Kapitulo 15

Ang Balaan nga Priesthood

“Gihigugma nako ang priesthood niini nga Simbahan. Kini mahinungdanon kaayo, buhi nga butang. Kini mao gayud ang kinauyokan ug kalig-on niini nga buhat. Kini mao ang gahum ug awtoridad diin ang Dios, ang atong Mahangturong Amahan, nagtuman sa Iyang buhat dinhi sa yuta.”

Gikan sa Kinabuhi ni Gordon B. Hinckley

Sa 1980, si Elder Gordon B. Hinckley ug ang iyang asawa, si Marjorie, miapil og tulo ka semana nga paglibut sa Asia, namulong sa mga area conference ug miapil sa paghalad sa Templo sa Tokyo Japan. Sa wala pa mobalik sa panimalay, mibiyahe sila ngadto sa Mission sa Sendai Japan, diin gidumala ni Elder Hinckley ang paghimo sa unang stake diha sa misyon. Sa hapit na magsugod ang miting uban sa bag-ong stake presidency, giduol ni Elder Hinckley ang mission president, si Kiyoshi Sakai. “Nasurprisa si Presidente Sakai sa dihang gipangutana niya kon siya aduna bay gipahinungod nga lana ug dayon midugang, ‘Gikapoy ako kaayo, mahimo bang hatagan mo ako og panalangin?’ Nahinumdom si Presidente Sakai, ‘nahadlok kaayo ako ug mibati nga luya kaayo sa pagpanalangin sa usa ka Apostol sa Ginoo. Gisultihan ko siya nga dili ako makahatag og panalangin sa Ingles. Miingon si Elder Hinckley nga ang Hinapon maayo ra. Busa si Elder Hitoshi Kashikura, ang Regional Representative, ug ako mipadayon.’ Human ang panalangin nalitok, yano nga misulti si Elder Hinckley og ‘Salamat, salamat. Makapauli na ko ugma.’

“Pagkasunod buntag si Elder Hinckley makita nga lig-on og baskog, ug sa dihang gipangutana ni Presidente Sakai unsay gibati niya gitubag siya, ‘Dai Jobu, labaw pa sa ka maayo. Ako maayo.’ Human sa pila ka adlaw nakadawat og sulat pasalamat si Presidente Sakai gikan ni Elder Hinckley, kinsa misulat: ‘… Mapasalamaton ako kaayo sa panalangin nga imong gihatag kanako. Dayon misugod ako sa pagbati og kamaayo human niana. Ang akong pagkaayo dali ug kompleto. Si Sister Hinckley ug ako mapasalamaton kaayo alang sa pribilehiyo sa pagpuyo diha sa inyong mission home.’”¹

Kanunay si Presidente Hinckley nga mipamatuod sa mga panalangin sa priesthood, gikan sa milagroso apan temporaryo nga mga panalangin sa pisikal nga pagkaayo ngadto sa mahangturon, nagbugkos nga mga panalangin pinaagi sa mga ordinansa sa templo. Gipahayag niya,“Nagtuo ko nga sa Iyang priesthood anaa ang balaanong awtoridad—ang gahum sa pagpanalangin, ang gahum sa pag-ayo, ang gahum sa pagdumala sa mga kalihokan sa Dios dinhi sa kalibutan, ang gahum sa pagbugkos didto sa kalangitan nianang gibugkos dinhi sa kalibutan.”²

“Uban [ang priesthood], walay imposible sa pagpauswag sa buhat sa gingharian sa Dios.”

Mga Pagtulun-an ni Gordon B. Hinckley

Gipahiuli sa Dios ang priesthood ug mga yawe sa gingharian sa langit.

Ang gahum sa priesthood ug awtoridad [mga] gihatag ngadto sa kalalakin-an sa karaang panahon. Ang ubos nga awtoridad gihatag ngadto sa mga anak ni Aaron aron sa pagdumala sa mga butang nga temporal ingon man usab sa pipila ka sagradong eklesiastikal nga mga ordinansa. Ang labaw nga priesthood gihatag sa Ginoo Mismo ngadto sa Iyang mga Apostoles, pinasubay sa Iyang pahayag ngadto ni Pedro: “Hatagan ko ikaw sa mga yawe sa gingharian sa langit: ug bisan unsay imong pagabugkuson dinhi sa yuta, didto sa langit pagailhon kini nga binugkos: ug bisan unsay imong pagaluagan dinhi sa yuta, didto sa langit pagailhon kini nga linuagan” (Mateo 16:19).

