Tusi Lesona ma le Taimi o Fetufaaiga a le Peraimeri

Lesona 39: Faaalia o le Alofa Mo o Tatou Matua

Lesona 39

Faaalia o le Alofa Mo o Tatou Matua

Faamoemoega

Ina ia fesoasoani i tamaiti e faaali lo latou alofa mo o latou tama ma tina e ala lea i lo latou usiusitai ma fesoasoani iai.

Sauniuniga

Suesue ma le agaga tatalo Esoto 20:12 ma le Mamona 8:1.
Ia saunia e usuina e le vasega le “O Se Aiga Fiafia” (Tusipese A Tamaiti, itulau 198); o lo o maua upu i le pito i tua o le tusi lesona lenei.
Ia nofouta mo tamaiti na e leai ni o latou matua i le fale po o o latou matua o lo o iai nisi tulaga le maalofia.
O Mea e Manaomia:
1. Se Tusi a Mamona.
2. Se tamai taga fatupi po o se polo.
3. Se kopi o le laau o le aiga mo tamaiti uma (tagai i le faataitaiga o lo o i le faaiuga o le lesona lenei).
4. Ata 3-34, Ua Faapuupuuina e Mamona ia Papatusi (62520; Taga Ata o le Talalelei 306); ata 3-35, Ua Nanaina e Moronae ia Papatusi i le Mauga o Kumora (622462); Taga Ata o le Talalelei 320); ma le ata 3-5, Atamu ma Eva o Lo o Aoaoina a Laua Fanau.
Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

Na Tuuina E Le Tama Faalelagi i o Tatou Matua le Tiutetauave mo i Tatou

Gaoioiga faatosina

Faaali atu le ata 3-5, Atamu ma Eva o Lo o Aoaoina a Laua Fanau.

Gaoioiga faatosina

O le ata lenei o ai? (O Atamu, Eva, ma a laua fanau.)
O le a le mea na finagalo le Tama Faalelagi ina ia aoaoina e Atamu ma Eva i a laua fanau? (O le talalelei. Faamanatu atu i tamaiti sa latou talanoaina muamua lenei mea i se vasega ua tuanai; tagai i le lesona 35.)

Ia faamalamalama atu na tuuina atu e le Tama Faalelagi i o tatou matua ia fanau e tausi ma alofa iai seia oo i se aso e toe foi atu ai ia te ia. E finagalo o ia ina ia tatou aoaoina uma pe faapefea ona tatou agavaa ina ia tatou toe mau faatasi ma ia pe a mavae lenei olaga. E faamoemoeina e le Tama Faalelagi ia matua ina ia latou aoao atu i a latou fanau i poloaiga ma tausia mea e mananao iai a latou fanau. O se tiutetauave sili lenei mo o tatou matua.

Tuu atu i tamaiti uma se kopi o le laau o le aiga. Tuu atu pe fesoasoani atu i tamaiti taitoatasi i le tusiga o igoa po o le tusia o foliga o ona matua i le ogalaau o le laau ma igoa muamua po o foliga o ia ma ona uso ma tuafafine i lālā.

Talanoaga

Aisea na tuuina mai ai e le Tama Faalelagi ia te i tatou ni matua? (Ina ia alolofa ma tausia i tatou ma aoaoina i tatou i poloaiga.)

Ia faamalamalama atu e silafia e le Tama Faalelagi e mafai e fanau ona faaali atu lo latou alofa mo o latou matua. Ua tauina mai e le Tama faalelagi e tatau ona tatou faia lea mea (tagai i le Esoto 20:12). E tele auala e mafai ai ona tatou faaali atu lo tatou alolofa mo o tatou matua.

Tatou te Faaali Atu lo Tatou Alolofa i o Tatou Matua e Ala i lo Tatou Loto Fesoasoani

Tala

Ia faamalamalama atu i le vasega o le fesoasoani atu o se tasi lea auala e faaalia ai lo tatou alolofa i o tatou matua. Toe faamatala atu le tala lenei i ni au lava upu:

Na mafai ona iloa e Ema ua matuai le lavā lona tina. E foliga vaivai o ia ma ua nofo soo foi i lalo e malolo. E oo lava i lona leo ao tautala atu ia Tavita ma Ioane, o tuagane laiti o Ema. Na mafaufau Ema i mea uma e faia e lona tina mo ia ma ia moomoo maimau pe ana mafai ona ia fesoasoani i lona tina ia toe lelei lana faalogona.

