Kapitulo 7

Ang mga Paghunghong sa Espiritu

“Mohangyo ko nga kanunay kitang magtinguha sa inspirasyon sa Ginoo ug sa pakig-uban sa Iyang Balaang Espiritu sa pagpanalangin kanato nga mopabilin sa atong mga paningkamot diha sa taas nga espirituhanong kahimtang.”

Gikan sa Kinabuhi ni Gordon B. Hinckley

Niadtong Hunyo 24, 1995, si Presidente Gordon B. Hinckley namulong sa usa ka miting alang sa bag-ong mga mission president ug sa ilang mga asawa, naghatag kanila og tambag aron mogiya sa mosunod nilang tulo ka tuig nga pagserbisyo. Iyang gisulti ang instruksyon nga iyang nadawat sa dihang si Presidente Harold B. Lee, nga nianang higayuna usa pa ka sakop sa Korum sa Napulog Duha ka mga Apostoles, mi-set apart kaniya isip usa ka stake president:

“Usa ra ka butang ang akong nahinumduman nga iyang giingon: ‘Paminaw sa mga paghunghong sa Espiritu sa tungang gabii, ug buhata kadto nga mga paghunghong.’ Wala ko kahibalo nganong ang pinadayag moabut usahay sa gabii, apan mahitabo kini. Moabut usab kini sa adlaw, siyempre. Apan paminaw sa mga paghunghong sa Espiritu, ang gasa sa pagpadayag, diin makadawat kamo niini.”¹

Nagpasabut sa iyang mga kasinatian sa iyang pagsunod niini nga instruksyon, miingon siya: “Ang Ginoo hilum nga namulong. … Sa tungang gabii, mga ideya moabut sa akong ulo nga, sa akong hunahuna, nahimong propetikanhon.”² Pananglitan, niadtong Hulyo 1992 didto siya sa Hong Kong kuyog sa ubang mga lider sa Simbahan, nangita og dapit nga tukuran og templo. Mihigda siya usa ka gabii nga mibati nga wala mahimutang bahin sa desisyon nga kinahanglan niyang buhaton. Dayon ang paghunghong sa Espiritu nakapamata kaniya sayo pagkasunod buntag.

“Dunay butang nga makapainteresado kaayo nga misantup sa akong hunahuna,” iyang girekord sa iyang journal. “Wala ako makadungog og usa ka tingog. Apan miabut sa akong hunahuna ang tingog sa Espiritu. Miingon kini, “Nganong nabalaka man ka bahin niini? Duna moy nindot nga dapit nga naa nagbarug ang mission home ug ang gamayng chapel. Naa kini sa sentro mismo sa Kowloon, sa lokasyon diin dunay pinakamaayong transportasyon. … Pagtukod og building nga dunay [pipila] ka andana. Mahimo kining maglakip og usa ka chapel ug mga classroom sa unang duha ka andana ug usa ka templo sa ibabaw nga duha o tulo ka andana.’” Pagkadawat niana nga pinadayag, miingon si Presidente Hinckley, “Mirelaks ko ug mibalik sa pagkatulog.”³

Sa Kowloon karon, usa ka dapit sa Hong Kong nga daghan kaayong nagpuyo, dunay nagbarug nga usa ka building diin nagbarug kaniadto ang usa ka chapel ug mission home. Kana nga building, nga dunay chapel, mission home, mission office, ug sagrado nga templo, usa ka testamento sa mga paghunghong sa Espiritu ngadto sa usa ka propeta sa Dios.

Mga Pagtulun-an ni Gordon B. Hinckley

Ang Espiritu Santo mao ang Maghuhupay ug Tigpamatuod sa kamatuoran.

