Kapitulo 1

Ang Pagpahiuli sa Ebanghelyo—Ang Kaadlawon sa usa ka Mahayag nga Adlaw

“Kini nga mahimayaong ebanghelyo gisugdan uban sa pagpakita sa Amahan ug sa anak ngadto sa batang lalaki nga si Joseph.”

Gikan sa Kinabuhi ni Gordon B. Hinckley

Sa iyang tibuok nga kinabuhi, si Presidente Gordon B. Hinckley nagpalambo og usa ka lawom nga respeto alang sa mga tawo ug mga dapit nga apil sa pagpahiuli sa ebanghelyo. Mibati siya og espesyal nga pasalamat alang kang Joseph Smith ug sa iyang tahas diha sa Pagpahiuli, ug siya namulong “nga sa kanunay nagtubo ang lig-ong pagpamatuod sa pagkabalaan sa Ginoo ug sa misyon ni Propeta Joseph Smith.”¹

Sa 1935, sa dihang si Gordon mibiyahe pauli sa panimalay gikan sa iyang misyon sa England, siya ug ang uban nga mupauliay nga mga misyonaryo mibisita sa Sagradong Kakahoyan ug sa Bungtod sa Cumorah. Mihunong usab sila sa Bilanggoan sa Carthage diin si Joseph Smith ug Hyrum Smith gipatay. Gilakaw nila ang abugon nga mga dalan sa Nauvoo, diin ang mga hininginlan nga mga Santos mihimo sa usa ka lamakan ngadto sa usa ka nindot nga siyudad. Sa walay duha-duha, ang mga pag-aninag sa mga kasakit ug mga kadaugan sa unang mga Santos napatik diha sa hunahuna ni Gordon samtang siya diha niini nga mga dapit ug samtang siya mipadayon sa kasadpan subay sa agianan sa mga pioneer ngadto sa Siyudad sa Salt Lake.

Mibalik si Gordon B. Hinckley ngadto sa sagradong mga dapit sa Pagpahiuli sa makadaghan nga higayon sa mosunod nga mga dekada. Sa Pasko nga debosyonal sa First Presidency sa Disyembre 3, 2000, mipakigbahin siya niining personal nga kasinatian gikan sa usa ka pagbisita sa Sagradong Kakahoyan:

“Mga pipila ka tuig ang milabay gi-assign ako ngadto sa komperensya sa Rochester New York Stake. Nianang Sabado misulti ako ngadto sa mga kaigsoonan kinsa uban kanako, ‘Mangmata kita og sayo sa buntag, sayo sa Dominggo sa buntag, ug mangadto sa Sagradong Kakahoyan sa wala pa ang komperensya.’ Miuyon silang tanan. Sumala sa gikasabutan, sa sayo kaayo niana nga tingpamulak sa Igpapahulay, ang mission president, ang stake president, ang regional representative, ug ako miadto sa Palmyra ug milakaw ngadto sa kakahoyan. Walay laing tawo didto. Kini malinawon ug matahum. Miulan niana nga gabii. Mga bag-ong udlot sa mga dahon diha sa mga kahoy.

“Hagawhaw kaming nakigsulti sa usag usa. Nangluhod kami diha sa umog nga yuta ug nag-ampo. Kami walay nadungog nga tingog. Kami walay nakita nga panan-awon. Apan sa dili matukib nga paagi diha sa among mga hunahuna, matag usa kanamo, nga oo, kini nahitabo dinhi ingon gyud sa gisulti ni Joseph nga kini nahitabo. Dinhi niini nga ang Dios nga atong Amahan sa Kahangturan ug ang Iyang Hinigugmang Anak, ang nabanhaw nga si Ginoong Jesukristo, mipakita ngadto sa 14-anyos-ang panuigon nga batang lalaki ug nakigsulti kaniya. Ang dili katupngan niini nga kahayag midapat diha kaniya, ug siya gitudloan kon unsa ang iyang kinahanglan nga buhaton.

