Lesona 47
Na Soifua mai Iesu Keriso i le Lalolagi (Kerisimasi)
Faamoemoega
Ina ia fesoasoani i tamaiti ia malamalama i le taua o le fanau mai o Iesu Keriso.
Sauniuniga
-
Suesue ma le agaga tatalo le Helamana 14; 3 Nifae 1; ma le Luka 2. Ia saunia e faitau atu le Helamana 14:5; 3 Nifae 1:13, 12; ma le Luka 2:9-15.
-
Ia saunia se kopi o le paso o le fetu e tufaina atu, o lo o maua i le faaiuga o le lesona, mo tamaiti uma. ʻOti le paso i ni vaega, ma faapipii faatasi pe tuu i totonu o se teutusi mo tamaiti uma.
-
Ia saunia e aoao tamaiti e usu pe faitau upu o le “Stars Were Gleaming” (Tusipese A Tamaiti, itulau 37) ma le “Po Filemu” (Viiga, nu. 116).
-
O Mea e Manaomia:
-
Se Tusi Paia ma se Tusi a Mamona.
-
O ata tipi nei: le fanau mai o Iesu Keriso (ata tipi 33-11), o leoleo mamoe (ata tipi 3-12), o le agelu (ata tipi 3-5), ma Sa Nifaē ma le fetu (ata tipi 3-13).
-
Se pepa lanu mo tamaiti uma.
-
Mea faapipii.
-
Ata 3-73, Samuelu le Sa Lamanā i Luga o le Pa (62370; Taga Ata o le Talalelei 314).
-
-
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.
Faalautelega Fautuaina o le Lesona
Tofi se tamaititi e faia le tatalo amata.
Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.
Na Faailoaina Mai le Fanau Mai o Iesu Keriso e se Agelu
Gaoioiga faatosina
Gaoioiga faatosina
-
Pe ua outou faatalitali ea mo se mea faapitoa e tupu?
-
O le a lena mea? (O tali a tamaiti e mafai ona aofia ai le fanau mai o se pepe fou, se asiasiga mai o latou tama ma tina matutua, se aso fanau, o o latou papatisoga, ma isi mea faapena.)
-
Pe na foliga ea o se taimi umi na faatali ai?
-
O le a se lagona na oo ia te outou ina ua taunuu?
Tuu atu i tamaiti se avanoa e fetufaai mai ai ni mea na latou oo iai ma faaali mai o latou lagona o le fiafia na iai. Atonu e te manao e fetufaai atu foi se mea o lo o e tulimatai atu iai.
Ia faamalamalama atu, talu mai le taimi o Atamu, na folafola mai e lo tatou Tama Faalelagi o le a iai se mea taua o le a tupu. Na ia folafola mai o le a ia auina mai lona Alo i le lalolagi, o lē a avea ma Faaola i le lalolagi. Na tulimatai atu iai tagata amiotonu i lea mea ofoofogia. Na latou iloaina o le a tausia e le Tama Faalelagi lana folafolaga. Na latou faatalitali mo le fanau mai o Iesu.
Mau ma tala o ata tipi
Faaali atu le ata tipi o le fanau mai o Iesu. Fai atu i tamaiti e faamatala atu se mea latou te iloa e uiga i le tala o le fanau mai o Iesu. Fesoasoani i tamaiti taitoatasi e tuu mai sona manatu i le tala.
Mau ma tala o ata tipi
-
O ai sa i le faatoaga e latalata i Peteleema i lena po? (O leoleo mamoe, sa leoleo a latou lafu.)
Faaali atu le ata tipi o leoleo mamoe.
Ia faamatala atu o le po na fanau ai Iesu na faaali atu ai se agelu i nei leoleo mamoe agamalu ma tau atu iai le tala faapitoa o le fanau mai o Iesu.
Faaali atu le ata tipi o le agelu.
Mau ma tala o ata tipi
-
O le a se lagona na oo i leoleo mamoe ina ua latou vaaia le agelu? (Na fefefe le au leoleo mamoe ina ua faaali atu le agelu.)
