pisinisi, i le faaletino ma le faaleagaga, lea o loo tatou faafeagai ai. E le mafai ona tatou pa’i atu i se mataupu e o gatasi ma le tulafono ma tonu i le silafaga a le Atua ma le tagata e le o taliaina i la tatou lotu. O le talalelei a Iesu Keriso lea ua tatou taliaina, ma tatou talaiina, o loo aofia ai upumoni uma, ma valaauga ma galuega uma a le tagata e o gatasi ma le tulafono.¹⁰

E le tatau ona tuulafoaiina a tatou fanau; e tatau ona maua e i latou ni aoaoga faatulagaina i mea uma faaleagaga ma le faaletino. O le tofi sili lava lea e mafai ona tuua e ni matua mo a latou fanau.¹¹

A o tupu pea ma faateleina le fiafia e aoao mai i tusi, e le tatau lava ona tuulafoaia le galue i lima. O le aoaoina o le mafaufau ma le aoaoina o le tino e tatau ona o gatasi. O se faiai atamai e tatau ona tuufaatasia ma ni lima atamamai. O le galue i lima e tatau ona siitia ma tauleleia e i tatou ma ia faia pea ia faamamaluina. O le manatu ua taatele tele i aso nei, faapea o alii talavou e maua loa sina aoaoina laitiiti ona manatu loa lea o i latou ua le tatau ona toe faia ni galuega e faia i lima ma tigaina ai, o se manatu lea e le tatau ona faatagaina e tupu ia i tatou. … E tatau i tagata uma taitoatasi ona avea ma se mataupu e mitamita ai lona galueaiina o ni mea, ae le na o le faaaogaina. E tatau ona aoaoina a tatou fanau e lagolagoina i latou lava e ala i lo latou galulue malolosi ma le faaaogaina o lima, ma e le gata foi i lea, ae ina ia fesoasoani e lagolagoina isi, ma o le faia o lea tulaga e ala i le galue faamaoni o se tasi lea o tulaga sili ona faamamaluina ua tuuina mai e le Atua i Lana fanau iinei i luga o le fogaeleele. O le mataupu o aoaoga faatulagaina mo o tatou talavou a Siona o se tasi lea o mataupu matua silisili lona taua.¹²

Ia tatou taumafaiga mo mea tau tupe, e tatau ona tuuina atu le tausiga i o tatou aiga, usitai i le tulafono o le sefuluai, ia lima foai i a tatou mea e maua, ma aloese mai aitalafu.

E tusa ai ma a tatou mataupu faaletino, e ao ona tatou matua galulue ina ia maua mea mo i tatou lava.¹³

O le mataupu i oa ma le tamaoaiga, ou te le manao i ai pe afai latou te faafanoina a’u. Ou te manao ia lava ni mea e maua e oofu ai, see ai vae ma fafagaina ai lo’u [aiga], ma ia maua e i latou le mafanafana, pe afai e mafai ona ou mauaina mai ma le faamaoni i luma o le Alii; ae e sili ai ia te a’u ma i latou uma le matitiva nai lo le maua o le tamaoaiga ae faaumatia ai i matou. O ‘oa e matautia sei vagana ua tatou faaaogaina ina ia le faaumatia ai i tatou; afai e le mafai ona tatou faaaogaina ia mea mo le mamalu o le Atua ma le atiina ae o lona malo, e sili ai ia i tatou le ola e aunoa ma ia mea.¹⁴

O nisi o tagata ua vaai i le tulafono o le sefuluai o se ituaiga o lafoga ma se avega mamafa ua tuuina i luga ia i latou, ae mo ai? O la tatou sefuluai, o la tatou galuega, ma mea uma lava tatou te faia i le malo o le Atua, e mo ai ia mea uma? … O a tatou sefuluai, o a tatou galuega, o mea uma tatou te faia e le mo le faaeaina o le Silisiliese, ae mo i tatou. … Ia tatou malamalama i ai i lenei mea e pei ona i ai ma o le a lelei ona tatou faia. I le totogiina o a tatou sefuluai, i le usitaia o tulafono uma taitasi ua tuuina mai e faaeaina ai i tatou ma ia aoga ia i tatou, o mea uma lava e mo lo tatou lelei taitoatasi ma le lelei o a tatou fanau, ae e leai se aoga faapitoa i le Alii, pau lava lea o le a faamalieina o ia i le faatuatua o lana fanau ma naunau e silasila mai o savavali lana fanau i le ala e tau atu i le faaolataga ma le ola e faavavau.¹⁵