Ang hingpit nga pagpahiuli sa priesthood naglakip sa pagtungha ni Juan Bautista … ug ni Pedro, Santiago, ug Juan. … Kini naglakip ni Moises, Elias, ug ni Elias [Elijah], ang matag usa nagdala og mga yawe sa priesthood sa pagkompleto sa buhat sa pagpahiuli sa tanang mga lihok ug mga ordinansa sa miaging mga dispensasyon niini, ang labing importante, katapusan nga dispensasyon sa kahingpitan sa mga panahon.

Ania ang priesthood. … Kita nahibalo, tungod kay atong nakita, ang gahum niini nga priesthood. Nakita nato ang masakiton nga naayo, ang bakol nahimong nakalakaw, ug ang pag-abut sa kahayag ug kahibalo ug pagsabut ngadto niadtong kinsa diha sa kangitngit.³

Gihulagway ni Propeta Joseph Smith [ang priesthood] sa usa ka okasyon niini nga mga pulong: “Ang Priesthood usa ka mahangturong baruganan, ug diha uban sa Dios sa kahangturan … hangtud sa kahangturan, nga walay sinugdanan sa mga panahon o katapusan sa mga katuigan.” (History of the Church, 3:386.)

Kini sa tinuod ang gahum sa Makagagahum nga gihatag ngadto sa tawo sa paglihok diha sa Iyang pangalan ug diha sa Iyang dapit. Kini usa ka pagtugyan sa balaanong awtoridad, lahi kay sa ubang mga gahum ug mga awtoridad dinhi sa yuta. Dili katingad-an nga kini gipahiuli ngadto sa tawo pinaagi sa nabanhaw nga mga binuhat kinsa naghupot niini sa karaang panahon, nga unta walay pangutana kalabut sa awtoridad ug sa katinuod niini. Kon wala kini adunay simbahan nga sa ngalan lamang, nga kulang sa awtoridad sa pagpangalagad sa mga butang sa Dios. Uban niini, walay imposible sa pagpauswag sa buhat sa gingharian sa Dios. Kini balaan sa iyang kinaiyahan. Kini temporal ug mahangturon sa awtoridad niini. Kini mao lamang ang gahum dinhi sa yuta nga moabut lapas pa sa kamatayon.⁴

Ang priesthood mao ang gahum ug awtoridad pinaagi diin ang Dios makatuman sa Iyang buhat.

Gihigugma nako ang priesthood niini nga Simbahan. Kini mahinungdanon kaayo, buhi nga butang. Kini mao gayud ang kinauyokan ug kalig-on niini nga buhat. Kini mao ang gahum ug awtoridad pinaagi diin ang Dios, ang atong Amahan sa Kahangturan, makatuman sa Iyang buhat dinhi sa yuta.⁵

Ang balaang priesthood nagdala uban niini sa awtoridad sa pagdumala sa mga kalihokan sa gingharian sa Dios ibabaw sa yuta. Ubos sa mga pagpadayag sa Ginoo, ang Simbahan pagadumalaon sa tulo ka presiding nga mga high priest. Sila pagatabangan sa konseho sa Napulog Duha ka mga Apostoles, kinsa usab pagatabangan sa … Seventy. Tulo ka Presiding Bishopric ang responsable alang sa temporal nga mga kalihokan ubos sa direksyon sa Presidency. Tanan niini mga opisyales sa priesthood. Kana nga gahum nga balaang hinatag mao ang awtoridad pinaagi diin sila nagdumala. Mao usab diha sa mga stake ug sa mga ward uban sa mga presidency ug sa mga bishopric. Mao usab diha sa mga korum. Ang mga opisyal sa auxiliary naghimo sa ilang buhat ubos sa direction ug pagtugyan gikan sa priesthood. Kung wala ang priesthood tingali anaa ang pagkamay-ong sa simbahan, apan dili ang tinuod nga kalig-on. Kini mao ang simbahan ni Jesukristo, ug kini gidumala pinaagi niana nga awtoridad nga “sunod sa Kapunongan sa Anak sa Dios.” (D&P 107:3.)⁶

Ang mga panalangin sa priesthood pagapahimuslan sa tanan.

