Lesona 17

Matou te Talitonu o le Tusi a Mamona o le Afioga lea a le Atua

Faamoemoega

Ina ia fesoasoani i tamaiti ia latou malamalama o tusitusiga paia e mafai ona fesoasoani ia latou aoao ma malamalama i poloaiga ma o tusitusiga paia e mafai ona fesoasoani ia i latou ia o mai ia Iesu Keriso.

Sauniuniga

1. Suesue ma le agaga tatalo le 1 Nifae 3-4; 3 Nifae 18:19; ma le Mosaea 23:15. Ia saunia e faamatala atu le tala ia Nifae ma papatusi apamemea.

2. Faatulaga lelei tusi faavae e fa i luga o se laulau; tuu nisi tusi e pei o se tusi faitau, tusi kuka, ma se tusi aoga, i tulimanu eseese o le potu. Ia saunia e talanoaina ma tamaiti ituaiga tusi eseese ua e faaalia ina ia latou malamalama i le faamoemoega o tusi taitasi.

3. Ia saunia e usu pe faitau upu o le “Mataupu e Valu o le Faatuatua” (Tusipese a Tamaiti, itulau 127); o upu e tutusa lelei ma le mataupu e valu o le faatuatua.

4. O Mea e Manaomia:

   1. Tusi faavae e fa.

   2. Nisi tusi, e pei o se tusi faitau, tusi kuka, ma se tusi aoga.

   3. Penisina, laupapa, ma se solo.

   4. Ata 3-41, Ua Sola Lamana; ata 3-42, O Nifae i Tafatafa o le Fale o Lapana; ata 3-43, O Nifae ma Sorama; ma le ata 3-44, O Liae ma Papatusi Apamemea.

5. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

O Tusitusiga Paia o Lo o Aofia ai Poloaiga a le Tama Faalelagi

Gaoioiga faatosina

Tuu ituaiga tusi eseese i tulimanu eseese o le potu ma faamatala laititi atu e uiga i nei tusi. Ona fesili atu lea o fesili nei po o nisi fesili e faatatau i tusi ua e faaalia. A maea ona taliina sao mai e tamaiti ia fesili, ona tuu lea e o i le tulimanu o le potu o lo o iai lena tusi ma faasino mai ia te oe.

Gaoioiga faatosina

• O le fea o nei tusi o lo o faamatala mai ai le faiga o se keke?

• O le fea o nei tusi o lo o aofia ai ni tala faatusa?

• O le fea o nei tusi o lo o iai aoaoga a perofeta lea o le a fesoasoani ia i tatou e tausia poloaiga?

Ia faamalamalama atu e finagalo le Tama Faalelagi ina ia tatou usiusitai i poloaiga. Na ia tauina atu i perofeta e tusia ana afioga ina ia mafai ai ona tatou iloa ana aoaoga ma ana poloaiga.

Gaoioiga faatosina

• O le a le igoa o tusi paia ia na tusitusi ai perofeta i luga? (O tusitusiga paia.)

Ia faamalamalama atu e toatele perofeta na faamaumauina le talalelei ma olaga na ola ai tagata ina ia mafai ai ona tatou iloa po o a nei mea e tau o poloaiga. O nei poloaiga o lo o faamaumauina i totonu o a tatou tusitusiga paia e fa. O nisi taimi tatou te taua o tusi faavae e fa.

Ua Mauaina Mai e Nifae Tusitusiga Paia

Ata, tala mai tusitusiga paia, ma le talanoaga

Ia faamalamalama atu o le Tusi a Mamona o lo o aofia ai se tala o lo o faaali mai ai le taua tele o tusitusiga paia ia Nifae ma lona aiga.

