Lesona 10

Salamo

Faamoemoega

Ina ia fesoasoani i tamaiti ia malamalama i le mataupu o le salamo ma aisea e taua ai i o tatou olaga.

Sauniuniga

1. Suesue ma le agaga tatalo ma ia saunia e talanoaina le Mataupu Faavae ma Feagaiga e 58:42 ma le 3 Nifae 9:22.

2. Faaaoga le siata “Avea ma se Tagata o le Ekalesia a Iesu Keriso” na saunia i le lesona 7, ma upu o lo o tusia i fasipepa “Faatuatua ia Iesu Keriso.” Ia iai foi le upu salamo ua tusia i se fasipepa ia saunia e faaaogaina i lenei lesona. (Atonu e lelei pe a saunia e iloilo le mataupu e fa o le faatuatua faatasi ma tamaiti ma fesoasoani i tamaiti na e mafai ona taulotoina e tauloto uma pe na o se vaega ao e talanoaina ia mataupu i le taimi o le vasega.)

3. Ia saunia upu nei e tusia i luga o ni fasipepa (ia teuina faalelei ina ia mafai ona e toe faaaogaina i le lesona 22):

   Lagona le sese

   Ole atu mo se faamagaloga

   Faasao le sese

   Aua le toe faia le sese

4. Ia saunia e fesoasoani atu i tamaiti e usuina po o le faia o upu o le fuaiupu lona lua o le pese “Fesoasoani Mai Tama Pele e” (Tusi Pese a Tamaiti, itulau 99); o lo o maua upu i tua o le tusi lesona lenei.

5. Ia manatua o tamaiti e i lalo ifo o le valu tausaga e le taulia ai; e leai se tamaititi e tatau ona lagona le tausalaina.

6. O Mea e Manaomia:

   1. Se Tusi Paia, Se Tusi a Mamona, ma se Mataupu Faavae ma Feagaiga.

   2. Mea faapipii.

   3. Se fusi.

7. Ia faia ni sauniuniga e talafeagai ai mo so o se gaoioiga e faamauoa mai ai e te manao e faaaoga.

Faalautelega Fautuaina o le Lesona

Tofi se tamaititi e faia le tatalo amata.

Toe tulitatao atu i tamaiti pe afai na uunaiina i latou e faataunuuina se mea i le vaiaso talu ai.

E tatau Ona Tatou Salamo Pe a Tatou faia ni Filifiliga Sese

Gaoioiga faatosina

Faaali atu le fusi i tamaiti.

Gaoioiga faatosina

• E iai se isi o outou na iai sona manua?

• O le a sau faalogona na i ai?

• O le a se mea e tatau ona tatou faia pe a iai se manua? (Fufulu ma fusi lelei.)

• Aisea tatou te fufuluina ai ma fusi se manua? (Ina ia fesoasoani ia vave ona pe.)

Pe a tatou faia se mea sese, e pei lava o se manua. E tiga i totonu ma tatou te faanoanoa ai foi aua ua tatou iloa ua tatou faia se mea sese. E mafai e le salamo ona fesoasoani ia i tatou pe a tatou faia se mea sese. O se auala lea e fufuluina ai ma toe faaleleia ai se tiga faaleagaga.

Faapipii le upu salamo o lo o tusia i se fasipepa i luga o le laupapa.

Tala

Faamatala atu i ni au lava upu le tala lenei.

Sa alu atu Ricardo i le faleoloa e faatau mai se filo ma lona tina. Na ia vaaia ni lole o lo o paʻū lo latou tau i luga o le fata. Sa manao iai ae e le lava lana tupe. Ao alu ese atu le faatauoloa e aumai se filo, na tago atu loa Ricardo ma tuu ni lole i totonu o lana taga. Ina ua toe foi mai le faatauoloa, sa totogiina e Ricardo na o le filo. Na ia aia ia lole ao agai atu o ia i le fale. Mulimuli ane, na amata ona mafaufau Ricardo i se mea sa aoaoina atu e ona matua ia te ia.

Ia faitauina e se tamaititi matua le Esoto 20:15 po o lou faitauina leotele atu foi e oe.

Tala

• O le a sou manatu, o le a se lagona na oo ia Ricardo? (Le fiafia.)

• O le a se mea sese na faia e Ricardo? (Na ia gaoia ni lole.)

• O le a se mea e mafai ona faia e Ricardo e aveesea ai lona lagona le fiafia? (salamo.)

