Kapitulo 14

Pagkalimot sa Atong mga Kaugalingon diha sa Pagserbisyo sa Uban

“Hinaut nga ang tinuod nga kahulugan sa ebanghelyo motuhop sa atong mga kasingkasing nga kita makaamgo nga ang atong mga kinabuhi, nga gihatag kanato sa Dios atong Amahan, gamiton sa pagserbisyo sa uban.”

Gikan sa Kinabuhi ni Gordon B. Hinckley

Ang batan-on nga si Elder Gordon B. Hinckley naglisud sa iyang unang mga semana isip usa ka full-time nga misyonaryo sa England. Duna siyay sakit sa iyang pag-abut, ug ang iyang mga paningkamot sa pagsangyaw sa ebanghelyo pabalik-balik nga gibalibaran. Nianang lisud nga panahon, napanalanginan siya sa unsay iyang gitawag sa wala madugay nga iyang “adlaw sa pagdesisyon”—usa ka kasinatian nga miimpluwensya sa iyang pagserbisyo sa tibuok niyang kinabuhi.

“Nawad-an ko sa kadasig,” siya mihinumdom. “Gisulatan nako ang akong buotang amahan ug giingnan nga morag nag-usik-usik lang ko sa akong panahon ug sa iyang kwarta. Siya ang akong amahan ug akong stake president, ug siya usa ka maalamon ug dinasig nga tawo. Mipadala siya kanako og mubo kaayo nga sulat nga nag-ingon, ‘Minahal nga Gordon, nadawat nako ang imong sulat. Usa ra ang akong sugyot: kalimti ang imong kaugalingon ug pagtrabaho.’ Sayo nianang buntaga sa among klase sa kasulatan ang akong kompanyon ug ako nakabasa niini nga mga pulong sa Ginoo: “Bisan kinsa nga buot magapatunhay sa iyang kinabuhi mawagtangan hinoon siya niini; apan bisan kinsa nga magawagtang sa iyang kinabuhi tungod kanako ug tungod sa Maayong Balita, magapatunhay niini.” (Marcos 8:35.)

“Kadto nga mga pulong sa Agalon, gisundan sa sulat sa akong amahan nga nagtambag sa paglimot sa akong kaugalingon ug sa pagtrabaho, mituhop sa akong kalag. Dala ang sulat sa akong amahan, misulod ko sa among kwarto sa balay diha sa 15 Wadham Road, diin kami nagpuyo, ug miluhod ug mihimo og pakigsaad sa Ginoo. Ako mipakigsaad nga akong kalimtan ang akong kaugalingon ug isubsob ang akong kaugalingon diha sa Iyang serbisyo.

“Kadto nga adlaw sa Hulyo 1933 mao ang akong adlaw sa pagdesisyon. Usa ka bag-ong kahayag ang miabut sa akong kinabuhi ug bag-ong kalipay diha sa akong kasingkasing.”¹

Kana nga kahayag wala gayud mobiya sa kinabuhi ni Gordon B. Hinckley. Gikan nianang adlawa, iyang gipahinungod ang iyang kaugalingon ngadto sa Ginoo sa pagserbisyo sa uban. Atol sa haya ni Presidente Hinckley, si Presidente Henry B. Eyring milista og pipila sa mga kontribusyon ni Presidente Hinckley: pagtukod sa mga templo sa tibuok kalibutan, pag-establisar og gagmay nga mga templo aron mapadali ang buhat sa templo, pag-establisar sa Perpetual Education Fund, ug pagtukod sa Conference Center. Dayon miingon siya:

“Ang iyang personal nga kabilin molapas sa akong listahan ug sa akong gahum sa paghulagway. Apan ang iyang mga kalampusan adunay labing minos usa ka butang nga pareha. Sa kanunay kini naghatag sa mga indibidwal og kahigayunan. Ug kanunay siyang maghunahuna niadtong gamay ra og kahigayunan, sa ordinaryong tawo nga nakigbisog sa kalisud sa matag adlaw nga pagpuyo ug sa mga hagit sa pagsunod sa ebanghelyo ni Jesukristo. Sobra sa kausa iyang gipikpik ang iyang tudlo sa akong dughan sa dihang duna koy gihimo nga sugyot ug miingon, ‘Hal, nakahinumdom ka ba sa tawo nga nanlimbasug?’”²