“Kanang halangdon nga higayon, ang Unang Panan-awon, miabli sa mga tabil pinaagi diin miabut ang pagpahiuli ngadto sa yuta sa Simbahan ni Kristo. Kini migawas gikan sa kamingawan sa kangitngit, gikan sa kaawaaw sa mga katuigang nanglabay ngadto sa mahimayaong pagbanag-banag sa usa ka bag-ong adlaw. Ang Basahon ni Mormon misunod ingon nga laing saksi ni Ginoong Jesukristo. Ang iyang balaan nga langitnong priesthood gipahiuli ubos sa pagdumala niadtong kinsa naghupot niini sa karaang panahon. Mga yawe ug mga gahum gitugyan diha sa Propeta ug sa iyang mga kauban. Ang karaang Simbahan diha na usab sa yuta uban sa tanang mga panalangin, mga gahum, mga doktrina, mga yawe, ug mga baruganan sa miaging mga dispensasyon. Kini ang kang [Kristo] nga Simbahan. Kini nagdala sa Iyang pangalan. Kini gidumala pinaagi sa Iyang priesthood. Walay lain nga pangalan ubos sa langit pinaagi diin ang mga tawo kinahanglan gayud nga maluwas. Si Joseph Smith … nahimong Iyang halangdon nga magtutugon”²

Ang Unang Panan-awon misugod sa “katapusang kapitulo diha sa taas nga kasaysayan sa pakig-uban sa Dios sa mga tawo dinhi sa yuta.”

Mga Pagtulun-an ni Gordon B. Hinckley

Human sa pagkamatay sa Manluluwas, ang Simbahan nga Iyang gitukod gipadpad ngadto sa apostasiya.

Si [Jesukristo] mao kaniadto ug karon ang halangdong punoan sa kasaysayan sa katawhan, ang pinakalabaw sa mga higayon ug mga panahon sa tanang mga tawo.

Sa wala pa ang Iyang kamatayon, gi-orden Niya ang Iyang mga Apostoles. Mipadayon sila sulod sa pipila ka panahon. Ang Iyang Simbahan gipahimutang.³

Human sa pagkamatay sa Manluluwas, ang Simbahan nga Iyang gitukod gipadpad ngadto sa apostasiya. Natuman ang mga pulong ni Isaias kinsa miingon, “Ang yuta usab nahugawan ubos sa mga lumulupyo niini; tungod kay ilang gilapas ang mga balaod, gipasipalahan ang kabalauran, gibungkag ang tugon nga walay katapusan” (Isaias 24:5).⁴

Ang mga sulat ni Pablo nag-awhag og kalig-on taliwala sa mga sumusunod ni Kristo, basig madala sila ngadto sa mga paagi sa dautan. Pero ang espiritu sa apostasiya sa katapusan nagpatigbabaw.⁵

Ang gatusan ka mga tuig mipadayon. Panganod sa kangitngit milukop sa tibuok yuta. Gihulagway kini ni Isaias: “Kay, ania karon, ang kangitngit motabon sa yuta, ug ang mabaga nga kangitngit motabon sa mga katawhan” (Isa. 60:2).

Kini usa ka panahon sa panglungkab ug pag-antus, gitimaan sa dugay ug duguon nga kagubot. … Kini usa ka panahon sa pagkanawad-an og paglaum, usa ka panahon sa mga tigmando ug mga ulipon.

Ang unang liboan ka mga tuig milabay, ug ang ikaduhang milenyum mibanag-banag. Ang unang mga gatusan ka tuig niini sumpay sa nauna. Kini usa ka panahon nga puno sa kahadlok ug pag-antus.⁶

Ang Bag-ong Pagkatawo [Renaissance] ug ang Repormasyon [Reformation] mitabang sa pag-andam sa dalan alang sa pagpahiuli sa ebanghelyo.

Tungod niini, diha sa taas nga panahon sa kangitngit, usa ka kandila ang gidagkutan. Ang panahon sa Bag-ong Pagkatawo midala uban niini og malamboon nga pagkat-on, sining, ug siyensa. Dihay miabut nga kalihokan sa walay kahadlok ug maisug nga mga tawo kinsa naghangad ngadto sa langit agi og pasalamat sa Dios ug sa Iyang balaang Anak. Atong gitawag kini og Repormasyon.⁷

Ang mga Tigreporma [Reformers] mitrabaho aron pag-usab sa [Kristiyano] nga simbahan, labi na sa inilang mga tawo sama ni Luther, Melanchthon, Hus, Zwingli, ug Tyndale. Kining mga tawhana hilabihan kaisug, ang uban miantus og mabangis nga mga kamatayon tungod sa ilang mga tinuohan. Ang Protestantismo nahimugso uban sa nagkahiusa niini nga tawag alang sa kausaban. Sa dihang ang repormasyon wala matuman, ang mga tigreporma mitukod og mga simbahan sa ilang kaugalingon. Gihimo nila ang mao nga walay awtoridad sa priesthood. Ang ilang tinguha mao ang pagpangita og gamay nga dapit diin sila mahimong mosimba sa Dios ingon nga ilang gibati nga Siya kinahanglan nga pagasimbahon.

