Mga Kahanas sa Pagtuon sa Kasulatan: Leksiyon 169

Mga Aksiyon nga Magdapit sa Espiritu Santo diha sa Pagtuon sa Kasulatan

Usa ka Dapit diin Makatudlo ang Espiritu

Kitang tanan adunay mga higayon nga magtuon sa kasulatan sa mas kaswal nga paagi ug mas seryoso nga paagi. Samtang kita maghimo og tinuyo nga mga paningkamot sa atong pagtuon sa kasulatan, ipadala sa Langitnong Amahan ang Espiritu Santo aron tabangan tang mailhan ug gamiton ang mga kasulatan diha sa atong kinabuhi (tan-awa ang 2 Nephi 32:3, 5; Juan 14:26). Niini nga leksiyon, ang mga estudyante mahimong magpraktis sa mga kahanas nga magdapit sa Espiritu Santo diha sa pagtuon sa kasulatan.

Pagpangandam sa estudyante: Dapita ang mga estudyante sa paglista sa mga ideya nga ikahatag nila sa usa ka higala nga motabang nila sa pagpauswag sa ilang personal nga pagtuon sa kasulatan. Pwede nilang pangayoan og ideya ang uban nga pwedeng idugang sa ilang listahan.

Posibleng mga Kalihokan sa Pagkat-on

Duha ka managlahing kasinatian

Sa pagsugod sa klase, ikonsiderar ang pagdrowing og duha ka stick nga tawo diha sa pisara, sama sa mosunod, nga magbilin og lugar nga kasulatan sa tunga ug palibot niini. Pwede usab nimong dapiton ang mga estudyante nga magdrowing og parehas nga stick nga tawo diha sa usa ka piraso sa papel o sa ilang mga journal.

Hunahunaa nga kining duha mao ang tipikal nga mga tin-edyer.

• Unsa kaha ang pipila ka butang nga parehas sila?

  Isulat ang mga komento sa mga estudyante sa tunga sa duha ka stick nga tawo.

  Dapita ang mga estudyante nga maghanduraw nga kining duha adunay managlahi kaayong mga kasinatian samtang sila nagtuon sa mga kasulatan. Isulat ang “Adunay makahuloganong mga kasinatian sa pagtuon sa kasulatan” tupad sa usa ka porma og tawo ug ang “Naglisod sa pagtuon sa kasulatan” tupad sa lain nga porma og tawo.

  Ikonsiderar ang pagsulat sa mga tubag sa mga estudyante sa mosunod nga pangutana diha sa ubos sa stick nga tawo.

• Unsa ang pipila ka aksiyon nga mahimong positibo o negatibong makaapektar sa pagtuon sa kasulatan?

Si Elder Gary E. Stevenson sa Korum sa Napulog Duha ka Apostoles mitudlo sa mosunod nga magamit sa atong pagtuon sa kasulatan:

Ang espirituhanon nga mga butang dili mapugos. Mahimo kang mag-ugmad og kinaiya ug usa ka kahimtang nga moimbitar sa Espiritu, ug ikaw makaandam sa imong kaugalingon, apan dili ka makadiktar kon sa unsang paagi o kanus-a moabot ang inspirasyon. Mahimong mapailobon ug mosalig nga ikaw makadawat sa unsay imong gikinahanglan kon ang panahon husto. (“Mga Pag-aghat sa Espiritu,” Liahona, Nob. 2023, 45)

• Sa unsang paagi ang mga pulong ni Elder Stevenson magamit sa pagtuon sa kasulatan?

  Kon wala kini gipahayag sa mga estudyante, tabangi silang mailhan nga maugmad nato ang kinaiya ug dapit nga magdapit sa Espiritu Santo diha sa atong pagtuon sa kasulatan.

• Unsang mga panalangin ang moresulta sa pagdapit sa Espiritu Santo diha sa atong pagtuon sa kasulatan?

  Ikonsiderar ang pagdapit sa mga estudyante sa pagpamalandong sa mosunod nga pangutana.