Ang Espiritu Santo nagbarug isip ikatulo nga sakop sa Dios nga Kapangulohan, ang Maghuhupay nga gisaad sa Manluluwas nga motudlo sa Iyang mga sumusunod sa tanang mga butang ug modala sa tanang mga butang ngadto sa ilang panumduman, bisan unsa ang Iyang gisulti ngadto kanila (tan-awa sa Juan 14:26).⁴

Ang Espiritu Santo nagpamatuod sa atong kasingkasing mahitungod sa Amahan ug sa Anak.⁵

Ang [akong] pagpamatuod [bahin ni Jesukristo] moabut pinaagi sa gahum sa Espiritu Santo. Usa kini ka gasa, sagrado ug talagsaon, gihatag pinaagi sa pagpadayag gikan sa ikatulo nga sakop sa Dios nga Kapangulohan.⁶

Ang Espiritu Santo mao ang Tigpamatuod sa Kamatuoran, kinsa motudlo [kanato] sa mga butang nga dili [nato] matudlo sa usag usa. Niadtong mahinungdanon ug mahagitong mga pulong ni Moroni, ang kahibalo sa kamatuoran sa Basahon ni Mormon gisaad “pinaagi sa gahum sa Espiritu Santo.” Nianang higayuna si Moroni namahayag, “Ug pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:4–5).

Nagtuo ako nga kini nga gahum, kini nga gasa, ania kanato karon.⁷

Nagkinahanglan kita sa Espiritu Santo nga mogiya kanato sa atong pagserbisyo sa panimalay ug sa Simbahan.

Walay mas labaw pa kadako nga panalangin nga moabut sa atong kinabuhi kay sa gasa sa Espiritu Santo—ang pakig-uban sa Balaang Espiritu nga mogiya kanato, manalipod kanato, ug mopanalangin kanato, nga moadto, sama kaniadto, isip usa ka gilis sa atong atubangan ug kahayag nga mogiya kanato diha sa mga dalan sa pagkamatarung ug kamatuoran. Kanang magiyahong gahum sa ikatulong sakop sa Dios nga Kapangulohan maato kon kita magpuyo nga takus niini.⁸

Nagkinahanglan kita sa Espiritu Santo sa atong daghang mga responsibilidad sa pagdumala. Nagkinahanglan kita niini samtang kita motudlo sa ebanghelyo diha sa atong mga klase ug ngadto sa kalibutan. Nagkinahanglan kita niini sa pagdumala ug pagtudlo sa atong mga pamilya.

Sa atong paggiya ug pagtudlo ubos sa impluwensya niana nga Espiritu, madala nato ang pagkaespirituhanon ngadto sa kinabuhi niadtong kinsa kita responsable. …

… Nindot ang mga bunga sa pagtudlo nga gibuhat ubos sa inspirasyon sa Balaang Espiritu. Mopakaon kini sa espiritu ug mopalagsik sa kalag.

Mahimo ba kong mohatag og espesyal nga pagtambag ngadto sa mga ginikanan nga nagbarug isip mga pangulo sa mga pamilya: nagkinahanglan kita sa direksyon sa Espiritu Santo sa delikado ug dakong buluhaton nga atoa sa pagpalig-on sa espiritwalidad sa atong mga panimalay.⁹

Paminaw sa mga pag-aghat sa Espiritu. Pagmapainubsanon. Mahimo kamong giyahan ngadto sa usa ka tawo pinaagi sa kamot sa Ginoo tungod sa inyong espiritu, inyong kinaiya, inyong pagbati, inyong kamapainubsanon.¹⁰

Ang pagpadayag hapit kanunay nga moabut ngari kanato pinaagi sa ligdong, hinagawhaw nga tingog—ang paghunghong sa Espiritu.

Matag karon ug unya, interbyuhon ko sa mga representante sa media. Hapit sa kanunay mangutana sila, “Sa unsang paagiha moabut ang pagpadayag ngadto sa propeta sa Simbahan?

Motubag ko nga moabut kini karon sama sa pag-abut niini sa nangagi. Kalabut niini, akong gisaysay ngadto niining mga representante sa media ang kasinatian ni Elijah human sa iyang pakigbatok sa mga pari ni Baal:

“Ug, ania karon, ang Ginoo milabay, ug usa ka dako ug makusog nga hangin mibuak sa mga bukid, ug mibuak sa ginagmay sa mga bato sa atubangan sa Ginoo; apan ang Ginoo wala diha sa hangin: ug sa tapus sa hangin, ang usa ka linog; apan ang Ginoo wala diha sa linog:

“Ug sa tapus sa linog, ang usa ka kalayo; apan ang Ginoo wala diha sa kalayo: ug sa tapus sa kalayo, ang usa ka malinawon nga diyutayng tingog” (1 Mga Hari 19:11–12).