Samtang kining dako nga kagubot nagkutaw sa tibuok Kristiyanos nga kalibutan, ang pwersa nga politikanhon naglihok usab. Dayon miabut ang Rebolusyonaryong Gubat nga Amerikanhon, nga miresulta sa pagkatawo sa usa ka nasud kansang Konstitusyon mipahayag nga ang panggobyerno kinahanglan nga dili mo-impluwensya sa mga butang kalabut sa relihiyon. Usa ka bag-ong adlaw misugod, usa ka mahimayaong adlaw. Dinhi wala nay simbahan nga konektado sa gobyerno. Walay usa ka relihiyon nga gipaboran labaw sa usa.

Human sa gatusan ka mga tuig sa kangitngit ug kasakit ug panlimbasug, ang panahon hinog na alang sa pagpahiuli sa ebanghelyo. Ang karaan nga mga propeta namulong kabahin niining dugay nang gipaabut nga adlaw.

Ang tanan nga nanglabay nga kasaysayan mipunting niini nga panahon. Ang gatusan ka mga tuig uban sa ilang mga pag-antus ug sa tanan nilang paglaum miabut ug milabay. Ang Makagagahum nga Maghuhukom sa mga nasud, ang Buhing Dios, mihukom nga ang mga panahon nga gipamulong sa mga propeta miabut na. Natan-aw daan ni Daniel ang usa ka bato nga gisapsap gikan sa bukid nga walay kamot ug nahimong usa ka dakong bukid ug mipuno sa tibuok kalibutan [tan-awa sa Daniel 2:35, 44].⁸

Ang Pagpahiuli misugod uban sa pagpakita sa Amahan ug sa Anak ngadto ni Joseph Smith.

Human sa daghang mga henerasyon nga milabay sa yuta—daghan kaayo niini ang diha sa panagbangi, kasilag, kangitngit, ug kadautan—diha miabut ang mahinungdanon, bag-ong adlaw sa Pagpahiuli. Kini nga mahimayaong ebanghelyo misugod uban sa pagpakita sa Amahan ug sa Anak ngadto sa batang lalaki nga si Joseph.⁹

Unsa gayud ka talagsaon kadto nga panan-awon sa tuig 1820 sa dihang si Joseph nag-ampo didto sa kakahoyan ug didto mipakita diha sa iyang atubangan ang Amahan ug ang Anak. Usa kanila misulti ngadto kaniya, nagtawag kaniya sa iyang ngalan ug, nagtudlo ngadto sa lain, miingon—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17).

Walay sama niini sukad nga nahitabo kaniadto. Ang usa ka tawo mahibulong kon nganong importante kini nga ang Amahan ug ang Anak nagpakita. Ako nagtuo nga tingali Sila nagsugod sa dispensasyon sa kahingpitan sa panahon, ang ulahi ug katapusang dispensasyon sa ebanghelyo, diin diha pagapundukon og tingub ngadto sa usa ang mga elemento sa tanang nangagi nga mga dispensasyon. Kini ang mahimo nga katapusang kapitulo sa taas nga kasaysayan sa pakig-uban sa Dios sa mga tawo dinhi sa yuta.¹⁰

Ang matag pag-angkon nga kita naghimo kalabut sa balaang awtoridad, ang matag kamatuoran nga ang simbahan nagtanyag kalabut sa katinuod niini nga buhat, ang tanan niini adunay sinugdanan diha sa Unang Panan-awon sa batang lalaki nga propeta. Kung wala kini wala tay daghang masulti. Kini mao ang importanteng pag-abli sa dispensasyon sa kahingpitan sa panahon, sa dihang ang Dios misaad nga Siya mopahiuli sa tanang gahum, sa mga gasa, sa mga panalangin, sa tanang miagi nga mga dispensasyon.¹¹

Ang awtoridad ug yawe sa priesthood gipahiuli.