Tau atu i tamaiti, na faatonuina e Liae ona atalii - Lamana, Lemuelu, Sama, ma Nifae- o lo o finagalo le Alii ina ia latou toe foi atu i Ierusalema ma aumai papatusi apamemea mai se tagata e igoa ia Lapana. O papatusi apamemea o se tusi o tusitusiga paia e faia mai itulau apamemea. Sa lei mananao Lamana ma Lemuelu e toe foi atu i Ierusalema ma sa matuai feita lava i laua, ae sa naunau Nifae ma Sama e o atu.

Ina ia faaali atu i tamaiti pe o a ni lagona o Nifae e uiga i le o atu e aumai papatusi apamemea, ia faitau leotele le 1 Nifae 3:7 ma talanoaina faatasi ma tamaiti.

Ata, tala mai tusitusiga paia, ma le talanoaga

• Aisea lava na naunau ai Nifae e alu? (Na ia iloa o le a saunia e le Alii se auala mo ia e faataunuuina ai le poloaiga ua ia tuuina atu.)

• O le a le folafolaga na faia e Nifae? ( O le a ia alu atu ma faia mea ua poloaiina ai o ia e le Alii.)

Ia faamalamalama atu na tauanauina e Nifae ona uso latou te o.

O Lamana na alu atu muamua i le fale o Lapana. Na ia fesili atu ia Lapana mo papatusi apamemea. Sa lei mafai ona tuuina atu e Lapana ia Lamana ia papatusi ma sa ia faafefe o le a fasiotia o ia. Sa fefe Lamana ma tamoe atu i ona uso. Faaali atu le ata 3-41, Ua Sola Lamana. Na manao o ia e toe foi atu i lo latou tama o lo o i le vao.

Na fai atu Nifae ia i latou e tatau ona latou usiusitai i le poloaiga ina ia aumaia ia papatusi apamemea. Na o atu Nifae ma ona uso i lo latou fale sa iai muamua i Ierusalema ma aumai a latou auro ma siliva. Na latou fuafua e faafesuiai a latou oloa ma papatusi apamemea.

Sa aveina e Lapana a latou auro ma siliva ae lei tuuina atu ia Nifae ma ona uso ia papatusi apamemea. Na ia faatonuina ana au e fasioti ia i latou. Na sosola ese Nifae ma ona uso ma lalafi.

Sa le malilie Lamana ma Lemuelu. Sa la sasaina Nifae ma Sama i se laau. Sa faaali atu se agelu ma faatonuina i laua e taofi. Sa faapea atu le agelu o le a fesoasoani le Alii ia te i latou ina ia aumaia papatusi apamemea ma sa tau atu iai e usiusitai ia Nifae.

Faaali atu le ata 3-42, O Nifae i Tafatafa o le Fale o Lapana.

O le taimi lea ua alu atu ai Nifae e aumai papatusi. Sa faatali atu ona uso i tafatafa o le pa o le aai ao ia tolotolo atu i le fale o Lapana. Sa vaaia e Nifae ia

Lapana o lo o taoto mai o ia i le palapala ua onā. Na faatonuina e le Agaga Paia ia Nifae e fasioti ia Lapana. Sa le mautonu ia Nifae aua e lei manao o ia na te fasiotia se tasi.

Na manatua e Nifae le taua tele o tusitusiga paia, ma na ia iloa e le mafai ona ia mauaina ia papatusi apamemea seiloga e fasiotia ia Lapana. O lea na ia faia ai e pei ona faatonuina e le Agaga Paia. Na ia fasiotia Lapana ma ofu i lavalava o Lapana.

Ona faafoliga ai lea o ia e pei o Lapana.

Faaali atu le ata 3-43, O Nifae ma Sorama.

Na fai atu Nifae ia Sorama le auauna a Lapana ina ia aumai papatusi apamemea ma mulimuli atu ia te ia. Sa usiusitai ia Sorama, ma lona manatu ai o Lapana ia Nifae. Mulimuli ane, na faamatala atu iai e Nifae ia Sorama ua faatonuina o ia ma ona uso e le Alii ina ia aumai ia papatusi apamemea. Sa talitonu Sorama ia te ia. Na manao foi o ia e usiusitai. Na o atu faatasi o ia ma Nifae ma ona uso i le vao i le mea o loo iai Liae.