Ia tau lava o lo tatou vaavaai ane i o tatou tafatafa e faamalieina ai i tatou … ma o i latou o e matamau i le foai atu lea i le galuega a le Atua o loo fiafia le Alii ia i latou. O le malamalama lea o Isaraelu anamua, ma o lo tatou malamalama foi lea. Ae peitai e tusa ai ma meaalofa e foai atu i le lotofuatiaifo ua tele naua le faatamala, e ui lava e i ai folafolaga taua uma e fesootai ma ia mea. E tatau ona faamanatu i le Au Paia le tiutetauave o loo i o latou luga. O a tatou fanau foi, e tatau ona aoaoina i ai lenei tiute, ina ia avea ma masani tumau a i latou le faataunuuina loa o nei vaega taua. O i latou o e o loo faataunuuina ma le atoatoa nei tulaga manaomia e mafai ona latou molimau e uiga i le fiafiaga maoae ma le tele o taui ua latou maua mai lo latou faataunuuina.

O lenei tulafono o le limafoai e foliga mai o se tasi lea o puipuiga ua faaaogaina e le Alii ina ia liliueseina ai mai lenei nuu ia taunuuga leaga ia e mulimuli mai i le mauaina o le oa. Ua Ia ta’u maia ia i tatou faapea o ‘oa o le lalolagi o Ia e foaiina mai; ae ua Ia lapatai mai ia i tatou ina ia faaeteete i le faamaualuga, ne’i pei i tatou o Sa Nifae anamua [tagai i le MFF 38:39]. Ua tatou malamalama i faatafunaga na oo ia i latou, ma e le tatau ai ona tatou tuuese ni puipuiga e taofia ai le ‘oa mai le i ai o ni ona aafiaga matautia ia i tatou. E toatele e mafai ona onosaia le mativa ma lotomaulalo, ma ola faalatalata i le Alii, [ae] le mafai ona taulimaina ia ‘oa. E siitia i luga i latou e le faamaualuga ma le manao, ma galo ai lo latou Atua. Ae peitai, o i latou o e manatua pea lava pea aoaoga a le Alii e faatatau i le lalolagi ma e o nonofo ai, ma i latou o e foaiina atu e ala i meatotino ua tuuina atu e le Alii ia i latou ina ia lagolagoina ai e matitiva ma fesoasoani e tauave atu i luma le galuega a le Atua, o loo ua latou tofotofoina i latou lava ma tuuina atu ia Satani sina mana itiiti e taitaieseina ai i latou.¹⁶

Ua matou lagona ua taitaiina i matou e lapatai atu i le Au Paia o Aso e Gata Ai i le tetee atu i le uiga leaga lea o le faia o aitalafu ma le aumaia lea i o latou lava luga o ni tiutetauave e masani lava ona avea ma avega sili atu ona mamafa ia te i latou nai lo le mea latou te mafai ona tauaveina, ma faasolo atu ai ina aveesea o latou fale ma isi meatotino. Matou te iloa o le mea ua taatele i ona po nei le faaaogaina o aitalafu i le mea e gata mai ai. … O se faiga leaga tele lenei ma e o se mea e tatau ona tatou teenaina ma le faaeteete, i le avea ai o se nuu ma le avea ai ma ni tagata taitoatasi. O la tatou galuega, e tatau ona faia i le mafai tatou te mafaia ai, i luga o le aoaoga faavae o le totogiina lea o mea ua tatou faatauina mai, ma o mea tatou te manaomia e tatau ona i totonu o tapulaa o mea tatou te maua. O le manatu lea faapea e taumatemate ona faia ni faiga faapisinisi ma le faamoemoe e maua ai se manuia le mautinoa ua tatau ona taofi. … Ia faamalieina i nai mea ua maua, ae aua ne’i faaseseina i tatou i faamoemoega le faavaea o le fia maua o le oa. Ia manatua le faaupuga a le tagata poto: “A o le ua faataalise ona mauoa, e le faasaoina o ia.” [Tagai i le Faataoto 28:20.] Ia aoaoina foi a tatou fanau i amioga masani o le ola faaeteete i tulaga tau tupe, ae aua le ola soona fai ma manaonao i mea e le mafai ona faamalieina ai i latou e aunoa ma le faia o ni aitalafu.¹⁷

E tatau ona tatou muai saili le malo o le Atua, i a tatou taumafaiga uma lava.

O loo i ai se faanaunauga lautele o loo faailoa mai e lenei nuu o le fia mauoa, ma ia galue mo le tagata lava ia nai lo le malo o le Atua. Ae o le a ea se aoga ia te oe ma a’u o le tuu o le tatalo ae o atu e sue le oa? Se a le aoga i le tagata, pe afai na te maua le lalolagi uma, a e maumau ai lona ola? E leai se mea tele. O le a se mea e mafai ona tuuina atu e le tagata e fesuiai ma lona agaga pe a oo atu o ia [i] le isi itu o le veli? [Tagai i le Mareko 8:36–37.]