Ang awtoridad ug mga yawe sa Melchizedek Priesthood gipahiuli nganhi sa yuta isip kabahin sa Pagpahiuli.

Sa pagpahiuli sa Aaronic Priesthood, ang nabanhaw nga si Juan Bautista mipandong sa iyang mga kamot diha sa mga ulo ni Joseph Smith ug Oliver Cowdery ug miingon, “Diha kaninyo nga akong kauban nga mga sulugoon, sa ngalan sa Mesiyas, ako motugyan sa Priesthood [Pagkapari] ni Aaron, nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” (D&P 13:1)¹²

Kini gisundan sa pagbisita ni Pedro, Santiago, ug Juan, mga Apostoles ni Ginoong Jesukristo, kinsa mitugyan diha ni Joseph ug Oliver Cowdery sa Melchizedek Priesthood, nga gidawat niining mga Apostoles sa Ginoo Mismo nga mipandong sa Iyang mga kamot diha kanila.¹³

Tulo sa mga Apostoles [sa Manluluwas] —si Pedro, Santiago, ug Juan—mipakita ngadto ni Joseph ug Oliver sa usa ka dapit “diha sa kamingawan” subay sa Suba sa Susquehanna (tan-awa sa D&P 128:20). Mipandong sila sa ilang mga kamot diha sa ilang mga ulo ug gitugyan diha kanila kining balaan nga awtoridad. …

Akong masubay ang akong priesthood sa direkta nga linya ngadto niini nga hitabo. Kini mabasa sama sa mosunod: Ako gi-orden ni David O. McKay; kinsa gi-orden ni Joseph F. Smith; kinsa gi-orden ni Brigham Young; kinsa gi-orden sa Tulo ka mga Saksi; kinsa gi-orden ni Joseph Smith Jr. ug Oliver Cowdery; kinsa gi-orden ni Pedro, Santiago, ug Juan; kinsa gi-orden ni Ginoong Jesukristo.

Kini susama nga miabut ngadto sa [matag tighupot sa Melchizedek Priesthood]. Ang matag kaigsoonan kinsa naghupot niini nga priesthood nakadawat usab niini sa direkta nga linya gikan sa pagtugyan nga gihimo ni Pedro, Santiago, ug Juan.¹⁴

Pinaagi ni Joseph Smith, ang Ginoo mipadayag og mga kamatuoran nga nagpalahi kanato gikan sa ubang mga simbahan.

Tuguti ako sa paghingalan og pipila sa daghang mga doktrina ug mga buhat nga nagpalahi kanato gikan sa tanang uban nga mga simbahan, ug ang tanan miabut pinaagi sa pagpadayag ngadto sa batan-ong Propeta. Kini pamilyar nganha kaninyo, apan kini takus nga balik-balikon ug hunahunaon.

Ang Diosnong Kapangulohan

Ang una niini … mao ang pagpaila sa Dios Mismo ug sa Iyang Pinalanggang Anak, ang nabanhaw nga Ginoong Jesukristo. Ang talagsaong pisikal nga pagpakita sa Dios mao, sa akong paghukom, ang labing mahinungdanon nga hitabo sukad sa pagkatawo, kinabuhi, pagkamatay, ug Pagkabanhaw sa atong Ginoo diha sa kinatung-an sa panahon.

Kita walay rekord sa bisan unsang lain nga hitabo nga makaparehas niini.

Sulod sa gatusan ka mga tuig ang mga tawo nagpundok ug naglalis kalabut sa kinaiyahan sa Pagkadios. Gipundok ni Constantino ang mga iskolar sa nagkalain-laing mga partido sa Nicaea sa tuig 325. Human sa duha ka bulan sa mapait nga debate sila nagsabut og katin-awan diin sulod sa mga henerasyon nahimong doktrinal nga pamahayag sa mga Kristyano kalabut sa Diosnong Kapangulohan.

Gidapit ko kamo sa pagbasa niana nga katin-awan ug itandi kini sa pahayag sa batang lalaki nga si Joseph. Nag-ingon lamang siya nga ang Dios mibarug sa iyang atubangan ug misulti ngadto kaniya. Si Joseph nakakita Kaniya ug nakadungog Kaniya. Ang porma niya sama sa usa ka tawo, may lawas ug unod. Sa Iyang kilid mao ang nabanhaw nga Ginoo, usa ka lain nga tawo, kinsa Iyang gipaila isip Iyang Hinigugmang Anak ug ngadto kinsa si Joseph usab nakigsulti.