[Ang priesthood] … kabahin sa plano sa Dios nga atong Amahan sa Kahangturan sa pagpanalangin sa mga kinabuhi sa Iyang mga anak sa tanang mga henerasyon.⁷

Ang balaang priesthood naglakip sa gahum sa pagpanalangin. Alang niadtong sa Aaronic Priesthood, kini nagdala uban niini sa awtoridad sa pagpangalagad ngadto sa kongregasyon sa mga simbolo sa lawas ug dugo sa Ginoo, kinsa mihatag sa Iyang kinabuhi isip sakripisyo alang sa tanan. Ang sakrament ug ang pag-ambit niini nga mga simbolo mao gayud ang kinauyokan sa atong pagsimba sa igpapahulay. Kini naglakip sa pagbag-o sa mga pakigsaad uban sa Dios. Kini nagdala uban niini og usa ka saad sa Iyang Balaang Espiritu Santo. Kini usa ka panalangin nga walay makatupong nga pagapahimuslan sa tanan ug nahimong posible pinaagi sa awtoridad nga gihatag ngadto sa batan-ong mga lalaki. …

Ang Melchizedek Priesthood nagdala uban niini sa awtoridad sa pagtugyan sa Espiritu Santo. Unsa ka dako nga panalangin kini nga makabaton sa impluwensya sa pagpangalagad sa usa ka miyembro sa Diosnong Kapangulohan, nakadawat niana nga gasa ubos sa mga kamot niadtong kinsa adunay balaang awtoridad. Kon kita magpadayon og lakaw nga mahiyason, kita mahimong magpahimulos sa katumanan sa saad nga gihimo sa Dios sa dihang Siya miingon: “Ang Espiritu Santo mao ang inyong kauban sa kanunay, ug ang inyong pagmando usa ka dili mausabon nga pagmando sa pagkamatarung ug kamatuoran; ug ang inyong kamandoan mao ang usa ka walay katapusan nga kamandoan, ug walay pagpugos nga paagi kini mokanap nganha kanimo hangtud sa kahangturan.” (D&P 121:46.)

Ang priesthood naglakip sa gahum sa pagpanalangin sa masakiton. Aduna bay usa ka tawo nga naminaw kanako kinsa wala migamit o mibati nianang balaan nga gahum? Makabaton ba ang bisan kinsa kanato og bisan unsa nga pagduda kalabut sa pagkaepektibo niini? Makasulti kita og mga milagro, sagrado ug nindot kaayo, nga atong nasaksihan sulod sa atong kaugalingong kasinatian. …

Kining balaan nga Melchizedek Priesthood nagdala uban niini sa gahum sa pagpanalangin uban ang panagna, ang paghupay, ang pagpaluyo, ang pagpalakaw. Kita adunay mga patriarch sa atong taliwala kinsa, ubos sa awtoridad nga ilang gihuptan, nagpahayag sa kaliwatan ug gilitok ang mga panalangin alang sa atong paggiya. Kini nga mga panalangin mahimong usa ka angkla ngadto diin kita mahimong mokupot sa pagpabilin kanato nga dili matarug sa mga pagsulay sa kinabuhi.

Sa labing nindot nga pagkasulti ang balaang priesthood nagdala uban niini sa awtoridad sa pagbugkos dinhi ibabaw sa yuta ug ipahimo kana nga pagbugkos nga epektibo didto sa kalangitan. Kini talagsaon ug nindot kaayo. Kini ang awtoridad nga gigamit diha sa mga templo sa Dios. Kini may kalabutan sa buhi ug sa patay. Kini gayud ang lintunganay sa kahangturan. Kini balaan nga gahum nga gitugyan sa Makakagahum isip kabahin sa Iyang mahinungdanong plano alang sa immortalidad ug mahangturong kinabuhi sa tawo.

Unsa ka mahal ang gasa sa Dios nga miabut kanato.⁸

Ang mga anak nga lalaki sa Dios kinsa naghupot sa Iyang balaan nga awtoridad kinahanglan gayud nga tinuod sa labing maayo kaayo nga anaa kanila.

