Lesona 32

Manatuaina o Iesu Keriso Pe a Tatou Aai i le Faamanatuga

Faamoemoega

Ina ia fesoasoani i tamaiti ia latou manatua pea Iesu Keriso ma a latou feagaiga o le papatisoga pe a latou tagofia le faamanatuga.

Sauniuniga

1. Suesue ma le agaga tatalo le 3 Nifae 18:1-11; 20:1-9; ma le Mataio 26:17-30.

2. Ia saunia se taga o lo o iai ni mea eseese.

3. Iloilo le tala ia Iesu ma Fanau a Sa Nifaē mai le lesona 10 i lalo o le ulutala “E Alofa Iesu Keriso i Tamaiti Uma.”

4. Ia saunia e fesoasoani i tamaiti e usuina pe faitauina upu o le “Ou te Lagonaina le Alofa o Lou Faaola” (Tusipese a Tamaiti, itulau 74); o lo o maua upu i le pito i tua o le tusi lesona lenei.

5. O Mea e Manaomia:

   1. Se Tusi a Mamona ma se Mataupu Faavae ma Feagaiga.

   2. Ata 3-57, Ua Faamanuia e Iesu Fanau a Sa Nifaē; ata 3-22, O le Talisuaga Mulimuli (62174, Taga Ata o le Talalelei 225); ata 3-1, Papatisoga o Iesu e Ioane le Papatiso (62133, Taga Ata o le Talalelei 208); ata 3-51, Lauga i le Mauga (62166, Taga Ata o le Talalelei 212); ata 3-56, O Keriso ma Tamaiti (62467, Taga Ata o le Talalelei 216); ata 3-10, O Le Uluai Faaaliga (62470, Taga Ata o le Talalelei 403); ma le ata 3-59, Tufatufaina o le Faamanatuga (62021).

   3. Afai e mafai, ona aumai lea o se fata vai ma se fata areto mo le faamanatuga.

6. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E Mafai E Le Faamanatuga Ona Fesoasoani I ai Tatou Ia Tatou Manatua Iesu Keriso

Gaoioiga faatosina

Aveese auauai i fafo mea laiti na e i totonu o le ato na e sauniaina. Ia faamatala otooto atu iai mea taitasi. A uma, ona tuu atu lea i tamaiti e faamatala atu ia te oe po o le a le mea na e aveeseina muamua i fafo, ma lona lua, lona tolu, ma faapena ai lava.

Ia faamalamalama atu i tamaiti o lenei gaoioiga e fesoasoani ia i latou e iloa ai po o le a le lelei o le mafai ona latou manatua o ni mea.

Faaali atu le ata 3-57, Ua Faamanuia e Iesu Fanau a Sa Nifaē. Fai atu i tamaiti e faamatala mai po o le a se mea latou te manatua e tusa ai ma lenei tala. Faafetai atu iai mo mea ua mafai ona latou tauina maia.

Ata ma le talanoaga

Ia faamalamalama atu iai, ao iai Iesu Keriso ma lona Au Aposetolo i Ierusalema, na ia auina atu Peteru ma Ioane e saunia se taumafataga faapitoa mo ia ma le Au Aposetolo e Toasefululua (tagai i le Mataio 26:17-30).

Faaali atu le ata 3-22, O le Tausamaaga Mulimuli.

Ia faamalamalama atu na tauina atu e Iesu Keriso i lona Au Aposetolo o le taimi mulimuli lea latou te aai faatasi ai ma ia. Ina ua uma le taumafataga, ona faia lea e Iesu se mea e lei faia lava muamua i lenei lalolagi. Na ia faamanuia ma tufatufaina atu le faamanatuga. Na ia tofitofiina le areto ma fai atu i lona Au Aposetolo e faapea, a latou aai e tatau ona latou mafaufau i lona tino ua faamanuaina. Na ia tuuina atu ia te i latou le uaina ma fai atu iai ia latou manatua lona toto o le a faamaligiina i le eleele mo i latou. Na ia fai atu iai e tatau ona latou manatua ua ia tuuina atu lona ola ina ia mafai ona tatou toe mau faatasi e faavavau.