“Gusto nakong maglihok ug dunay buhaton,” miingon si Presidente Hinckley. “Gusto nakong atubangon ang matag adlaw uban sa determinasyon ug katuyoan. Gusto nakong gamiton ang matag oras sa paghatag og pagdasig, sa pagpanalangin niadtong kansang mga palas-anon bug-at, sa pag-ugmad og hugot nga pagtuo ug kalig-on sa pagpamatuod.”³

“Kon kita mangangkon nga nagsimba ug nagsunod sa Agalon, dili ba kita maningkamot nga mosunod sa iyang kinabuhi sa pagserbisyo?”

Mga Pagtulun-an ni Gordon B. Hinckley

Ang atong mga kinabuhi mga gasa gikan sa Dios ug kinahanglang gamiton sa pagserbisyo sa uban.

Adunay … grabeng kakabus ug kawad-on sa tibuok kalibutan, daghan kaayong pagpangsupak ug kabangis, daghan kaayong imoralidad ug kabastos, daghan kaayong nagkabulag nga mga panimalay ug naguba nga mga pamilya, daghan kaayong magul-anong mga tawo nga nagpuyo og subo nga mga kinabuhi nga walay paglaum, daghan kaayong kasagmuyo bisan asa.

Ug busa mohangyo ako kaninyo. Mohangyo ko ninyo nga sa tanan ninyong paningkamot nga makaangkon og kalibutanong bahandi aduna usab kamoy buhaton nga mahimong mas maayo og gamay ang kalibutan.⁴

Aron mapalambo ang kalibutan, ang proseso sa gugma kinahanglang mohimo og kausaban sa mga kasingkasing sa katawhan. Mahimo kini kon molantaw kita lapas sa kaugalingon aron sa paghatag sa atong gugma ngadto sa Dios ug sa uban, ug mohimo niini sa tibuok natong kasingkasing, tibuok natong kalag, ug sa tibuok natong hunahuna.

Ang Ginoo mideklarar sa modernong pinadayag, “Kon ang inyong katuyoan usa ngadto sa akong himaya, ang inyong tibuok kalawasan mapuno sa kahayag, ug walay kangitngit diha kaninyo.” (D&P 88:67.)

Samtang motan-aw kita sa Dios uban sa gugma ug pasalamat, samtang moserbisyo kita kaniya uban sa katuyoan nga bug-os ngadto sa iyang himaya, mawala gikan kanato ang kangitngit sa sala, ang kangitngit sa kahakog, ang kangitngit sa garbo. Moabut ang dugang gugma alang sa atong Mahangturong Amahan ug alang sa iyang Hinigugmang Anak, ang atong Manluluwas ug atong Manunubos. Moabut ang mas dakong pagbati sa pagserbisyo sa atong isigkatawo, mominos ang paghunahuna sa kaugalingon ug mas motabang sa uban.

Kini nga baruganan sa gugma maoy kinauyukan sa ebanghelyo ni Jesukristo.⁵

Kon kita mangangkon nga nagsimba ug nagsunod sa Agalon, dili ba kita maningkamot nga mosunod sa iyang kinabuhi sa pagserbisyo? Walay usa kanato nga saktong makaingon nga ang iyang kinabuhi iyang kaugalingon. Ang atong mga kinabuhi mga gasa sa Dios. Mianhi kita sa kalibutan dili sa atong kaugalingong kabubut-on. Mobiya kita dili sumala sa atong gusto. Ang atong mga adlaw gitagalan dili pinaagi sa atong kaugalingon, apan sumala sa kabubut-on sa Dios.