Matag takus nga lalaki, walay pagsapayan sa nasyonalidad, etnikong kaagi, o bisan unsa nga hinungdan, makahimo sa pagdawat sa priesthood. Ang iyang pagkamasulundon sa mga sugo sa Dios mahimong mao ang kapasikaran. Ang pagtugyan niini gibasi lamang sa katakus diha sa atubangan sa Ginoo. …

Ingon niana ang katingalahan niini nga priesthood. Ang bahandi dili usa ka kapasikaran. Ang edukasyon dili usa ka kapasikaran. Ang mga pasidungog sa mga tawo dili mga kapasikaran. Ang nakapugong nga kapasikaran mao ang pagkamadawat ngadto sa Ginoo.⁹

Ang panahon miabut alang kanatong tanan kinsa naorden ngadto sa Aaronic o Melchizedek Priesthood, ug ngadto sa bisan hain nga katungdanan diha niini, sa pagpamalandong sa atong mga kinabuhi, sa paghatag og bili sa atong mga kakulangan, ug sa paghinulsol niadtong mga butang sa pamatasan nga mga sukwahi sa labaw ug balaan nga gahum nga atong nadawat. …

Walay tawo, batan-on o tigulang, … kinsa, … giorden, makatan-aw nga wala kaayoy pagtagad niana nga iyang gihuptan. Anaa siya sa pagka-kauban sa Dios ug anaa diha kaniya ang usa ka solido ug sagradong obligasyon aron sa pagpuyo isip usa ka takus nga mosulti ug molihok diha sa pangalan sa Dios isip iyang may kasarang nga tinugyanan.¹⁰

Bisan tuod og kadtong may awtoridad nagpandong sa mga kamot diha sa atong mga ulo ug kita na-orden, kita mahimong pinaagi sa atong pamatasan mo imbalido ug mopawagtang sa bisan unsang katungod sa paggamit niining balaang awtoridad.

… “Walay gahum o impluwensya nga makahimo o angay gayud nga magpadayon pinaagi sa hiyas sa pagkapari, gawas lamang sa pagdani, sa pagka-mainantuson, sa kalumo ug kaaghup, ug sa tiunay nga paghigugma;

“Pinaagi sa pagkamabination, ug putli nga kahibalo, diin makapadugang sa hilabihan sa kalag nga walay pagpakaaron-ingnon, ug walay pagpanglimbong” (D&P 121:41–42).

Karon, akong mga kaigsoonan, kadto mao ang mga sumbanan diin kini nga priesthood kinahanglan gayud nga magamit. Kini dili usa ka kupo nga atong isul-ob ug hubuon kon gusto. Kini mao, kon gamiton sa katarung, isip ang hulma gayud sa atong mga lawas, kabahin kanato sa tanang panahon ug sa tanang mga higayon.¹¹

Kinahanglan gayud nga kita tinuod sa labing maayo gayud nga anaa kanato. Kita anak nga mga lalaki sa Dios napasidunggan sa paghupot sa Iyang balaan nga awtoridad. Apan nagpuyo kita sa usa ka kalibutan nga dautan. Kanunay adunay gahum, nga nagbitad kanato paubos, nagdapit kanato sa pag-ambit niadtong mga butang nga hingpit sukwahi sa balaang priesthood nga atong gihuptan. …

Nganha kaninyo mga kalalakin-an naghatag ako niini nga hagit. Dagan palayo sa mapintas nga baha sa kabastusan nga mobuntog kaninyo. Dagan palayo sa mga dautan sa kalibutan. Pagmaunungon sa inyong kaayohan sa kaugalingon. Pagmaunungon sa labing maayo nga anaa kaninyo. Pagmatinud-anon ug matinuoron ngadto sa mga pakigsaad nga kauban sa priesthood sa Dios.¹²

Ngadto sa matag nagdumala, ngadto sa matag magtutudlo niining Simbahan kinsa naglihok sa usa ka katungdanan sa priesthood, anaa ang sagradong responsibilidad sa pagpalambo nianang priesthood calling. Ang matag usa kanato responsable alang sa kaayohan ug pagtubo ug paglambo sa uban. Dili lamang kita magpuyo alang sa atong mga kaugalingon. Kon kita kinahanglan nga magpalambo sa atong mga calling dili lamang kita magpuyo alang sa atong mga kaugalingon.¹³

