Kapitulo 16

Ang Gahum sa Basahon ni Mormon

“Sa kalibutan nga nagpaling-paling ang pagtuo niini, ang Basahon ni Mormon maoy [usa ka] gamhanang saksi sa kabalaan sa Ginoo.”

Gikan sa Kinabuhi ni Gordon B. Hinckley

Sa batan-on pa si Gordon B. Hinckley, giestablisar niya ang usa ka sumbanan sa pagtuon sa kasulatan. “Isip usa ka misyonaryo, matag gabii sa dili pa matulog magbasa ko og pipila ka kapitulo sa Basahon ni Mormon,” miingon siya, “ug misulod sa akong kasingkasing ang kombiksyon nga wala gayud mahanaw; nga kini pulong sa Dios, gipahiuli dinhi sa kalibutan pinaagi sa gahum sa Labing Gamhanan, gihubad pinaagi sa gasa ug gahum sa Dios ngadto sa pagpamatuod ngadto sa Judeo ug sa Hentil nga si Jesus mao ang Kristo.”¹

Ang iyang kahibalo ug pagpamatuod sa Basahon ni Mormon miimpluwensya og daghang tawo human sa iyang pagmisyon, dihang nagtrabaho siya nga empleyado sa Komitiba sa Radio, Publicity, ug Mission Literature sa Simbahan. Nakadawat siya og assignment nga magsulat og mga script para sa serye sa radyo nga giulohan og Usa ka Bag-ong Saksi ni Kristo. Ang mao nga serye naghatag og kinabuhi sa mga tudling sa Basahon ni Mormon para sa mga tigpaminaw sa radyo. Nianang higayona, mikomentaryo siya ngadto sa usa niya ka kauban: “Kanunay nakong gihunahuna nga mahimo nato ang pinakamaayo sa atong trabaho kon makuha nato ang interes sa mga tawo ngadto sa punto nga ila kining basahon. Niana ang Espiritu makasaksi sa kabalaan niini.”²

Sa tibuok niyang pangalagad, gihatagan og importansya ni Presidente Hinckley ang kaimportante sa Basahon ni Mormon. Niadtong Agosto 2005, isip Presidente sa Simbahan, gihagit niya ang mga Santos sa Ulahing mga Adlaw nga basahon ang tibuok basahon sa dili pa matapos ang tuig. Sa wala madugay iyang gireport: “Makapatingala nga daghan ang nakahimo sa hagit. Ang tanan nga mibuhat gipanalanginan sa iyang paningkamot. Kon sila hingpit nga moapil niining dugang nga saksi sa atong Manunubos, ang ilang kasingkasing mobati ug ang ilang espiritu [n]atandog.”³

“Ang ebidensya sa kamatuoran [sa Basahon ni Mormon] anaa sulod sa hapin niining basahon mismo. Ang pagtesting sa kamatuoran niini nag-agad diha sa pagbasa niini.”

Mga Pagtulun-an ni Gordon B. Hinckley

Katambayayong sa Biblia, ang Basahon ni Mormon nagpamatuod kang Jesukristo.

Ginaingon sa karaan, ginaingon sa Manluluwas, nga sa mga ba-ba sa duha o tulo ka mga saksi mamalig-on ang tanang butang.⁴

Ingon nga ang Biblia mao ang testamento sa Daang Kalibutan, ang Basahon ni Mormon mao ang testamento sa Bag-o. Nagtambayayong kini sa pagpahayag ni Jesus isip ang Anak sa Amahan.⁵

Ang Basahon ni Mormon … nagpamatuod bahin Kaniya kinsa natawo sa Betlehem sa Judea ug kinsa namatay sa bungtod sa Kalbaryo. Sa kalibutan nga nagpaling-paling ang pagtuo, ang Basahon ni Mormon lain usab ug gamhanang saksi sa kabalaan sa Ginoo. Diha gayud sa pasiuna niini, gisulat sa usa ka propeta kinsa didto sa Amerika liboan ka tuig ang milabay, tin-aw nga nag-ingon nga kini gisulat “sa pagpamatuod ngadto sa Judeo ug sa Hentil nga si Jesus mao ang Kristo, ang Dios sa Kahangturan, nagpaila sa iyang kaugalingon ngadto sa tanan nga mga nasud.”⁶

Walay laing mas importante nga angay natong buhaton kay sa palig-unon ang tinagsa natong kinabuhi pinaagi sa dili mapaling nga kombiksyon nga si Jesus mao ang Kristo. … Ug, akong mga kaigsoonan, mao kana ang tuyo sa pagtungha niining talagsaon ug katingalahan nga basahon.⁷

Pinaagi sa gahum sa Espiritu Santo, kita makadawat og saksi bahin sa balaan nga tinubdan sa Basahon ni Mormon.

