Eksodi 11–12; 14–15

Pashka

Të mbrojtur nga Zoti

Faraoni nuk i lejonte izraelitët të shkonin të lirë, prandaj Zoti i tha Moisiut se Ai do të dërgonte një plagë të fundit. Fëmija i parëlindur i çdo familjeje në tokën e Egjiptit do të vdiste, madje edhe të parëlindurit e kafshëve të tyre.

Eksodi 11:1, 4–10

Zoti premtoi që, nëse izraelitët do t’i ndiqnin udhëzimet e Tij, plaga do të kalonte mbi ta dhe nuk do t’i lëndonte.

Eksodi 12:3, 13, 23

Zoti i tha çdo familjeje izraelite që të flijonte një qengj të përsosur mashkull dhe ta lyente me gjakun e qengjit kornizën e dyerve të shtëpive të tyre.

Eksodi 12:4–7

Zoti u tha izraelitëve që ta gatuanin dhe ta hanin me të shpejtë qengjin. Ndërkohë që hanin, ata duhej të ishin të veshur dhe të ishin gati për t’u larguar nga shtëpitë e tyre. Zoti tha që nëse izraelitët i bënin këto gjëra, të parëlindurit e tyre do të ishin të sigurt nga plaga.

Eksodi 12:8–11

Siç paralajmëroi Zoti, plaga erdhi. Të gjithë të parëlindurit në Egjipt vdiqën, përfshirë djalin më të madh të Faraonit. Por plaga kaloi mbi secilën shtëpi që e kishte gjakun e qengjit në kornizën e derës. Të parëlindurit e izraelitëve u shpëtuan ngaqë iu bindën Zotit.

Eksodi 12:12–13, 29–30

Kur Faraoni pa se vetë biri i tij kishte vdekur për shkak të kësaj plage, ai u tha Moisiut dhe Aaronit që të merrnin të gjithë izraelitët dhe të largoheshin nga Egjipti.

Eksodi 12:31–33

Izraelitët u larguan, por Faraoni ishte i zemëruar. Ai mblodhi ushtrinë dhe qerret e tij dhe i ndoqi izraelitët.

Eksodi 12:37–41; 14:5–8

Izraelitët e ngritën kampin buzë Detit të Kuq. Shpejt Faraoni dhe ushtria e tij iu afruan atyre. Kur izraelitët panë se egjiptianët po afroheshin, ata u frikësuan. Por Moisiu u tha izraelitëve se Zoti do t’i mbronte.

Eksodi 14:9–14

Teksa egjiptianët po afroheshin, Zoti i tha Moisiut që ta ngrinte lart bastunin e tij. Moisiu e ngriti dhe Zoti e ndau detin. Izraelitët e kaluan detin në tokë të thatë. Ata u larguan nga Faraoni dhe ushtria e tij.

Eksodi 14:15–16, 21–22

Ushtria egjiptiane i ndoqi izraelitët. Kur të gjithë izraelitët ishin të sigurt në anën tjetër të detit, Zoti e la ujin të zbriste. Ushtria egjiptiane u mbyt në det.

Eksodi 14:23–30

Izraelitët më në fund ishin të lirë. Ata kënduan këngë, vallëzuan dhe e falënderuan Zotin. Ata e kujtuan gjithmonë Pashkën si kohën kur Zoti ua shpëtoi jetën dhe i nxori nga Egjipti.

Eksodi 14:31; 15:1–22