Mao kana ang paagi. Dunay ligdong, hinagawhaw nga tingog. Moabut kini isip tubag sa pag-ampo. Moabut kini pinaagi sa paghunghong sa Espiritu. Mahimong moabut kini diha sa kamingaw sa kagabhion.

Aduna ba koy pagduha-duha niana? Wala gayud bisan unsa. Nakita nako kini sa daghang higayon.¹¹

Ang ingon hapit sa kanunay mao ang pulong sa Dios nga miabut kanato, dili inubanan sa mga trumpeta, dili gikan sa mga hawanan sa konseho sa makiadmanon, apan sa ligdong, hinagawhaw nga tingog sa pagpadayag. Ang pagpaminaw niadtong nagtinguha sa kawang sa pagpangita og kaalam ug kinsa namahayag og kusog sa ilang mga tambal alang sa mga sakit sa kalibutan, ang usa malagmit motubag uban sa Salmista, “Humilom kamo, ug ilhon ninyo nga ako mao ang Dios: …” (Sal. 46:10) ug uban sa Manluluwas, “Ang may mga dalunggan nga makadungog, kinahanglan magpatalinghug.” (Mat. 11:15.)¹²

Ang mga butang sa Espiritu molamdag, molig-on, ug modasig kanato.

Unsaon nato pagkahibalo sa mga butang sa Espiritu? Unsaon nato pagkahibalo nga gikan kini sa Dios? Pinaagi sa mga resulta niini. Kon moresulta kini sa pagtubo ug paglambo, kon moresulta kini sa pagtuo ug pagpamatuod, kon moresulta kini sa mas maayong paagi sa pagbuhat sa mga butang, kon moresulta kini sa pagkadiosnon, nan iya kini sa Dios. Kon makapahuyang kini kanato, kon modala kini kanato sa kangitngit, kon makapalibog kini kanato ug makapabalaka kanato, kon moresulta kini sa kawalay pagtuo, nan iya kini sa yawa.¹³

Mailhan ninyo ang mga pag-aghat sa Espiritu pinaagi sa mga bunga sa Espiritu—kanang molamdag, kanang molig-on, kanang positibo ug apirmatibo ug makapadasig ug modala kanato sa mas maayong panghunahuna ug mas maayong mga pulong ug mas maayong mga binuhatan iya sa Espiritu sa Dios. Kanang makapahuyang, nga modala kanato ngadto sa gidili nga mga dalan—iya kana sa kaaway. Sa akong hunahuna ingon lang kana ka yano, ingon lang kana ka simple.¹⁴

Usa ka iskolar ang kausa mipadayag sa panglantaw nga ang Simbahan kaaway sa intellectualism. Kon buot niyang ipasabut sa intellectualism nga kanang branch sa philosophy nga nagtudlo “sa doktrina nga ang kahibalo sa kinatibuk-an naggikan sa hingpit nga pangatarungan” ug “nga ang pangatarungan mao ang katapusang baruganan sa reyalidad,” nan, oo, supak kami sa ingon nga mabaw nga interpretasyon kon kalabut na sa relihiyon. (Mga kinutlo gikan sa Random House Dictionary of the English Language, p. 738.) Ang ingon nga interpretasyon wala maglakip sa gahum sa Balaang Espiritu nga mamulong ngari ug pinaagi [kanato].

Siyempre mituo kita sa pagpalambo sa hunahuna, apan ang kinaadman [intellect] dili lamang mao ang tinubdan sa kahibalo. Dunay usa ka saad, nga gihatag ubos sa inspirasyon gikan sa Labawng Makagagahum, nga gihulagway niining matahum nga mga pulong: “Ang Dios mohatag nganha kanimo og kahibalo pinaagi sa iyang Balaan nga Espiritu, oo, pinaagi sa dili mahulagway nga gasa sa Espiritu Santo.” (D&P 121:26.)

