Mataupu 11

Tatalo ia Maua Faamanuiaga o le Lagi

Pe a tatou tatalo ma le faatuatua, ua tatou saunia i tatou lava e maua faamanuiaga o loo ua saunia e le Tama Faalelagi mo i tatou.

Mai le Soifuaga o Wilford Woodruff

I le masina o Mati 1835, ao auauna i lana misiona muamua, sa sopoia ai e Wilford Woodruff o vaitafe ma taufusi i le itu i saute i sasae o le Iunaite Setete. Ina ia mafai ona sopoia nei taufusi, sa taina i lalo e ia ma lana soa ia se laau ma fausia ai se paopao. Sa alo atu ai ma le saogalemu mo le tusa o le 150 maila ona tiai ai lea o le paopao ae savavali. Sa toe manatuaina mulimuli ane e Peresitene Woodruff sa la’ua uia se auala sa “taoto tonu i le pala, ma sa tele lava ina ufitia [le auala] e le palapala ma le vai mo le selau ma le fitusefulu maila. Sa ma savavali mo le fasefulu maila i le aso i le palapala ma le vai e oo mai i tulivae le maualuga. I le aso 24 o Mati, ina ua mae’a ona savalia se sefulu maila i le palapala, sa amata ai ona pi’o lo’u vae ona o se tiga maatiati i lo’u tulivae. Sa ou nofo ifo i luga o se ogalaau.”

I le taimi tonu lea o le faigamalaga, sa tuua ai o ia iina e lana soa, o le sa matuai le lavatia le galuega ma filifili ai loa e toe fo’i i lona aiga, a o nofo o ia i luga o le ogalaau i le pala e nonofo ai korokotaila. Ma le lototele, sa liliu atu Wilford Woodruff i le Alii. Sa ia faapea mai, “Sa ou tootuli ifo i le palapala ma tatalo, ma sa faamaloloina a’u e le Alii, ma sa ou faaauau ai i lo’u ala ma le olioli tele.”¹

I le tele o tausaga mulimuli ane, sa faaalia e Peresitene Woodruff lona faatuatua a o ia malaga atu ma lona toalua, ma isi i se vaa e auauna ai i Egelani. “Tusa e tolu ao ma po o matou faimalaga i le mamafa o taaviliga o matagi, ma sa tuleia matou agai i tua,” sa faamatala ai o ia. “Sa iu ina ou fai atu i a’u soa matou te o i totonu o le potu, ma sa ou fai atu ia i latou e tatalo ina ia suia e le Alii le ala matagi. Sa leai so’u mata’u nei matou leiloloa; ae ou te lei fiafia i le manatu o le toe tuleia i tua o i matou i Niu Ioka, aua sa ou manao ina ia agai i luma la matou faigamalaga. Sa matou faia le tatalo lava e tasi, sa faia uma e alii ma tamaitai; ma ina ua maea ma matou toe foi ane i luga o le vaa [mai le potu] e lei atoa se minute ae pei lava sa aveane e se tagata se pelu ma tipi ai le matagi, ma sa mafai lava ona e togia i fafo se solosolo ae aunoa ma le lelea.”²

Aoaoga a Wilford Woodruff

O lo tatou tiute le tatalo ma le faatuatua mo le fesoasoani tatou te manaomia.

E i ai le apoapoaiga e tasi a lo tatou Faaola lea e tatau i le Au Paia uma a le Atua ona tausia, ae o lea, ou te mata’u ai, tatou te le o faia e pei ona tatau ai, ma o lea [apoapoaiga] o le tatalo e le aunoa, ina ia outou le vaivai [tagai Luka 18:1; MFF 88:126]. Ou te mata’u, i le avea o se nuu, e le o lava ona tatou tatalo ma le faatuatua. E tatau ona tatou valaau atu i le Alii i le tatalo faatauanau, ma faailoa atu ia te ia mea uma tatou te mananao ai. Aua afai o le a ia le puipuia ma laveai i tatou ma faasaoina i tatou, e leai lava se isi mana e mafaia. O le mea lea o lo tatou faatuatuaga ua atoatoa ia te ia. O le mea lea ua tatau ona oo atu a tatou tatalo i fofoga o lo tatou Tama Faalelagi i le ao ma le po.³

O tagata o le lalolagi, latou te le iloaina le aafiaga ma le aoga o le tatalo. E faafofoga le Alii ma tali i tatalo a alii, tamaitai ma tamaiti. E sili atu le mana o le tatalo, o se mea aoga tele, e aumaia ai faamanuiaga a le Atua, nai lo se isi lava mea.⁴