Ia faapipiiina e se tamaititi le upu “Lagona le faanoanoa” i lalo ifo o le upu “Salamo.”

Ia faamalamalama atu afai ua tatou iloa ua tatou faia se mea sese, e tatau ona tatou taliaina ua tatou faia se mea sese ma ia tatou lagona lo tatou faanoanoa i le mea ua tatou faia. O lenei lagona o se auala lea a le Tama Faalelagi e fesoasoani mai ai ina ia tatou iloa ua tatou faia se mea sese.

Ia faamalamalama atu o le isi mea e tatau ona faia e Ricardo o le talosaga atu lea mo se faamagaloga mo le mea na ia faia. Ia faapipii e se isi tamaititi le upu “Ole atu mo le faamagaloga.”

Tala

• O ai e manaomia ona ole atu iai Ricardo mo se faamagaloga? (O le Tama Faalelagi ma le faatauoloa.)

Ia faamanino atu, afai tatou te salamo mai ia tatou filifiliga sese, e tatau ona tatou ole atu i le Tama Faalelagi ma le tagata na tatou sese iai ina ia faamagalo i tatou. E manaomia lo tatou taliaina ua tatou faia se filifiliga sese ona ole atu lea mo se faamagaloga mo le mea sese ua tatou faia.

Tala

• E faapefea ona tatou ole atu i le Tama Faalelagi ina ia faamagalo i tatou? (Tatou te ole atu i le tatalo.)

Ia faamalamalama atu o le mea lona tolu e tatau ona faia e Ricardo o le tauamafai lea e faasao le sese. Ia faapipii e se isi tamaititi le upu “Faasao le sese” i lalo ifo o isi upu tusi. Fesoasoani ina ia latou malamalama e manaomia lo tatou taumafai e faasao so o se faafitauli na tatou amataina ona o a tatou filifiliga sese. O nisi taimi e le mafai ai ona tatou faasaoina ia faafitauli (e pei o le suiina o se mea na tatou faaleagaina), ae manaomia lava lo tatou faia o le mea silisili tatou te mafaia.

Tala

• E mafai faapefea e Ricardo ona ia faasaoina lona sese? (Toe foi atu i le faleoloa ma totogi lole po o le faia o se isi galuega mo le faatauoloa e aunoa ma se totogi.)

Ia faamanatu atu i le vasega o le isi mea e tatau ona faia e Ricardo o le mafaufau lea e aua nei toe faia lena filifiliga sese. Ia faapipii e se isi tamaititi le upu “Aua nei toe faia le sese” i lalo ifo o isi upu tusi. Ia faaiuina i le faapea atu, na fuafua Ricardo na te le toe faia lena filifiliga sese. Na ia iloa ua ia matuai salamo faamaoni pe afai ua ia lagona le faanoanoa mo le faia o le mea sese ma ua ia naunau e faaali atu, ole atu ina ia faamagaloina, taumafai e faasao le sese, ma fuafua na te le toe faia lena filifiliga sese. Ao e tauina atu vaega taitasi, ia tusi atu i upu tusi e talafeagai iai.

Pese

Usu pe faitau upu o le fuaiupu lona lua o le pese “Fesoasoani Mai Tama Pele.”

O le Salamo o se Auala Lea i le Avea ma Tagata o le Ekalesia Moni

Siata ma le talanoaga

Ia faamalamalama atu e finagalo Iesu Keriso ina ia tatou iloa pe faapefea ona salamo ina ia mafai ona tatou salamo mai a tatou mea sese pe a avea i tatou ma tagata o lana ekalesia.

Faaali atu le siata “Avea ma Tagata o le Ekalesia a Iesu Keriso” mai le lesona 7.

Faamanatu atu i tamaiti, i se lesona talu ai sa latou aoaoina ai e uiga i se auala se tasi e avea ai ma se tagata o le ekalesia moni. O lena auala o le faatuatua lea ia Iesu Keriso. Aveese le upu tusi o le “Salamo” mai le laupapa ma tuu i luga o le siata i luga ae o le upu tusi “faatuatua ia Iesu Keriso.”

Ia fai leotele e tamaiti nei auala e lua lea e manaomia ina ia avea ai ma tagata o le ekalesia moni-faatuatua ma le salamo.