• Unsa ka kamasaligon sa imong abilidad sa pagdapit sa Espiritu Santo diha sa imong pagtuon sa kasulatan?

Samtang magtuon ka karon, hatagi og pagtagad ang mga ideya o mga impresyon nga makatabang nimo aron madapit sa mas hustong paagi ang Espiritu Santo diha sa imong pagtuon sa kasulatan.

Mga aksiyon nga magdapit sa Espiritu Santo diha sa pagtuon sa kasulatan

Sa dili pa dapiton ang mga estudyante nga tubagon ang mosunod nga mga pangutana, basaha ang mga pangutana ug sultihi ang mga estudyante nga maghunahuna lang sa ilang mga tubag sulod sa lima hangtod napulo ka segundo.

• Unsay nakatabang nimo sa pagdapit sa Espiritu Santo diha sa imong pagtuon sa kasulatan?

• Unsa na ang imong nasulayan nga morag dili epektibo?

Ionsiderar ang pagsulat diha sa pisara sa mga tubag sa mga estudyante sa unang pangutana. Ang pipil ka tubag tingali maglakip sa pagtangtang sa mga makabalda, pag-ampo, ug pagpamalandong. Kon wala nila mahatag kini nga mga tubag, pwede nimo kining idugang diha sa pisara. Hisgotan niini nga leksiyon kining tulo ka ideya. Pwede nimong hisgotan ang ubang aksiyon nga gilista diha sa pisara nga para nimo makatabang sa imong mga estudyante nga madapit sa mas hustong paagi ang Espiritu Santo diha sa ilang pagtuon sa kasulatan.

Pwede ninyong buhaton ang matag usa niini nga mga seksiyon ingon nga usa ka klase. Ingon nga alternatibo, pwede nimong ihan-ay ang matag seksiyon ingon nga istasyon. Pwede nimong mas sayo nga sangonan ang usa ka estudyante nga manguna sa diskusyon sa kada istasyon. Seguroa nga ang mga lider sa panaghisgot adunay igong panahon nga mangandam sa wala pa ang klase. Diha sa klase, pwedeng grupo-grupohon ang mga estudyante ug magpulipuli og libot sa lainlaing istasyon nga gidumala sa estudyante.

Pagtangtang sa mga makabalda

• Unsay posibleng mga makabalda nga makapalisod sa pagbati sa Espiritu Santo panahon sa pagtuon sa kasulatan?

  Ikonsiderar ang paglista sa mga tubag diha sa pisara. Pwedeng hisgotan sa mga estudyante ang mga butang nga sama sa selpon, kakapoy, palibot, ug uban pa.

• Sa imong hunahuna, nganong ang pagtangtang sa mga makabalda makatabang sa pagdapit sa Espiritu Santo diha sa imong pagtuon sa kasulatan?

  Pwede nimong ipasabot nga sagad mangita og hilom nga mga dapit ang Manluluwas dihang gusto Niyang makauban ang Dios (tan-awa ang Mateo 14:22–23). Usa kini ka paagi sa Iyang pagtangtang sa mga makabalda.

• Unsa ang mga pihong mga butang ang imong mahimo aron matangtang ang mga gihisgotan nga mga makabalda?

Ikonsiderar ang paglista sa tubag sa mga estudyante diha sa pisara tupad sa makabalda diin kini magamit.

Kon ang imong mga estudyante naggamit og mga smart phone o uban pang mobile device, makatabang tingali ang pagpakita nila o ang pagdapit og usa ka estudyante aron ipakita kon unsaon pag-on ang airplane mode sa maong mga device. I-off niini nga setting ang mga notipikasyon gikan sa mga mobile app nga makabalda sa mga estudyante samtang nagtuon sa ilang mga kasulatan. Pwede gihapon nga magamit sa mga estudyante ang Gospel Library app samtang naka-airplane mode.

Pag-ampo

Ang pag-ampo sa Langitnong Amahan usa ka epektibong paagi sa pagdapit sa Espiritu Santo diha sa imong pagtuon sa kasulatan.