Faaali atu le ata 3-44, O Liae ma Papatusi Apamemea.

Na faitauina e Liae ia papatusi apamemea. O lo o aofia ai i papatusi ia poloaiga ma nisi o tala e uiga ia Mose ma isi perofeta. O lo o aofia ai foi le talaaga o le aiga o Liae. Na faatonuina ia Liae e alu ma ave ia papatusi apamemea i le nuu folafolaina.

Ata, tala mai tusitusiga paia, ma le talanoaga

• O ai e ona tusitusiga ia sa i luga o papatusi apamemea?

• a mea na tusia i luga o papatusi apamemea?

• apamemea?

Gaoioiga

Ia faia le taaloga lenei ina ia fesoasoani i tamaiti ia malamalama pe aisea na taua tele ai i le aiga o Liae lo latou aveina o papatusi apamemea o lo o aofia ai faamaumauga tusitusia o poloaiga, i le nuu na folafolaina.

O le autu o le taaloga o le faaali atu lea pe faapefea ona mafai ona fenumiai ia upu o lo o i tusitusiga paia pe afai e le tusiaina i lalo.

Faanonofo tamaiti i se lio. Musumusu atu i le tamaititi o lo o i lou itu taumatau, “O le a ou usitai i poloaiga a le Tama Faalelagi.” Ona musumusu atu lea e le tamaititi lena le mea na ia faalogo iai i le tagata o lo o i lona itu agavale po o le taumatau. Ia faaauau pea ona pasi atu le savali seia faalogo uma iai tagata o lo o i le lio. Tuu atu i le tamaititi na mulimuli lava e faamatala mai mea na ia faalogo iai. Atonu o le a le faamatalaina mai e le tamaititi le savali sao. (Afai e tutusa lelei le savali, e mafai ona e faamalo atu i tamaiti i lo latou lelei tele. Ona toe taumafai lea o se isi savali e lua pe tolu fuaiupu.) Tau atu i tamaiti le savali na e amata ai.

Ia faamalamalama atu e faigofie lava ona galo pe fenumiai ia tala po o savali e le tusiaina i lalo. Sa tusia i lalo e perofeta ia aoaoga a le Tama Faalelagi ma Iesu Keriso ina ia le mafai ai ona faagaloina. O nei aoaoga o lo o i totonu o tusitusiga paia.

Na manaomia e Liae ma lona aiga ia papatusi apamemea ina ia latou manatuaina ai poloaiga ma usiusitai iai.

E Fesoasoani Tusitusiga Paia Ia i Tatou Ia Usiusitai

Gaoioiga e faaaoga ai mau

Ia faamalamalama atu e manaomia lo tatou iloaina o poloaiga e pei lava o le aiga o Liae. E mafai e tusitusiga paia ona fesoasoani ia i tatou ia usiusitai i le Tama Faalelagi ma Iesu Keriso aua o lo o aofia ai le tele o a la poloaiga.

Fai atu i tamaiti e faalogo lelei mai ao e faitauina atu mau nei e lua. Fai atu iai e sii i luga o latou lima pe afai latou te iloaina le poloaiga o lo o aoaoina mai le mau. Faitau le 3 Nifae 18:19 ma le Mosaea 23:15 ma talanoaina faatasi ma tamaiti.

Faamanatu atu i tamaiti, ana fai tatou te le mauaina ia tusitusiga paia, atonu tatou te le manatuaina ia poloaiga ma usiusitai iai. Ona tatou le mauaina lea o faamanuiaga e maua mai le ola ai i poloaiga.