Nabasa na nako ang Basahon ni Mormon, nga gihubad ni [Joseph Smith] pinaagi sa gasa ug gahum sa Dios. Pinaagi sa gahum sa Espiritu Santo nakadawat ko og pagpamatuod ug usa ka saksi sa balaan nga tinubdan niining sagrado nga rekord.⁸

Milagruso ang tinubdan niini; kon kana iistorya ngadto sa dili pamilyar niini, ingon og lisud kining tuohan. Apan ang basahon ania aron mabatyagan ug mahikap ug mabasa. Dili malantugi ang presensya niini. Ang tanang paningkamot sa pagsaysay sa tinubdan niini, nga wala maggikan sa saysay nga gihatag ni Joseph Smith, makita nga kulang sa kalig-on.⁹

Ang ebidensya sa katinuod niini, sa pagkabalido niini sa kalibutan nga nagpangita og ebidensya, dili makita sa archaeology o anthropology, bisan og makatabang kini sa uban. Dili kini makita pinaagi sa pagsiksik sa pulong o pag-analisar sa kasaysayan, bisan tingali og makapamatuod man kini. Ang ebidensya sa kamatuoran ug katinuod sa Basahon ni Mormon anaa sulod sa hapin niini nga basahon mismo. Ang pagtesting sa kamatuoran anaa sa pagbasa niini. Kini usa ka basahon bahin sa Dios. Ang may salabutan nga mga tawo mahimong mokwestyon sa tinubdan niini: apan kadtong nakabasa niini sa mainampuong paagi nasayud pinaagi sa gahum labaw pa kaysa ilang natural nga mga balatian nga kini tinuod, nga kini naglangkob sa pulong sa Dios, nga kini naglatid sa mga makaluwas nga mga kamatuoran sa walay katapusan nga ebanghelyo nga kini “[mitungha] pinaagi sa gahum sa Dios … sa pagpamatuod ngadto sa Judeo ug sa Hentil nga si Jesus mao ang Kristo.”¹⁰

Si [Moroni] misulat sa katapusan niyang tugon diha sa basahon nga nagdala sa iyang ngalan ug maoy katapusan sa rekord sa mga Nephite. Siya misulat isip tawo nga may piho nga kahibalo nga ang iyang rekord sa katapusan mahimong kahayag. …

Sa katapusang kapitulo sa kaugalingon niyang komposisyon mihatag siya sa iyang pagpamatuod mahitungod sa rekord sa iyang mga tawo ug piho nga misaad nga kinsa kadtong mobasa niini mahibalo pinaagi sa gahum sa Espiritu Santo sa pagkamatuod niini [tan-awa sa Moroni 10:3–5].

Walay laing basahon ang aduna niana nga saad. Kon wala pa dugangi ni Moroni ang iyang sulat, kini nga saad diha sa iyang panapos nga pagpamatuod maghimo unta nga siya ra sa hangtud ang batid nga saksi sa mahangturon nga kamatuoran. Apan, siya miingon nga, “pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:5).¹¹

Ang usa ka pagpamatuod sa Basahon ni Mormon mosangput sa kombiksyon ngadto sa ubang kamatuoran.

Matag higayon nga awhagon nato ang uban sa pagbasa sa Basahon ni Mormon, nakahatag kita nila og kaayohan. Kon ila kining basahon sa mainampuong paagi ug uban sa kinasingkasing nga tinguha nga masayud sa kamatuoran, masayud sila pinaagi sa gahum sa Espiritu Santo nga ang basahon tinuod.

Gikan niana nga kahibalo mobuhagay ang kombiksyon bahin sa kamatuoran sa daghan pang butang. Kay kon ang Basahon ni Mormon tinuod, nan buhi ang Dios. Daghang pagpamatuod ang anaa sa mga pahina niini mahitungod sa balaang kamatuoran nga ang atong Amahan tinuod gayud, nga personal siya, nga nahigugma siya sa iyang mga anak ug nagtinguha nga magmalipayon sila.