Dapita ang pipila ka estudyante sa pagpakigbahin kon unsaon nila pagtubag ang mosunod nga pangutana. Dapita sila nga matinahorong mopakigbahin unsa nga mga pulong nga tingali ilang masulti (nga dili ilitok ang pormal nga pag-ampo).

• Unsa kahay imong isulti sa pag-ampo sa Langitnong Amahan sa dili pa magtuon sa mga kasulatan?

Gipakigbahin ni Presidente Dallin H. Oaks sa Unang Kapangulohan kon giunsa niya paggamit ang pag-ampo aron dapiton ang Espiritu Santo diha sa iyang pagtuon sa kasulatan.

Sa dili pa ko magsugod og basa sa mga kasulatan matag adlaw, akong iduko ang akong ulo, ug hangyoon ang Ginoo sa pagpanalangin kanako aron ako makabaton sa Iyang Espiritu nga molamdag kanako nga masabtan unsa ang akong gibasa ug mag-uban kanako sa tibuok adlaw aron motabang kanako sa paghimo og mga desisyon, ug suklan ang mga tentasyon. Ako moawhag kaninyo nga batasanon kana. (“2.3.1. I Love My Daily Scripture Study,” Welcome to Seminary, 2012)

• Unsa ang uban pang mga panabot ang imong naangkon gikan ni Presidente Oaks?

Pamalandongi ang mga kasulatan

Aron tabangan ang mga estudyante nga masabtan kon unsaon nila pagpamalandong samtang nagtuon sila sa mga kasulatan, pwede nimong ipakigbahin ang usa o ang duha sa mosunod nga pamahayag. Dapita ang mga estudyante sa pagpakigbahin kon unsay mipatigbabaw nila gikan niini nga mga pagtulun-an.

Ang Giya ngadto sa mga Kasulatan nagtudlo nga ang pagpamalandong mao ang “paghinuktok ug paghunahuna nga lawom, sa kasagaran diha sa mga kasulatan o uban nga mga butang sa Dios. Kon ilangkob uban sa pag-ampo, ang pagpamalandong sa mga butang sa Dios mahimo nga magdala og pagpadayag ug pagsabot” (Giya ngadto sa mga Kasulatan, “Pagpalandong,” Librarya sa Ebanghelyo).

Gihulagway ni Elder D. Todd Christofferson sa Korum sa Napulog Duha ka Apostoles kon unsay ipasabot sa pagpamalandong sa mga kasulatan.

Maayo man na nga usahay mobasa og basahon sa kasulatan sulod sa gitakda nga oras aron makuha ang kinatibuk-ang kahulogan sa mensahe niini, pero sa pagkakabig, kinahanglan mas hatagan nimo og gibug-aton ang kadugayon sa panahon nga imong gigahin sa mga kasulatan kay sa kadugayon nga nagbasa ka nianang panahona. Naobserbahan nako nga usahay magbasa mo og pipila ka mga bersikulo, mohunong aron mamalandong niini, magbasa og maayo sa mga bersikulo pagbalik, ug samtang naghunahuna mo bahin sa unsay gipasabot niini, mag-ampo para sa panabot, mangutana diha sa inyong hunahuna, maghulat sa espirituhanong mga impresyon, ug mosulat sa mga impresyon ug mga panghunahuna nga moabot aron mo makahinumdom ug makat-on og dugang pa. Sa pagtuon niining paagiha, mahimong dili daghan ang inyong mabasa nga mga kapitulo o mga bersikulo sulod sa tunga sa oras, pero makahatag kamo og luna sa inyong kasingkasing alang sa pulong sa Dios, ug Siya makigsulti kaninyo. (“When Thou Art Converted,” Liahona, Mayo 2004, 11)

• Unsay mipatigbabaw nimo gikan sa gitudlo ni Elder Christofferson?

• Sa imong hunahuna, nganong ang pagpamalandong sa mga kasulatan magdapit sa Espiritu Santo?

