Kapitulo 13

Kalinaw ug Pagkatagbaw pinaagi sa Temporal nga Paninguha sa Kaugalingon

“Nagtudlo kita og pagpaninguha sa kaugalingon isip usa ka baruganan sa kinabuhi, nga kinahanglan kitang mosangkap sa atong mga kaugalingon ug moatiman sa atong kaugalingong mga panginahanglan.”

Gikan sa Kinabuhi ni Gordon B. Hinckley

Isip usa ka bata, si Gordon B. Hinckley nakat-on sa mga baruganan sa paninguha sa kaugalingon samtang nagtrabaho siya uban ang iyang mga ginikanan ug mga igsoon. Sa kaulahian siya mihinumdom:

“Nagpuyo kami sa usa ka dakong balay. … Adunay usa ka dakong balilihan, nga adunay daghang mga kahoy diin nangatagak ang minilyon ka mga dahon, ug usa ka dakong buluhaton kanunay.

“… Aduna kamiy usa ka lutoan sa kusina ug usa ka lutoan sa lawak-kan-anan. Sa wala madugay usa ka halingan ang gibutang, ug unsa ka talagsaon kadto nga butang. Apan kini kusog mokaon og uling, ug kaniadto walay himan nga tigdugang og uling ngadto sa kalayo. Ang uling kinahanglan palahon ngadto sa halingan ug mabinantayon nga hipuson matag gabii.

“Nakat-on ko og dako nga leksyon gikan nianang dako nga halingan: kon gusto nimong kanunay init, kinahanglan magtrabaho ka sa pala.

“Ang akong amahan nakahunahuna nga ang iyang mga anak nga lalaki kinahanglan makat-on sa pagtrabaho, sa ting-init man o sa tingtugnaw usab, ug sa ingon mipalit siya og lima ka tipik nga umahan [duol sa 20,000 ka metro kwadrado], diin sa katapusan mitubo nga nahimong labaw sa treynta ka tipik. Mipuyo kami didto sa ting-init ug mibalik sa dakbayan kon misugod na ang klase.

“Aduna kamiy halapad nga prutasan, ug ang mga kahoy gikinahanglang tupihan matag tingpamulak. Si Papa midala kanamo sa mga pasundayag sa pagtupi nga gihatag sa mga eksperto gikan sa kolehiyo sa agrikultura. Nakat-on kami og usa ka dako nga kamatuoran—nga makatino ka na sa matang sa prutas nga imong mapupu sa Septyembre pinaagi sa giunsa nimo pagtupi sa Pebrero.”¹

Uban niini nga mga kamatuoran isip kabahin sa iyang personal nga pundasyon, si Presidente Hinckley sa kasagaran mitudlo sa praktikal nga mga leksyon sa pagpakabuhi sa ebanghelyo. Mipamatuod siya sa mga panalangin nga moabut pinaagi sa kakugi, ug miawhag siya sa mga Santos sa Ulahing mga Adlaw nga magpuyo sigun sa ilang kinitaan ug mangandam sa ilang mga kaugalingon alang sa mga kalamidad nga mahimong moabut sa umaabot.

Agig dugang sa pagtudlo niini nga mga baruganan, si Presidente Hinckley mitabang sa paghatag og mga pamaagi nga pagasundon sa mga Santos. Sama pananglit, sa Abril 2001 iyang gipasiugdahan ang Makanunayong Pundo sa Edukasyon, nga sa iyang gisulti pagdasig gikan sa Ginoo.² Pinaagi niini nga programa, ang mga tawo maka-donar sa usa ka pundo nga makahatag og mubog-tagal nga pahulam aron makatabang sa takus nga mga miyembro sa Simbahan, kasagaran mga returned missionary, nga makadawat og edukasyon o pagbansay sa panginabuhi nga makadala ngadto sa makahuluganon nga trabaho. Sa dihang ang mga tawo mibayad niadto nga mga pahulam, kana nga kwarta malakip diha sa pundo aron sa pagtabang sa mga sumasalmot sa umaabot. Ang Makanunayong Pundo sa Edukasyon nakatabang na sa liboan ka mga tawo nga mahimong mapaningkamuton sa kaugalingon. Kini naghatag og, sama sa giingon ni Presidente Hinckley kausa, usa ka “kahayag nga naghatag og paglaum.”³