Daghang mga kalalakin-an ingon og naghunahuna nga tungod kay sila na-orden, ang priesthood ila sa hangtud nga paggamit kutob sa ilang gusto. Nagtuo sila nga makahimo sila sa paglapas panagsa og pakigsaad ug sugo, magpakasala sa lain-laing paagi, ug bisan pa niana sa gihapon anaa pa kanila ang gahum sa priesthood ug nga ang Dios mouyon nianang ilang gipamulong diha sa Iyang balaan nga pangalan ug diha sa pangalan sa Manunubos. Kini mahimong bugal-bugal, ug ako nagtuo nga sa ingon niana nga paggamit, sila nagdala sa pangalan sa Dios sa kawang. Nagpasipala sila sa pangalan sa Iyang Pinalanggang Anak. Nagpanamastamas sila sa sagradong gasa nga miabut pinaagi sa pag-orden, ug sa awtoridad nga giwagtang kanila agi og resulta sa kalapasan. …

… Pasidan-an ko kamong tanan, mga batan-ong lalaki ug hamtong nga kalaIakin-an, sa paglikay sa sala. Ang kalapasan dili magkauyon sa balaang awtoridad. Likayi ang pornograpiya sama sa katalagman. Likayi ang sekswal nga sala sa bisan unsa nga matang. Likayi ang dili pagkadili matinuoron ug paglingla. Nangamuyo ako kaninyo sa pagpugong sa bisan unsa nga susama sa garbo o kawang nga ambisyon. Naghangyo ako kaninyo sa pag-eksamen sa inyong mga kaugalingon sa pagtan-aw nga walay kinaiya sa paghari o pamugos sa inyong mga asawa o inyong mga anak. …

… Nalipay ako nga ang atong Amahan sa Langit dili mahimuot ni bisan kinsa nga hamtong nga lalaki o batan-ong lalaki kinsa midawat sa pag-orden ug dayon nagtagbaw diha sa dautan. Sa paagi gayud sa pagdawat sa pag-orden siya misulod ngadto sa usa ka panumpa ug pakigsaad tali sa iyang kaugalingon ug sa Dios¹⁴

Walay lalaki, mabatan-on o matigulang, nga nagpuyo sa mga sumbanan sa priesthood kinsa nagpakaulaw o nagwagtang sa dungog sa pagkababaye, kinsa napakyas sa paghatag niana nga paagi sa pagrespeto ngadto sa anak nga mga babaye sa Dios nga ang atong Amahan sa langit gusto nga sila hatagan.¹⁵

Himoon natong mamaayo kitang mga bana ug mga amahan. Bisan kinsa nga lalaki nga hari-harion diha sa iyang kaugalingong panimalay dili takus sa priesthood. Dili siya angay nga instrumento diha sa mga kamot sa Ginoo kon dili siya magpakita og pagrespeto ug pagkamabination ug paghigugma ngadto sa kauban nga iyang pinili. Ingon man usab, bisan kinsa nga lalaki kinsa ngil-ad nga ehemplo sa iyang mga anak, kinsa dili makapugong sa iyang kasuko, o kinsa naapil sa dautan o malaw-ay nga mga binuhatan mahibalo nga ang gahum sa iyang priesthood mawad-an og epekto¹⁶

Ang asawa nga imong gipili mahimo nga imong kaparang. … Siya dili nimo sulugoon, imong butang, ni bisan unsa nga matang. Unsa ka makalolooy ug hingpit nga makalagot nga hitabo nga ang asawa gipasipad-an. Bisan kinsa nga lalaki niini nga Simbahan kinsa nagpasipala sa iyang asawa, kinsa nagpakaulaw kaniya, kinsa nag-insulto kaniya, naggamit og dili matarung nga pagdala kaniya dili takus sa paghupot sa priesthood. Bisan siya naorden, ang langit mobiya, ang Espiritu sa Ginoo maguol, ug amen sa awtoridad sa priesthood nianang tawhana. Bisan kinsa nga lalaki kinsa naghimo niini nga buhat dili takus sa paghupot og temple recommend. …

… Kon ugaling aduna … kinsa sad-an sa maong pamatasan, nagtawag ako kaninyo sa paghinulsol. Luhod ug hangyoa ang Ginoo sa pagpasaylo kaninyo. Pag-ampo ngadto Kaniya alang sa gahum sa papugong sa inyong dila ug sa inyong bug-at nga kamot. Pangayo og pasaylo sa inyong asawa ug mga anak. …