Tala

O a nisi o mea e mafai e Ema ona faia e fesoasoani ai i lona tina?

Sa nonofo Ema ma ona tuagane ma latou taaalo faatasi. Na fesoasoani o ia ina ia latou taaalo fiafia ma filemu. Ona ia faataooto lea o i laua i lalo e momoe ae sei fai sina moe a lona tina. Ona fesoasoani lea o Ema i le tuueseina o meataalo a ona tuagane.

Ina ua uma ona sauniaina e tina la latou meaai o le aoauli, ona fesoasoani lea o Ema i le fufuluina o lima o Tavita ma Ioane ma sauni e fai le lotu. Na ata atu tina ia Ema ma tago atu i le fusi mai o ia.

“Faafetai mo lou fesoasoani mai ia te au i lenei aso,” na musumusu atu ai tina i le taliga o Ema.

Talanoaga

Na faapefea ona faaalia le alofa o Ema mo lona tina?
O le a so outou manatu o le a se lagona na oo ia Ema ina ua uma ona ia fesoasoani i lona tina?
O le a so outou manatu o le a se lagona na oo i lona tina?

Gaoioiga

Togi atu le taga fatupi i tamaiti uma ma fesili atu iai se fesili o fesili nei. A maea ona tuuina mai le tali a le tamaititi, ona fai atu lea iai e toe togi atu ia te oe le taga fatupi. Tuu atu le avanoa i tamaiti e tali uma mai ai fesili.

Gaoioiga

O le a le mea e faia e lou tama ma lou tina e faaalia mai ai lo la alofa ia te au?
O le a se mea e mafai ona ou faia e faaalia ai lou alofa mo lou tama ma lou tina?

E Faaalia lo Tatou Alolofa i o Tatou Matua e Ala i le Usiusitai

Talanoaga

Ia faamalamalama atu o le usitai o se tasi lea o auala taua e mafai ona tatou faaali atu ai lo tatou alofa mo o tatou matua.

Tala

Faamatala atu le tala lenei i ni au lava upu e uiga ia Anata ma lona tama:

O lenei ua tuuina atu le vaaiga o le lafu ʻoti ia Anata. O lea ua lava lona matua e na te vaavaaia ai ʻoti ao tataa i latou i luga o le mauga. Ua valu tausaga o Anata ma na faatalitali o ia ma le naunautai i le tiutetauave o le tausia lea o le lafu ʻoti.

Na mafaufau Anata i taeao uma o le a faapotopotoina ai e ia ma lana maile o Numi ia ʻoti ma mulimuli atu i isi lafu ao latou aveina atu ia ʻoti a le nuu i luga o le mauga i le mea e maua ai vao. A oo i afiafi ua alu atu lona tama i luga o le mauga e fesoasoani ia te ia ma Numi i le aumaia o ʻoti i le fale.

Na fai atu lona tama ia te ia, “Aua lava nei e tuua le ala savali o le mauga, Anata. Afai e le iloa se ʻoti, valaau atu iai, ae aua lava nei e tuua le ala savali o le mauga. O le mauga e gaoa ma e matuai matautia lava. Ia e faia le mea lea ou te fai atu ai lou atalii e. Aua nei e alu ese ma le ala savali o le mauga.”

Ua mavae atu lea aso ma lea aso, ma ua foliga mai ua faigofie le tiutetauave fou o Anata ua iai nei, ma ua amata ona fiafia o ia i le umi o le taimi e iai i luga o le mauga.

I se tasi aoauli, na iloa ai e Anata ua tuai atu lona tama e fesoasoani ia te ia. O lea na ia mafaufau ai o le a ia faapotopotoina ia ʻoti ma amata loa ona latou savavali ifo i lalo o le mauga e faafetaui lona tama. Na ia faapotopotoina ia ʻoti faatasi ai ma le fesoasoani a Numi. Na tei o ia ina ua ia iloaina e tolu ʻoti ua leaio Summa, le ʻoti matua, ma lana fanau e toalua. O le a le mea o le a ia faia? Na manatu Anata ua maualuga le mea ua oo iai ia Summa i le ala savali o le mauga lea e masani ona latou o iai i le tele o taimi muamua. E tatau ona ia mulimuli atu iai.