“Walay butang ubos sa kalangitan nga makapuli sa mabungahon nga trabaho. Mao kini ang proseso nga makapatinuod sa mga pangandoy.”

Mga Pagtulun-an ni Gordon B. Hinckley

Samtang kita nagtrabaho uban ang katarung, ang atong mga kinabuhi mapanalingan sa kahangturan.

Nagtuo ko sa ebanghelyo sa trabaho. Walay butang ubos sa kalangitan nga makapuli sa mabungahon nga trabaho. Mao kini ang proseso nga makapatinuod sa mga pangandoy. Mao kini ang proseso nga ang tinapolan nga mga panan-awon mahimong mabisog nga mga kalampusan.⁴

Ang gamay nga dula ug ang gamay nga lingawlingaw maayo. Apan ang trabaho mao ang makahatag og kalahian diha sa kinabuhi sa usa ka lalaki ug usa ka babaye. Ang trabaho mao ang makasangkap sa pagkaon nga atong gikaon, sa sinina nga atong gisuot, sa mga panimalay diin kita nagpuyo. Dili kita makalimud sa panginahanglan sa trabaho nga nagkinahanglan og hanas nga mga kamot ug edukado nga mga hunahuna kon kita gustong molambo ug mouswag sa tagsatagsa ug sa tiningub⁵

Nadiskobrehan nako nga ang kinabuhi dili usa ka han-ay sa bantugan ug maambong nga mga buhat. Ang labing maayo nga kinabuhi mao ang resulta sa makanunayon nga kamaayo ug kaligdong, nagbuhat nga walay pagdayeg nianang gikinahanglan buhaton kon kanus-a kini gikinahanglang buhaton. Naobserbahan nako nga dili ang mga henyo ang naghimo og kalahian sa kalibutan. Naobserbahan nako nga ang trabaho sa kalibutan kadaghanan nabuhat sa mga lalaki ug mga babaye nga ordinaryo ang talento nga mitrabaho sa talagsaon nga paagi.⁶

Ang mga bata kinahanglang magtrabaho uban sa ilang mga ginikanan—manghugas sa mga plato uban kanila, manglampaso sa salog uban kanila, manglampas sa balilihan, manupi sa mga kahoy ug mga anot, mamintal ug mangayo ug manglimpyo ug magbuhat sa gatosan pa nga laing mga butang diin sila makakat-on nga ang trabaho mao ang bili sa kalimpyo ug kauswagan ug kalampusan.⁷

“Ang mga bata kinahanglang magtrabaho uban ang ilang mga ginikanan. … Makakat-on sila nga ang trabaho mao ang bili sa kalimpyo ug kauswagan ug kalampusan.”

Ang dakong kaalam niini nga Simbahan mao ang pagtrabaho. Ang tanan nagtrabaho. Dili kamo mouswag gawas kon motrabaho kamo. Ang hugot nga pagtuo, pagpamatuod sa kamatuoran, sama lamang sa muscle sa akong bukton. Kon gamiton ninyo kini, motubo kini nga lig-on. Kon inyo kining butangan og bendahe, mahimo kining huyang ug luyat. Atong patrabahoon ang mga tawo. Naglaum kita og dagkong mga butang gikan kanila, ug ang katingalahan ug maanindot nga butang mao nga mabuhat nila ang ilang mga buluhaton. Makahimo gayud sila.⁸