Faamatala atu i tamaiti e lei malamalama leoleo mamoe e iai se savali faapitoa faapena a le agelu mo i latou. Faitau atu i le vasega le mea na tupu o lo o i le Luka 2:9-15.
Mau ma tala o ata tipi
-
O le a so outou manatu o le a se lagona o le au leoleo mamoe ina ua latou faalogo i le tala e uiga i le fanau mai o Iesu?
-
O le a le mea na faia e leoleo mamoe e faaalia ai lo latou fiafia e tusa ma le fanau mai o Iesu? (Na latou o atu ma sue le pepe o Iesu i Peteleema.)
Ia faamalamalama atu, talu ai ona sa faaali atu se agelu i leoleo mamoe ma tau atu ia i latou le fanau mai o Iesu Keriso, na latou iloa ai o Iesu o le Alo o le Tama Faalelagi ma o lona fanau mai e taua tele.
Pese
Ina ia fesoasoani i tamaiti ia latou lagonaina le olioli ma le fiafia i le fanau mai o Iesu, ia fesoasoani atu iai i le usuina po o le faitauina o upu “Fetu ua Pupula.”
O fetu ua pupula;
Ma le po ua malulu.
O le tala a agelu
Na faalogo i le po.
O pesega ma viiga,
O le Kerisimasi!
Ua faalogoina pea.
Le manino ma le susulu
O lena fetu fou
Na taitai ai makoi
I lena toafa pogisa.
Matagofie le pupula,
E susulu pea
E fai ma taiala
(“Stars Were Gleaming” by Nancy Byrd Turner from Hymns for Primary Worship. Used by permission of John Knox Press.)
A maea ona usuina pe faitauina upu o le pese, ia faamatala atu e le gata ina maua e le au leoleo mamoe lenei savali taua e uiga i le fanau mai o Iesu, ae sa mauaina foi e Sa Nifaē ma Sa Lamanā i Amerika.
Na Faailoaina Atu Le Fanau Mai o Iesu Keriso i Amerika
Ata, mau, ma le tala
Ia faamalamalama atu i le Tusi Mamona atoa, o lo o talanoa ai perofeta e uiga i lo latou tulimatai atu i le fanau mai o Iesu Keriso. O tagata o le ekalesia a Keriso sa latou tulimatai atu i le fanau mai o le Faaola ma tatalo iai mo le tele o tausaga. Faamatala atu le tala lenei i ni au lava upu:
I le toe lima tausaga fanau mai Iesu, na valaauina ai e le Atua se perofeta e ioga ia Samuelu ina ia saunia tagata mo le fanau mai o Iesu. Na te taʻu atu i tagata ina ia salamo ma talitonu i le Faaola. O Samuelu o le Sa Lamanā. Ua amioleaga Sa Nifaē ma e lei faalogo i latou. Sa latou matuai inoino lava ia Samuelu o lea na latou tulieseina ai o ia mai le aai. Ae na oo mai le siufofoga o le Alii ia Samuelu ma fai atu ia te ia e toe foi atu iai. Na ae atu o ia i luga o le pa ma lona lototele ma tau atu i tagata ina ia latou salamo ma saunia i latou mo le fanau mai o Iesu Keriso
Faaali atu le ata 3-73, Samuelu le Sa Lamanā i Luga o le Pa.
Ia faamalamalama atu na tau atu e Samuelu i tagata, toe lima tausaga ona afio mai ai lea o Iesu Keriso i le lalolagi. Ua leva ona tauina mai lenei mea ae o lenei lava o le a tupu. Na tau atu iai e Samuelu e iai ni mea o le a tutupu e tau atu ai ia te i latou ua fanau Iesu i Peteleema. O le po ao lumanai le fanau mai o Iesu o le a iai le malamalama tele i le lagi. O le a matuai malamalama lava ma o le a leai se pogisa i le po. O le a matuai malamalama le po e pei o le ao.