“Kon ang Basahon ni Mormon tinuod, nan si Jesus mao ang Anak sa Dios, ang Bugtong Anak sa Amahan dinhi sa unod, natawo kang Maria, “usa ka birhen, labing matahum … labaw sa tanan nga mga birhen” (tan-awa sa 1 Ne. 11:13–21), kay ang basahon nagpamatuod sa usa ka paghulagway nga dili hilabwan sa bisan unsang literatura.

Kon ang Basahon ni Mormon tinuod, nan si Jesus mao gayud ang atong Manunubos, ang Manluluwas sa kalibutan. …

Kon ang Basahon ni Mormon tinuod, si Joseph Smith usa ka Propeta sa Dios, kay siya mao ang instrumento diha sa kamot sa Ginoo sa pagpagawas niining pagpamatuod mahitungod sa pagkabalaan sa atong Ginoo.

Kon kini nga basahon tinuod, [ang Presidente sa Simbahan] usa ka propeta, kay gihuptan man niya ang tanang yawe, mga gasa, gahum, ug awtoridad nga gihuptan ni Propeta Joseph, kinsa midala niining buhat sa ulahing mga adlaw.

Kon tinuod ang Basahon ni Mormon, nan ang Simbahan tinuod, tungod sa samang awtoridad diin napagawas kining sagradong rekord ug napakita kanato karon. Usa kini ka pagpahiuli sa Simbahan nga gitakda sa Manluluwas didto sa Palestina. Usa kini ka pagpahiuli sa Simbahan nga gitakda sa Manluluwas sa dihang mibisita siya niini nga kontinente [Amerika] nga makita dinhi niining sagradong rekord.

Kon ang Basahon ni Mormon tinuod, nan ang Biblia tinuod. Ang Biblia mao ang Tugon [Testamento] sa Daang Kalibutan, ang Basahon ni Mormon mao ang Tugon [Testamento] sa Bag-o. Ang usa mao ang rekord sa Judah; ug ang lain mao ang rekord ni Jose, ug gihiusa kini sa kamot sa Ginoo sa pagtuman sa panagna ni Ezequiel. (Tan-awa sa Ezeq. 37:19.) Kining duha namahayag sa Pagkaharianon sa Manluluwas sa kalibutan ug sa reyalidad sa iyang gingharian.¹²

Ang Basahon ni Mormon nagtanyag og mga pagtulun-an nga makatabang nga makit-an nato ang mga solusyon sa mga problema sa katilingban karon.

Ang sugilanon nga naa sa [Ang Basahon ni Mormon] usa ka rekord bahin sa mga nasud dinhi sa kalibutan dugay na kaayong panahon. Apan sa mga paghulagway niini bahin sa mga problema sa katilingban karon, sama kini kabag-o sa buntagon nga pamantalaan ug dili kaduha-duhaan, dinasig, ug makadasig kalabut sa mga solusyon niadto nga mga problema.¹³

Giablihan nako ang mga pahina ug gibasa, ug ang pinulongan niini pareho nga matahum ug makabayaw. Ang karaang rekord nga gihubad migawas gikan sa yuta nga sama sa tingog nga namulong gikan sa abug. Miabut kini isip usa ka pagpamatuod sa mga henerasyon sa mga babaye ug mga lalaki kinsa nagpakabuhi dinhi sa kalibutan, nga nagsagubang og mga kalisdanan, kinsa nakig-away ug nakigsangka, kinsa sa daghang panahon nagsunod sa balaan nga balaod ug milambo ug sa ubang panahon mibiya sa Dios ug nangalaglag.¹⁴

Wala akoy nahibaloan nga ubang sinulat nga gihan-ay sa ingon nga kaklaro sa labihan kasubo nga mga sangputanan sa katilingban nga misupak sa mga sugo sa Dios. Ang mga pahina niini nagsubay sa mga istorya bahin sa duha ka managlahi nga sibilisasyon nga milambo didto sa Kasadpang bahin sa Kalibutan. Ang matag usa niini nagsugod nga usa ka gamayng nasud, ang mga katawhan niini naglakaw nga may kahadlok sa Ginoo. Ang matag usa miuswag, apan uban sa pag-uswag nag-anam usab og dagsang ang kadautan. Ang mga tawo nahaylo sa ambisyuso ug malipat-lipatong mga lider kinsa mipahamtang kanila og dagkong buhis, kinsa mipahilum kanila pinaagi sa mabaw nga mga saad, kinsa mitugot ug gani miawhag og dautan ug imoral nga pagpakabuhi, kinsa nangulo kanila sa labihan ka grabe nga gubat nga misangput sa pagkamatay sa minilyon ug sa hingpit nga pagkahanaw sa duha ka dako nga sibilisasyon sa duha ka managlahi nga kapanahunan.