Walay mahitabo niini nga Simbahan gawas kon kamo motrabaho. Sama kini sa usa ka karetilya. Dili kini mosibog hangtud nga inyong gunitan ang duha ka kuptanan ug motulod. Ang kakugi nagpauswag sa buhat sa Ginoo, ug kon nakat-on kamo nga motrabaho uban ang tinud-anay nga kaligdong kini mopanalangin sa inyong mga kinabuhi sa kahangturan. Labing sinsero akong nagpasabut niana. Kini mopanalangin sa inyong mga kinabuhi sa kahangturan.⁹

Aduna kitay responsibilidad nga motabang sa uban sa pagbayaw sa ilang kaugalingon ug mahimong mapaningkamuton sa kaugalingon.

Adunay karaan nga panultihon nga kon imong hatagan ang usa ka tawo og isda, aduna siyay pagkaon sa usa ka adlaw. Apan kon imo siyang tudluan kon unsaon pagpangisda, siya makakaon sa tibuok niyang kinabuhi. …

Unta ang Ginoo motugyan kanato og panan-awon ug pagsabut nga mobuhat niadtong mga butang nga motabang sa atong mga miyembro dili lamang sa espirituhanon apan usab sa temporal. Aduna kitay seryuso kaayo nga obligasyon. Si Presidente Joseph F. Smith miingon … nga ang usa ka relihiyon nga dili motabang sa usa ka tawo niini nga kinabuhi lagmit walay daghang mabuhat alang kaniya sa kinabuhi nga moabut (tan-awa sa “The Truth about Mormonism,” Out West magasin, Sept. 1905, 242).

Tungod kay hilabihan ka daghang kabus sa atong mga katawhan, kinahanglang himoon nato ang tanan kutob sa mahimo sa pagtabang nga mouswag ang ilang kaugalingon, nga maestablisar ang ilang kinabuhi diha sa usa ka pundasyon sa paninguha sa kaugalingon nga moabut pinaagi sa pagbansay. Ang edukasyon mao ang yawe sa oportunidad. …

Ato ang maligdong nga obligasyon …sa pag-“tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang” (D&P 81:5). Kinahanglan kitang motabang kanila nga mahimong mapaningkamuton sa kaugalingon ug malampuson.

Nagtuo ko nga dili maoy pangandoy sa Ginoo nga makita ang Iyang mga katawhan nga mag-antus sa pagpakabuhi nga kabus. Nagtuo ko nga gusto Siya nga ang mga matinud-anon makatagamtam sa maayong mga butang sa kalibutan. Buot Niyang buhaton nato kining mga butanga aron sa pagtabang kanila.¹⁰

Ang indibidwal, samtang kita nagtudlo, kinahanglang mobuhat alang sa iyang kaugalingon sa tanan niyang mahimo. Sa dihang mahurot na ang iyang mga kapanguhaan, kinahanglan siyang modangup ngadto sa iyang pamilya aron motabang kaniya. Kon ang pamilya dili makahimo niini, ang Simbahan motabang. Ug kon ang Simbahan motabang, ang atong dakong tinguha mao ang pag-alima og una sa iyang dihadiha nga mga panginahanglan ug dayon sa pagtabang kaniya samtang siya nagkinahanglan og tabang, apan diha niana nga proseso magtabang kaniya sa pagbansay, sa pagpangita og trabaho, sa pagpangita og paagi nga makasuporta sa iyang kaugalingon pag-usab. Mao kana ang tibuok nga katuyoan sa dungganan nga welfare nga programa [sa Simbahan].¹¹

Kadtong kinsa gitabangan niini nga programa naluwas gikan “sa tunglo sa pagkatapulan ug sa pagkadautan sa pagsalig sa tabang.” Ang dignidad ug pagtahud sa kaugalingon nabuhi. Ug kadtong dili maihap nga mga lalaki ug mga babaye kinsa dili direkta nga gitabangan, apan kinsa miapil sa pagpananom ug pagproseso sa pagkaon ug sa daghan pang uban nga mga trabaho, nagpamatuod sa kalipay nga makita diha sa dili hinakog nga pagserbisyo ngadto sa uban.