Tala o tusitusiga paia

Ia faamalamalama atu ina ua asiasi atu Iesu i Sa Nifaē, na ia tuuina atu foi iai le faamanatuga (tagai i le 3 Nifae 18:1-11. E pei ona ia faia i Ierusalema, na auina atu ai e Iesu le au soo e toasefululua e aumai le areto ma le uaina. (Ia faamalamalama atu, ua tatou faaaogaina le vai nai lo le uaina mo le faamanatuga i aso nei.) Ina ua o ese atu le au soo, ona fai atu lea o Iesu i tagata e faapotopoto ane i ona tafatafa.

Ina ua toe foi mai le au soo ma le areto ma le uaina, ona tofitofi lea e Iesu Keriso o le areto i ni fasi areto ma faamanuia. Na ia tuuina atu i lona au soo taitoatasi se fasi areto e ai. Ona faatonuina lea e Iesu o lona au soo e tufa atu le areto i le lautele o tagata. Ina ua maea lea vaega, ona faamanuia lea e Iesu o le uaina ma tufatufaina atu i lona au soo ona tufatufa atu ai lea i tagata. Na ia faamalamalama atu iai o le a ia tuuina mai le pule e faamanuia ma tufatufa atu ai le faamanatuga i tagata uma o lana Ekalesia.

Ina ua tofusia uma tagata i le faamanatuga, ona faamalamalama atu lea e Iesu Keriso lona faamoemoega e pei foi ona ia faia i lana Au Aposetolo i Ierusalema.

Faitauina o le mau ma le talanoaga

Faitau leotele atu i tamaiti le 3 Nifae 18:7 o lo o i le Tusi a Mamona. Tau atu iai o le mea lenei na fai atu ai Iesu Keriso ina ua ia tuuina atu le faamanatuga. Ia faamamafa atu o le tagofia o le faamanatuga e faaali atu ai i le Tama Faalelagi o le a tatou manatua pea Iesu Keriso.

Faitauina o le mau ma le talanoaga

• O le a so outou manatu o le a se lagona na oo i tagata Sa Nifaē e uiga ia Iesu Keriso ina ua latou fetagofi atu i le faamanatuga?

Talanoaina o mea taitasi

Faaali atu le ata 3-59, Tufaina Atu o le Faamanatuga.

Talanoaina faatasi ma tamaiti mea e faia i le taimi o le sauniga o le faamanatuga. Faaaoga fesili e aumaia ai manatu nei:

Talanoaina o mea taitasi

1. E masani ona tatou usuina se viiga o le faamanatuga.

2. O i latou e umia le perisitua (e masani lava o ositaulaga) latou te tofitofiina le areto. Faaali atu i tamaiti le fata faamanatuga mo le areto.

3. O se tasi e umia le perisitua (e masani lava o se ositaulaga) e tootuli ma faia le tatalo faamanatuga o le areto. (Atonu e te manao e faitau atu upu o tatalo o le faamanatuga o loo maua i le Moronae 4 ma le 5 ma le Mataupu Faavae ma Feagaiga e 20:77, 79.)

4. O i latou e umia le perisitua (e masani lava o tiakono) latou te tufaina atu le areto.

5. O se tasi e umia le perisitua (e masani lava o se ositaulaga) e tootuli ma faia le tatalo faamanatuga o le vai. (Faaali atu le fata faamanatuga mo le vai.)

6. O i latou e umia le perisitua (e masani lava o tiakono) latou te tufaina atu le vai.

Talanoaina o mea taitasi

• O le a se mea e tatau ona tatou mafaufau iai pe a tufaina mai le faamanatuga? (O Iesu Keriso ma le tele o lona alofa mo i tatou.