Walay laing testamento ang tin-aw nga namahayag sa kamatuoran nga kon ang katawhan ug kanasuran maglakaw nga may kahadlok sa Dios ug sa kamasulundon sa iyang mga sugo, mouswag sila ug molambo, apan kon siya ug ang iyang pulong ilang ibaliwala, adunay dautan nga mahitabo diin, gawas lang kong mapugngan pinaagi sa pagkamatarung, mosangput sa pagkawala sa gahum ug ngadto sa kamatayon. Ang Basahon ni Mormon usa ka pagmatuod sa proverbio nga naa sa Daang Tugon, “Ang pagkamatarung nagabayaw sa usa ka nasud; Apan ang sala maoy usa ka kaulawan sa bisan unsang katawohan.” (Prov. 14:34.)¹⁵

Ang Basahon ni Mormon dunay gahum sa pag-usab sa atong kinabuhi ug sa atong panglantaw.

Niadtong Agosto 1830, isip usa ka lay preacher [pinili nga tigsangyaw], si Parley Parker Pratt nagbiyahe gikan sa Ohio ngadto sa eastern New York. Didto sa Newark, buyon sa Erie Canal, nanaog siya sa sakayan ug gilakaw ang napulo ka milyas [16 ka kilometros] ngadto sa nasud, diin iyang nahimamat ang usa ka deacon nga Baptist nga ginganlan og Hamlin, kinsa misulti kaniya mahitungod sa “usa ka basahon, usa ka LAHI NGA BASAHON, LABIHAN KA LAHI NGA BASAHON! … Kini nga basahon, miingon siya, nangangkon nga orihinal nga nakasulat sa mga palid nga bulawan o tumbaga [brass], sa sanga sa mga tribu sa Israel; ug nadiskubrihan ug gihubad sa batan-ong tawo duol sa Palmyra, sa Estado sa New York, pinaagi sa tabang sa mga panan-awon, o sa pagpangalagad sa mga anghel. Nangutana ko niya kon sa unsang paagi o diin nakuha ang basahon. Misaad siya nako mahimo nako kining makita og masuta, ngadto sa iyang balay sa sunod nga adlaw. … Pagkasunod nga buntag mibisita ko sa iyang balay, diin, sa unang higayon, nakita sa akong mga mata ang ‘BASAHON NI MORMON’—nga ang basahon nga maoy pinakaimportante sa tanang basahon … nga mao ang pinakaunang pamaagi, diha sa mga kamot sa Dios, sa pakigdumala sa kinatibuk-ang panaw sa kaugmaon sa akong kinabuhi.

Ang Basahon ni Mormon dunay dako kaayong epekto kang Parley P. Pratt, kinsa sa wala madugay nahimong usa ka Apostol.

“Naghinam-hinam ko nga miabli niini, ug gibasa ang ulohang pahina niini. Gibasa dayon nako ang pagpamatuod sa pipila ka saksi nga may kalabutan kon sa unsang paagi kini nakit-an ug nahubad. Human niini gisugdan nako kini pagbasa sa han-ay nga paagi. Nagbasa ko sa tibuok adlaw; langay na gani ang mokaon, wala na koy tinguha alang sa pagkaon; langay na gani ang pagkatulog dihang miabut na ang gabii, kay mas ganahan ko nga magbasa kay sa matulog.

“Samtang nagbasa ko, ang espiritu sa Ginoo diha kanako, ug ako nasayud ug nakasabut nga ang basahon tinuod, ingon kayano ug nagpakita nga sama sa pagkasabut ug pagkasayud sa usa ka tawo nga siya anaa.” (Autobiography of Parley P. Pratt, 3rd ed., Salt Lake City: Deseret Book Co., 1938, mp. 36–37.)

Si Parley Pratt nagpangidaron pa og baynte tres. Ang pagbasa sa Basahon ni Mormon nakaapekto kaayo kaniya nga sa wala madugay nabunyagan siya sa Simbahan ug nahimong usa sa pinakaepektibo ug impluwensyal nga tagasuporta. …

Ang kasinatian ni Parley Pratt sa Basahon ni Mormon dili lahi. Dihang ang mga unang edisyon sa basahon mikatap na ug gibasa, ginatus ka lig-ong mga lalaki ug mga babaye natandog kaayo nga gisakripisyo nila ang tanan nilang kabtangan, ug sa mga katuigang nagsunod, dili lamang diyutay ang mihatag sa ilang kinabuhi alang sa pagsaksi sa unsay anaa sa ilang kasingkasing nga kamatuoran mahitungod niining talagsaon nga basahon.