Walay usa nga nagsaksi niini nga programa diha sa kadako sa iyang mga implikasyon ug sa hilabihan nga mga sangputanan ang makahimo og makatarunganong pagduha-duha sa espiritu sa pagpadayag nga maoy nakapamugna ug nakapalapad sa iyang mapuslanon nga gahum alang sa kaayohan.¹²

Magpadayon gayud kita niini nga buhat. Aduna gayuy panginahanglan. Ang kagutom ug ang panginahanglan ug ang mga katalagman mouban gayud kanato. Ug anaa gayud kanang kansang kasingkasing gihikap sa kahayag sa ebanghelyo kinsa andam nga moserbisyo ug motrabaho ug mobayaw sa mga nagkinahanglan sa kalibutan.

Isip susama nga paningkamot atong gitukod ang Makanunayong Pundo sa Edukasyon. Nahimo kini pinaagi sa inyong mahinatagon nga mga kontribusyon. … Mga loan gipahulam ngadto sa takus nga batan-ong kalalakin-an ug kababayen-an para makaeskwela. Kay kon dili, masulod sila sa laang sa nag-urong nga kakabus nga nadak-an sa ilang mga ginikanan ug mga katigulangan sulod na sa henerasyon. …

Ang Espiritu sa Ginoo naggiya niini nga buhat. Kining maong kalihokan sa welfare dili relihiyoso nga kalihokan, masukod kini kon unsa kadaghana sa bugas ug lugas, sa mga habol ug mga tulda, sa mga sinina ug medisina, sa panarbaho ug edukasyon aron makakita og maayong trabaho. Pero kini gitawag og dili relihiyoso nga buhat usa lamang ka makita nga pagpadayag sa espiritu sa sulod—ang Espiritu sa Ginoo kang kinsa gikaingon, Siya “miadto sa tanang dapit naghimog mga maayong butang” (Mga Buhat 10:38).¹³

Ang mga propeta miawhag kanato nga mangandam sa atong mga kaugalingon sa espirituhanon ug sa temporal nga paagi alang sa mga katalagman nga moabut.

Nagtudlo kita og pagpaninguha sa kaugalingon isip usa ka baruganan sa kinabuhi, nga kinahanglan kitang mosangkap sa atong mga kaugalingon ug moatiman sa atong kaugalingong mga panginahanglan. Ug sa ingon kita moawhag sa atong mga katawhan nga kinahanglan adunay usa ka butang, nga magplano, magtipig … og pagkaon, nga magtigum, kon mahimo, batok sa panahon sa panginahanglan. Ang mga katalagman usahay moabut sa mga tawo sa panahon nga wala nila damha—pagkawalay trabaho, balatian, mga butang niana nga matang.¹⁴

Kining karaang kalibutan nakasinati na og daghang mga kalamidad ug mga katalagman. Kanato kinsa nagbasa ug nagtuo sa kasulatan nahibalo sa mga pasidaan sa mga propeta kalabut sa mga katalagman nga nahitabo ug mahitabo pa. …

Pagkamahinungdanon sa mga pulong sa pinadayag nga makita diha sa ika-88 nga Seksyon sa Doktrina ug mga Pakigsaad kalabut sa mga kalamidad nga mahitabo human sa mga pagpamatuod sa mga elder. Ang Ginoo miingon:

“Kay human sa inyong pagpamatuod moabut ang pagpamatuod sa mga linog, nga makahimo og mga pag-agulo diha sa taliwala kaniya, ug ang mga tawo matumba diha sa yuta ug dili makahimo sa pagbarug.