Daghan kaayo kanato naggamit sa atong mga kinabuhi nga daw hingpit kini nga atoa. Makapili kita nga usikan kini kon gustohon nato. Apan mahimo kana nga usa ka pagluib sa usa ka dako ug sagrado nga pagsalig. Sama sa giklaro og maayo sa Agalon, “Kay bisan kinsa nga buot magapatunhay sa iyang kinabuhi mawagtangan hinoon siya niini; apan bisan kinsa nga magawagtang sa iyang kinabuhi tungod kanako ug tungod sa maayong balita, magapatunhay niini.” (Marcos 8:35.)⁶

Akong minahal nga mga kaigsoonan, ang hagit dako. Ang mga oportunidad naglibut kanato. Gusto sa Dios nga buhaton nato ang Iyang buhat—ug buhaton kini uban sa kadasig ug kamaya. Kana nga buhat, sama sa Iyang pagpasabut niini, mao ang “[pag]tabang sa maluyahon, [pag]pataas sa mga kamot sa nawad-an og paglaum, ug [paglig-on sa] mga tuhod nga mahuyang.” (D&P 81:5.)

Kini mao ang pagpangalagad niadtong nanginahanglan. Kini mao ang paghupay sa nagbangutan. Kini mao ang pagduaw sa mga biyuda ug mga ilo diha sa ilang mga kasakit. Kini mao ang pagpakaon sa mga kabus, pagsinina sa mga hubo, paghatag og kapasilungan niadtong walay atop ibabaw kanila. Kini mao ang pagbuhat sama sa gibuhat sa Agalon, kinsa “nagpangadto-ngadto sa paghimog mga kaayohan.” (Mga Buhat 10:38.)⁷

Ang akong mensahe kaninyo karong adlawa … mao nga kamo modeterminar sa pagpahinungod og usa ka bahin sa inyong panahon, samtang inyong planuhon ang buhat sa inyong kinabuhi, alang niadtong anaa sa kasakit ug panginahanglan, nga dili maghunahuna og ganti. Ang inyong mga kahanas gikinahanglan, bisan unsa pa man kini. Ang inyong matinabangong mga kamot moalsa sa tawo gikan sa lapok sa kasakit. Ang inyong makanunayong tingog mohatag og pagdasig sa pipila nga tingali gusto na lang nga moundang. Ang inyong mga kahanas makausab og mga kinabuhi, sa usa ka talagsaon ug maanindot nga paagi, niadtong adunay mga panginahanglan. Kon dili karon, kanus-a man? Kon dili kamo, kinsa man?⁸

Hinaut nga ang tinuod nga kahulugan sa ebanghelyo motuhop sa atong mga kasingkasing nga kita makaamgo nga ang atong mga kinabuhi, nga gihatag kanato sa Dios atong Amahan, gamiton sa pagserbisyo sa uban.

Kon kita mohatag sa ingon nga pagserbisyo, ang atong mga adlaw mapuno sa hingpit nga kalipay ug kamaya. Mas importante, kini ipahinungod ngadto sa atong Ginoo ug Manluluwas, si Jesukristo, ug sa pagpanalangin sa tanan kansang mga kinabuhi atong natandog.⁹

Ang pagserbisyo mao ang labing maayo nga tambal alang sa kalooy sa kaugalingon, kahakog, kawalay paglaum, ug kaguol.

Nakahinumdom ko nga mibisita og usa ka campus sa kolehiyo diin akong nadungog ang naandan, kasagarang reklamo sa mga kabatan-onan: reklamo kabahin sa mga kabudlay sa eskwelahan—nga daw kini usa ka palas-anon imbis nga usa ka oportunidad sa pag-ambit sa kasayuran sa yuta—mga reklamo kabahin sa pinuy-anan ug kabahin sa pagkaon. …

Akong gitambagan kadto nga mga kabatan-onan nga kon ang mga kabudlay sa eskwelahan grabe ra kaayo, kon sila mibati nga magreklamo kabahin sa ilang mga pinuy-anan ug ilang mga pagkaon, niana makasugyot ko og tambal alang sa ilang mga problema. Misugyot ko nga ipadaplin nila ang ilang mga libro sulod sa pipila ka oras, mobiya sa ilang mga kwarto, ug mobisita sa usa ka tawo nga tigulang ug nag-inusara, o usa ka tawo nga masakiton ug nawad-an sa kadasig. Sa kinatibuk-an, akong nakita nga kon magreklamo kita kabahin sa kinabuhi, kini tungod kay naghunahuna lamang kita sa atong mga kaugalingon.