Pe a tulai mai le lalolagi e faasagatau i le malo o le Atua i nei aso e gata ai, pe tatau ea ona matata’u le Au Paia? … E le tatau ia i tatou. E i ai le mea e tasi e tatau ona tatou faia, ma o lena mea, o le tatalo i le Atua. Sa faia e tagata amiotonu uma lenei mea; e oo lava ia Iesu le Faaola, le Alo e Toatasi na fanaua e le Tama i la le tino, sa tatau ona tatalo, mai le falepovi i le satauro, e le aunoa lava; i aso uma sa manaomia ona ia valaau atu i lona Tama e tuuina mai ia te ia le alofa tunoa e lagolagoina o ia i lona taimi o mafatiaga ma ina ia mafai ai e ia ona inu le ipu oona. Sa faapea foi i ona soo.⁵

Po o le a lava mea e manaomia e i tatou ona taliaina ma faafiafiaina [ai i tatou], o lo tatou tiute o le tagi atu i le Alii mo [na mea]. E tatau ia i tatou ona o atu ia te Ia i nofoaga lilo ma faailoa atu o tatou manaoga, ina ia lagonaina ma taliaina i luga o o tatou ulu. O i lava o loo i ai lo tatou malosi. O lo tatou faatuatuaga ua i le Atua, ae le o i le tagata.⁶

O le tiute o tagata taitoatasi o le Au Paia a le Atua … le tuuina atu o ana tatalo ia oo atu i fofoga o le Atua o Sapaota, i le ao ma le po i taimi talafeagai, i le faalapotopotoga o le aiga ma nofoaga lilo, ina ia lagolagoina e le Alii ona tagata, fausiaina Siona ma faataunuuina ana folafolaga. …

… E sili atu lo’u faatuatua i le tatalo i luma o le Alii nai lo se isi lava aoaoga faavae i luga o le fogaeleele. Afai e leai so tatou faatuatua i le tatalo i le Atua, e leai foi so tatou faatuatua ia te ia po o le talalelei. E tatau ona tatou tatalo i le Alii, e fesili atu ai ia te ia mo mea tatou te mananao ai. Ia oo atu tatalo a lenei nuu i luma o le Alii e le aunoa i le taimi e tatau ai, ma o le a le liliueseina i latou e le Alii, ae o le a faafofogaina i latou ma taliaina, ma o le a tulai ma susulu atu le malo ma le Siona a le Atua, o le a ofuina ona ofu matagofie ma faaofuina i le mamalu o le Atua, ma faataunuuina le faamoemoe na faavae ai i luga o le fogaeleele [tagai MFF 82:14].⁷

I le avea o se nuu e tatau ona tatou tulai atu i le faatuatua ma le mana i luma o le Atua ma faailoa atu o tatou manaoga, ma tuuina atu o tatou taunuuga i Ona aao. O loo i ai lava iina. Ma o le a tumau ai iina.⁸

E tatau ona tatou tatalo ina ia mafai ai ona tatou malamalama i le finagalo o le Alii ma mauaina Lana taitaiga.

Ou te lagona e tatau ona sii ae o tatou loto i le tatalo i le Atua lo tatou Tama Faalelagi mo Lona alofa tunoa, ma o le a Ia taitaia ma faasino i tatou e ala i musumusuga a le Agaga Paia, ina ia faapupulaina o tatou mafaufau, ma ia tatalaina lo tatou malamalamaaga ia tatou manino i Lona mafaufau ma Lona finagalo e uiga i Lona nuu.⁹

I soo se taimi lava pe a e le mautinoa e uiga i soo se tiute po o se galuega e mafai ona e faatinoina, aua lava nei e alu atu ma faia se mea seiloga ua e alu atu ma galue i le tatalo ma maua le Agaga Paia. O fea lava le mea e faasino mai e le Agaga e te alu i ai pe e te faia, o le mea sa’o lena; ma, o le mulimuli atu i ana taitaiga, o le a e faia le mea sa’o.

E tele ni nofoaga o le a tatou oo i ai i la tatou galuega i nuu o le lalolagi, lea atonu tatou te mafaufau ai o se tasi ala faapitoa o le faagasologa o mea e sa’o; ae afai tatou te le iloa, o le a sili atu mo i tatou le oo atu i luma o le Alii, ma fesili atu ma le faatuatua ina ia taitaia i tatou i ala o le ola.¹⁰

Ia tatou galulue ma le faatuatua ma tatalo i le Alii mo le poto i lea aso ma lea aso, ina ia tatou maua le mana e manumalo ai ma foia ai [faafitauli].¹¹

Ua i matua le tiute paia e aoao a latou fanau ia tatalo ma faamautinoa e tatalo faatasi le aiga.

O le mafaufau ma le finagalo o le Atua o alii ma tamaitai uma o e ua ulu atu i le feagaiga o le faaipoipoga, ma e ua i ai atalii ma afafine ua tuuina atu ia i latou, a oo ina lava le matutua o fanau na, e tatau ona aoaoina i latou e tatalo.