Na ia tuua ia Numi e na te vaaia isi ʻoti, ae amata loa ona ia aʻeaʻe i luga o le mauga. E lei umi ae ona vaaia loa ia Summa ma lana fanau ua matuai mamao ese lava ma le auala o le mauga i se tamai pa vao. E tele maa ma laau, ma sa le mafai e Anata ona ia iloaina le mea o lo o i le va o ia ma Summa. Na iloa e Anata e tatau ona tumau pea i le auala, o lea na ia valaauina ai ia Summa, ae sa toe savali ese ia Summa ua fai si mamao teisi.

Ua amata ona pogisa, ma e lei umi ae le toe vaaia e Anata ia ʻoti e tolu. Na ia iloa e iai se mea e tatau ona faia, o lea na ia mafaufau ai e mulimuli atu iai. E mautinoa lava e mafai ona ia toe aumaia i latou i le auala.

Ina ua amata ona ia tuua le auala, na ia manatua le upu atu a lona tama ia te ia, “Anata, e le tatau ona e tuua le ala savali o le mauga.”

Na iloa e Anata e tatau ona ia usitai i lona tama, o lea na ia nofo ai i lalo ma amata ona valaau mo Summa. E lei pine ae ona faalogoina loa se gasē mai o vaovao. Na tilotilo atu o ia ma vaaia ia le ʻoti fafine ma lana fanau e toalua. Ua latou omai uma lava ia te ia.

Na toe taitaiina atu i latou e Anata i le auala, lea na latou feiloai ai ma lona tama o mulimuli mai ia te ia. Na la aveina atu ia ʻoti i le fale faatasi ai ma Numi o lo o pito i luma.

O le aso na sosoo ai na aveina atu ai e Anata lona tama i le mea na ia faatali ai mo Summa. Na faasino e le tama o Anata ia te ia se vaega tafatō i se pupuvao lata ane. Na semnau e pau iai Anata ina ua ia mulimuli atu ia Summa. Na faafetai Anata i lona loto ona sa ia usitai ma ava i lona tama.

Talanoaga

O le a so outou manatu o le a se lagona na oo ia Anata e uiga i lona tama? (Ua ia alofa ia te ia.)
Na faapefea ona faaali atu e Anata lona alofa i lona tama? (Na usitai o ia iai e ala lea i lona le alu ese mai le auala o le mauga.)
Na faapefea ona avea lona usitai i lona tama ma fesoasoani ia te ia? (E lei alu ese o ia mai le auala o le mauga ma sa faasaoina ai.)

Ia faamalamalama atu o nisi taimi e le mafai ona tatou malamalama pe aisea e fai mai ai o tatou matua e faia lea mea ma lea mea. O matua amiotonu e alolofa i a latou fanau ma mananao i le mea e sili mo i latou. E tatau i fanau ona usiusitai i o latou matua ma faia mea ua fai atu latou te faia. Afai tatou te usiusitai i o tatou matua, ua tatou faaalia atu foi i ai tatou te alolofa ia te i latou

Pese

Usu pe faitau upu o le “O se Aiga Fiafia.”

Na Faaalia e Moronae Lona Alofa mo Lona Tama o Mamona

Tala o tusitusiga paia ma ata

Tau atu i tamaiti o lo o iai i le Tusi a Mamona ni tala eseese e uiga i tagata na faaalia lo latou alolofa i o latou matua e ala lea i le usiusitai ma le fesoasoani atu iai. O se tasi o tala e faatatau lea i le perofeta o Moronae.

Faaali atu le ata 3-35, Ua Natia e Moronae Papatusi i le Mauga o Kumora. Fesili atu i tamaiti po o le a se mea latou te iloaina mai le ata. Faamatala atu iai o Moronae na tanumiaina ia papatusi auro. I ni tausaga mulimuli ane, ona toe foi ane ai lea o ia o se agleu ia Iosefa Samita ma faaali atu iai le mea o lo o iai. O le tama o Moronae o le perofeta o Mamona. Faaali atu le ata 3-34, Ua Faapuupuuina e Mamona ia Papatusi, e sosoo ma le ata o Moronae.