Sulod sa daghang katuigan adunay karatula sa bongbong sa shop nga ayuhanan og sapatos nga akong suki. Kini ang mabasa, “Nagreklamo ko tungod kay wala koy sapatos hangtud nga nakakita ko og tawo nga walay tiil.” Ang labing epektibo nga medisina sa sakit sa kalooy sa kaugalingon mao ang pagkalimot sa atong mga kaugalingon diha sa pagserbisyo sa uban.¹⁰

Ako nagtuo nga alang sa kadaghanan kanato ang labing maayong medisina sa kamingaw mao ang pagtrabaho ug pagserbisyo alang sa uban. Wala nako gipakagamay ang inyong mga problema, apan dili ako magduhaduha sa pagsulti nga adunay daghan kansang mga problema mas grabe pa kay sa inyoha. Paningkamot sa pagserbisyo kanila, sa pagtabang kanila, sa pag-awhag kanila. Adunay daghan kaayong mga batang lalaki ug babaye nga nahagbong sa eskwela tungod kay kulang sila sa personal nga pagtagad ug pag-awhag. Adunay daghan kaayong mga tigulang nga nagpuyo diha sa kaguol ug kamingaw ug kahadlok diin ang yano nga panag-istorya makahatag og gamay nga paglaum ug kadasig. …

Adunay daghan kaayo nga nasakitan ug kinsa nagkinahanglan og usa ka maayo nga Samarianhon nga mobugkos sa ilang mga samad ug motabang kanila sa ilang pagpadayon. Ang usa ka gamay nga buhat sa kamabination makahatag og dako nga panalangin sa tawo nga anaa sa kasakit ug usa ka tam-is nga pagbati ngadto sa tawo nga nakighigala kaniya.¹¹

Adunay daghan kaayo kansang mga palas-anon inyong maalsa. Anaa ang mga walay kapuy-an, anaa ang mga gigutom, anaa ang mga kabus libut kanato. Anaa ang mga tigulang nga nag-inusara diha sa mga rest home [balay sa mga tigulang ug may pisikal nga kakulangan]. Anaa ang mga bata nga may pisikal nga kakulangan, ug mga kabatan-onan nga adik sa drugas, ug ang mga masakiton ug mga napundo sa balay kinsa nanginahanglan og mabinationg pulong. Kon dili kamo ang mobuhat niini, kinsa man?

Ang labing maayo nga tambal nga akong nasayran alang sa kabalaka mao ang pagtrabaho. Ang labing maayo nga medisina sa pagkawala sa paglaum mao ang pagserbisyo. Ang labing maayo nga tambal alang sa kakapoy mao ang hagit sa pagtabang sa usa ka tawo kinsa mas gikapoy.¹²

Nganong malipayon man ang mga misyonaryo? Tungod kay ilang gikalimtan ang ilang mga kaugalingon diha sa pagserbisyo sa uban.

Nganong malipayon man ang mga nagtrabaho sa templo? Tungod kay ang ilang buhat sa gugma nahiuyon gayud sa mahinungdanong pagpuli [vicarious] nga buhat sa Manluluwas sa katawhan. Wala sila mangayo ni magpaabut og pasalamat alang sa unsay ilang gibuhat. Kasagaran, wala na silay lain pang nasayran gawas sa pangalan sa tawo alang kang kinsa sila nagtrabaho.¹³

Ipadayag ang halangdong mga tinguha nga anaa sulod sa inyong mga kasingkasing nga motabang sa paghupay, pagsuporta, ug paglig-on sa uban. Kon buhaton ninyo kini, ang makadaut nga epekto sa pagkahakog mobiya kaninyo, ug kini mapulihan sa usa ka tam-is ug nindot nga pagbati nga daw dili moabut sa laing paagi.¹⁴

“Adunay daghan kaayo kansang mga palas-anon inyong maalsa.”

Kon kita maningkamot sa pagtabang sa uban, atong makaplagan ang atong tinuod nga mga kaugalingon.