Faitau atu i tamaiti le Helamana 14:5.
Ata, mau, ma le tala
-
O le a le mea na tau atu e Samuelu i tagata Sa Nifaē latou te vaai iai? (O se fetu fou.)
Faamatala atu i tamaiti na tauina atu e Samuelu le Sa Lamanā i tagata Sa Nifaē o le a latou vaaia se fetu fou i le lagi pe a fanau Iesu. Na iloa e Samuelu lenei mea aua na tauina atu ia te ia e se agelu o nei faailoga o le a oo mai.
Ata, mau, ma le tala
-
O le a so outou manatu aisea na auina mai ai e le Tama faalelagi se agelu e tau atu ia Samuelu nei mea? (Ina ia mafai ona ia tauina atu i tagata.)
-
O le a so outou manatu aisea na finagalo ai le Tama Faalelagi e tauina atu e Samuelu le Sa Lamanā i Sa Nifaē nei faailoga? (Ina ia latou iloa ai ua fanau mai Iesu ma taumafai ina ia salamo tagata.)
Ia faamalamalama atu na auina mai e le Tama faalelagi se agelu e tau atu ia Samuelu le oo mai o nei mea. Na finagalo o ia ina ia tulimatai e tagata i Amerika le fanau mai o Iesu Keriso. Na finagalo le Tama Faalelagi ia latou iloa ua latalata mai.
I le lima tausaga talu ona mavae le tauina atu e Samuelu le Sa Lamanā i Sa Nifaē o le a fanau mai Iesu, sa faatalitali ai tagata o le Ekalesia mo faailoga na tauina atu e Samuelu ia te i latou. Sa latou vaavaai i le po e leai se pogisa o le faailoga lena o lona fanau mai. O tagata amioleaga o e na le talitonu i upu a Samuelu, na latou tauina atu i tagata amiotonu o e na mulimuli ia te ia o le a latou fasiotia i latou pe afai e leai ni faailoga i le aso ua latou filifilia.
O le perofeta i le taimi lena o le tagata e igoa ia Nifae. Na popole Nifae i le mea o le a fai e tagata le talitonu i tagata amiotonu pe afai e le taunuu faailoga i le aso ua filifilia e tagata le talitonu. Na matuai tumu o ia i le faanoanoa o lea na ia tatalo atu ai i le Tama Faalelagi ona o nei faafitauli ua latou feagai. Na tatalo Nifae i le aso atoa. Ona oo mai ai lea o le siufofoga o le Alii ia Nifae.
Talanoaina o le mau
Faitau atu i tamaiti le 3 Nifae 1:13.
Talanoaina o le mau
-
O le a so outou manatu o le a se lagona na oo ia Nifae ina ua fetalai atu Iesu ia te ia i nei upu?
Ia faamalamalama atu na faamafanafanaina ia Nifae ma ua ia iloaina o le a fanau mai Iesu i le aso e sosoo ai. O le afiafi lava lena na oo mai ai le faailoga muamua.
Talanoaina o le mau
-
O le a le mea na tupu i lena po?
Tuu atu i tamaiti e tau mai le mea o lo o latou iloaina. Fesoasoani iai ina ia latou malamalama, na oo mai le po ae leai se pogisa. Na matuai ofo tagata aua e foliga mai e leai ma se po. Na maofa i latou ma ua latou pauu ai i le eleele. Na iloa e tagata amiotonu ua oo mai le taimi na latou faatalitali iai mo le tele o tausaga. Na latou iloaina o le a fanau mai Iesu Keriso. Ona tupu ai lea o se isi mea.
Mau ma ata tipi
Faitau atu i le vasega le 3 Nifae 1:21 ma vaai poo le a lena mea.
Faaali atu le ata tipi o Sa Nifaē ma le fetu (o lo o i le isi itu o mea na sa faaaoga muamua).