Karon … daghan na kaayo ang mibasa niini kay sa ubang panahon sa kasaysayan. … Ang panawagan niini susama sa kamatuoran nga para sa tanang kapanahunan, sama ka malukpanon sa katawhan.¹⁶

[Ang Basahon ni Mormon] mihatag og kaayohan sa kinabuhi sa minilyon kinsa mainampuong mibasa niini ug namalandong sa mga pulong niini. Sultihan ko kamo og usa niini. …

Usa siya ka negosyante, malampuson sa iyang gipangbuhat. Sa iyang mga pagbiyahe nakahimamat siya og duha ka misyonaryo. Gisulayan nila ang paghimo og appointment sa pagtudlo kaniya. Mibalibad siya, apan sa katapusan miuyon ra nga maminaw. Ingon og basta lang siya miuyon sa ilang gisulti. Nakumbinser ang iyang hunahuna nga nagsulti sila sa kamatuoran, apan wala matandog ang iyang kasingkasing.

Nakahukom siya nga iyang basahon ang Basahon ni Mormon. Miingon siya nga usa siya ka tawo nga lisud pahilakon. Apan dihang gibasa niya ang basahon, midagayday ang mga luha sa iyang aping. Duna kini nahimo ngadto kaniya. Gibasa niya pag-usab ug gibati ang sama nga pagbati. Ang kaniadto nga pagkakabig sa hunahuna nahimong pagkakabig sa kasingkasing.

Ang iyang pagpakabuhi nausab, ang iyang panglantaw nausab. Gisubsob niya ang iyang kaugalingon sa buluhaton sa Ginoo. Karon naghupot siya og taas ug balaan nga calling sa katuyoan nga nakat-unan niyang higugmaon.¹⁷

Suginlan ko kamo og [lain pang] sugilanon mahitungod sa Basahon ni Mormon. Nakadungog ko og usa ka tawo nagtrabaho sa banko nga misugilon niini nga istorya. Miingon siya nga manabako ang iyang secretary, walay hunong nga panabako. Adik siya sa pagpanabako. Dili niya kini maundang. Usa ka adlaw giingnan siya sa iyang secretary, “Unsaon nako nga maundang sa pagpanabako?”

Mikab-ot siya sa iyang lamesa ug mikuha og kopya sa Basahon ni Mormon ug gihatag kini ngadto sa iyang secretary. Miingon siya, “Karon, basaha kini.”

Miingon siya, “Sige, basahon nako.”

Human sa pipila ka adlaw mibalik ang secretary ug miingon, “Akong nabasa ang 200 ka pahina, ug wala koy nakita nga pulong nga pagpanabako bisan asa. Wala koy nakit-ang pulong nga tabako bisan asa. Wala sab koy nakit-an bisan unsa nga naghisgot niini.”

Miingon siya, “Sigiha lang og basa.”

Mao nga mibalik siya human na usab sa pipila ka adlaw ug miingon, “Akong nabasa ang 200 pa ka dugang nga pahina—walay nahisgutan nga pagpanabako, walay nahisgutan nga nicotine, walay nahisgutan nga bisan unsang may kalabutan sa tabako.”

Miingon siya, “Sigiha lang og basa.”

Mibalik siya mga tulo o upat ka adlaw. Miingon siya, “Akong nabasa ang tibuok nga basahon. Wala ko kakita og pulong nga tabako bisan asa; wala ko kakita og pagpanabako bisan asa. Apan,” miingon siya, “dunay misulod sa akong kasingkasing isip resulta sa pagbasa niana nga basahon nga pipila ka impluwensya, pipila ka gahum, nga mitangtang sa akong gana sa pagpanabako, ug talagsaon kini.”¹⁸