E Tatau Ona Tatou Manatua Iesu Keriso i le Taimi o le Faamanatuga

Talanoaga

Talanoaga

• O le a se mea e mafai ona tatou faia e manatua ai Iesu Keriso i le taimi o le faamanatuga?

• O a nisi tala e uiga i le Faaola atonu e mafai ona tatou mafaufau iai i le taimi o le faamanatuga?

• O a nisi o pese atonu e mafai ona tatou mafaufau iai i le taimi o le faamanatuga?

I le taimi o le faamanatuga, e mafai ona tatou mafaufau i mea tatou te iloaina e uiga ia Iesu Keriso ina ia fesoasoani ia i tatou ia manatua ma alolofa ia te ia.

Pese

Fesoasoani i tamaiti e usu pe faitau upu o le “Ou Te Lagonaina le Alofa O Lou Faaola.”

Pese

• O le a se lagona na oo ia te outou ina ua outou usuina po o le faitauina foi o upu o lenei pese?

• O le a se lagona e oo ia te outou pe afai tou te manatunatu i upu o lenei pese i le taimi o le faamanatuga?

Talanoaina o ata

Tau atu i tamaiti o lo o iai ni ata eseese o lo o ia te oe ma e te manao latou te faamatalaina atu taitasi ia te oe. Faaali atu ata ma talanoaina faapuupuu ma tamaiti ata taitasi. Taumafai e faaaafia uma tamaiti. Faaaoga le ata 3-1, Papatisoga o Iesu e Ioane le Papatiso; ata 3-51, Lauga i le Mauga; ata 3-56, O Keriso ma Tamaiti; ma le ata 3-10, O le Uluai Faaaliga.

Toe faamanatu atu i tamaiti e mafai ona latou mafaufau e uiga ia Iesu Keriso e ala lea i lo latou manatuaina o tala e uiga ia te ia ma mafaufau i le tele o lona alofa mo i latou.

Gaoioiga o le tala faatino ma le talanoaga

Tau atu i tamaiti o le a latou faia se gaoioiga e fesoasoani ai ia te i latou ia latou manatuaina mea e tatau ona latou faia i le taimi o le faamanatuga. Filifili ni tamaiti se toalua i le taimi e tasi e faatinoina vaega nei. Fai atu iai e o mai i luma o le vasega. Musumusu taitoatasi atu ia te i laua mea e tatau ona faia. Fai atu i isi tamaiti e vaavaai ma filifili po o a mea e tatau ona latou faia i le taimi o le faamanatuga. Fai atu ia i laua e toalua e faamatala mai po o a mea sa laua mafaufau iai. Ia talanoaina faatasi ma tamaiti le mafuaaga e faatagaina ai e uiga lelei i latou e mafaufau ia Iesu Keriso.

Faafoliga o lo o tusi pe valivali se ata.	Nofo faaaloalo lelei ma mafaufau i tala mai tusitusiga paia e uiga ia Iesu Keriso.
Faafoliga o lo o e musumusu atu i lou tuaoi.	Nofo faaaloalo lelei ma mafaufau e uiga i le tele o le alofa o Iesu mo oe.
Faafoliga o lo o e taalo i se meataalo ma pa’o ai.	Tago atu ma le faaaloalo i le faamanatuga ma tufa atu ma le faaaloalo.

Aotelega

Faitauina o le mau

Ia faamalamalama atu i tamaiti e tatau ona latou manatuaina Iesu Keriso pe a latou fetagofi atu i le faamanatuga ma faapena foi i le vaiaso atoa. Toe faitau le fuaiupu lenei mai le 3 Nifae 18:7: “Afai tou te manatua pea a‘u, tou te mafuta ma lou agaga.”

Molimau a le faiaoga

Ia tuuina atu lau molimau i le fiafia o le Tama Faalelagi pe a tatou taumafai e manatua Iesu Keriso ma usiusitai i ana aoaoga. Ia uunaiina tamaiti e mafaufau ia Iesu Keriso i le isi taimi latou te fetagofi atu ai i le faamanatuga.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoani mo le Faiaoga.”

