Tusi Lesona ma le Taimi o Fetufaaiga a le Peraimeri

Lesona 7: Faatuatua ia Iesu Keriso

Lesona 7

Faatuatua ia Iesu Keriso

Faamoemoega

Ina ia fesoasoani i tamaiti ia malamalama o le atinaeina o le faatuatua ia Iesu Keriso o le mataupu faavae muamua lea o le talalelei.

Sauniuniga

Suesue ma le agaga tatalo ma ia saunia e tuuina atu pe faamatala atu i tamaiti ia mau nei: Mareko 10:46–52; Mataio 3:13–17 ; 3 Nifae 11:8–17; ma le Mataupu Faavae ma Feagaiga 76:19–23.
Valaaulia se tasi e malosi sana molimau ia Iesu Keriso ina ia asiasi atu i le vasega mo ni nai minute i le amataga o le vasega ma fetufaai atu lana molimau ma ona lagona e uiga i le Faaola. Ia mautinoa ua maua mai se faatagaga mai le epikopo po o le peresitene o le paranesi aʻo leʻi valaauliaina se tasi, ma ia logo foi le peresitene o le Peraimeri.
Mulimuli i faatonuga o lo o i lalo ina ia faia ai se siata e faaigoaina “Avea ma se Tagata o le Ekalesia a Iesu Keriso.” (O se faataitaiga o lo o maua i le faaiuga o le lesona.) O lenei siata o le a faaaogaina i isi lesona e fa o lo o sosoo ai, o lea atonu e te manao ai e faapipii i luga o se pepa malō ma valivali. Fai ia lava le telē o le siata ina ia faigofie ona iloa uma e tagata o le vasega. (Atonu foi e te manao e faaaoga le siata i se isi taimi o le fetufaaiga.)
1. Tusi i ni fasipepa upu nei:
  
  Meaalofa a le Agaga Paia
  
  Papatisoga
  
  Faatuatua ia Iesu Keriso
  
  Salamo
2. Faapipii upu tusi taitasi i luga o sitepu e pei ona faaalia i le lesona. O le lesona lenei e faaaogaina ai na o le sitepu o le “Faatuatua ia Iesu Keriso.”
Tusi lolomi le “Fesili mai ia te au po o le a se mea na ou aoaoina i le avea o au ma se tagata o le Ekalesia a Iesu Keriso” i luga o ni tamai fasi pepa mo tamaiti uma.
Aʻo leʻi amataina le vasega, ia tuu se kopi o tusitusiga faavae e fa i se mea e mafai ai e tamaiti ona iloa atu.
Ia saunia e usu pe faitau upu o le pese “Ou Te Lagonaina le Alofa o Loʻu Faaola” (Tusi Pese a Tamaiti, itulau 74); o lo o maua upu i le pito i tua o le tusi lesona lenei.
Fesoasoani i tamaiti na e mafai ona taulotoina le mataupu faavae e fa o le faatuatua ina ia taulotoina se vaega uma latou te mafaia.
O Mea e Manaomia:
1. Se Tusi Paia, se Tusi a Mamona, se Mataupu Faavae ma Feagaiga, ma se Penina Tautele.
2. Ata 3-9, O Iesu Le Keriso (62572; Taga Ata o le Talalelei 240); ata 3-16, Faamaloloina o le Tauaso (62145; Taga Ata o le Talalelei 213); ata 3-1, Ioane Le Papatiso o Lo o Papatisoina Iesu (62133; Taga Ata o le Talalelei 208); ata 3-17, O Lo o Aoao Atu Iesu i le Itu Lalolagi i Sisifo (62380; Taga Ata o le Talalelei 316); ata 3-10, O le Uluai Faaaliga (62470; Taga Ata o le Talalelei 403); ma le ata 3-18, Peresitene Lorenzo Snow.
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Malamalama i le Faatuatua

Gaoioiga faatosina

Faaali atu le ata 3-9, O Iesu Le Keriso. Ia faaali atu pea le ata i le taimi atoa o le lesona.

Gaoioiga faatosina

O ai lenei?