Masaligon ako nga sa panahon nga kita mobarug sa atubangan sa hukmanan sa Dios, adunay gamay nga paghisgot kon unsay gidaghanon sa bahandi nga atong natigum sa kinabuhi o sa bisan unsa nga pasidungog nga atong naangkon. Apan adunay detalyadong mga pagpangutana kalabut sa atong mga relasyon sa panimalay. Ug ako nakumbinsir nga kadto lamang kinsa naglakaw sa kinabuhi uban ang gugma ug respeto ug pasalamat sa ilang mga kapikas ug mga anak ang modawat gikan sa atong mahangturon nga maghuhukom sa mga pulong, “Maayong pagkabuhat, maayo ug kasaligan nga ulipon: … dumuyog ka sa kalipay sa imong agalon” (Mat. 25:21).¹⁷

Ang korum sa priesthood mahimong angkla sa kalig-on alang sa mga miyembro niini.

Ako masaligon nga gituyo sa Ginoo nga ang korum sa priesthood kinahanglan nga dili lamang kay klase bahin sa Dios sa Dominggo sa buntag. Hinoon, ang pagtukod og espiritwalidad ug ang pagpalig-on sa pagpamatuod pinaagi sa pagtudlo sa ebanghelyo usa ka importanteng responsibilidad sa priesthood. Apan kini bahin lamang sa kalihokan sa korum. Ang matag korum kinahanglang mahimong usa ka panag-inigsoonay nga nagtrabaho alang sa kada miyembro kon ang katuyoan niini kinahanglan nga makab-ot. …

… Ang korum sa priesthood mao ang organisasyon sa Ginoo alang sa mga kalalakin-an, ingon man nga ang Relief Society mao ang organisasyon alang sa kababayen-an sa Simbahan. Ang matag usa aduna sa daghan niini nga responsibilidad, sukaranan nga rason sa pagka-ingon niini, ang pagtabang niadtong nanginahanglan.

Sa dihang ang Relief Society gitukod si Propeta Joseph Smith miingon kabahin sa mga kababayen-an sa Society: “Sila makahimo og “dinalian nga pagtabang sa mga langyaw; mobu-bu og bino ug lana sa nasamdan nga kasingkasing sa naglisud; mopauga sila sa luha sa nailo ug himoon nga malipayon ang kasingkasing sa mga biyuda.” [Mga Pagtulun-an sa mga Presidente sa Simbahan: Joseph Smith (2007), 547]. Molaum ako nga unta ang sama masulti kabahin sa mga lalaki sa priesthood.

Mahimo kining talagsaong adlaw, … kon ang atong mga korum sa priesthood mahimong angkla sa kalig-on sa matag sakop niini, kon ang matag lalaki makaingon nga, “Sakop ko sa korum sa priesthood sa Ang Simbahan ni Jesukristo sa mga Santos sa Ulahing mga Adlaw. Andam ko sa pagtabang sa akong kaigsoonan sa tanan nilang panginahanglan, ingon nga ako masaligon nga sila andam sa pagtabang kanako sa akong panginhanglan. Sa pagtinabangay, motubo kita sa espirituhanong paagi isip anak nga mga lalaki sa pakigsaad sa Dios. Sa pagtinabangay, kita makabarug, nga walay kaulaw ug kahadlok, batok sa matag hangin sa kalisdanan nga mohampak, sa ekonomikanhon man, sosyal, o espiritwal.”¹⁸

Ang mga lider sa Simbahan ug ang mga miyembro—kalalakin-an ug kababayen-an—nagtinabangay og trabaho sa “pagtuman sa ilang mga buhat ubos sa paggiya ug pagtudlo gikan sa priesthood.”

Sa mga panimalay ug diha sa Simbahan, ang mga kalalakin-an ug mga kababayen-an nagtinabangay sa pagpauswag sa gingharian sa Ginoo.