Akong itanyag nga sa mubong panahon nianang talagsaon nga panan-awon nakakat-on og daghan si Joseph kalabut sa Dios kay sa tanang mga iskolar ug mga kaparian sa nanglabay nga panahon.

Niining balaan nga pagpadayag dihay gibalik nga pagpamatuod nga dili kaduha-duhaan ang katinuod sa literal nga Pagkabanhaw ni Ginoong Jesukristo.

Kini nga kahibalo kalabut sa Dios, natago gikan sa kalibutan sulod sa gatusan ka mga tuig, mao ang una ug labing importanteng butang nga gipadayag sa Dios ngadto sa Iyang pinili nga sulugoon.¹⁵

Ang Basahon ni Mormon isip kauban nga saksi sa Biblia

“Ang Basahon ni Mormon … namulong ingon ug tingog gikan sa abug sa pagpamatuod sa Anak sa Dios.”

Sunod mamulong ako kabahin sa laing importante kaayo nga butang nga gipadayag sa Dios.

Ang Kristyanong kalibutan nagdawat sa Biblia isip ang pulong sa Dios. Kadaghanan walay ideya kon sa unsang paagi miabut kini kanato.

Bag-o lamang akong nakahuman og basa sa usa ka bag-ong gimantala nga basahon sa usa ka bantugang iskolar. Kini tataw gikan sa impormasyon nga iyang gihatag nga ang lain-laing mga basahon sa Biblia gitingub og makita nga dili maayo nga paagi ang pagkahan-ay. Sa pipila ka sitwasyon, ang mga panulat wala himoa hangtud sa dugay na kaayong panahon nga nahuman ang mga panghitabo nga ilang gihulagway. Ang usa ka tawo makapangutana,“Tinuod ba ang Biblia? Tinuod ba gyud ni nga pulong sa Dios?”

Among gitubag nga kini mao, kutob nga kini husto ang pagkahubad. Ang kamot sa Ginoo diha sa pagbuhat niini. Apan karon kini wala magbarug nga nag-inusara. Adunay lain nga saksi sa mahinungdanon ug importante nga mga kamatuoran nga makita diha niana.

… Ang Apostol Pablo nagpahayag nga “Ang bisan unsa nga sumbong kinahanglan paluyohan sa pagpanghimatuod sa duha o tulo ka mga saksi” (2 Mga Taga-Corinto 13:1).

Ang Basahon ni Mormon miabut pinaagi sa gasa ug gahum sa Dios. Namulong kini ingon nga tingog gikan sa abug sa pagpamatuod sa Anak sa Dios. Naghisgot kini sa Iyang pagkatawo, sa Iyang pangalagad, sa Iyang Pagkalansang sa Krus ug Pagkabanhaw, ug sa Iyang pagpakita ngadto sa mga matarung diha sa yuta sa Bountiful didto sa kontinente sa Amerika.

Mahikap kini, mabasa kini, nga mahimong masulayan. Nagdala kini sulod sa mga tabon niini og saad sa iyang balaan nga gigikanan. Minilyon karon ang misulay sa saad ug nakakita nga kini tinuod ug sagrado nga rekord. …

Ingon nga ang Biblia mao ang testamento sa Karaang Kalibutan, ang Basahon ni Mormon mao ang testamento sa Bag-ong Kalibutan. Mag-uban kini sa pagpahayag kabahin ni Jesus isip ang Anak sa Amahan. …

Kining sagrado nga basahon, nga mitungha isip usa ka pagpadayag sa Makagagahum, sa tinuod mao ang lain nga testamento sa pagkabalaan sa atong Ginoo.¹⁶

Awtoridad sa priesthood ug organisasyon sa Simbahan

Ang priesthood mao ang awtoridad sa paglihok diha sa pangalan sa Dios. … Nakabasa ako bag-ohay lamang og [usa] ka basahon [nga] may kalabutan sa Apostasiya sa karaang Simbahan. Kon ang awtoridad niana nga Simbahan nawala, sa unsa nga paagi kini ipahiuli?