Ang mga humanista nga mitamay sa buhat sa Ginoo, ang gitawag nga mga intellectualist kinsa modaut, mosulti lamang gikan sa kaignorante sa espirituhanong pagpakita. Wala sila makadungog sa tingog sa Espiritu. Wala sila makadungog niini tungod kay wala sila magtinguha niini ug mangandam sa ilang kaugalingon nga mahimong takus niini. Unya, magtuo nga kana nga kahibalo nagagikan lamang sa pangatarungan ug sa dagan sa hunahuna, ilang gilimud kanang nagagikan pinaagi sa gahum sa Espiritu Santo.

Ang mga butang sa Dios masabtan lamang pinaagi sa Espiritu sa Dios. Kana nga Espiritu tinuod. Niadtong nakasinati sa dagan niini, ang kahibalo nga naangkon niining paagiha sama katinuod nianang makaangkon pinaagi sa paggamit sa lima ka senses. Ako mopamatuod niini. Ug masaligon ko nga kasagaran sa mga miyembro sa Simbahan makapamatuod sa ingon. Giawhag nako ang matag usa kanato sa pagpadayon sa pagpalambo og kasingkasing nga nahiangay sa Espiritu. Kon kita mobuhat sa ingon, ang atong kinabuhi mapauswag. Bation nato ang kasuod ngadto sa Dios nga atong Mahangturong Amahan. Matagamtam nato ang katam-is sa hingpit nga kalipay nga dili makuha sa laing paagi.

Dili kita magpalaang sa pangatarungan sa kalibutan nga sayop [sophistry], nga sa kasagaran negatibo ug kanunay gayud nga dunay makadaut nga mga epekto. Maglakaw kita uban sa pagtuo sa umaabut, mamulong nga apirmatibo ug mopalambo og kinaiya nga masaligon. Kon atong buhaton, ang atong kalig-on makahatag og kalig-on sa uban.¹⁵

Mohangyo ko nga kanunay kitang magtinguha sa inspirasyon sa Ginoo ug sa pakig-uban sa Iyang Balaang Espiritu sa pagpanalangin kanato nga mopabilin sa atong mga paningkamot diha sa taas nga espirituhanong kahimtang. Kadto nga mga pag-ampo dili mahitabo nga dili tubagon.¹⁶

“Ang mga butang sa Dios masabtan lamang pinaagi sa Espiritu sa Dios. Kana nga Espiritu tinuod.”

Ang Espiritu Santo mao ang kanunay natong kauban samtang magpakabuhi kita alang niini nga panalangin.

Ang Ginoo mao ang miingon nga kon motuman kita sa mga sugo, “ang Espiritu Santo mao ang [atong] kauban sa kanunay” (D&P 121:46) nga modasig kanato, motudlo kanato, mogiya kanato, mohupay kanato, ug mopatunhay kanato. Aron makabaton niini nga pakig-uban, kinahanglan natong mangayo niini, magpakabuhi alang niini, nga mahimong matinud-anon ngadto sa Ginoo.¹⁷

“Unsaon man ninyo sa pagpabilin sa Espiritu sa Ginoo nga makauban ninyo sa tanang higayon?” Ah, magpakabuhi kamo nga takus niini; magpakabuhi kamo nga takus sa Espiritu sa Ginoo. Kana ang inyong buhaton. Ug kamo makabaton niini. … Pagpakabuhi lang nga matarung. Palayo sa mahugaw nga mga butang. Palayo sa pornograpiya. Palayo niining mga butang nga mobira kaninyo. Ang mga libro nga inyong gibasa, ang mga magasin nga inyong gibasa, ang mga video nga inyong gitan-aw, ang mga programa sa telebisyon nga inyong gitan-aw, ang mga pasundayag nga inyong adtoan, ang tanan dunay epekto kaninyo ug mahitabo kon inyong ipaubos ang inyong kaugalingon sa impluwensya niadtong makapailad nga mga butang nga gituyo aron mahimo kamong kabus ug ang laing tawo mahimong adunahan. Palayo gikan niini.¹⁸