Ou te matua maofa lava i le laitiiti o le naunautai o loo faaalia e tagata o le lalolagi i lo latou tofi i le lumanai. E leai ma se tagata o loo iinei i lenei aso o le a le ola i le isi itu o le veli i le umi e soifua ai lona Foafoa—e oo atu i tupulaga e le gata o le faavavau, ma o le taunuuga e faavavau o tagata uma taitoatasi e faamoemoe lea i le auala na faaaluina ai ni nai tausaga pupuu o le olaga i la le tino. Ou te fesili atu i le suafa o le Alii, o le a ea le aoga o le lauiloa ia te oe ma a’u? O le a ea le aoga o le auro ma le ario, po o tamaoaiga uma o lenei lalolagi i soo se isi lava o i tatou, e sili atu nai lo le mea e mafai ai ona maua e i tatou tau o mea tatou te manaomia e aai ai, feinu ai ma oofu ai, ma ia atiina ae ai le malo o le Atua. Ae o lo tatou tuu o le tatalo ae tatou faavalea i oa o le lalolagi o le faatumutumuga lea o le faavalevalea ma le leai o se mafaufau.

O le vaai atu i le auala o loo ola ai isi tagata, atonu tou te manatu ai o le a ola i latou iinei e faavavau, ma o lo latou taunuuga e faavavau e faalagolago lea i le tele o tupe latou te maua. O nisi taimi ou te fesili ai i le Au Paia o Aso e Gata Ai, e fia ni tupe sa ia i tatou ina ua tatou o mai iinei? E fia se mea na tatou aumaia, ae o fea na aumai ai? … Ou te manatu e leai ma se isi o i tatou na fanau mai i luga o le nofoa o se solofanua po o totonu o se taavale solofanua, pe na tatou aumaia ni tusi e faamaonia ai, o tatou e ana auala o nofoaafi ma povi ma fale, ae sa tatou fananau mai ma le le lavalava e pei o Iopu, ma ou te manatu o le a tatou tuua foi iinei ma le le lavalava e pei foi ona faia e ia [tagai i le Iopu 1:20–21]. E tusa ai la ma le tamaoaiga o lenei lalolagi, o le a so latou aoga ia i tatou, ina ia tatau ai ona faaosoosoina i tatou e aveese atu lo tatou faaolataga ona o na mea? E lelei ona ou faapea atu, e sili atu lo’u mativa pea i aso uma o lo’u ola; afai o le a faafanoina a’u e ‘oa ma aveesea a’u mai le mamalu o loo mafai ona ou vaai atu i ai e ala i le tausia o poloaiga a le Atua, ou te tatalo i le Atua ia ou le mauaina lava ni ‘oa.

E umia e le Atua ‘oa o lenei lalolagi i ona aao: o le auro ma le ario, o povi ma le lalolagi o ana ia, ma e na te tuuina atu i e na te tuuina i ai. A o i ai Keriso i luga o le mauga, sa faaali atu e Lusifelo, le tiapolo, ia te ia le mamalu uma o le lalolagi ma ofo e tuuina atu ia te ia pe afai e faapau ma ifo atu ia te ia [tagai i le Mataio 4:8–9]. Ae pe tou te iloa ea o lena tiapolo mativa e leai ma se futu se tasi o se fanua i le lalolagi atoa na te umiaina, ma e leai foi sona tino, po o se malumalu? O le lalolagi o le mea e tu ai aao o le Alii, ma afai lava tatou te avea se vaega mo i tatou lava o le a tuuina mai e le Alii ia i tatou; ma e tatau ai ona faapena foi ona tatou faatuatua i lo tatou talitonuga pe a faapea e i ai sa tatou fiaafe miliona tala ia tutusa lava ma le leai o se mea. O le ola e faavavau o le mea lea o loo tatou sailia pe tatau ona tatou tulitulia, ma o lea, e tusa lava po o le a o tatou laasaga ma o tatou tulaga o loo i ai i le olaga, e tatau lava ona avea ma o tatou faamoemoega muamua. …

… O lea sa ou talanoa atu e uiga i le mauaina o ‘oa. Ou te le iloa se mea e leaga ai le mauaina o ‘oa. O le auro ma le ario o mea ia a le Alii. Tatou te mananao e [fausia] fale ma e tatau ona tatou galueaiina le eleele. E leai se afaina o lea mea. Ou te le iloa se mea e leaga ai pe a mauoa se tagata. Ou te iloa le leaga o lo tatou faatau atu o le malo o le Atua, lo tatou tofi, le faatauina atu o le talalelei ma le taofia o i tatou lava mai le ola e faavavau ina ia faamalieina o tatou tuinanau o le tino, le faasausili o le olaga ma tifiga a le lalolagi, ma le gauai atu o o tatou loto i nei mea.¹⁸