Molimau a le uso asiasi

Faailoa atu le uso asiasi ma taʻu atu i tamaiti ua e valaauina lenei tagata ina ia taʻu mai ni ona lagona e uiga ia Iesu Keriso. Faafetai atu i le uso asiasi pe a maea lana molimau ma tuu atu loa o ia e alu. Pe a alu ese atu o ia, ia fesili atu fesili nei i tamaiti:

Molimau a le uso asiasi

O ai le tagata lea na asiasi mai?
E faapefea ona outou iloa sa iinei le uso asiasi lea?

Mafaufau i se tamaititi po o se isi tagata e le o iai i le vasega i le taimi nei ma fesili atu fesili nei, i le faaaogaina lea o le igoa o le tamaititi e le o iai i avanoa nei:

Molimau a le uso asiasi

Na vaai i le tatou uso asiasi i le asō?
E mafai faapefea e ona iloa sa iai se tatou uso asiasi i le vasega i le asō?

Faamatalaga a le faiaoga

Fesoasoani i tamaiti ina ia malamalama o le tagata e leʻi auai e leʻi vaai i le uso asiasi iinei. Ae peitai, afai e faamatala atu iai e le vasega na sau le uso asiasi, atonu o le a talitonu iai le tagata lea. Ina ia talitonu i se mea e moni ma saʻo e ui lava tatou te leʻi vaai iai, e tatau ona i ai le faatuatua.

Siata

Faaali atu le siata “O le Avea ma Tagata o le Ekalesia a Iesu Keriso.” Faitau faatasi ma tamaiti le ulutala o le siata. Ia toe fai leotele e outou ma tamaiti laiti.

Ia faamalamalama atu o le iai o le faatuatua po o le talitonu ia Iesu Keriso o le sitepu muamua lea o le avea ma tagata o le ekalesia a Iesu Keriso. Tuu le fasi pepa o tusi ai le upu “Faatuatua ia Iesu Keriso,” i luga o le sitepu muamua o le siata. (Mo tamaiti laiti, atonu e te faaalia atu iai se ata o Iesu faatasi ma le upu o lo o tusia i le fasi pepa ina ia faamanatu atu ai ia i latou le uiga.) Ia fai faatasi e oe ma tamaiti matutua ia upu. Taʻu atu i tamaiti, o le a latou aoao e uiga i le faatuatua ia Iesu Keriso i le lesona lenei.

E Molimau le Tusi Paia ma le Tusi a Mamona ia Iesu Keriso

Faamatalaga a le faiaoga

E ui tatou te leʻi vaai ia Iesu, e mafai faapefea ona tatou talitonu ma faatuatua o lo o soifua o ia ma e alofa ia i tatou? ( O isi tagata na vaai ia Iesu ma mafai ona latou taʻuina mai e uiga ia te ia.)

Ia faasino atu i tusi o lo o i luga o le laulau ma faamatala atu o nei tusi ua taua o tusitusiga paia. O lo o taʻuina mai e tusitusiga paia le toatele o tagata o ē na vaai pe na talanoa foi ma Iesu.

Ia uu atu i luga le Tusi Paia. Ia faamanino atu, o se vaega o le Tusi Paia o lo o taʻu mai ai le taimi na soifua ai Iesu i le lalolagi, tuuina atu ana aoaoga i tagata, ma faatuina lana ekalesia. O lo o taʻuina mai e le Tusi Paia tagata na vaai ma iloa Iesu ma le auala na ia fesoasoani atu ai i le toatele o i latou.

Ata ma le tala o tusitusiga paia

Faaali atu le ata 3-16, Faamaloloina o le Tauaso. Faamatala atu i tamaiti le tala ia Patimaio, o se alii tauaso na ola i le taimi o Iesu (tagai i le Mareko 10: 46-52).

Ia faamatala atu, ina ua faalogo Patimaio o le a malaga atu Iesu, na ia tagi atu ia Iesu ina ia alofa atu ia te ia. E toatele tagata na fai atu ia Patimaio e aua le faalavelave ia Iesu ma ia filemu. Ae na faalogoina e Iesu ia Patimaio ma fai atu loa e avatu Patimaio ia te ia. Na ole atu Patimaio ia Iesu ina ia faamalolo ia te ia ina ia mafai ona pupula.