Ia faamalamalama atu ua fanau mai le Faaola. O le faatuatua sa ia te i latou mo le tele o tausaga ua liua nei i le olioli tele ina ua latou vaaia le fetu fou i le lagi. E ui lava sa le mafai ona malaga atu Sa Nifaē e vaai i le pepe, ae na latou iloa o lona fanau mai na taua tele ia i latou.
Mau ma ata tipi
-
Aisea na finagalo ai le Tama Faalelagi ina ia mautinoa ua vaai Sa Nifaē i le fetu? (ina ia latou iloa ai ua fanau Iesu Keriso.)
-
O le a so outou manatu o le a se lagona na oo ia Sa Nifaē ina ua latou vaaia le fetu?
Ia faamalamalama atu na vaaia foi le fetu lenei i Ierusalema. O le fanau mai o Iesu Keriso na taua uma i tagata. O se mea na tulimatai atu iai tagata mo le tele o tausaga, ma na oo lava ina taunuu.
Pese
Usu pe faitau upu o le “Po Filemu.”
Po filemu! Po paia!
Filemu, susulu
I le Pepe paia naua
Ma le taupou o lona tina.
Moe lelei ia oe.
Moe lelei ia oe.
Po filemu! Po paia!
Leo mamoe, meia!
O mamalu to mai luga;
Agelu pese aleluia!
Fanau mai le Faaola!
Fanau mai le Faaola!
Po filemu!Po paia!
Alo o le Atua
Ua susulu ou fofoga,
I le alofa togiola,
Iesu i lou fanau mai;
Iesu i lou fanau mai.
Aotelega
Faamatalaga a le faiaoga
Ia faamalamalama atu e le manaomia ona tatou vaai atu mo se agelu po o se fetu i Kerisimasi taitasi e tau mai ai ia te i tatou ua fanau mai Iesu Keriso. Ua tatou iloa e moni lena mea. Ua tatou iloa e taua tele mo i tatou. E mafai ona tatou lagonaina le olioli e pei ona lagonaina e leoleo mamoe ma Sa Nifaē ina ua latou iloa ua fanau mai o ia. Tatou te lagonaina lea e ala i lo tatou faalauteleina atu o lo tatou olioli ma le alofa mo isi.
Faamatalaga a le faiaoga
-
E mafai faapefea ona outou fetufaai ma isi lo outou olioli i le fanau mai o Iesu Keriso?
Molimau a le faiaoga
Ia tuuina atu lau molimau i le taua o le fanau mai o Iesu Keriso ma pe mafai faapefea ona tatou fetufaai ma isi le alofa ma le olioli.
Gaoioiga
Tufatufa atu ia vaega o le paso i tamaiti uma. Tuu atu iai e toe tuufaatasi a latou paso ma faapipii i luga o se fasi pepa lanu. A maea uma lava tamaiti, ona faitau lea o le faaupuga o lo o i luga o le fetu: “Aua o le aso nei ua fanau mai ai i le aai o Tavita, lo outou Faaola, o le Alii ia o Keriso” (Luka 2:11).
Talanoaga
Talanoaga
-
O ai na mauaina lea savali mai se agelu? (O leoleo mamoe.)
-
O ai na mauaina le fetu e avea o se faailoga o le fanau mai o Iesu? (O Sa Nifaē ma tagata i Ierusalema.)
Tofi se tamaititi e faia le tatalo faaiu.
Gaoioiga e Faamauoa Mai Ai
Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”
-
Faaaoga ni mea faigofie e faatinoina ai le tala i le fanau mai o Iesu Keriso.
-
Tuuina atu i tamaiti uma se pepa ma ni penivali. Fesoasoani i tamaiti e gagau le pepa ia pei o se faamanuiaga. Tusi le upu Kerisimasi i le itu i luma. Fai atu i le vasega e fai ni faamanuiaga o le Kerisimasi mo o latou aiga e ala lea i le tusia o ata o mea na latou aoaoina mai le lesona.
Aua o le aso nei ua fanau ai i le aai o Tavita, lo outou Faaola, o le Alii ia o Keriso.