Suginlan ko kamo og usa ka sulat nga among nadawat. … Usa ka tawo misulat, nag-ingon nga, “Ania ako sa federal nga bilanggoan. Bag-o lang nakakita ko og kopya sa Basahon ni Mormon sa library sa prisohan. Gibasa nako kini, ug dihang gibasa nako ang pagbangutan ni Mormon tungod sa pagkamatay sa iyang mga katawhan—‘O kamo nga mga matahum, sa unsa nga paagi nga kamo mibiya gikan sa mga pamaagi sa Ginoo! O kamo nga mga matahum, sa unsa nga paagi nga kamo misalikway niana nga Jesus, kinsa mibarug uban sa bukas nga mga bukton sa pagdawat kaninyo! Tan-awa, kon kamo wala pa makahimo niini, kamo wala unta mapukan’ (Morm. 6:17–18)—akong gibati nga si Mormon nakig-istorya kanako. Pwede bang makaangkon ko og kopya niana nga basahon?”

Gipadad-an namo siya og kopya. Wala madugay kaniadto, miadto siya sa akong opisina nga usa ka tawo nga nausab. Natandog siya sa espiritu sa Basahon ni Mormon ug karon usa ka malampuson nga tawo, nausab, nanginabuhi nga matinuoron sa iyang kaugalingon ug sa iyang pamilya.

Ang ingon mao ang gahum niining talagsaong basahon sa kinabuhi niadtong mobasa niini sa mainampuong paagi.

Mga kaigsoonan, sa walay pagpanagana mosaad ko ninyo nga kon mainampuon kamong mobasa sa Basahon ni Mormon, sa walay pagtagad kon kapila na ninyo kini nabasa, moabut diha sa inyong kasingkasing ang dugang nga pagbati sa Espiritu sa Ginoo. Dunay moabut nga lig-ong paghukom nga maglakaw nga magmasulundon sa iyang mga sugo, ug moabut ang mas lig-on nga pagpamatuod sa buhi nga reyalidad sa Anak sa Dios.¹⁹

Mga Sugyot alang sa Pagtuon ug Pagtudlo

Mga Pangutana

Ngano nga nagkinahanglan man kita sa Basahon ni Mormon? Unsa ang ubang mga tudling sa Basahon ni Mormon nga nakalig-on sa inyong pagpamatuod kang Jesukristo? Unsa ang ubang ehemplo nga inyong nakita sa Basahon ni Mormon ug sa Biblia nga kini “nagtambayayong” sa pagpamatuod bahin sa Manluluwas? (Tan-awa sa seksyon 1.)
Ngano kaha nga ang saad diha sa Moroni 10:3–5 mas importante man kay sa pisikal nga ebidensya sa Basahon ni Mormon? (Tan-awa sa seksyon 2.) Unsa nga mga kasinatian ang inyong nasinati gumikan niini nga saad?
Sa inyong pagribyu sa seksyon 3, timan-i ang mga kamatuoran nga atong mahibaloan kon duna kitay pagpamatuod sa Basahon ni Mormon. Sa unsang paagi ang Basahon ni Mormon nagpamatuod niini nga mga kamatuoran?
Hunahunaa ang pipila ka mga “problema sa katilingban karon” (seksyon 4). Sa unsang mga paagi ang Basahon ni Mormon makatabang nato nga makakita og mga solusyon niana nga mga problema? Unsa ang pipila ka mga tudling diha sa Basahon ni Mormon nga nakatabang ninyo sa mga panahon sa personal nga mga hagit?
Pamalandunga ang mga istorya nga naa sa seksyon 5. Kon dunay mangutana ninyo mahitungod sa Basahon ni Mormon, unsay inyong ikasulti mahitungod sa impluwensya niini sa inyong kinabuhi?

May Kalabutan nga mga Kasulatan

Isaias 29:9–18; 1 Nephi 13:35–41; 2 Nephi 29:6–9; Moroni 10:27–29; D&P 20:8–12; 42:12–13

Tabang sa Pagtuon

“Mapasalamaton ako sa gihatag nga importansya sa pagbasa sa mga kasulatan. Manghinaut ako nga diha kaninyo kini mahimong mas makalingaw kay sa usa ka katungdanan; nga, hinoon, kini mahimong usa ka pagmahal uban sa pulong sa Dios. Mosaad ako kaninyo nga samtang kamo mobasa, ang inyong mga hunahuna malamdagan ug ang inyong mga espiritu mabayaw. Sa sinugdanan kini ingon og laay, apan kana mausab ngadto sa usa ka makapatingala nga kasinatian uban sa mga hunahuna ug mga pulong sa mga butang nga balaan” (Gordon B. Hinckley, “The Light within You,” Ensign, Mayo 1995, 99).