Fai atu i tamaiti e faalogologo aʻo e faitauina atu le Mareko 10:52 ina ia iloa ai le mea na tupu ia Patimaio.

Ata ma le tala o tusitusiga paia

O le a le mea na tupu ia Patimaio? (Na faamaloloina o ia e Iesu. Na mafai ona pupula Patimaio.)

Na fetalai atu Iesu, ua faamaloloina ia Patimaio ona o lona faatuatua. Na talitonu Patimaio e mafaia e Iesu ona faamalolo ia te ia.

Ata ma le tala o tusitusiga paia

O le a se mea ua mafai ona fesoasoani mai ai le tala ia Patimaio ia i tatou ia tatou iloa e uiga ia Iesu? (E alofa Iesu ia i tatou ma o le a ia fesoasoani mai pe a tatou faatuatua ia te ia.)

Ata ma le talanoaina o mau

Tuu le ata 3-1, O Ioane Le Papatiso o Lo o Papatisoina Iesu, i luga o le ata o Patimaio.

Ata ma le talanoaina o mau

O le a le mea o lo o tupu i lenei ata? (O lo o papatisoina Iesu e Ioane le Papatiso.)

Faitau le Mataio 3:17.

Ata ma le talanoaina o mau

Ina ua papatisoina Iesu, o ai lea na fetalai mai le lagi ma faapea mai, “O loʻu Atalii pele lena, ua ou fiafia lava ia te ia”? (Tama Faalelagi.)
O le a se mea ua tatou aoaoina e uiga i le fetalaiga a le Tama Faalelagi? (O Iesu o lona Alo.)

Ia faamalamalama atu na tuuina mai e le Tama Faalelagi se molimau o Iesu o lona Atalii.

Uu atu i luga le Tusi a Mamona. Ia faamalamalama atu, o totonu o lenei tusi ua faaigoaina o le Tusi a Mamona, e mafai ai ona tatou faitau i se faapotopotoga tele o tagata Sa Nifaē i Amerika o ē na vaai ma faalogo ia te ia ina ua mavae lona toetu mai le oti.

Faitau le 3 Nifae 11:8. Tuu le ata 3-17, O Iesu o Lo o Aoao Atu i le Itu Lalolagi i Sisifo, i luga o le ata o le papatisoga o Iesu. Faitau le 3 Nifae 11:9-10. Ia faamalamalama atu na taʻu atu e Iesu i tagata o ia o Iesu Keriso, le Faaola o lē na fai mai ai perofeta o le a sau.

Fesoasoani i tamaiti ina ia malamalama i se fiafia na oo i tagata sa Nifaē ina ua latou iloa o Iesu lea ua sau e pei ia fetalai mai ai. Na fai atu Iesu i tagata ina ia fetagofi i ona lima ma ona vae ina ia latou iloa ai na maliu o ia ma ua toetu.

Ata ma le talanoaina o mau

O le a se mea e mafai ona tatou aoaoina mai e uiga i le asiasiga a Iesu i tagata Sa Nifaē? (Na ia maliu ma ua toetu. O lo o soifua o ia.)

Ua Molimau Mai Perofeta o Aso-Nei ia Iesu Keriso

Ata ma le talanoaga

Uu i luga se kopi o le Penina Tautele. Ia faamatala atu o le tala i le uluai faaaliga a Iosefa Samita o loo tusia ai i lenei tusi. Fai atu i tamaiti e faamatala mai po o le a se tele o se mea latou te iloaina e uiga i le uluai faaaliga a Iosefa Samita. (Ia saunia e faamatala atu le tala i le Uluai faaaliga pe afai e le iloa e tamaiti; tagai i le Talafaasolopito o Iosefa Samita 1:7-19.)

Tuu le ata 3-10, O le Uluai Faaaliga i luga o le ata lena o lo o iai. Ia faamamafa atu na vaaia e Iosefa Samita ia Iesu i le faitau selau o tausaga talu ona toetu mai o ia.

Ata ma le tala

Faaali atu le ata 3-18, Peresitene Lorenzo Snow. Ia faamatala atu, aʻo avea o ia ma Peresitene o le Ekalesia, sa asiasi atu Iesu Keriso ia te ia i le Malumalu o Sate Leki.