“Ug usab moabut ang pagpamatuod sa tingog sa mga dugdog, ug ang tingog sa mga kilat, ug ang tingog sa mga bagyo, ug ang tingog sa mga balud sa dagat nga mobanlas sa ilang mga kaugalingon lapas sa ilang naandan nga gilay-on.

“Ug ang tanan nga mga butang magkaguliyang; ug sa pagkatinuod, ang mga kasingkasing sa mga tawo mopakyas kanila; kay ang kahadlok moabut diha sa tanan nga mga katawhan” (D&P 88:89–91). …

… Sama nga adunay mga kalamidad kaniadto, daghan pa kita og paabuton sa umaabot. Unsa may atong buhaton?

May tawo nga miingon nga wala kadto mag-ulan sa dihang gihimo ni Noe ang arka. Pero iya kining gihimo, ug ang ulan miabut.

Ang Ginoo miingon, “Kon kamo andam, dili kamo mahadlok” (D&P 38:30).

Ang unang pagpangandam gipahimutang usab diha sa Doktrina ug mga Pakigsaad, diin miingon kini, “Busa, barug kamo sa balaan nga mga dapit, ug ayaw pagbalhin, hangtud ang adlaw sa Ginoo moabut” (D&P 87:8). …

Magpakabuhi kita sa paagi nga kita makatawag sa Ginoo alang sa Iyang proteksyon ug giya. Mao kini ang unang prayoridad. Dili kita makapaabut sa Iyang tabang kon dili kita andam nga mosunod sa Iyang mga sugo. Kita nga ania niini nga Simbahan adunay igong ebidensya kabahin sa mga silot sa pagkadili masulundon diha sa mga ehemplo sa mga nasud nga Jaredite ug Nephite. Ang kada usa naggikan sa himaya ngadto sa hingpit nga pagkalaglag tungod sa pagkadautan.

Siyempre, nahibalo kita, nga ang ulan mobundak ibabaw sa mga maayo maingon man usab sa mga dautan (tan-awa sa Mateo 5:45). Pero bisan pa man kon ang mga maayo mamatay wala sila malaglag, apan maluwas pinaagi sa pag-ula sa Manunubos. Misulat si Pablo ngadto sa mga taga-Roma, “Kon kita nabuhi, nabuhi kita alang sa Ginoo; ug kon kita mamatay, mamatay kita alang sa Ginoo” (Mga Taga-Roma 14:8). …

Ang atong katawhan … gisigehan na og tambag ug giawhag nga mohimo sa maong pagpangandam kanang mosiguro nga makalahutay sa higayon nga moabut ang katalagman.

Makapundo kita og tubig, nag-unang mga pagkaon, tambal, ug sinina nga atong masul-ob. Kinahanglan kitang adunay gamayng kwarta nga igahin sa panahon sa panginahanglan.¹⁵

Aduna kitay dakung programa sa welfare uban sa pasilidad alang sa ingon nga mga butang sama sa pagpundo og mga bugas sa nagkalain-laing mga dapit. Importante nga ato kining buhaton. Apan ang pinakamaayo nga dapit nga magtipig og pagkaon mao ang sulod sa atong mga panimalay, hasta ang pagtigom og dyutay nga kwarta. Ang pinaka maayo nga programa sa welfare mao ang atong kaugalingong programa sa welfare. Ang lima o unom ka mga lata nga trigo mas maayo pa kay sa usa ka gantang sa galingan sa welfare. …

Makasugod kita bisan ginagmay. Mahimo kitang mosugod og usa ka semana nga tagana sa pagkaon ug sa hinay-hinay padak-on kini ngadto sa usa ka bulan, ug unya ngadto sa tulo ka bulan. Ang akong ipasabot mao ang pagkaon nga motubag sa nag-una nga mga kinahanglanon. Ingon nga inyong nailhan, kini nga tambag dili bag-o. Apan nahadlok ako nga daghan ang mibati nga ang usa ka dinugay nga suplay sa pagkaon dili makab-ot nga dili na lang sila maningkamot.