• Unsay mga kasinatian nimo (o sa imong kaila) sa pagpamalandong sa mga kasulatan? Seguroa nga dili ipakigbahin ang bisan unsang mga personal o balaan ra kaayo.

Paghimo og plano

Kon gituyok sa mga estudyante ang mga istasyon, papundoka sila og balik ingon nga usa ka klase ug ipakigbahin ang bisan unsa nga mipatigbabaw kanila. Dapita ang kada usa nila nga maghimo og usa ka butang base sa ilang nakat-onan. Pwede nimong ipakigbahin ang mosunod nga pagdapit ngadto kanila aron tabangan sila sa paghimo niini.

Samtang naghunahuna sa imong nakat-onan karon, paghimo og plano nga madapit sa mas maayong paagi ang Espiritu Santo diha sa imong pagtuon sa kasulatan. Tubaga ang mosunod nga mga pangutana diha sa inyong journal sa pagtuon:

• Unsay inyong mahimo aron madapit ang Espiritu Santo sa mas maayong paagi diha sa inyong personal nga pagtuon?

• Unsa kahay resulta kon nag-uban ninyo ang Espiritu Santo samtang nagtuon kamo sa pulong sa Dios?

Pwede ninyong ipakigbahin ang inyong pamatuod kon sa unsang paagi nakatabang nimo ang mga aksiyon nga gihisgotan karon aron dapiton ang Espiritu Santo diha sa inyong pagtuon sa kasulatan ug nakapaduol kaninyo kang Jesukristo.

Dugang nga mga Kapanguhaan

Unsa ang lainlaing mga paagi nga gigamit ni Satanas ang mga makabalda?

Si Elder Alvin F. Meredith III sa Seventy mitudlo nato:

Ang kaaway ingon og determinado nga himoon ang mga maayong tawo nga walay buhaton, o sa labing minos mag-usik sa ilang panahon sa mga butang nga mobalda kanila gikan sa ilang halangdong mga katuyoan ug mga tumong. … Ang kaaway nakasabot nga ang mga pagbalda dili kinahanglan nga daotan o imoral aron mahimong epektibo. (“Tan-aw sa Unahan,” Liahona, Nob. 2021, 115)

Unsaon nako pagdapit og inspirasyon sa akong pagtuon?

Si Presidente M. Russell Ballard (1928–2023) sa Korum sa Napulog Duha ka Apostoles mipakigbahin sa mosunod bahin sa kaimportante sa pagtangtang sa mga makabalda aron mas masinati ang Espiritu Santo.

Dili ka makakonektar sa langit kon daghan kaayo ang gihunahuna. Kinahanglan kang mangita niadtong hilom nga mga panahon sa imong kinabuhi nga ikaw makapamalandong sa mga butang sa Espiritu. Sa akong kasinatian, diha ako makakuha og mga impresyon. (“How I #HearHim: President M. Russell Ballard,” 2020, Librarya sa Ebanghelyo)

Sa unsang paagi nga ang pagtuon sa mga kasulatan hinayhinay nga makahatag og kaayohan?

Gipakigbahin ni Presidente Henry B. Eyring sa Unang Kapangulohan ang iyang hunahuna bahin sa hinayhinay nga pagbasa.

Atong gibahandi ang pulong sa Dios dili lamang pinaagi sa pagbasa sa mga pulong sa mga kasulatan kondili pinaagi sa pagtuon niini. Mahimong mas maamumahan kita pinaagi sa pagpamalandong sa pipila sa mga pulong, magtugot sa Espiritu Santo sa paghimo niini nila nga mga bahandi kanato, kaysa paspas ug taphaw nga pagpalabay lamang sa tibuok mga kapitulo sa kasulatan. (“Feed My Lambs,” Ensign, Nov. 1997, 84)

Unsa kaha kon naglisod ko sa pag-concentrate dihang mamalandong ko?

Gipakigbahin ni Elder Scott D. Whiting sa Seventy ang iyang hunahuna bahin sa pagpamalandong.