I se tasi aso aʻo savavali atu Peresitene Lorenzo Snow ma se tama teine a sona afafine i totonu o le malumalu, na ia faamatalaina atu iai se mea na tupu ia te ia. Sa faamatalaina e le tamaitai lenei mea e tusa ai ma le la talanoaga:

“Ina ua ma o ese ma lona potu, ma aʻo ma tutu ai i le ala e ui atu ai i le potu Selesitila, sa fai si oʻu muamua laititi atu i luma o Tamā matua ae ona taofia loa aʻu, ma faapea mai, ‘Faatali laititi lava, Allie, E iai se mea ou te manao e taʻuina atu ia te oe. O iinei tonu lava na faaali mai ai le Alii o Iesu Keriso ia te au i le taimi tonu lava o le maliu o Peresitene Woodruff….’

“Ona toe savali teisi mai lea i luma o Tama matua ma faasino mai lona lima agavale ma faapea mai, ‘O i tonu lava na tu ai, pe tusa ma le tolu futu i luga aʻe o le fola. Na foliga mai sa ia tu i luga o se papa auro.’

“Na taʻuina mai ia te au e Tamā matua le mamalu tele o le Faaola ma ia faamatala mai ona lima ma ona vae, faatasi ai ma le sinasina o lona ofu talaloa, o na mea uma ua matuai pupula ese ma susulu na toetoe lava a le mafai ai ona ia vaai atu ia te ia.

“Ona toe laa mai foi lea i luma Tama matua i oʻu tafatafa ma tuu mai lona lima taumatau i luga o loʻu ulu ma faapea mai: ‘O lenei afafine, ou te manao ia te oe ina ia e manatua o le molimau lenei a lou Tama matua, na ia taʻuina atu ia te oe i ona lava laugutu na ia matuai vaaitino lava i le Faaola iinei i le Malumalu, ma talanoa fesagai ma ia’ “ (Allie Young Pond, siitia mai e Ivan J. Barrett, i le “O Lo o Soifua o Ia! Aua na Matou Vaai ia te Ia,” Ensign, Aok. 1975, itulau 20; o lo o maua foi i le Le Roi C. Snowʻs “Faaaliga Ofoofogia ia Lorenzo Snow,” i le Church News, 2 Ape. 1938, itulau 8.)

Ata ma le tala

O le a se mea ua fesoasoani mai ai le molimau a Peresitene Snow ia te outou ina ia outou iloa e uiga ia Iesu? (O lo o soifua o ia, e iai sona tino, ma e tautala mai o ia i tagata o o tatou taimi.)

E Mafai Ona Iai So Tatou Faatuatua ia Iesu Keriso

Talanoaga

Fai atu le fesili lenei i le toatele o tamaiti.

Talanoaga

Ua e vaai ia Iesu?
E faapefea ona e iloa o Iesu e moni, ma o lo o soifua foi o ia?

Ia faatagaina tamaiti e faaali mai lo latou faatuatua ia Iesu ona o aoaoga a o latou matua, o o latou faiaoga o le Peraimeri, ma tusitusiga paia.

Fesoasoani i tamaiti ina ia malamalama e mafai ona iai lo tatou faatuatua o lo o soifua Iesu ma e alofa ia i tatou aua ua taʻuina mai e tusitusiga paia ma molimau moni a nisi tagata faamaoni. Mai molimau a isi, ua tatou iloa ai e—

Talanoaga

O Iesu o le Alo o le Atua.
E alofa Iesu ia i tatou ma e finagalo o ia e fesoasoani ia i tatou.
E finagalo Iesu ina ia tatou faatuatua atu ia te ia.
Na toetu mai Iesu ma o lo o soifua o ia.
E iai se tino o Iesu ma e talanoa atu foi o ia i tagata.

Ia faamanatau atu i tamaiti, o le iai o le faatuatua ia Iesu Keriso o le sitepu muamua lea i le avea ma se tagata o le ekalesia moni.

Pese

Usu pe faitau upu o le pese, “Ou te Lagonaina le Alofa o Loʻu Faaola.”