Sugod sa ginagmay … ug sa hinay-hinay padak-a ngadto sa makatarunganon nga tumong. Pagtigom og dyutay nga kwarta kanunay, ug matingala nalang kamo unsa na kini ka dako.¹⁶

Makatagamtam kita og kagawasan samtang kita maglikay sa utang ug maggahin og kwarta alang sa mga panahon sa panginahanglan.

Sa makadaghan na kita gitambagan mahitungod sa paninguha sa kaugalingon, mahitungod sa utang, mahitungod sa pagdaginot. Daghan kaayo sa atong mga katawhan ang anaa diha sa bug-at nga mga utang alang sa mga butang nga dili kaayo kinahanglan. … Nag-aghat ko kaninyo isip mga miyembro sa Simbahan nga molingkawas sa utang taman sa mahimo ug nga adunay gamayng tinigum alang sa mga panahon nga kinahanglanon nato kini.¹⁷

Panahon na nga han-ayon nato ang atong panimalay. …

Si Presidente J. Reuben Clark Jr., diha sa priesthood miting sa komperensya niadtong 1938, [miingon]: “Kon nakautang na, ang tubo maoy inyong kompanyon matag minuto sa adlaw ug gabii; dili kamo makabaliwala niini o makalikay gikan niini; dili ninyo kini mapalayo; dili kini madala sa mga hangyo, mga mando, ni mga sugo; ug kon kamo mosupak niini o mapakyas sa pagtuman sa mga mando niini, molaglag kini kaninyo” (sa Conference Report, Abr. 1938, 103).

Akong namatikdan nga mahimong kinahanglanon nga mangutang aron makatukod og balay, siyempre. Apan mopalit kita og balay nga kita makabayad ra ug sa ingon gaan ang pagbayad nga kanunay natong gihunahuna nga walay kaluoy o kapahulayan. …

Sukad sa mga sinugdanan sa Simbahan, ang Ginoo naghisgot na niining utang. Ngadto kang Martin Harris pinaagi sa pagpadayag Siya miingon: “Bayad sa utang nga imong gikauyunan uban sa tig-imprinta. Hatagi og kagawasan ang imong kaugalingon gikan sa pagkaulipon” (D&P 19:35).

Si Presidente Heber J. Grant misulti sa makadaghan mahitungod niini nga butang. …Siya miingon: “Kon aduna may usa ka butang nga makadala og kalinaw ug katagbawan ngadto sa kasingkasing sa tawo, ug ngadto sa pamilya, kini mao ang pagpuyo sigun sa atong kinitaan. Ug kon aduna may usa ka butang nga makapabug-at ug makawala og paglaum ug makapasakit, kini mao ang pagbaton og mga utang ug mga obligasyon nga ang usa dili makabayad” (Gospel Standards, comp. G. Homer Durham [1941], 111).

Nagdala kita og usa ka mensahe sa paninguha sa kaugalingon sa tibuok Simbahan. Ang paninguha sa kaugalingon dili magmalampuson kon adunay utang ang usa ka panimalay. Ang usa walay kagawasan gikan sa pagkaulipon kon aduna siyay obligasyon ngadto sa uban.

Sa pagdumala sa mga kalihokan sa Simbahan, misulay kita sa pagtakda og usa ka panig-ingnan. Kita, sumala sa lagda, estriktong misunod sa nabatasan nga magtigum matag tuig og usa ka bahin sa kita sa Simbahan nga mangandam sa usa ka posible nga panahon sa panginahanglan.