Mataupu faavae o le faatuatua ma le pese

Ia usuina e tamaiti po o le faitauina ia upu o le pese “O le Mataupu e Valu o le Faatuatua.” Ia faamalamalama atu o lenei mataupu faavae o le faatuatua o lo o faamatala mai ai ia i tatou o le Tusi Paia ma le Tusi a Mamona o lo o iai afioga a le Atua, o lona uiga o lo o aofia ai aoaoga moni. Na faatonuina e le Tama Faalelagi ma Iesu Keriso ia perofeta ina ia latou tusia i lalo nei aoaoga mo tupulaga o le lumanai.

Ia toe faia e le vasega le mataupu e valu o le faatuatua faatasi ma oe. Atonu e mafai ona fesoasoani i tamaiti matutua e taulotoina uma. Faamanatu atu i tamaiti ua tatou maua ia tusitusiga paia ina ia mafai ona tatou aoao i poloaiga lea o le a fesoasoani ia i tatou e filifili le sao ma tausia a tatou feagaiga o le papatisoga.

Aotelega

Talanoaga

Ia talanoaina e le vasega mea o loo ta’ ua i lalo:

Talanoaga

• O a mea e tatau ona tatou faafetai atu ai i le Tama Faalelagi i a tatou tatalo? (Ia talia uma tali, ae faamamafa atu tusitusiga paia).

• O a mea e tatau ona tatou ole atu ai i a tatou tatalo? (Fesoasoani mai ia usitai i poloaiga.)

Tofi se tamaitiiti e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

1. Amata ona faamatalaina le tala ia Nifae ma ona uso i lo latou toe foi atu i Ierusalema e aumai papatusi apamemea mai ia Lapana. Ia faaopoopoina e tamaiti taitoatasi se fuaiupu i le tala, e faamatala mai ai le mea o le a tupu. Ia faamalosia i latou e tuuina mai ni faamatalaga se tele e mafai ona latou manatuaina. Faaaoga ata ina ia fesoasoani ia i latou e manatua le tala. (Afai e sese tali e tuuina mai e tamaiti po o le lē sao foi o le faasologa o le tala, ia fesoasoani atu iai ia faatulaga sao. Ia taliaina ma uunaiina tali uma e tuuina mai.)

2. Ia tusia e se tamaititi se ata i luga o le laupapa po o se fasipepa e tau mai ai pe faapefea ona tausia poloaiga i le vaiaso ona e tau atu lea i tamaiti uma le mea ua ia fuafuaina o le a fai. Ia auauai i le faiga o lea mea ina ia maua uma e tamaiti le avanoa e tusia ai se ata ma faamatala mai. E mafai e tamaiti ona tusia ata o mea e pei o le alu i le lotu, tatalo, fesoasoani i aiga, ma le fetufaai o meataalo.

3. Ia usuina pe faitauina e tamaiti upu o le “Lototele o Nifae” (Tusipese a Tamaiti, itulau 120); o lo o maua upu i le pito i tua o le tusi lesona lenei. Atonu e te manao e fai ni taga po o le faatinoina o upu.

4. Mo tamaiti e mafai ona faitau, ia faia se kopi o le “O Lau Feagaiga o le Papatisoga” mai le pepa na tufaina atu i le faaiuga o le lesona 13. ʻOti ʻoti le pepa e tufaina atu i ni vaega se fa, i le ʻotiʻotiina lea i lalo tonu ifo lava o upu “O au o , ua ou folafola atu,” lalo o upu “ia usiusitai i poloaiga a le Tama Faalelagi,” ma lalo o upu “ua folafola mai e le Tama Faalelagi o le a ia.” Ia faafefiloi ia fasipepa ma fai atu i tamaiti e toe faatulaga lelei. A maea ona toe faatulagaina lelei e tamaiti, ia faitau leotele atu i le vasega le feagaiga o le papatisoga. Ia faamalamalama atu e finagalo le Tama Faalelagi ia tatou tausia a tatou feagaiga na tatou faia i le papatisoga ina ia usitai i ana poloaiga. Na ia tauina atu i perofeta e tusia ana afioga ina ia mafai ona tatou malamalama i ana aoaoga ma ana poloaiga.