Usa ka Dominggo sa buntag pipila ka tuig ang milabay, anaa ako sa panimalay sa usa ka stake president sa usa ka gamayng lungsod sa Idaho. Sa wala pa ang pag-ampo sa buntag, ang pamilya dungan nga mibasa og pipila ka mga bersikulo sa kasulatan. Lakip niini mao ang mga pulong ni Jesus nga narekord sa Juan 12:24: “Sa pagkatinuod, sa pagkatinuod, magaingon ako kaninyo, nga ang usa ka lugas trigo kinahanglan mahulog sa yuta ug mamatay, kay kon dili man, nan, magapabilin kini nga mag-inusara; apan kon kini mamatay, nan, mamunga kinig daghan.”

Walay pagduhaduha nga ang Manluluwas naghisgot sa iyang kaugalingong umaabut nga kamatayon, nagpahayag nga gawas kon siya mamatay ang iyang misyon sa kinabuhi mahimong makawang lang. Apan akong nakita niini nga mga pulong ang dugang nga kahulugan. Alang kanako daw nag-ingon ang Ginoo sa matag usa kanato nga gawas kon kalimtan nato ang atong mga kaugalingon sa pagserbisyo sa uban, ang atong mga kinabuhi sa kasagaran gigamit nga walay tinuod nga katuyoan, kay siya mipadayon sa pag-ingon, “Ang mahigugma sa iyang kinabuhi mawad-an hinoon niini; apan ang magadumot sa iyang kinabuhi niining kalibutana, magapatunhay niini alang sa kinabuhing dayon.” (Juan 12:25.) O, sama sa narekord diha sa Lucas, “Bisan kinsa nga magatinguha sa pagpatunhay sa iyang kinabuhi, mawagtangan hinoon siya niini; apan bisan kinsa nga magawagtang sa iyang kinabuhi, magapatunhay hinoon niini.” (Lucas 17:33.) Sa laing pagkasulti, siya nga nagpakabuhi lamang alang sa iyang kaugalingon malaya ug mamatay, samtang siya nga mokalimot sa iyang kaugalingon sa pagserbisyo sa uban motubo ug mamulak niining kinabuhia ug sa kahangturan.

Nianang buntaga sa komperensya sa stake, ang presidente nga akong gipuy-an gi-release human sa trese ka tuig nga matinud-anong pagserbisyo. Dihay hilabihan nga pagpadayag sa gugma ug pasalamat, dili tungod sa iyang kaadunahan, dili tungod sa iyang posisyon diha sa komunidad sa patigayon, apan tungod sa maayong serbisyo nga walay paghinakog niyang gihatag. Walay personal nga interes nga gihunahuna, siya mibiyahe og liboan ka mga milya sa tanang matang sa panahon. Migahin siya og liboan ka mga oras alang sa kaayohan sa uban. Iyang gipasagdan ang iyang personal nga mga butang aron sa pagtabang niadtong nagkinahanglan og tabang. Ug sa iyang pagbuhat niini nalagsik siya ug nahimong mahinungdanon sa panan-aw niadtong iyang giserbisyohan.¹⁵

Mga tuig na ang milabay nakabasa ko og istorya kabahin sa usa ka batan-ong babaye kinsa miadto og usa ka lugar sa probinsya isip usa ka magtutudlo. Lakip sa iyang klase mao ang usa ka babaye kinsa nahagbung sa klase kaniadto ug kahagbungon na sab. Ang estudyante dili kahibalo mobasa. Naggikan siya sa usa ka pamilya nga walay kwarta aron madala siya ngadto sa mas dako nga dakbayan aron mapaeksamin kon aduna ba siyay problema nga mahatagan og kasulbaran. Nakamatikod nga ang problema tingali mao ang mga mata sa batang babaye, ang batan-ong magtutudlo miareglo nga dad-on ang estudyante, sa kaugalingong gasto sa magtutudlo, aron mapaeksamin ang iyang mga mata. Usa ka diperensya ang nadiskubrehan nga mahimo ra nga makorihian pinaagi sa antiyuhos. Sa wala madugay usa ka bag-o nga kalibutan ang nasinati sa estudyante. Sa pinakaunang higayon sa iyang kinabuhi, klaro niyang nakita ang mga pulong sa iyang atubangan. Ang sweldo niana nga probinsyanang magtutudlo gamay ra, apan gikan sa gamay nga aduna siya, siya mihimo og pamuhunan nga hingpit nga miusab sa kinabuhi sa hagbungunon nga estudyante, ug sa pagbuhat niini siya nakakaplag og usa ka bag-ong dimensyon sa iyang kaugalingong kinabuhi.¹⁶