Ia faamalamalama atu, pe a maea ona papatisoina i tatou e tatau ona tatou salamo i o tatou olaga atoa i so o se taimi lava tatou te faia ai se filifiliga sese. Ua folafola mai e le Faaola ia i tatou so o se taimi lava tatou te salamo faamaoni ai, o le a ia faamagaloina a tatou agasala ma na te le toe manatuaina a tatou agasala.

Faitau atu le Mataupu Faavae ma Feagaiga e 58:42 i tamaiti.

O le a le folafolaga sili na tuuina mai e Iesu ia i tatou pe a tatou salamo?

Faamatalaga a le faiaoga

Ia faamalamalama atu o le salamo e tatau ona avea o se vaega taua o o tatou olaga. Pe a tatou aulia atu le valu tausaga, ua paʻu ia i tatou a tatou filifiliga e faia. Na silafia lelei e Iesu tatou te le faia pea filifiliga sao i taimi uma. E alofa o ia ia i tatou ma ua ia tuuina mai se auala ina ia tatou foiaina ai a tatou filifiliga sese. Ua ia tauina mai ia i tatou e tatau ona tatou salamo ina ia mafai ai ona tatou toe foi atu ma ola faatasi ma ia ma le Tama Faalelagi.

Aotelega

Faamatalaina o le mau

Faitau leotele po o le tuuina atu i se tamaititi matua na te faitauina le fuaiupu muamua o le 3 Nifae 9:22.

Ia faamalamalama atu o le salamo o se faamanuiaga taua tele, lea e mafai ai ona saunia i tatou ina ia toe mau faatasi ma le Tama faalelagi. Ia faamalamalama atu foi, e ui lava ua tatou faia uma mea tatou te mafaia ina ia faasaoina ai o tatou sese, o le a faamagaloina lava i tatou e le Tama Faalelagi ona o le togiola a Iesu Keriso (tagai i le 2 Nifae 25:23).

Molimau a le faiaoga

Ia tuuina atu lau molimau i le mataupu o le salamo, ma valaaulia tamaiti ina ia fesili atu i o latou matua ina ia toe faamalamalama atu iai le uiga o le salamo i o latou aiga. Ia faaalia atu lou agaga faafetai i le Tama faalelagi ma Iesu Keriso ona ua la tuuina mai i tatou tatou te faasaoina a tatou mea sese ina ia mafai ai ona tatou fiafia i lenei olaga ma ia toe foi atu ai ma mau faatasi ma i laua e faavavau.

Tofi se tamaititi e faia le tatalo faaiu.

Gaoioiga e Faamauoa Mai Ai

Filifili mai gaoioiga nei ni gaoioiga o le a sili ona fetaui mo tamaiti. E mafai ona e faaaogaina i le lesona lava ia po o le avea ma se iloiloga po o se aotelega. Mo nisi taiala faaopoopo, tagai i “Taimi o le Vasega” i “Fesoasoaniga mo le Faiaoga.”

1. Ia saunia se pepa lenei mo tamaiti taitoatasi. Fai i tamaiti latou te tusia i lalo auala e fa e faaaogaina i le salamo. Mo tamaiti laiti, ia tusi ni lio mo foliga e lua ma tuu atu i tamaiti e tusia lava e i latou ia foliga i totonu o lio. Ia fautuaina tamaiti e tuu le pepa lenei i totonu o o latou fale i se mea e faigofie ona latou vaai atu iai ina ia faamanatu atu ai ia te i latou pe faapefea ona salamo ma suia o latou lagona faanoanoa i lagona fiafia.

   repent

   Ou Te Lagona Le Fiafia Pe a Uma Ona Ou Salamo

   repent

2. Ia faatinoina e tamaiti taga o le lagona o le faanoanoa ma ole atu i se tasi mo se faamagaloga mo le mea sese ua latou faia. Ia faamamafa atu o le faamaoni e taua tele pe a ole atu mo se faamagaloga. O lenei faamaoni e masani lava ona faaalia mai i o latou leo. Faataitai atu pe faapefea ona ole atu mo se faamagaloga, i le faamaoni ma le le faamaoni, ma ia tuu atu ia i latou e faataitai ma le leo sao ma taga sao.

3. I ni au lava upu, ia faamatala atu le tala i le salamo o Alema le Itiiti ma atalii e toafa o Mosaea (tagai i le Mosaea 27). Ao e faamatalaina atu le tala, ia tagatagai i laasaga e fa o le salamo.