Ia faamalamalama atu na filifilia Mamona e le Tama Faalelagi na te faapotopotoina faatasi ia talafaasolopito ma tusia i luga o papatusi. E na te faaalia pea lona alofa mo le Tama Faalelagi i lona faia lea o mea e poloaiina ai o ia e faia. Na ia aoaoina lona atalii o Moronae, ia faapea foi ona ia faia. Sa alofa Mamona ia Moronae ma na manao ina ia fiafia o ia. Na ia iloa o le alofa ma le usitai i le Tama Faalelagi o le a fesoasoani lea ia Moronae ina ia fiafia.

E oo lava ina ua avea Moronae ma tagata matua, sa faaauau pea ona aoaoina e Mamona lona atalii ina ia alofa i le Tama Faalelagi. Na alofa Moronae i lona tama ma manao e mulimuli i ana faataitaiga.

Talu ai ona o le tele o lona alofa na iai mo lona tama, o lea na ia usiusitai ai i aoaoga a lona tama. Na ia tusia i lalo mea na aoaoina ai o ia e lona tama ina ia mafai ai ona iloa uma e le lalolagi aoaoga a lona tama. Na maliu Mamona ao lei uma papatusi auro, o lea na ave ai e Moronae ia talafaamaumau ma faaumaina.

Mau ma le talanoaga

Faitau atu i le vasega le Mamona 8:1.

Mau ma le talanoaga

Aisea na usitai ai Moronae ia Mamona? (Aua sa ia alofa iai.)
Na faapefea ona faalia le alofa o Moronae mo lona tama? E ala i lona usitai ma lona fesoasoani iai.)

Aotelega

Talanoaga

Aisea na tuuina mai ai e le Tama faalelagi ia i tatou ni matua? (Ia alolofa ia i tatou, aoao i tatou i poloaiga, ma tausia i tatou.)
E faapefea ona tatou faaali atu i o tatou matua tatou te alolofa ia te i latou? (e ala lea i lo tatou usiusitai ma le fesoasoani iai.)
O a ni auala e tutusa ai ia tala ia Anata, Ema, ma Moronae? (I nei tala uma, na faaalia e i latou lo latou alolofa i o latou matua e ala lea i lo latou usiusitai ma le fesoasoani iai.)

Molimau a le faiaoga

Ia tuuina atu lau molimau e uiga ile taua o matua ma faamanuiaga e mafai ona oo mai pe a tatou faaali atu ia te i latou lo tatou alolofa mo i latou. Ia valaaulia tamaiti e filifili se auala se tasi e mafai ona latou faaali atu ai lo latou alolofa mo o latou matua i le gasologa o le vaiaso o le a sosoo ai nei.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

Usu e le vasega le “E Mafai Ona Faavavau Aiga” (Tusipese A Tamaiti, itulau 188); o lo o maua upu i le pito i tua o le tusi lesona lenei.
Fai atu i tamaiti e tusi se ata e faaalia mai ai pe faapefea ona latou faaali atu lo latou alolofa mo o latou matua.
Ia fai le taaloga “Faiaoga, e mafai ona ou” ma tamaiti. Fai atu iai e tutu i se laina sao e faasasaga atu ia te oe. Fai ni faamatalaga e pei o le “(igoa o le tamaititi), fesoasoani i lou tina i le fufuluina o ipu.” E tatau i le tamaititi ona faapea mai, “Faiaoga, pe mafai ona ou fesoasoani i lou tina i le fufuluina o ipu?” po o se isi mea faapena. Afai e faapea mai le tamaititi, ona e fai atu lea, “Tasi le laa agai mai i luma,” ona laa atu lea o le tamaititi ia te oe. Afai e laa atu i luma le tamaititi e aunoa ma lona fesili atu muamua, ona tasi lea o lana laa i tua, po o le laa ese mai ia te oe. O le tamaititi lava e muamua paʻi atu i lou lima o ia lena e manumalo.

Ata

family tree