Samtang kamo sama nga nagserbisyo, usa ka bag-ong dimensyon ang madugang sa inyong kinabuhi. Makakaplag mo og bag-o ug makapadasig nga mga panag-uban. Makakaplag mo og panaghigalaay ug maayo nga mga panag-uban sa ubang mga tawo. Motubo mo sa kahibalo ug salabutan ug kaalam, ug sa inyong kapasidad sa pagserbisyo.¹⁷

Ako mopamatuod nga samtang kamo maningkamot sa pagtabang sa uban, inyong makaplagan ang inyong tinuod nga mga kaugalingon ug makapanalangin og maayo sa kalibutan diin kamo nagpuyo.¹⁸

Ang Simbahan naghatag og daghang mga oportunidad sa dili hinakog nga pagserbisyo.

Mga kaigsoonan, dili gayud kamo magmalipayon kon mopadayon kamo sa kinabuhi nga maghunahuna lamang sa inyong kaugalingon. Ipahinungod ang inyong kaugalingon niining labing halangdong buhat sa kalibutan—ang buhat sa Ginoo. Ang buhat sa mga korum, ug sa mga organisasyon sa auxiliary, buhat sa templo, buhat sa pagserbisyo sa welfare, misyonaryo nga buhat. Inyong mapanalanginan ang inyong kaugalingong kinabuhi samtang kamo nagpanalangin sa kinabuhi sa uban.¹⁹

Walay laing buhat sa tibuok kalibutan nga puno kaayo sa kalipay sama niini nga buhat. Kana nga kalipay talagsaon. Nagagikan kini diha sa pagserbisyo sa uban. Tinuod kini. Talagsaon kini. Maanindot kini.²⁰

“Samtang kamo … nagserbisyo, usa ka bag-ong dimensyon ang madugang sa inyong kinabuhi.”

Himoa ang Simbahan nga maoy inyong suod nga higala. Himoa kini nga maoy inyong halangdong kompanyon. Pagserbisyo bisan asa kamo gitawag sa pagserbisyo. Buhata ang gihangyo kaninyo nga buhaton. Matag katungdanan nga inyong gihuptan modugang sa inyong kapasidad. Nakaserbisyo ko sa daghang mga responsibilidad niining halangdong organisasyon. Matag pagserbisyo midala og kaugalingon niining ganti.

Kini … nagkinahanglan sa inyong dili hinakog nga debosyon, sa inyong dili matarug nga pagkamaunungon ug hugot nga pagtuo. Moserbisyo mo sa daghang mga posisyon sa dili pa mahuman ang inyong mga kinabuhi. Pipila kanila tingali ingon og gamay ra, apan walay gamay o dili importante nga calling sa Simbahan. Ang matag calling importante. Ang matag calling gikinahanglan aron sa pagpauswag sa buhat. Ayaw ipakaubus ang usa ka responsibilidad sa Simbahan. …

Hatagi og luna ang Simbahan sa inyong kinabuhi. Himoa ang inyong kahibalo sa doktrina niini nga molambo. Himoa ang inyong pagsabut sa organisasyon niini nga motubo. Himoa ang inyong gugma alang sa mahangturong mga kamatuoran niini nga kanunay nga magkalig-on.