Ou te tautala faatatau i afioga a Iesu Keriso lea na ia fetalai atu ai i ona soo: “A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.” [Tagai i le Mataio 6:33.] O le a ou ta’uina atu ia te outou, uso e ma tuafafine, atonu tatou te taumafaia i aso uma o lo latou ola, atonu tatou te taumafaia auala uma ma mataupu faavae uma o lenei lalolagi ae o i tatou le Au Paia e le mafai lava ona tatou manuia e ala i le faaaogaina o se isi lava auala nai lo le muai saili o le malo o le lagi ma lana amiotonu; a tatou faia lenei mea e leai se faamanuiaga, e leai se lelei, leai se faaeaga, meaalofa, alofa tunoa, naunautaiga, po o soo se mea lava e mafai ona moomoo i ai se tagata lelei e aoga, ma lelei mo le olaga nei ma le ola e faavavau, ae o le a tuuina mai ia i tatou.

E matua matautia le toatele o tagata o e ua taumafai e saili mo le fiafia e aunoa ma le muai sailia o le malo o le lagi, … ae peitai ua latou iloaina lava o se galuega matua faigata tele, ma e faapena foi i tatou pe a tatou taumafaia.¹⁹

O lo tatou faamoemoega e maualuga. O loo tatou tulimatai atu mo se nofoaga i le malo selesitila o le Atua, ina ia maua le ola e faavavau, o le meaalofa sili o meaalofa uma a le Atua i le tagata. O le faamamaluga, mamalu ma ‘oa uma o lenei lalolagi e tatau ona goto atu i se tulaga le taua i o tatou mafaufau pe a faatusatusa atu i se mautofi ai i le afioaga o le Atua ma le Tamai Mamoe, faatasi ai ma perofeta uma lava, o aposetolo ma le au paia, e aofia ai ma le aiga o lo tatou tama. E ui o le isi e puupuu ma vave ona mou atu, ae o le isi e tumau e faavavau.²⁰

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

O le a le mea na faia e Peresitene Wilford Woodruff ina ia mulimuli ai i aoaoga faavae ua taua i lenei mataupu? (Tagai i itulau 235, 237.)
Aisea tatou te “le mafai ai ona tuuesea le faaletino mai le faaleagaga”? (Tagai i itulau 237–238); tagai foi i le MFF 29:34–35. E faapefea ona tatou faaaogaina lenei upumoni i o tatou olaga i aso uma? i a tatou auanaga i le Ekalesia?
Sa matauina e Peresitene Woodruff e toatele tagata o e le mulimuli i fautuaga a le Alii i mataupu faaletino. Aisea tou te manatu ai o loo tupu lenei mea? (Tagai i itulau 238–239.) O a ni fautuaga ua tuuina mai e le Peresitene o loo i ai nei o le Ekalesia e uiga i mataupu faaletino?
Toe iloilo le parakalafa lona lua i le itulau 240. O a nisi faamanuiaga o le galue i lima? O le a so outou manatu o le a le uiga o le “avea ma se e galue ma faia soo se mea nai lo le na o le faaaogaina o mea e faia e isi”?
O a ni lapataiga ua tuuina mai e Peresitene Woodruff e uiga i tupe? (Tagai i itulau 240–243.) O a ni fautuaga na ia tuuina mai e uiga i aitalafu ma nonoga tupe? O a ni mea e mafai ona tatou faia e faamautuina ai se manatu tonu?
O a ni auala o loo avea ai sefuluai ma taulaga “mo lo tatou lava lelei ma le lelei o a tatou fanau”? (Tagai i le itulau 241.)
O le a se uiga ia te oe o aoaoga a le Faaola o loo i le Mataio 6:33? (Tagai foi i itulau 245–246.)
Faasolo vave lau vaai i le mataupu, ma saili mataupu faavae e tatau ona aoaoina e matua i a latou fanau. O a nisi o mea patino e tatau i matua ona faia faatasi ma a latou fanau ina ia aoao ai nei mataupu faavae? O a ni aafiaga ua e maua i le aoaoina mai ma le aoaoina atu o nei aoaoga faavae?

Mau E Faatatau I Ai: Malaki 3:8–11; Mataio 6:19–21; Iakopo 2:14–26 (Feagaiga Fou); Iakopo 2:12–19 (Tusi a Mamona); MFF 42:42; 58:26–28