Malipayon akong makasulti nga ang Simbahan sa tanang mga palakaw niini, sa tanang mga buluhaton niini, sa tanang mga departamento niini, makahimong molihok nga walay hinulaman nga kwarta. Kon dili kita makapadayon sa atong buhat, atong minusan ang atong mga programa. Atong pagamyan ang atong mga gasto aron mapaigo ang kita. Dili kita manghulam. …

Talagsaon kaayo ang pamati nga gawasnon sa utang, nga adunay tinigum nga kwarta kon pananglit adunay kalit nga panghitabo ug nga nahimutang kini diin mahimong kuhaon kon gikinahanglan. …

Nag-awhag ko kaninyo … nga tan-awon ang kahimtang sa inyong mga panalapi. Nag-awhag ko kaninyo sa paghinay-hinay sa inyong mga galastuhan, disiplinaha ang inyong mga kaugalingon sa inyong mga pagpamalit aron makalikay sa utang. Bayari ang utang sa labing daling panahon, ug himoa ang inyong mga kaugalingon nga gawasnon gikan sa pagkaulipon.

Kabahin kini sa temporal nga ebanghelyo nga atong gituohan. Unta ang Ginoo mopanalangin kaninyo … nga han-ayon ang inyong mga panimalay. Kon nabayaran na ninyo ang inyong mga utang, kon aduna kamoy kwarta nga natigum, bisan og gamay lamang kini, dayon kon ang mga unos moulbo sa inyong palibut, aduna kamoy kasilongan alang sa inyong [pamilya] ug kalinaw sa inyong mga kasingkasing.¹⁸

Mga Sugyot alang sa Pagtuon ug Pagtudlo

Mga Pangutana

Si Presidente Hinckley mitudlo nga “walay makapuli … sa mabungahon nga trabaho” (seksyon 1). Sa unsang paagi nga ang trabaho nahimong panalangin sa inyong kinabuhi? Unsa ang inyong nakat-unan mahitungod sa makugihon nga pagtrabaho? Sa unsang paagi nga ang mga ginikanan makatabang sa ilang mga anak nga makat-on og panrabaho?
Unsa ang atong mga responsibilidad ngadto niadtong adunay mga temporal nga mga panginahanglan? (Tan-awa sa seksyon 2.) Sa unsang paagi kita makatabang sa uban nga mahimong mapaningkamuton sa kaugalingon? Sa unsang paagi ang inyong mga kinabuhi naimpluwensiyahan pinaagi sa pagserbisyo nga inyong nahatag ug nadawat?
Ribyuha ang mga pagpangandam nga gitambag ni Presidente Hinckley kanato nga atong himuon alang sa mga panahon sa panginahanglan (tan-awa sa seksyon 3). Kanus-a ninyo nakita-an ang importansya sa pagpangandam alang sa mga panahon sa panginahanglan? Unsa ang pipila ka gagmay, inanay nga mga butang nga mahimo natong buhaton aron sa pagpangandam sa atong mga kaugalingon?
Ribyuha ang tambag ni Presidente Hinckley mahitungod sa utang ug pagdaginot (tan-awa sa seksyon 4). Nganong importante man nga limitahan ang atong paggasto sa kwarta? Sa unsang paagi ang utang makaapekto kanato sa temporal ug espirituhanon nga paagi? Sa unsang paagi ang mga ginikanan makatudlo sa ilang mga anak sa paggamit sa kwarta sa minaalam nga paagi?

May Kalabutan nga mga Kasulatan

1 Mga Taga-Tesalonica 4:11–12; D&P 1:11–13; 78:13–14; 104:13–18; Moises 5:1

Tabang sa Pagtudlo

“Pagbantay nga dili tapuson dayon ang maayong mga panaghisgutan aron lang mahuman ang tanang mga materyal nga imong giandam. Bisan og importante ang paghuman sa materyal, mas importante ang pagtabang sa mga estudyante nga mobati sa impluwensya sa Espiritu, mosulbad sa ilang mga pangutana, mopadugang sa ilang pagsabut sa ebanghelyo, ug mopalig-on sa ilang pasalig sa pagsunod sa mga kasugoan” (Pagtudlo, Walay Labaw ka Mahinungdanon nga Tawag [1999], 64)