Aotelega

Molimau a le faiaoga

Atonu e te manao e filifili se ata mai ata na sa faaaoga i le lesona ma faamatala faapuupuu atu e uiga i lou faatuatua ia Iesu ona o le molimau po o se mea na tupu e talafeagai ma le ata.

Mo se faataitaiga, faaali le ata 3-17, O Lo o Aoao Atu Iesu i le Itu Lalolagi i Sisifo. Ia faamalamalama atu, talu ai na faaali atu Iesu i tagata Sa Nifaē ina ua mavae lona toetu ma faatagaina i latou e fetagofi i ona lima ma ona vae, ua e iloa ai e alofa tele o ia i tagata uma.

Ave i le fale

Ia tuuina atu i tamaiti uma se fasi pepa o lo o iai le faamatalaga “Fesili mai ia te au po o le a se mea na ou aoaoina e uiga i le avea ma tagata o le Ekalesia a Iesu Keriso” o tusia ai i luga. Ia uunaiina i latou ina ia ave lenei fasi pepa i o latou matua ma fetufaai ma o latou aiga i mea na latou iloa e uiga i le faatuatua ia Iesu Keriso.

Ia toe faia e tamaiti le vaega lenei: “Matou te talitonu i le Atua, le Tama Faavavau, ma Lona Alo, o Iesu Keriso” (Mataupu Faavae o le Faatuatua 1:1). Ona fesoasoani lea ia i latou o ē mafai ona taulotoina le mataupu faavae lona fa o le faatuatua e tauloto mai se vaega latou te mafaia.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

Ia uu i luga le Mataupu Faavae ma Feagaiga. Ia faamalamalama atu o lo o taʻu mai ai iina le isi taimi na vaai ai Iosefa Samita ia Iesu. Ao suesue Iosefa ma Sini Rikitone ma mafaufau e uiga ia Iesu ma ana aoaoga, na faapea ona faaali atu ai Iesu ia i laua.

Fai atu i tamaiti e faalogo lelei mai aʻo e faitauina le molimau a Iosefa Samita. Faitau le Mataupu Faavae ma Feagaiga 76:22 ma upu “Aua na ma vaaia o ia” mai le fuaiupu e 23.
- O le a se mea e mafai ona outou aoaoina mai e uiga i le molimau a Iosefa Samita? (O lo o soifua Iesu.)
Ia faamalamalama atu o le faitau mai tusitusiga paia ma le aoao e uiga i tagata na vaai ia Iesu e fesoasoani tele lea ia i tatou ina ia tatou maua le faatuatua ia Iesu. E ui lava atonu tatou te leʻi vaai i o tatou mata faaletino ia Iesu, ae e mafai ona iai lo tatou faatuatua o lo o soifua o ia ma e alofa ia i tatou talu ai molimau a i latou o ē na vaai ia te ia ma latou taʻuina mai e uiga ia te ia i totonu o tusitusiga paia. E mafai ona tatou iloa i o tatou loto o Iesu o lo tatou Faaola pe a tatou ole atu i le Tama Faalelagi e ala i le tatalo.
Fesili atu i tamaiti pe iai nisi e mananao e faamatala mai po o a ni o latou lagona e uiga ia Iesu. E mafai ona latou filifili mai se ata ma taʻu mai pe na faapefea ona faamalosia e le ata lo latou faatuatua. E mafai ona faaaogaina faalua so o se ata.

A tofu uma tamaiti ma le avanoa e fetufaai mai ai ni ona lagona e uiga ia Iesu, ia faamatala atu iai o lo o latou faia se sitepu taua i le sauniuni atu mo le papatisoga.
- O le a lea sitepu? (O le atinaeina o le faatuatua ia Iesu Keriso.)
Faasino atu i le siata ma faitau po o le fai faatasi ma oe ia upu (Faatuatua ia Iesu Keriso.)
Tuu atu i tamaiti e tusia se ata o se tala se tasi o tusitusiga paia na latou aoaoina i le asō.

Ata

becoming a member

Avea ma se tagata

o le

Ekalesia a Iesu Keriso

Meaalofa a le Agaga Paia

Faatuatua ia Iesu Keriso

Papatisoga

Salamo