Ang kalalakin-an naghupot sa priesthood, oo. Apan ang akong asawa mao ang akong kauban. Dinhi niining Simbahana ang lalaki dili gayud mag-una og lakaw sa iyang asawa o magsunod sa iyang asawa pero diha sa iyang kiliran. Sila managsamang magkauban niini nga kinabuhi sa usa ka dako nga kalihokan.¹⁹

Anaa ang kalig-on ug dakong kapasidad sa mga babaye niini nga Simbahan. Anaa ang pagpangulo ug direksyon, piho nga diwa sa pagka-independente, ug gani ang dakong katagbawan nga mahimong bahin niini, sa gingharian sa Ginoo, ug sa pakigtambayayong sa priesthood aron magpadayon kini.²⁰

Nagpasalamat ako sa akong Mahangturon nga Amahan tungod sa pagpahiuli sa balaang priesthood, nga ang “matag tawo unta mamulong sa ngalan sa Dios ang Ginoo, gani ang Manluluwas sa kalibutan” (D&P 1:20). Akong nakita ang katahum ug kaanindot niana nga priesthood sa pagdumala niining talagsaon nga simbahan. Gibati nako ang gahum niini nga midagayday kanako alang sa pagpanalangin ug pag-ayo sa masakiton. Akong nakita ang kahalangdon nga gihatag ngadto sa mapainubsanong mga tawo kinsa natawag sa mahinungdanon ug bug-at nga responsibilidad. Nakita ko kini samtang nagsulti sila uban sa gahum ug awtoridad gikan sa kahitas-an ingon og ang tingog sa Dios namulong ngadto kanila.

Nagpasalamat ako sa Ginoo alang sa pagpamatuod nga iyang gihatag kanako sa kahingpit sa ebanghelyo, sa gilapdon ug sulod ug giladmon. Gidesinyo kini sa pagpanalangin sa mga anak sa tanang mga henerasyon sa panahon—sa buhi ug sa patay.²¹

Mga Sugyot alang sa Pagtuon ug Pagtudlo

Mga Pangutana

Ribyuha ang mga pagtulun-an ni Presidente Hinckley sa seksyon 1 mahitungod sa pagpahiuli sa priesthood. Unsa nga mga kasinatian nagtabang kaninyo sa pagbaton og pagpamatuod kabahin niini nga mga kamatuoran?
Gitudlo ni Presidente Hinckley, “Ang balaang priesthood nagdala uban niini sa awtoridad sa pagdumala sa mga kalihokan sa gingharian sa Dios ibabaw sa yuta (seksyon 2). Sa unsa nga paagi kini nga kamatuoran magamit sa mga stake og mga ward? sa mga korum? sa Relief Society? Sa unsa nga paagi ang awtoridad sa priesthood maglig-on sa inyong serbisyo diha sa gingharian sa Dios?
Sa seksyon 3, ribyuha ang mga panalangin nga kitang tanan makadawat pinaagi sa priesthood. Sa unsang mga paagi nga inyong nasinati ang gahum ug mga panalangin sa priesthood?
Unsay atong makat-unan gikan sa mga pagtulun-an ni Presidente Hinckley mahitungod sa kalainan tali sa awtoridad sa priesthood ug sa gahum sa priesthood? (Tan-awa sa seksyon 4.) Unsa sa inyong hunahuna ang gipasabut alang sa usa ka tighupot sa priesthood nga “tinuod sa labing maayo gayud nga anaa [kaniya]”? Nganong kinahanglan gayud nga ang mga tighupot sa priesthood “dili magpuyo alang sa ilang mga kaugalingon lamang”?
Sa seksyon 5 unsay nakapadani kaninyo mahitungod sa paghulagway ni Presidente Hinckley sa mga korum sa priesthood ug sa Relief Society? Unsa ang atong mabuhat sa atong ward o branch sa pagsunod sa iyang tambag?
Ngano nga ang mga kalalakin-an ug mga kababayen-an magtinabangay isip “magkatimbang” sa pagtuman sa buhat sa Ginoo? (Tan-awa sa seksyon 6.)

May Kalabutan nga mga Kasulatan

Mga Hebreohanon 5:1–4; 1 Nephi 14:12–14; Alma 13:1–9; D&P 84:33–44; 88:133; 112:30–32

Tabang sa Pagtudlo

“Paghimo og mga pangutana nga kinahanglang pangitaon sa mga estudyante diha sa mga kasulatan ug sa mga pagtulun-an sa mga propeta sa ulahing mga adlaw” (Pagtudlo, Walay Labaw ka Mahinungdanon nga Tawag[1999], 62) .