Ang Simbahan mahimong motawag kaninyo sa paghimo og sakripisyo. Kini mahimong motawag kaninyo sa paghatag sa labing maayo nga inyong mahatag. Walay mawala kaninyo sa inyong paghimo niini, tungod kay inyong madiskubrihan nga kini mahimong usa ka puhunan nga mohatag kaninyo og ginansya samtang buhi pa kamo. Ang Simbahan mao ang dakong pundohanan sa mahangturong kamatuoran. Hangupa kini ug panggunit og maayo niini.²¹

Gusto ba kamo nga magmalimpyo? Kalimti ang inyong kaugalingon ug ipahinungod ang inyong kaugalingon niining halangdong buhat. Paningkamot sa pagtabang sa mga tawo. Pag-ugmad og usa ka diwa sa pagpasaylo diha sa inyong mga kasingkasing kang bisan kinsa nga tingali nakasilo kaninyo. Tan-aw ngadto sa Ginoo ug pagpakabuhi ug paningkamot sa pagbayaw ug pagserbisyo sa Iyang mga anak. Makahibalo kamo og usa ka kalipay nga wala pa gayud ninyo mahibaloi sukad kon inyo kanang buhaton. Dili nako importante kon unsa ka katigulang, unsa ka kabatan-on, bisan unsa pa. Makabayaw kamo sa mga tawo ug makatabang kanila. Ang langit nahibalo nga adunay daghan, daghan, daghan kaayong tawo niining kalibutan nga nagkinahanglan og tabang. O, pagkadaghan gayud. Atong wagtangon ang mokutkut, hakog nga kinaiya sa atong mga kinabuhi, akong mga kaigsoonan, ug moserbisyo kita nga mas maayo sa daghan pa nga mga tawo. … Palamboa ang inyong mga kaugalingon ug tabangi ang mga tuhod nga nagluya, ipataas ang mga bukton nga nagbitay. Sunda ang ebanghelyo ni Jesukristo. Kalimti ang inyong kaugalingon.²²

Mga Sugyot alang sa Pagtuon ug Pagtudlo

Mga Pangutana

Si Presidente Hinckley mitudlo nga ang atong mga kinabuhi mga gasa gikan sa Dios, nga gamiton sa pagserbisyo sa uban (tan-awa sa seksyon 1). Sa unsang paagi kita makahimo sa pagserbisyo sa uban nga usa ka paagi sa pagpakabuhi? Unsa kaha ang gipasabut nga moserbisyo uban sa katuyoan nga bug-os ngadto sa himaya sa Dios? Sa unsang paagi nga ang pagserbisyo sa uban nakapanalangin kanimo?
Nganong ang pagserbisyo makatabang kanato nga mabuntog ang kalooy sa kaugalingon, kahakog, ug pag-inusara? (Tan-awa sa seksyon 2.) Sa unsang paagi nga ang pagserbisyo nakahatag kaninyo og kalipay? Samtang inyong basahon ang paghulagway ni Presidente Hinckley sa mga tawo nga nanginahanglan, ideterminar kon sa unsang paagi kamo ug ang inyong pamilya makatabang sa pagserbisyo.
Nganong ang paghikalimot sa atong mga kaugalingon diha sa pagserbisyo sa uban makatabang kanato nga “makaplagan ang [atong] tinuod nga mga kaugalingon”? (Tan-awa sa seksyon 3.) Unsay atong makat-unan gikan sa mga istorya sa seksyon 3?
Si Presidente Hinckley mitambag, “Ipahinungod ang inyong kaugalingon niining labing halangdong buhat sa kalibutan—ang buhat sa Ginoo” (seksyon 4). Unsa nga mga panalangin ang nahatag diha sa inyong kinabuhi sa pagserbisyo sa Simbahan?

May Kalabutan nga mga Kasulatan

Mateo 20:25–28; 25:34–40; Juan 13:35; Mosiah 2:16–18; 18:8–9; D&P 64:33

Tabang sa Pagtuon

“Samtang ikaw magtuon, bantayi og maayo ang mga ideya nga mosulod sa imong hunahuna ug ang mga pagbati nga mosulod sa imong kasingkasing” (Isangyaw ang Akong Ebanghelyo [2004], 21). Hunahunaa ang pagrekord sa mga impresyon nga imong nadawat, bisan og ingon og wala kini kalambigitan sa mga pulong nga imong gibasa. Tingali mao gayud kini ang mga butang nga gusto sa Ginoo nga imong makat-unan.