Ang awtoridad sa priesthood miabut gikan lamang sa usa ka dapit nga kini mahimo nga magagikan, ug kana gikan sa langit. Kini gitugyan ubos sa mga kamot niadtong kinsa naghupot niini sa dihang ang Manluluwas nagpuyo sa yuta. …

Unsa ka nindot sa padayag nga sumbanan sa pagpahiuli nga migiya ngadto sa pagtukod sa Simbahan sa tuig 1830. … Ang pangalan gayud sa Simbahan nagagikan sa pagpadayag. Kang kinsa nga Simbahan kini? Kang Joseph Smith ba kini? Kang Oliver Cowdery ba kini? Dili, kini ang Simbahan ni Jesukristo nga gipahiuli nganhi sa yuta niining ulahing mga adlaw.¹⁷

Ang pamilya

Laing importante kaayo ug linain nga pagpadayag nga gihatag ngadto sa Propeta mao ang plano alang sa mahangturon nga kinabuhi sa pamilya.

Ang pamilya usa ka nilalang sa Makagagahum. Kini nagrepresentar sa labing sagrado sa tanang mga relasyon. Kini nagrepresentar sa labing seryuso sa tanang mga buhat. Kini ang sukaranang organisasyon sa katilingban.

Pinaagi sa mga pagpadayag sa Dios ngadto sa Iyang Propeta miabut ang doktrina ug awtoridad ubos diin ang mga pamilya giusa og seal dili lamang niini nga kinabuhi apan sa tanang kahangturan.¹⁸

Ang ka inosente sa gagmay nga mga bata

Ang ka inosente sa gagmay nga mga bata lain nga pagpadayag diin ang Dios naghatag pinaagi ni Propeta Joseph. Ang kinatibuk-ang pagbansay mao ang bunyag sa mga masuso aron sa pagkuha sa mga epekto sa unsay gihulagway isip ang sala ni Adan ug ni Eva. Diha sa doktrina sa Pagpahiuli, ang bunyag maoy alang sa kapasayloan sa indibidwal ug personal nga mga sala. Kini nahimo nga pakigsaad tali sa Dios ug sa tawo. Kini gibuhat diha sa edad sa pagkamay-tulubagon, kon ang tawo igo na ang panuigon sa pag-ila sa matarung gikan sa sayop. Pinaagi kini sa pagpaunlod, sa pagsimbolo sa kamatayon ug paglubong ni Jesukristo ug sa Iyang pagbangon sa Pagkabanhaw¹⁹

Kaluwasan alang sa mga patay

Magpadayon ako sa paghisgot og laing gipadayag nga kamatuoran. Kita gisultihan nga ang Dios walay pinalabi nga mga tawo, ug bisan niana, walay lain nga simbahan nga akong namatngunan, nga ang pagsangkap gihimo alang niadtong nangamatay sa pagdawat sa matag panalangin nga nadawat sa mga buhi. Ang mahinungdanong doktrina sa kaluwasan alang sa mga patay talagsaon niini nga Simbahan. … Ang mga patay gihatagan og samang oportunidad ingon sa mga buhi. Usab, unsa ka mahimayaon ug katingalahan nga pagsangkap ang gihimo sa Makagagahum pinaagi sa Iyang pagpadayag ngadto sa Propeta.²⁰

Ang kinaiyahan, katuyoan, ug kalagmitan sa mga anak sa Dios

Ang mahangturon nga kinaiyahan sa tawo gipadayag na. Kita mga anak sa Dios. Siya mao ang Amahan sa atong mga espiritu. Nagpuyo kita isip espiritu sa wala pa kita moanhi dinhi. May personalidad kita. Natawo kita niini nga kinabuhi ubos sa balaang plano. Ania kita dinhi aron sa pagsulay sa atong katakus, naggamit sa atong kabubut-on nga gihatag sa Dios kanato. Kon kita mamatay magpadayon kita nga buhi. Ang atong mahangturon nga kinabuhi naglangkob og tulo ka bahin: una, kinabuhi nga wala pa dinhi sa yuta; ikaduha, ang atong kinabuhi dinhi sa yuta; ug ikatulo, ang atong kinabuhi human mamatay. Sa kamatayon kita mamatay niini nga kalibutan ug mobalhin pinaagi sa tabil ngadto sa kalibutan nga kita takus nga mosulod. Kini, usab, talagsaon, mahinungdanon, ug bililhong doktrina niini nga Simbahan nga miabut pinaagi sa pagpadayag.²¹