O le tiute o le Au Paia o Aso e Gata Ai le aoao o a latou fanau e tatalo ao iti i latou; e aoao i latou ia malamalama i le mataupu faavae ma faamanuiaga o le tatalo, ina ia latou tatalo mo o latou matua ma mea uma e talafeagai. Afai tou te amata [ona aoao] faapea fanau, ma outou aoao i latou ia matata’u i le Alii, o le a seasea ona latou o ese mai ai. E le tatau i le ulu o le aiga ona ia faia tatalo i taimi uma, ae e tatau ona tofi tagata o lona aiga e tatalo, ma talosia faamanuiaga mo meaai i [le] laulau.¹²

Pe a tatou ola i le talalelei, o le a tali mai a tatou tatalo i ni faamanuiaga i o tatou luga.

E tatau ia i tatou o se nuu ona lotomaulalo, loto tatalo, usiusitai i mana o le Atua ina ia tatou maua ai faamanuiaga folafolaina a lo tatou Tama Faalelagi.¹³

E tatau ona tatou ola i le auala ma le faiga lena ina ia mafai ona tatou o atu i luma o le Alii ma aioi mo na faamanuiaga, ma le faatuatua ma le mana, ia tatou te manaomia e faataunuuina ai faamoemoega o le Atua. … E matua manaomia lenei tulaga mo lo tatou alualu i luma.¹⁴

E finagalo le Atua e tuuina mai i Lana Au Paia mea lelei o le lalolagi, faapea foi ma faamanuiaga o le lagi, e tusa ma le mafai ona latou faaaogaina ma le tatau. …

… O le toatele o outou ua iloa tatalo; o le mea lea ia aua nei faaletonu le oo atu o a outou tatalo i fofoga o le Atua o Sapaota; ma o le a Ia faafofoga mai ia te outou. … Ae o faamanuiaga o le lagi faatoa mafai lava ona maua ma faasoasoaina i luga o aoaoga faavae o le amiotonu.¹⁵

Ua leai so tatou taimi e ma’imau ae ia saunia i tatou lava mo mea o le a oo mai i le lalolagi; ma o ai ea e manao e aveesea lona pale, lona mamalu, ma le faamoemoe mo le ola e faavavau lea sa ia mauaina i aso ua tea e ala i le taliaina o le talalelei a Iesu Keriso? E le o se tagata ua i ai se vaega o le Agaga o le Atua. Ia tatou tulai ma faalauteleina o tatou valaauga, ma galulue i luma o le Atua seia tatou maua le Agaga Paia, ma seia tatalaina e a tatou tatalo le pupuni o le faavavau ma oo atu i fofoga o le Atua o Sapaota ma talia mai ai e ala i faamanuiaga i o tatou luga.¹⁶

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Toe iloilo tala o loo i itulau 111–113. Manatunatu loloto pe talanoaina auala eseese atonu na tali atu ai Elder Woodruff i nei tulaga taitasi. O a ni mea e mafai ona tatou aoao mai i ana tali?
O a ni mea na aafia ai ou lagona a o e faitauina aoaoga a Peresitene Woodruff e uiga i lo tatou tiute ina ia tatalo? (Tagai itulau 113–114.) O le a le uiga ia te oe o lou tatalo ma le faatuatua? Aisea e tatau ai ona tatou tatalo ina ia maua faamanuiaga tatou te manaomia? O a nisi faamoemoega o le tatalo?
Faitau atoa le parakalafa tolu o i le itulau 113. Aisea na manaomia ai e le Faaola ona tatalo? O le a se mea e mafai ona tatou aoaoina mai i Lana tatalo? (Tagai Mataio 26:39; Ioane 11:41; 3 Nifae 13:9–13.)
E mafai faapefea e le tatalo ona fesoasoani ia i tatou pe a i ai ni a tatou filifiliga e faia po o ni a tatou fesili e uiga i o tatou tiute? (Tagai itulau 114.)
O a nisi o auala ua taliaina ai a outou tatalo e le Tama Faalelagi? E faapefea ona tatou tali atu pe a oo mai se tali o tatalo e ese mai le tali o loo tatou faamoemoe e mauaina?
O le a le faamaoniga na tuuina mai e Peresitene Woodruff i matua o e aoao a latou fanau e tatalo? (Tagai itulau 115.) O a ni aoaoga faavae o le tatalo ia e tatau ona aoao atu e matua i a latou fanau? E mafai faapefea e matua ona fesoasoani i a latou fanau e avea le tatalo ma vaega o o latou olaga?
I tatalo faaleaiga, aisea e taua ai le maua uma e tagata o le aiga le avanoa e tatalo ai? (Tagai itulau 115.) E faapefea ona faamalosia lou aiga e le tatalo?
Suesue le vaega faaiu o le mataupu (itulau 115–116), e vaai ai ni uiga taua ia na saunoa mai ai Peresitene Woodruff e tatau ona ia i tatou. Aisea ua manaomia ai nei uiga taua a o tatou tatalo ma ao tatou saili i tali ia tatou tatalo?

Mau E Faatatau I Ai: Mataio 7:7; Iakopo 1:5–6; 5:16; 2 Nifae 32:8–9; Alema 33:3–11; 34:17–28; 37:36–37; 3 Nifae 18:19–21; MFF 10:5; 68:28; 112:10