1. Afai e talafeagai, ia maua mai se ata laititi o Iesu Keriso mo tamaiti uma ma tusi ai se tamai faamatalaga puupuu a le tagata lava ia i le pito i tua. Tau atu i tamaiti e mafai ona latou tuuina a latou ata i se mea e mafai ai ona faamanatu atu ai pea ia te i latou Iesu ma lona alofa mo i latou.

2. Faitau po o le usu le “Tau Mai Tala ia Iesu” (Tusipese A Tamaiti, itulau 57).

   Faamatala mai tala ia Iesu,

   Mea na fai ou te fesili ai ia te ia.

   Ala na ui ai, tala i le vasa,

   Faamatala tala ia Iesu.

   Sei tau mai muamua tamaiti na siomia Ia.

   Ma sa ia faamanuia ia i latou;

   Upu alofa, agalelei,

   Ona fofoga alofa mai.

   Faamatala vavega i le afa,

   Tau goto ai le vaa i le sou naua!

   Na Fetalai atu Iesu,

   Na malu ai ma filemu.

3. Ia valaaulia tamaiti e musumusu atu i lou taliga ae na te lei tuua le vasega se mea se tasi o le a mafaufau iai e uiga ia Iesu Keriso i le isi faamanatuga e sosoo ai pe a tufaina atu. O le musumusu atu o le a faigofie ai le lē toe tauina atu e le isi tamaititi le mea o le a faia e le isi tamaititi ma ole a fesoasoani foi ia te i latou e faaaloalo ao latou tuua le potu.

4. Fai atu i tamaiti e faalogo i le tala lenei e uiga i se tamaititi o lē na fesoasoani iai se tasi na te manatuaina Iesu:

   “Faatoa siitia atu lava Sikoti ma lona aiga i se tasi aai fou. O lona aso muamua lava i lona aiga fou o le aso lea na atoa ai lona valu tausaga, ae sa leai ni ana uo latou te taaalo ma e lei asiasi atu foi ona tama ma tina matutua po o nai ona tei e pei ona sa masani ai.

   “Na faapea atu lona tina, ‘Aua e te popole Sikoti, o le a amata le aoga i le vaiaso lea ona maua ai lea o ni au uo fou.’

   “Ua amata le aoga, ae sa faateleina pea le lagona nofo toatasi o Sikoti. O le toatele o tama e foliga mai e iai uma lava a latou uo. Latou te taaalo ma fiafia faatasi, ae sa le valaauliaina Sikoti e faatasi ma i latou. E matamata mai lava o ia i autafa. A tuua le aoga i aso taitasi, e savali lava na o ia i le fale ….

   “Na toe tepa i tua Sikoti i lea taimi nofo toatasi ma faapea ane, “Ae ou te lei siitia atu, na tuuina mai e lou faiaoga [Peraimeri] se tamai ata faavaa o Iesu. Na ou tuua lenei ata i tafatafa o lou moega. O taimi uma lava ou te vaai ai i lenei ata, ou te lagona ai le fiafia. Ou te manatuaina e alofa Iesu i tamaiti. Na ou lagonaina e alofa o Ia ia te au ma na te silafia ou lagona” (Tusi o Afiafi Faaleaiga [1972], itulau 40).

   • Na faapefea ona fesoasoani ia Sikoti lona manatuaina o Iesu?

   • E mafai faapefea e lo tatou manatuaina o Iesu Keriso ona fesoasoani ia te i tatou?

5. Ia e luiina tamaiti e fifilemu mo se minute se tasi ma mafaufau e uiga ia Iesu Keriso.

6. Faitau pe usu le “Ia Mafaufau Ia Iesu” (Tusipese A Tamaiti, itulau 71).

   E le faigata ona ou filemu

   Ma mafaufau i lou Alii o Iesu

   Na faasatauro o ia mo au nei;

   Ma mea uma na ia mafatia ai.

   Tali:

   E ui ina laititi o au nei,

   Ou te manatua pea Iesu lelei.