Pagpadayag karong panahona

Itanyag ko kining mubo nga summary sa hilabihan ka grabeng pagbu-bu og kahibalo ug awtoridad gikan sa Dios diha sa ulo sa Iyang Propeta. … Adunay usa pa nga akong kinahanglan gayud nga hinganlan. Kini mao ang baruganan sa pagpadayag karong panahona. Ang artikulo sa hugot nga pagtuo nga gisulat sa Propeta nagpahayag:

“Kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.” (Mga Artikulo sa Hugot nga Pagtuo 1:9).

Ang usa ka nagtubo nga simbahan, usa ka simbahan nga nagkaylap sa tibuok yuta niining malisud nga mga panahon, nagkinahanglan og kanunay nga pagpadayag gikan sa trono sa langit sa paggiya ug sa pagpauswag niini.

Uban sa pag-ampo ug mabalak-ong pagtinguha sa kabubut-on sa Ginoo, kami mopamatuod nga ang direksyon gidawat, nga ang pagpadayag miabut, ug nga ang Dios nagpanalangin sa Iyang Simbahan samtang kini naglihok diha sa dalan nga padulngan.

Diha sa solido nga sukaranan ni Propeta Joseph nga ang balaang calling ug ang mga pagpadayag sa Dios, nga miabut pinaagi kaniya, nagpadulong kita sa unahan.²²

Ingon nga ika-15 sa linya gikan ni Joseph Smith ug nagdala sa propetikanhong kupo nga miabut diha kaniya, ako sa ligdong nga paagi nagpahayag sa akong pagpamatuod nga ang asoy ni Propeta Joseph sa [mga hitabo sa Pagpahiuli] tinuod, nga ang Amahan … misaksi sa pagkabalaan sa Iyang Anak, nga ang Anak mitudlo sa batang lalaki nga propeta, ug nga dihay sunod-sunod nga mga hitabo nga midangat ngadto sa pag-organisar sa “mao lamang ang tinuod ug buhi nga simbahan diha sa ibabaw sa tibuok yuta” [D&P 1:30].²³

Mga Sugyot alang sa Pagtuon ug Pagtudlo

Mga Pangutana

Ngano nga ang mga tawo sa kalibutan nagkinahanglan sa Simbahan ug sa ebanghelyo ni Jesukristo nga mapahiuli? (Tan-awa sa seksyon 1.) Unsa ang pipila ka mga paagi nga giandam sa Ginoo nga agianan alang sa pagpahiuli sa ebanghelyo? (Tan-awa sa seksyon 2.)
Pamalandungi ang mga pagtulun-an ni Presidente Hinckley mahitungod sa Unang Panan-awon (tan-awa sa seksyon 3). Sa unsang paagi ang inyong pagpamatuod sa Unang Panan-awon miimpluwensya kaninyo?
Nganong gikinahanglan nga ang priesthood ipahiuli pinaagi sa langitnong mga mensahero? (Tan-awa sa seksyon 4.) Nganong importante nga ang mga tighupot sa Melchizedek Priesthood makasubay sa ilang awtoridad sa priesthood ngadto ni Jesukristo?
Sa seksyon 5, ribyuha ang summary sa pipila ka mga kamatuoran nga miabut pinaagi sa pagpadayag ngadto ni Propeta Joseph Smith. Sa unsa nga paagi kini nga mga kamatuoran mipanalangin sa inyong kinabuhi? Unsaon kaha nato pagtabang ang mga kabataan nga makasabut ug magpasalamat niini nga mga kamatuoran?

May Kalabutan nga mga Kasulatan

Isaias 2:1–3; Mga Buhat 3:19–21; Pinadayag 14:6–7; 2 Nephi 25:17–18; D&P 128:19–21

Tabang sa Pagtuon

“Ang inyong pagtuon sa ebanghelyo labing epektibo kon kamo gitudloan sa Espiritu Santo. Sugdi kanunay ang imong pagtuon sa ebanghelyo pinaagi sa pag-ampo alang sa Espiritu Santo nga motabang kanimo nga makat-on” (Isangyaw ang Akong Ebanghelyo [2004], 18).