Gipahamtang ninyo sa inyong kaugalingon matag Dominggo ang pagbag-o sa inyong panumpa ug mipakigsaad kamo sa pagdala diha sa inyong kaugalingon sa ngalan ni Jesukristo. Nakahunahuna ba kamo niana, kon unsa kana kaimportante, kon unsay gipasabut sa pagdala diha sa inyong kaugalingon sa ngalan ni Ginoong Jesukristo uban sa panumpa ug saad nga motuman sa Iyang mga sugo? Ug mihimo Siya og panumpa ug saad nganha kaninyo nga ihatag Niya ang Iyang Espiritu nga magauban kaninyo. Pagkatalagsaon niini nga butang.¹⁹

Pagkadakong panalangin nga makabaton sa mapangalagarong impluwensya sa usa ka sakop sa Dios nga Kapangulohan, nga makadawat niana nga gasa ubos sa mga kamot niadtong naglihok uban sa balaanong awtoridad. Kon padayon kitang maglakaw diha sa pagkamahiyason, mahimo natong matagamtaman ang katumanan sa saad nga gihimo sa Ginoo sa dihang miingon Siya: “Ang Espiritu Santo mao ang inyong kauban sa kanunay, ug ang inyong pagmando usa ka dili mausabon nga pagmando sa pagkamatarung ug kamatuoran; ug ang inyong kamandoan mao ang usa ka walay katapusan nga kamandoan, ug walay pagpugos nga paagi kini mokanap nganha kanimo hangtud sa kahangturan.” (D&P 121:46.)²⁰

Mga Sugyot alang sa Pagtuon ug Pagtudlo

Mga Pangutana

Nganong nagkinahanglan man kita sa Espiritu Santo? (Tan-awa sa mga seksyon 1 ug 2.) Kanus-a kamo mibati nga ang Espiritu Santo nagtudlo ug naggiya kaninyo? Unsa ang inyong nakat-unan gikan niadtong mga kasinatian?
Unsa ang atong makat-unan gikan sa pagpasabut ni Presidente Hinckley mahitungod kon sa unsang paagi moabut ang pagpadayag ngadto sa propeta? (Tan-awa sa seksyon 3.) Ngano nga importante man kini nga masayran nga ang Espiritu Santo sa kasagaran makigsulti diha sa “ligdong, hinagawhaw nga tingog”? Unsay inyong nakat-unan gikan sa inyong kaugalingong mga kasinatian mahitungod sa pag-ila sa mga komunikasyon gikan sa Espiritu Santo?
Ribyuha ang “mga bunga sa Espiritu” nga gi-summarize ni Presidente Hinckley sa seksyon 4. Sa unsang paagi nga kining mga pagtulun-an makatabang kanato nga mailhan ang impluwensya sa Espiritu? Unsa ang mga peligro sa pagtuo nga “ang kinaadman mao … ang bugtong tinubdan sa kahibalo”? Unsa nga mga kasinatian ang inyong nasinati mahitungod sa pagbaton og espirituhanong kahibalo?
Unsa ang inyong gibati samtang namalandong kamo sa mga pagtulun-an ni Presidente Hinckley diha sa seksyon 5 mahitungod sa pagpakig-uban sa Espiritu Santo. Sa unsa nga paagi kamo napanalanginan pinaagi sa Espiritu Santo?

May Kalabutan nga mga Kasulatan

1 Mga Taga-Corinto 2:9–14; 1 Nephi 10:17; 2 Nephi 31:17–18; Mosiah 3:19; Moroni 8:25–26; D&P 11:12–14

Tabang sa Pagtudlo

“Kon kita nahigugma sa atong gitudloan, mag-ampo kita alang sa matag usa kanila. Buhaton nato ang tanan aron masayud sa ilang mga tinguha, mga kalampusan, mga panginahanglan, ug mga kabalaka. Atong ipahaum ang atong pagtudlo aron makatubag sa ilang mga panginahanglan, bisan og kini nagkinahanglan og daghang panahon ug paningkamot. Pangitaon nato sila kon sila wala diha ug pahalipayan kon anaa sila. Motanyag kita og tabang kon gikinahanglan” (Pagtudlo, Walay Labaw ka Mahinungdanon nga Tawag [1999], 32).