Gikan sa akong kasinatian, nakat-onan nako nga aktibong proseso ang pagpamalandong nga nagkinahanglan og disiplina, pagpunting, ug paglahutay. … Nagkinahanglan kini og praktis ug pailob, pero personal nakong mapamatud-an nga ang pagpamalandong moresulta sa pagpadayag. (“The Power of Pondering,” [debosyonal sa Ensign College, Nob. 7, 2017], ensign.edu)

Dugang nga mga Kalihokan sa Pagkat-on

Laing paagi sa pagsugod

Imbes magdrowing og mga stick nga tawo sa sinugdanan sa klase, ikonsiderar ang paggamit sa mosunod nga senaryo.

Nahibaloan ni Isabel nga kada adlaw magbasa sa mga kasulatan ang iyang amiga nga si Clara. Dihang gipangutana ni Isabel kon ngano, miingon si Clara nga tungod ni kay mobati siya og kalinaw ug direksiyon gikan sa Dios diha sa iyang kinabuhi. Nakuryoso pag-ayo niini si Isabel mao nga sa dili pa siya matulog anang gabhiona, nakita niya ang Biblia sa iyang balay, giablihan kini, ug misugod sa pagbasa. Nasagmuyo siya nga wala siyay sama nga kasinatian sa iyang higala.

• Ngano kaha, sa inyong hunahuna nga si Isabel walay sama nga kasinatian nga nasinati ni Clara?

• Unsay inyong itambag ni Isabel?

Ang espirituhanong mga butang dili mapugos

Aron tabangan ang mga estudyante nga masabtan ang kaimportante sa paghimo og usa ka dapit diin matudloan kita sa Espiritu Santo, ikonsiderar ang pagdala og liso diha sa klase. Human mabasa ang pamahayag ni Elder Stevenson, ibutang ang liso diha sa lamesa. Pwede nimong pangutan-on ang mga estudyante kon kaya nilang patuboon ang liso karon dayon. Ikonsiderar ang pagpangutana sa mosunod:

• Unsaon nimo pag-ugmad og usa ka dapit aron motubo ang usa ka liso?

• Sa unsang paagi kini may kalabotan sa pagdapit sa Espiritu Santo diha sa atong pagtuon sa kasulatan?

Pahinumdomi ang mga estudyante nga importante ang atong tinguha sa Espiritu Santo aron giyahan ang atong pagtuon sa kasulatan. Pwede nato Siyang dapiton sa atong pagtuon sa kasulatan pinaagi sa paghimo og usa ka dapit diin makapuyo Siya.

Kalihokan sa pagpraktis sa pagpamalandong

Human itudlo ang seksiyon nga “Pamalandongi ang mga kasulatan”, pwede nimong ipakita ang mosunod nga upat ka punto nga instruksiyon gikan sa pamahayag ni Elder Christofferson:

1. Pagbasa og pipila ka bersikulo ug hunong aron pamalandongan ang inyong gibasa.

2. Mainampingong mobasa sa mga bersikulo pag-usab.

3. Pag-ampo alang sa pagsabot ug isukna ang nahunahunaang mga pangutana.

4. Paghulat og mga hunahuna, mga ideya, o mga impresyon, ug dayon isulat kini aron dili nimo ni malimtan ug pagkat-on og dugang.

Dapita ang mga estudyante nga mogahin og duha hangtod lima ka minuto (depende sa nahibiling oras) sa pagbasa ug pagpamalandong sa Isaias 55:1–3, 8–11 o sa usa ka tudling sa kasulatan nga imong gipili. Dasiga ang mga estudyante nga mogahin og panahon samtang nagtuon ug dili mobati nga kinahanglan humanon ang tanang bersikulo.

Pwede nimong hangyoon ang mga estudyante nga ipakigbahin ang ilang giganahan bahin sa pagbasa sa mga kasulatan sa ingon niini nga paagi o unsa nga mga hagit ang ilang giatubang.